2007 年 6 月 5 日 星期二 【綿綿細雨】

Title：今日事件簿

1) 開閘後坐於後場 Ivan 的 "寶座" 上，花左個多小時完成未完的 "銷售報告" ．這份 "嘔心瀝血" 的銷售報告，還是小弟於商務的第一次．難度在於今個月只有今個月既數字，以往既月份會提供對上一個月同期既數字做參考，但由於上年五月沙商正值裝修，所以無得對比．所以所謂既報告，只係由一 D 不能實現既空想同埋杞人憂天既估計組成．

2) 當收銀處繁忙既時候去幫手，幫自己做左一陣而覺得條人龍有排先散既時候，突然抬頭發現人龍已經消失；而當無咩人既時候，自己以為做得好快，諗住休息下，抬頭發現人龍已經去到旅遊書．

3) 英文書種小組第一次會議，竟安排係 6 月 6 日下午 6 時於尖商舉行，面對這個魔鬼數字 "666" ，不敢為 Ivan 抹一把汗．(如果不知道甚麼是魔鬼數字，可以以飛行棋既 "三條6 ，返大陸" 既 Concept 去理解，相信效果一樣) 而 Ivan 竟然可以係 8 點 10 分返到沙田，究竟個會開左幾耐呢? 究竟係極速開完會定係時空轉移呢? ... 呢 D 都係...謎...

>>June 6, 2007 at 3:52:00 PM GMT+8

2007 年 6 月 1 日 星期五 【晴】

Title：又打仗了

　　來到一年之中既第二場仗，亦係小弟黎左商務既第三場仗 --- 匯豐促銷，全場正價圖書八折優惠，個別圖書低至五折，只限匯豐信用卡持卡者...

　　今日係匯豐促銷既第三日，亦係促銷開始後既第一個週末．如果平時星期六日既沙商叫做人山人海，今日既環境可以用波濤洶湧黎形容．整個晏晝都留係收銀處幫手入膠袋，只可惜小弟既收銀功夫還未到家，否則會開機幫手 >.<

　　不停團團轉入膠袋、跟信用卡，已經忘到有 D 頭痛，但人龍依然未有縮短．即使岩岩清晒，不消 30 秒又重現人龍，而經過觀察之後，發現唔咪碌卡既程序繁複，而係部卡機總係間唔中等一兩分鐘先處理到一張卡．每當見到人龍到達旅遊書開始向兒童部進發，心情都會緊張起來，還是身旁的阿珊見慣大場面，繼續 "著火" 地繼續掃 Barcode 、篤收銀機同收錢．如果換轉係小弟收錢，應該未到下午三點，早已不勝負荷，成為 "商務自焚之謎" 了！

>>June 3, 2007 at 5:01:23 PM GMT+8

2007 年 5 月 31 日 星期四 【綿綿細雨】

Title：期待開學中

　　今日食飯時鼓起勇氣，向羅小姐 "申請" 有時間去中文部實習一下，最快都要暑假之後，看來小弟都要同學生哥一樣 9 月先開學 lu !!~

>>June 1, 2007 at 3:42:23 PM GMT+8

2007 年 5 月 28 日 星期一 【晴】

Title：天清氣朗

　　今朝一朝早落左街，陽光普照，又炎熱．不過望上天空，比平時唔同既，就係空氣異常好，一 D 朦查查既感覺都無．

　　已經好耐無試過，心想："如果日日都係咁，真係成年都咁熱，流多幾滴汗都無所謂！"

>>May 30, 2007 at 4:26:50 PM GMT+8

2007 年 5 月 27 日 星期日 【晴】

Title：反思

　　今朝由於要連開兩會，所以九點鐘就返到沙商．平時九點鐘仲係訓緊覺，所以特別眼訓．一返到除左見到平時八點幾現身既李姑娘外，仲有阿華，比我更加早已經係公司執緊架．之後我問佢："點解咁早返黎既? " 之後阿華就話： "琴日放完假嘛，早 D 返黎執返好個架．" 入到後場第一時間開電腦， Prepare 開早會既 Material ，Check Email ，發現無咩特別野好講．跟住發現報告板上面既通告，就決定講下 "注意事項" ．

