2007 年 9 月 25 日 星期二 【晴】

Title：完美的一天 之 中秋節翌日

　　今日本來諗住返鄉下，前兩日又話唔駛，於是捉埋本來諗住係屋企 Hea 既美子去街街．但係由於琴晚成五點先訓，十一點先起身，仲要係俾阿媽整醒，十萬個慘！

　　今朝頂唔住，喪咳，終於要去睇醫生，20 蚊一次，好平囉！

　　之後約左美子係火車站等，去左旺角，行落去始創食 "北海道活壽司" ．今次 D 壽司好明顯係切合番香港人既口味， D 飯多 D ，又無加芥辣，好食好多 lu ．食飽飽之後就去左朗豪坊，睇左陣波衫．跟住行左去西洋菜街個邊，上左去兩間樓上書店， D 書好齊呢，點解我地成日都缺貨?? 係人地賣唔去，定係我地無門路補到貨呢??

　　跟住又去左第二間舖睇波衫（點解會去睇波衫呢??），之後就去左潮流特區，諗住買 D 野，不過都係得個睇字．跟住行左落永安，個度裝緊修，少左好多野睇，不過美美都仲係好鍾意睇食物盒呢！然後就行左落去尖沙咀，諗下食咩，因為我夠鐘食藥 =P 輾轉下去左沙嗲王食飯，原來美子無去過呢，當然要推介 "必食" 既 "白咖哩豬扒飯" ，好味！跟住又有龍蝦湯、蒜蓉包同埋脆蝦棒，美美就話遲 D 要帶埋玲兒同恩慧姐姐去喎．

　　之後行左落海旁，本來諗住行去紅墈既，不過去到海旁，見到好多人係度，突然醒起有幻彩詠香江，而美美又未睇過，所以我地就坐係海旁等左半個鐘．跟住就見到對面海 D 建築物開始閃下閃下，而最激烈都係閃下閃下，美美就話 "好無聊" ，但係身旁既遊客就自得其樂，好欣賞咁樣，睇黎呢個 "幻彩詠香江" 都係屬於遊客多 D ！睇完就坐多陣，吹海風，秋天好舒服呢！

　　夜晚同美美搭巴士返大埔，希望搭多 D 車無咁容易暈車浪啦！

　　ps. 今日好開心呢！ ^o^

>>September 27, 2007 at 4:57:31 PM GMT+8

2007 年 9 月 24 日 星期一 【乍寒還暖】

Title：中秋節

　　今日係中秋節，不過仍然要返工．成日都無咩人，本來諗住應該會好多人，但係都係四五點之後先忙少少，而所謂既 "忙" 都比平時差天共地．晏晝同左阿健、恩慧姐姐同埋阿珊去左瀝源村食常餐，20 蚊一份餐，都算 OK ．只係呢間茶餐廳實在係太過 "古法" ，落單既叔叔全靠記憶落單，寫都唔駛寫，但結果斷斷續續叫左五次先黎得齊 D 麵，再叫五次先黎得齊 D 奄列．再叫多三次先黎得齊 D 飲品 >.<

　　之後返到去，繼續悶到飛起，四五點幫兩邊收銀機數信用卡 + EPS 既收據，再數埋書券，都係未收得工，慘！！夜晚大頭目早走，我地好開心，因為代表有得準時收工．之後六點五十分咁上下去左後場講 "收工辭" ，好似通常都係恩慧姐姐講既，但係今日佢俾左我玩 ^o^ 跟住阿健話出面有 D 外國人，聽唔明廣東話，所以我即刻譯左做英文，實行中英文雙語廣播，幸好 D 外國人都自己走，證明佢地都聽得明我 D 英文啦，哈哈！

　　收工各自返屋企做節，今晚我屋企做節既餸都幾 "經典" ：有半隻雞、三文魚刺身、烚白菜同埋炒荷蘭豆．跟住就搭火車去大埔，係巴士站等美子，然後係新達廣場行左個圈，之後就行去恩慧姐姐既屋企．

　　今晚本來諗住出去賞月既，不過成晚都好多雲，睇唔到月亮．結果就轉為室內活動，玩 Wii 同埋打麻雀．開頭我坐低打既，不過就勁輸錢，之後叫左美子坐低打．原來美子打牌都係高手黎架，仲好聰明呢（講真架），同平時傻傻地既美美好唔同呢！之後美美手風好順呢，我就坐係隔離睇，最後贏左 51 蚊，勁勁！

