2007 年 3 月 28 日 星期三 【微雨】

Title：科大書展

　　今朝晨早九點半就要去到科大集合，因為個度搞書展，平時九點三先起身，依家九點半就要到西貢，真係有 D 難度，於是 "去科大要做足準備" ，但結果失左個預算：

1) 六點九起身，諗住七點半出門口，諗住預兩個鐘去（因為要去鑽石山轉車）．上到巴士見手錶 7 點 50 分仲係大圍，心情突然緊張起來，好驚遲到，結果去到鑽石山先 8 點鐘．而去到巴士站等左一陣又有車開，去到科大只係 8 點 3X 分，連科大書店都未開．跟住坐左陣，去 Toilet ，再去銀行打埋簿同過數，9 點鐘開門就入去參觀下，有以下驚人發現：


畢業版麥嘜+麥兜

2) 諗住個書展得我同另一位來自星光既外援---阿傑一齊 Handle 個書展，一來怕吹風，二來科大咁 "隔涉" ，實無乜人去，怕悶到飛起．結果我地被安排係一個有玻璃頂既大堂，雖然唔駛食西北風，但係就有太陽晒，亦因為無風之餘又無冷氣，都幾熱下．另外因為先前怕悶，諗住帶部 NDS 去以防不時之需，不過諗諗下返工打機有 D 過份，所以行過鑽石山地鐵站既時候，專登拎份報紙去睇．結果雖然係無野做，但係礙於有其他 Part-time 關係，只係好乖咁企係度看檔．不過真係無野做，所以同阿傑一路傾傾傾，九成圍繞工作，一成圍繞 NDS Games ，過左好 Hea 既一日．

　　收完檔之後，企係度等齊人既時候，突然科大既店長突然走埋黎同我講野："阿匯，你係見習黎個呵??" 突然間有 D 驚，驚唔咪因為佢只我叫咩名，因為一開始就介紹左，而係份名單應該無寫低我地既職位，於是有 D 驚佢點解會知！唔通我地幾個 Trainee 既成績評核，除左四大店長之外，連其他店長都會知??

>>March 29, 2007 at 1:01:18 PM GMT+8

2007 年 3 月 23 日 星期五 【炎熱】

Title：向未來出發

心情低落中！！

未來未如想像中平坦，要走平坦的路，也許要等待奇蹟出現！

真係不得不借用 Stephy "藍鞋子" 既一段歌詞：

如童話般歡喜
是太多心愛最後亦能如
玻璃故事精美
決定等你　期待一年
如若有天發現能　藍鞋稱身
能否想起我　能否親親我更多

今朝一返工就同沙田既 Ling 姐講出我既擔憂，亦得到一個好中肯又坦白既回應，係時候準備面對現實喇！！

>>March 29, 2007 at 12:30:03 PM GMT+8

2007 年 3 月 22 日 星期四 【炎熱】

Title：出去食 Lunch

　　今日雖然有帶飯，但係咁岩同事問我出唔出去食飯，我又竟然欣然想去．呢樣係去沙田之前都未諗過，因為諗住 "孤獨終老" ．但係發現我個 Log 食飯組合 (簡稱第一班) 既同事，全部都好好傾，慢慢連我由開始唔講野，都變到依家食飯都多左野講．今日去左希爾頓既德興食飯，結果全程超過六成既對話，都係圍繞城中熱話 --- 股票，突然成檯變左股票專家！~~

>>March 24, 2007 at 2:41:49 PM GMT+8

2007 年 3 月 20 日 星期二 【炎熱】

Title：小屋搬大屋

　　由於春銷已經完畢，本來借咗去擺特價書嘅架，終於都還番俾英文部．之前塞到 “密質質” 嘅電腦書可以 “細屋搬大屋” ，由兩個半書架變成三個書架．今日我大半日紀任務就係同 D 電腦書搬屋，等佢地住得舒服 D ．（不過舒服還舒服，唔好係度住咁耐，如果唔咪我地就糟殃 lu ！！）

　　既然幫得佢地搬屋，就順手將 D 亂糟糟既書分門別類．係分緊既時候，腦海中不停浮現一句說話，就係 "書到用時方恨少" ．什麼 Database、PHP、C##、C++、Access... 似乎似曾相識，早知當年上 J.Wan 堂既時候唔好成日恰眼訓，或者會對佢地認識多 D ．不過亦都慶幸當時未訓著，起碼應付到呢堆書，將佢地分晒類！之後同事就將 D IELTS、GMAT...既書搬到空左既架，我就繼續執埋Science同埋Engineering既架，咁就無左大半日 lu ！

>>March 24, 2007 at 2:16:22 PM GMT+8

2007 年 3 月 18 日 星期日 【颳風】

Title：精選遊覽團

新歌：鄧麗欣 --- 不速之約
　　　新書：帶銀公主 --- 50個女生想男生知道的心事
　　　圖書：Wendy Northcutt --- The Darwin Awards 4: Intelligent Design

