2007 年 9 月 7 日 星期五 【晴】

Title：超爆忙

　　今日主要既工作，都係幫其他分店做生意．點解?? 因為我地都無貨到，唔知英採係咪想等人地學期完先送貨黎?? Check 十本書，十本書都無貨，淨係得兩間大學書店，同銅商 + 尖商先有貨，難怪 Ivan 早已經話沙田係 "邊疆地方" ．

　　夜晚同美子 + 恩慧姐姐去大埔食糖水，食完之後恩慧姐姐就搭的士返屋企，我同美子行番屋企，之後搭車返屋企 lu ．

>>September 10, 2007 at 4:35:51 PM GMT+8

2007 年 9 月 6 日 星期四 【晴】

Title：死亡預告

　　日日都咁忙，又要幫手收錢，又要幫人 Check 書．雖然 Check 十本都無一本有貨，但係有四五個人圍住你既時候，壓力總會有．看來如果日日都係咁忙，過唔過到九月都應該係一個問題．

　　忽發奇想：如果有得停薪留職一個月，一定會揀九月！

　　ps1. 晏晝 "大頭目" 本來陪住阿珊入袋，但係突然望向後面（望住英文部）： "阿匯，我入去做野，你睇住阿珊喇！" 究竟大頭目對小弟既入袋功力有信心，定係收銀功力有信心呢?? 有待查考！

　　ps2. 結果小弟頂左兩班食飯，收左兩個鐘頭錢...

>>September 8, 2007 at 5:34:15 PM GMT+8

2007 年 9 月 5 日 星期三 【陰】

Title：足不出戶

　　今日係 Dayoff ，終於得到休息既機會 lu ，當然要大肆慶祝！今朝起身都唔知幾點，好似諗住出去睇 "交易現場" ，但係電視做緊 "人生馬戲團" ．整個人都 Delay 了嘛?? 之後食左叮叮蝦餃，都幾好味喎！食完就去左打機．

　　之後三點幾先食晏晝，跟住聽聽下收音機就訓覺．訓醒收音機做緊 "萬世巨星" ，有個環節幾得意既，就係播番佢地當年某日既片段，之後估下佢地當年講左 D 咩， Donald 再次發揮其 "冷面笑匠" 既本色，好好笑 ^o^ 之後再去打機，打左一陣就去上網．

　　夜晚翻熱番 D 隔夜餸，同埋炒左腸仔火腿蛋黎食，仲多左一條未熱既腸仔一條．之後睇左陣電視，又睇埋未睇完既小新，夜晚準時係 MSN 出現 lu ！

>>September 7, 2007 at 5:37:29 PM GMT+8

2007 年 9 月 4 日 星期二 【陰】

Title：繼續忙

　　今朝 Ivan 去左德信派書，英文部得番我同 Davis ，再加 Canny ，之後 Davis 去左食飯，得番我留守英文部，好彩 Ivan 今次又係 12 點幾返到黎，好野！

　　晏晝同左恩慧姐姐同阿珊去左 Euro Go Go 食，裡面無位要坐外面．好彩唔咪好曬，不過都係食到出汗，反而著住冷衫既恩慧無汗出，睇黎我真係好大汗 >.<

　　之後好早食完就返去公司，攞左部相機出黎，睇番阿鴻結婚既相．之後恩慧姐姐話同我地影相，我地仲三個一齊影相，不過我太手震，結果擺係個月餅罐上面影．


恩慧姐姐 + 阿珊 + 我

　　出番去又面對不停響既電話，唔駛攞起聽，淨聽響聲都已經想癲．之後又好多人黎搵大專書，最高峰試過有五個人排隊等 Check 書，忙到爆！而最痛苦既就係 Ivan 又要去開 D 咩鬼書種會，點解要揀 D 咁忙既時間開??

　　夜晚 7 點幾就見到 Ivan 返黎，又有番依靠 lu ！今日超累，累到連平時會去清機都唔想清，好想快 D 收工，但係俾班友仔搞遲左成 20 幾分鐘先有得落閘，真係痛苦！之後諗住幫熊貓美美拎野返去，不過佢知我太累，所以唔俾我送．抵錫 ^o^ ，就係喜歡呢個你！

　　返到屋企，終於第一次睇到 "味分高下" ，好笑就係幾好笑，不過見到佢地咁浪費食物，始終唔咪咁好囉！

>>September 6, 2007 at 5:01:27 PM GMT+8

2007 年 9 月 3 日 星期一 【乍寒還暖】

Title：開學喇，點解仲咁多人??