　　打完都成三點鐘，恩慧姐姐第二日要返工，所以我地都要走先，唔好阻佢地訓覺．我同美子就行返屋企，送完佢之後就搭 N271 返沙田，最後返到屋企都五點 lu ，好眼訓！

>>September 27, 2007 at 4:23:19 PM GMT+8

2007 年 9 月 23 日 星期日 【乍寒還暖】

Title：英文部大傷風中

　　今日係星期一，成日都幾靜．青媽媽既傷風繼續嚴重，而我就繼續 "陰 D 陰 D " 咁傷風中．大頭目終於肯同英文部講野 lu ，暫時鬆左少少，希望最壞既時間已經過左啦！

　　今日朝早去左爬左一陣 "膠袋山" ，之後就執架，執左 Science 、Social Science 同 Engineering 三個架，聽起上黎好似好多，但係其實 D 書都幾少！青媽媽話開頭跟住呢 D 書先，少少地記住先，遲下就記多 D ，最終要將 B45 交俾我喎，我就話：" 嘩！我何德何能呢? " 睇黎到青媽媽退休都未交得晒俾我 =P

　　晏晝去攞左裡面物流既貨出黎拆，原來琴日點解 "見單唔見貨" ，同今日後場 "見貨唔見單" 兩件事，原來係同一件事．跟住有時見收銀處忙少少，就去幫下手，好似有幾日無去過收銀處 lu ，有 D 陌生呢！

　　夜晚青媽媽病情有惡化趨勢，仲要戴口罩呢！但係戴都無用，因為佢要咳，仲咳到嘔咁滯．而正當佢要拎紙巾既時候，唔小心咳左 D 痰出黎，整左落去個櫃筒度．由於青媽媽繼續好慘咁咳緊，我就自己攞紙巾抹．雖然有 D 核突，但係突然覺得當媽咪第時老左既時候，自己都一定會咁樣幫手清潔，看來青媽媽真係成為左我既 "媽媽" lu ！

　　之後冷不提防個膠袋都有口水，自己隻手都沾染左少少，於是都係清潔完之後，去左 Toilet 洗左兩次手．跟住就等放工，幫美子清埋機就收工返屋企 lu ！

>>September 24, 2007 at 4:17:35 PM GMT+8

2007 年 9 月 22 日 星期六 【乍寒還暖】

Title：撞邪

　　今日係星期日，但係都唔算好忙，收銀處就忙得多．不過我無去幫手，愛莫能助，希望各位收銀姐姐會原諒小弟．

　　沙商既邪事越來越多，唔計先前英文部既 "彌天大錯" 之外，同事之間既關係都開始有問題．竟然連一個月餅都可以令人面阻阻，一個月餅都可以發生咁多事，一個食物盒都可以令人之間既互信消失，難怪 Ivan 聽到呢件事之後都話 "黐筋" ，而我當然繼續講我既 "農曆八月" 之說啦！

　　今晚又有美美煮既飯做晚餐 lu ，好好味！



>>September 23, 2007 at 2:35:20 PM GMT+8

2007 年 9 月 21 日 星期五 【晴】

Title：繼續低潮中 Episode 2

　　今朝返工對腳有 D 痛，可能係琴日游水太勞累 lu ．今朝本來去搬字典架，不過有人話執緊，仲 "暗示" 唔駛我幫手，咁我都好 "聽話" 返去英文部 Counter 駐守．

　　晏晝放假既美美黎搵我食飯，係全日最開心既事！本來我地諗住食小籠包既，但係太多人 lu ，所以去左 Spaghetti House 食野．叫左兩個午餐，原來好大碟既，食完一碟都飽飽地，好彩最尾都食得晒，唔駛食剩 ^o^

　　之後返番地獄沙商，見到收銀處都幾忙，但係又唔幫得手，大頭目既說話不停係腦海縈繞住．點解我咁主動幫收銀處，又成日係 Counter 駐守，幫人 Check 書，到頭來一句讚賞都無，仲要俾人嫌我唔做野，好唔開心，好唔開心！！始終同英文部既遭遇一樣，乜都要做，但係做錯少少就要俾人打到落谷底！

　　整個晏晝係度搞電腦書架，又將 D 電腦書分類一次，但係發現之後都係會亂，因為同事們都唔知 D Software 邊 D 打邊 D ，當然包括我自己在內，連普通既電腦知識都無，點解會去分電腦書??