>>March 19, 2007 at 6:10:09 PM GMT+8

2007 年 3 月 17 日 星期六 【颳風】

Title：長駐收銀處 "外圍"

　　今日係星期日，平時既星期日已經好多人，仲要加上係春銷既最後一日，多人到全部同事都未停過手．收銀處亦都開晒四部收銀機，再加上七八位同事係入面收銀同入膠袋．由於我地收銀處既設計係 L 字型，排緊隊既讀者通常望唔到尾個兩部收銀機，而個兩部機既收銀同事經常要 "嗌救命" 咁叫 D 人行過去，所以就要有位同事企係轉角位幫手 "分流" ．而我就有幾日負責左 "分流" 呢個責任，係同事忙於收銀既時候，排隊既人龍係晏晝四五點，竟然包圍文具部後場既四分之三，我企係收銀處度見到另一邊角凸左龍尾出黎，真係蔚為奇觀！

　　到左食飯既時候，同事都係不約而同講 "好攰" 同埋 "好肚餓" （因為 D 體力都消耗得七七八八），攰到坐低左唔想再企係身．席間玲兒讚我分流分得好，好開心　^.^

>>March 19, 2007 at 5:47:02 PM GMT+8

2007 年 3 月 13 日 星期二 【炎熱】

Title："客多" 定 "賊多" ??

　　 沙商既偷竊情況仍然嚴重，繼琴日有成行流行小說被拐帶之後，今日到武俠小說糟秧．只可惜武俠小說本身不懂武功，只能任人魚肉．結果，今日突然間有一班警察入黎調查，搞到 D 讀者都唔知做咩事，真係 "因小失大" ！！

　　亦因為呢個原因，門口旁邊既小 Counter 就要長駐同事係度 "捉賊" ．當個門口既防盜響，就要截住 D 人，但係呢個作用都唔咪好大，一來真係賊既話，叫佢都唔會企係度；二來既然做得賊，就唔會拎住本書咁低 B 咁行出去，一定係有備而來．

　　而最奇怪既就係當門口有同事企係度，個防盜可以半個鐘頭都唔響，但係一行開幾步，唔夠半分鐘就會響，仲要一分鐘響兩三次．咁究竟我地門市入面既 "顧客" ，究竟係 "客" 多定係 "賊" 多 ??

>>March 19, 2007 at 6:02:28 PM GMT+8

2007 年 3 月 12 日 星期一 【炎熱】

Title：長駐收銀處的一天

　　今日由於英文部四位同事都返齊，所以得閒番少少，於是今日基本上八成時間都係係收銀處度過，幫手入下膠袋．由於係平日，所以都幾靜下，萬料不到身旁的收銀姐姐阿珊，竟然話："太悶！恰眼訓！" 而我只係暗地慶幸無咩人黎，唔駛做野，反過來覺得佢有 D "自虐" ，應該跟佢學習下！

　　收工係後場見到有件爛貨，但由於加菲貓&牠的朋友實在太得意，忍唔住要留影一幅：



　　ps. 羅小姐晨早岩岩開門就叫左我去暢銷檯教我野，看來仙姐很相信 "一早起身記性好" ！

>>March 13, 2007 at 4:28:16 PM GMT+8

2007 年 3 月 10 日 星期六 【陰】

Title：狂歡 "後" 群症

　　一系列既唔舒服陸續出現！！

　　琴日：
　　經過 "極速大風車" 既蹂躪，出現腦充血，繼而頭痛．正要好少少既時候， "飛天椅" 令病情再度急轉直下！

　　今日：
　　除 "極速大風車" 外， "老鼠也瘋狂" 原來都係一個 "手尾長" 既 "隱疾" ，令人頸部出現疲勞感覺．

　　另外， "牛奶樽" 同 "鐵鈴" 令人的手部關節出現疲勞至勞損既後果，看來也要一樽 "七海健胳" 旁身好了！

>>March 11, 2007 at 2:50:07 PM GMT+8

2007 年 3 月 9 日 星期五 【陰】

Title：幻彩詠香江

　　去完環球嘉年華之後，就返左去星光一陣．之後就去海旁搵番媽咪，因為嫲嫲、姑媽同表姐係鄉下落左黎玩，所以佢地就去海旁遊覽．跟住影左陣相，就上去天橋坐定定等睇 "幻彩詠香江" ．第一次睇 "幻彩詠香江" ，覺得幾得意，不過其實最靚既始終係香港既夜境，而唔咪個幾支激光燈．與其係諗咁多 "花臣" 野，倒不如實實際際諗下點樣搞好空氣好過！



>>March 13, 2007 at 4:10:54 PM GMT+8