　　今日 Davis 同 Canny 都放假，Ivan 去左沙官書展，所以成朝得我同青媽媽留守英文部．同時後場又有好多貨等著我地拆，幸好經我苦苦哀求下，青媽媽都係推晒 D 貨出黎拆，陪我坐 Counter ．之後我今日朝早，就係度打銷售報告（今朝先記得 =P 但係其實琴晚先收到），幸好 Ivan 佢地 11 點幾就 "凱旋歸來" ．

　　之後打到咁上下就去食飯，食完飯因為熊貓美美今日又收錢，見到好多人，就幫佢入袋．少人 D 既時候，入入下唔記得未打完份報告，即刻去打埋先．打完報告見到好多人排隊，今日條隊好犀利，平時既隊未到旅遊書，就會自然轉彎向文具部或者後場進發（因為通常旅遊書都係水洩不通），但係今日竟然排到入去旅遊書，仲向兒童部 Counter 進發．

　　見到咁既情況，就去開機收錢，平時開機收錢係諗住幫下收銀處，唔駛收銀姐姐咁辛苦．但係今日雖然都係咁諗，但係唔咪全部咁諗，好衰 =P "大頭目" 既一句：" 好彩阿匯呢幾日都返工幫手！ " 唔知係真定係假．今日超多人，收黎收去都係咁多人，收極都收唔完！唔知收左幾耐，終於見到龍尾，令人振奮！

　　跟住回歸英文部，大專書既人流開始黎 lu ，查來查去，但係都係得個查字 --- 我地都無貨，都唔知應該慶幸唔駛去執書好，定係因為慨嘆我地無咩貨好．

　　夜晚搵到機會同熊貓美美清機，之後就一齊走．同埋華姐姐、阿珊、恩慧姐姐一齊搭火車，落車時勁大雨，仲行雷閃電呢，同美子搭巴士返屋企，送到佢樓下就走 lu ！之後搭巴士轉火車番屋企，去到大圍無雨喇！

>>September 6, 2007 at 7:07:24 AM GMT+8

2007 年 9 月 2 日 星期日 【晴】

Title：OT 日

　　琴日企得太耐，半夜訓覺竟然試過抽左兩次筋，對上一次係岩岩做商務既時候，所以好肯定係因為企得太耐！

　　訓到九點半先起身，沖完涼無食早餐就出門口．之後就開工，本來諗住坐一日，但係返到去又費事坐咁多，所以企係度包書．之後就食晏，難得 Macy 都食第一班，輾轉下佢都同我食飯．我地去左紅螞蟻食飯，原來平日既午餐平六蚊，都算 OK 抵．只係食餐午餐都要三十幾四十蚊，究竟新城市仲有無平野食??

　　返到去就去左兒童部頂恩慧姐姐食飯，好耐無咁靜喇，又無電話轟炸，又無咩客黎問野，簡直係天堂 ^o^ 於是我就係度補貨，見到美子久唔久係度跑來跑去，就知佢去左地獄，呵呵！

　　頂到兩點鐘就要去番地獄，不停受電話轟炸，好似唔停既來電，點聽都聽唔晒．晏晝最主要係留守英文部 Counter ，繼續等人黎查大專書．一係就好靜，一係就幾個人拎住 D 書單黎，查都查唔切，幸好今日唔駛幫收銀處．唯一一次係受琪琪所托，去左收左一陣錢，跟住 "大頭目" 走過黎幫我入袋，超爆大壓力，結果找錢又手震，收錢又手震，震到連錢都跌埋，結果換黎 "大頭目" 一句 "咁論盡" 架！

　　夜晚食飯，有熊貓煮既飯同菜，好好味！雖然 "玲兒飯" 太爛啦，哈！



　　收工無走到，同左宗哥、恩慧姐姐同美子 Pack 聽日沙官派書既書，我負責係 D 膠袋上面寫號碼，佢地就負責執書．之後寫晒編號，就幫埋佢地執書，結果幾經波折，十一點鐘就 Pack 好晒！

>>September 4, 2007 at 5:26:10 PM GMT+8

2007 年 9 月 1 日 星期六 【陰】

Title：第一次做伴郎

　　今朝一早 7 點鐘起身，8 點就出門口．雖然天氣唔咪好熱，又無咩太陽，但係因為一身襯衫，同埋要手執一件西裝，就搞到成身大汗．之後去到新郎阿鴻既屋企，見到佢既媽咪，好客氣，不停咁話 "辛苦晒" ．之後等埋班兄弟上黎，搞左一陣就出發．伴郎既地位原來好高既呢，可以同新郎一齊坐 Benz ，但係都係同樣要 "全程盛裝" ．