　　夜晚晚餐係雪糕月餅一大個，走左去後巷同 Crystal 傾電話，Crystal 同 Yuki 要調店，等人地岩岩先適應就要調走，呢 D 就係 "商務文化" ?? 百思不得其解！

　　今晚九點後大部份時間走左去文具部同玲兒傾計，陷入 "無王管" 狀態！連收銀機都無幫手清，因為傾完計佢地都差 D 清晒機 lu ，當休息一日啦！

　　返屋企打左俾 "長頸鹿美美" ，傾左成程車，之後係樓下又企左成個鐘，最尾傾左成個鐘電話呢！

>>September 23, 2007 at 3:34:30 PM GMT+8

2007 年 9 月 20 日 星期四 【晴】

Title：石澳游水日

　　今日同美子、玲兒同阿然約左係大圍等，之後去左食晏晝．食完就搭火車轉地鐵，去到觀塘接埋 Kitty + Kitty 男朋友，跟住我地就去左筲箕灣．再轉紅色小巴去石澳，真係幾轉折呢！

　　去到大家就換泳衣，之後輪住落水玩．今日都幾大浪，加上玲兒同美子都唔識游水，所以除左係淺水玩之外，都係算浸水多．好耐無去過海灘，唔記得左海水既味道，好鹹呢 >.<

　　之後女仔們坐係岸上傾計，我就自己落水游，始終都係驚游下游下唔到地，所以都唔咪咁放膽游．游游下 D 浪越來越大，海灘仲掛埋紅旗添，原來大浪係上黎真係會將個人扯出去既，都幾驚，好彩仲到地，可以企係度．

　　跟住就坐左係岸邊，俾浪衝埋黎既感覺... 無咩太大感覺！坐左一陣就走 lu ！

　　然後沖身換衫，坐番紅色小巴出去筲箕灣轉地鐵，Kitty + Kitty 男朋友係太古落車，我地四個就繼續坐到去銅鑼灣，之後行去灣仔 Neway 唱 K．好耐無唱過 K 喇 ，我喉嚨痛 + 傷風，狀態唔好；玲兒就繼續係 "K后" ，好聽呢；阿然就有一把 "深情" 既聲線；而今晚美子都有唱歌，算係第一次聽到佢唱歌呢，呵呵！今晚我唱左幾首古巨基既歌，因為美子鍾意古巨基，希望無唱衰佢 D 歌啦 ^O^ 但係玲兒同美子都話 "離開以後" 好聽喎，不過只係限於首歌好聽囉！

　　九點十五分就 "準時" 俾佢地 "趕" 出 K 房，同玲兒 + 阿然分別，佢地要行銅鑼灣．我同美子後行去搭船，之後就行去搭巴士返大埔，美子算係冒住 "生命危險" 搭巴士呢！最後送左美美返屋企，我都搭車返屋企 lu ！

　　

>>September 23, 2007 at 3:09:31 PM GMT+8

2007 年 9 月 19 日 星期三 【晴】

Title：繼續低潮中

　　英文部低潮繼續持續，被喻為 "計時炸彈" 既英文書調價終於降臨，基本上英國黎既書都要調價，逐本逐本去個架搵番本書出黎，困難極高！而大頭目今朝早會既語氣，潛台詞就係話："你地（英文部）今次醒醒定定，唔咪實死硬！" 絕對係 "屋漏兼逢連夜雨" 既經典例子！

　　而當黑起上黎，D 衰野總會接踵而來，所謂 "福無重至，禍不單行" ．今日遇到個傻佬，佢買本公開試既書問我地有無折，當然要大專書先有折．跟住佢哦左一大輪，又話我地個架貼住有折（都話大專書先有折囉）、又話我地 D 大專書 Label 點解係標原價... 跟住我無理佢，行左去上書，因為生平最怕麻麻煩煩既人同埋黐線佬 / 婆．點知佢返黎就話我唔理佢，又話要搵經理，又要投訴我．