　　然後九點九，就輪到開主管會．雖然小弟還是一個卑微既店務員，出席主管會還算係 "高攀" 一點，但係開主管會還是獲益良多，因為吸收到好多 Management Skill ，同埋諗到一班 Manager 既諗法，特別係諗野要全面 D ，要有自己既諗法，又要吸收人地既建議，做事才會 Balance ．

　　每次開主管會，對自己都有要求，要有建設性，縱使未必得到接納，都總算有觀察過公司既運作．要睇到大方向，相信小弟還未到家，睇黎睇去都係 D 細微細眼既野．上次係幫兒童部爭取一個電話，雖然到依家都仲係未有，但係都 Point-out 左一個問題．今次係想幫 Davis 減少去大圍既次數，因為佢依家得一半時間留係沙田，一來辛苦，二來對工作既專注亦都減少，一個人處理兩間書店既英文書應該會好吃力，而我覺得 Davis 留多 D 沙田，會對我地英文部既書種優化有幫助．結果亦喜出望外，也要感謝羅小姐既細微觀察！

　　之後講到某店既英文書銷售有進步，原來店長既出身對銷售既種類都有咁直接既關係．先前的店長主要熟悉中文書，所以英文書的銷售不很理想；但更換一位熟悉英文書既店長之後，英文書既銷售就大有改善．我一邊聽，一邊為之汗顏，因為一直只係負責英文書，對中文書甚至文具部都算係一竅不通．假使將來有望更上一層，亦可能只著重英文書，造成不平衡，所以如果有時間，都要過去其他部門偷師．

　　"三個月之約" 已經差唔多過左一半喇，到底我地四個既應許會唔會實現呢? 成日都諗自己會唔會勝任呢個職位，要學識多 D 野、諗野要成熟一點、做野要少錯一點... 將來唔要做一個 "沽名釣譽" 既主管，要做一個幫得手、令人信賴既主管．努力！

>>May 30, 2007 at 4:18:40 PM GMT+8

2007 年 5 月 25 日 星期五 【陰】

Title：牛皮燈籠??

　　今日有幸被安排去一個講座，都係琴日夜晚先收到羅小姐既通知．今朝諗住要去北角咁遠，專登六點幾起身，本來約九點，點知八點半就到左．由於個講座要我地睇定一本書去討論，所以企左係地鐵站睇埋本買左好耐但係未睇既加菲貓．睇完之後，門統既 Jessica 就黎到，跟住我地上左去北角既寫字樓．原來我地兩個都係琴日先知要去呢個 Talk ，而且完全唔知個 Talk 關於 D 咩．

　　之後上到去，望下個簽到表，原來好多都係 "教圖" 編輯部既同事，而有 D 係推廣部，而得小弟一位係門市既同事．之後有位鬍鬚叔叔坐係講 "檯" ，就係今次既講者，係一位 Designer ．跟住佢就將今日既 Schedule ，內容都係圍繞書本既設計，不期然腦海浮起："噢！今次實悶死都得！"

　　不過好彩之後，鬍鬚叔叔所講既野都幾有趣，而且佢又經常邀請 D 同事發言，D 同事又肯講野，仲講左好多搞笑既經驗，所以氣氛輕鬆之餘，又獲益良多，知道左好多出版既野．依家先知，原來佢地出每本書都會花咁多時間同資源去設計．

　　全日最有得著既就係一個叫 "先 Empty 而後 Full " 既 Concept ，意思係聽別人既觀點之前，而先 Empty 自己既想法，吸收人地既意見，才能令自己有所得著 (Full) ，團隊既決定才能更有創意．覺得幾有意思，因為眼見好多地位高或者經驗豐富既人，每當聽到創新既意見之後，都會覺得 "唔掂" ．講到底都係因為覺得舊既一套雖然無咩驚喜，但係點都唔會有太大差池，所以就無空間去嘗試新既 Idea ．而更加恐怖既係，一班下屬或經驗較淺既人，開始時滿有熱誠，但所有創見都被人 Ban ，久而久之佢地既工作方式就被上一輩定型，一代一代咁相傳落去，變得毫無進步．

>>May 29, 2007 at 3:38:20 PM GMT+8

2007 年 5 月 23 日 星期三 【乍寒還暖】

Title：矛盾的藝術

上次揭開報紙，內容講老闆一 D 矛盾既命令，令下屬無所適從．印象最深刻，就係話老闆說： "這麼簡單的東西，不需要事無大小都徵求我的意見，你沒有判斷力嗎? " 但轉過頭又會說： "你為什麼事事都自把自為，不問過我才下決定??"