　　當時大頭目唔係度，我叫佢夜 D 打電話黎，唔知佢之後有無打黎，總之就係慘！

　　夜晚有美美煮既晚餐，仲幫我叮埋添，抵錫 ^o^



>>September 21, 2007 at 3:16:21 AM GMT+8

2007 年 9 月 18 日 星期二 【晴】

Title：我病了

　　今朝醒左就發現個喉嚨好痛，琴晚半夜仲打左一個 "屬於傷風既乞嗤" ，就知道自己病左．本來諗住唔返工，反正返到去又情緒低落，不過為左勤工無辦法．

　　於是一返到公司就搵 "必理痛醫生" ．之後就早會，早會上 "大頭目" 話無人理 "大頭目既頭目" 意見，尤其係字典架喎．今日一開工就去後場搵貨，搵到成大車貨，一野推晒去英文部 Counter 拆， D 多人搵既書終於都返喇，唔駛再負債累累．

　　跟住就包書，本來唔想包，但係青媽媽話要包，唔包又俾 D 客嫌三嫌四；但係包又俾大頭目話，真係有 D 壓力！但係始終要有人包，唔理得咁多，結果 "好有壓力" 之下，包下又有上下書咁．原來上書係好花氣力既，一去上書個日就會肚餓．

　　晏晝食完飯繼續包書，又拎多少少貨出黎拆，跟住就企下 Counter 應付下 D 讀者．臨食飯前同左 Ivan 去字典架研究，執晒 D Oxford、Langencheidt 出黎，點知原來 Berlitz 都要抽起，執左成半個架出黎，結果個架淨番 Tuttle 、Collins 、Collins 同埋 Collins ，仲有 D 連我都唔知賣緊既不知名出版社，總之唔咪上述個三間就得啦！之後我地收埋 D 字典落櫃筒， Ivan 就話： "不如我地係個櫃筒出面寫住內有正（= 筍）貨，等佢地自己拉櫃筒搵啦！" 因為反正擺入櫃筒都唔會有人搵，唯有等機會低價散貨，慘！！

　　夜晚大頭目出左去巡舖，壓力消失晒，心情指數提升番．之後食飯時間去左海皇食粥，叫左牛肉粥同埋鹹肉粽，雖然係好好味，但係都要成 27 蚊，好貴呢！食完飯繼續執字典架，可以講話係 "回應訴求" ：無 Oxford 、無 Langenchidt 、無 Berlitz ，仲要好多 Face Out ！

　　夜晚無驚無險就等到收工，之後就返屋企 lu ！

　　ps. 謝謝美美的 "內線問候" 呢！

>>September 19, 2007 at 5:18:23 PM GMT+8

2007 年 9 月 17 日 星期一 【晴】

Title：一生為奴

　　由踏入沙商開始，全日精神晃忽．加上個頭痛，好想快 D 放假，唔想返工！

　　英文部同事都好似俾一陣 "情緒低落" 掩蓋住，睇黎仲要一段時間先可以見番平時好開心既英文部．

　　咁係沙商好開心既我又幾時會返黎呢...

>>September 18, 2007 at 4:13:03 PM GMT+8

2007 年 9 月 16 日 星期日 【晴】

Title：Very Very Down Day

　　今朝一早八點幾就返到公司，只係俾負責清潔既李姑娘遲左 D ，之後就要預備早會同埋講書既野，好趕呢！九點三就開始主管會，要受死 lu ，但係大頭目無鬧我地，只係對英文部好冷淡，仲慘！但係最慘還算係下半場（即係開完早會之後）既會，大頭目將我負責既架俾番之前個個人，仲 "訓示" 我要多 D 去執架添！

　　之後成日都好 Down ，晏晝同夜晚都無胃口食野，好似都無試過咁無胃口，結果食飯時間大部份時間都訓覺，好眼訓 + 精神欠佳，好難先捱到收工．收工同美子 + 玲兒去行左一陣，等到阿然放工出黎，我同美子就搭火車返大埔，去明將食壽司，心情好少少．今晚美子眼訓，所以同佢搭巴士返屋企，無行路 lu ！

>>September 18, 2007 at 3:29:21 PM GMT+8