如此的命令還有很多，老闆說： "處事要獨立，工作時不要聚集在一起！"，但同時又說： "工作地方不只你自己一個，要講求 Team Work ！" 而同時又說： "多一點跟同事交流，彼此也會有得著！" 但 "處事獨立" + "不可聚集" ，又怎能做到 "Team Work" + "互相交流" ，難道人類也有 Wi-Fi 嗎??

可是，當你認為係好矛盾既時候，偏偏這些矛盾的老闆都總是很成功，因為下屬太過無所適從：AB也不做，只會被老闆責備 ；所以他們做了 A ，也做了 B ，結果老闆的說話便 "事半功倍" ，這就是矛盾的藝術．

不過要達致這個境界，要有以下兩個條件：
1) 老闆要有一定的威嚴，講完之後要令下屬不敢不從．
2) 下屬要有一定的智慧，要自行調節到 Tangent Point ，否則會失去平衡．

因此，下屬怎樣利用這個矛盾的藝術去裝備好自己??

應用：

1) 辦公室篇

當你埋頭苦幹處理檯頭堆積如山既文件時，老闆突然拎一份文件話好趕，要快 D 起貨．那你應該繼續本身既工作，一來表現你自己做事 "專心一致" ，二來這些趕時間的文件，收件者都會心急如焚，當收到早到的文件，他們都只會第一時間說 "等咁耐至收到" ．反而那些不趕的文件，收件人都無預左早收到，如果佢地早收到，會話： "咩咁早到架，真係有效率" ，這樣反而得到一點掌聲．所以只要確保趕既文件 "準時" 送出，就無需要即刻放低手上既工作去立即處理．

2) 銷售店舖篇

當老闆說那邊貨品被客人整亂左，要快 D 去執好．此時，應該將旁邊比較整齊的貨品，再弄得整齊一點，因為弄得整齊一點，便令客人覺得舒服一點，從而揀都揀得開心 D ．當整完整齊既貨之後，先再整亂既部份，第一：亂左既地方，需要相對長既時間去整理；二來：俾人整亂左 = 有人注意，當 D 貨品亂到某個程度，客人會以為係特賣場，反而會有興趣埋去揀揀．而當有一定既客人聚集，其他既客人都會嘗試埋去趁熱鬧，成為 "市集效應" ，反而有助銷售．

>>May 24, 2007 at 7:41:54 PM GMT+8

2007 年 5 月 20 日 星期日 【乍寒還暖】

Title：第一次講書＠沙商

　　今個月先實行既 "早會講書" ，今日終於輪到小弟．琴晚 "臨急抱佛腳" ，搵到本書介紹，再加埋之前 "早有預謀" 既 "企鵝仔" ，就拼合成今日既講書環節．

　　1) The Darwin Awards 4: Intelligent Design
　　2) Gus & Waldo's Book of Love

　　希望帶出一個輕鬆既 "講書環節" ，令同事唔好覺得有壓力，輕輕鬆鬆咁係早上笑一笑，所謂 "笑一笑，世界更美妙" ，可以做到嗎 ??

>>May 21, 2007 at 5:02:45 PM GMT+8

2007 年 5 月 19 日 星期六 【颱風】

Title：繼續心痛

　　心痛的感覺，是跟你當了十年朋友，還可以這樣想我...

>>May 21, 2007 at 5:22:50 PM GMT+8

2007 年 5 月 19 日 星期六 【颱風】

Title：沉悶的星期日

　　心情繼續低落... 同今日既天氣一樣，久唔久落一陣大雨．

　　沙商今日人流唔似平時既星期日，而小弟則同青媽媽 and Canny 留守英文部 Counter ，悶得發慌，再加少少眼訓，原來無野做同勁多野做都係咁慘．

>>May 21, 2007 at 5:11:11 PM GMT+8