Benz 花車


兄弟們整裝待發

　　之後大約 10 點幾就去到海逸酒店接新娘，上到去等左一陣，就先過到第一關．


新郎 --- 阿鴻

　　入到屋入面．但係跟住兄弟們就要玩遊戲，玩左三個遊戲，第一個係俾人搽到成嘴都係唇膏，再嘴對嘴傳膠片；第二個係我地每人要著住女人底褲，俾新郎用嘴擔住支筆，係我地個 PatPat 寫字；第三個就係要新郎同我著住性感底衫，同班兄弟落去搵九個人簽名，支持佢地結婚，當然我地無咁做啦，落左兩層就出 Lift ，一人寫一句，結果我地六個人寫左八句，呢個時候有個外國人經過，叫佢寫 D 野又真係好 Nice 咁寫左，之後我地就返上去．

　　最後就食咖啡冰，搵條鎖匙入新娘房．跟住新郎宣讀左愛的宣言之後，就入去接新娘．之後就到敬茶時間，敬完茶就搭車返去新郎屋企敬茶．上花車前又見到伴郎同埋伴娘既優越之處，因為影親相都要有我地係度，仲要企係新郎同新娘兩邊，哈！

　　敬完茶就去食飯，出面開始落雨，我地搭車去左 "蔡瀾美食坊" 飲茶，兄弟們都話我辛苦，係咁夾野俾我食，最後食左 4 粒燒賣、 2 粒蝦餃、 1 盅灌湯餃同埋其他野，始終都係唔明點解一粒咁既灌湯餃要廿幾三十蚊一粒咁貴，食落又唔咪咁特別好食，寧願食碗雲吞麵 ^o^

　　食完飯，就要匆匆行返去新郎屋企攞野去註冊，結果由於塞車關係，好遲先去到都會海逸酒店換衫．換完又好趕咁去簽名行禮，我同伴娘就伴住新郎同新娘進場，之後我同伴娘坐埋一邊觀禮．


宣讀誓言

　　跟住禮成後就出去影相，同埋擲花球既時間，姊妹們中有位叫阿婷接到花球，而我地兄弟中有位叫阿培既被傳對佢有意思（唔知係真定係被屈啦），所以我地都諗住陣間會走開，等佢接埋個花球．點知當花球拋出左之後，以急勁既速度飛落另一個兄弟既手上，當時我形容：就算阿培好似守門員咁飛撲，都撲唔到！結果唔能夠成人之美 lu ，可惜！

　　之後新郎同新娘上去房間換衫同休息，我地兄弟姊妹就佈置禮堂．搞左一陣就搞完，跟住就打麻雀．有個兄弟問我： "咦！你唔駛跟住新郎咩? " 我就話："唔知呀！佢地叫我落黎幫下手嘛！" 跟住打打下，兄弟之一、城大既 Bobby 就話："你呢個伴郎都算做得舒服喇！都未見過伴郎可以得閒打牌既！" 因為通常除左新郎同新娘之外，伴郎同伴娘係第二忙，所以我就成為少有 "得閒打麻雀" 既伴郎，呵呵！


伴郎 --- 我呀 ^.^

　　最後到宴席既時間，賓客們睇完佢地既 Video 之後，就到新人進場，我同伴娘自然又係跟住佢地啦！跟住新人就講左幾句說話，之後就有野食，但係食左半餐，就要去敬酒，好彩最後食埋碗翅先去敬酒．而新娘同伴娘就最慘，一開始食野就要去換衫，換完就去敬酒，敬完酒食左兩三道菜，又要去換衫，基本上係無得食，所以我有半餐食已經好好！

　　食完晒之後，我地兄弟姊妹就出去出面送客．之後執埋 D 野，我就跟左新郎既 Daddy + Mammy 返屋企拎埋 D 野走，搞到 12 點先搭的士返屋企．


最後祝一對新人百年好合，永結同心

終於我當日即席諗既 "百年好合食百合" ， HEE！

>>September 6, 2007 at 7:32:29 AM GMT+8

2007 年 8 月 31 日 星期五 【晴】

Title：死神來了前傳

　　今朝返十一點三，返到去都唔記得換衫開工，等到差唔多夠鐘先換衫．換衫途中聽到出面不停叫英文部，搞到我連恩慧姐姐請食既兩塊 Orio 都唔得閒拎，連 Locker 都未閂埋就要飛撲出去．之後搞左好耐，先入得番後場攞番兩塊餅，同埋攞番個名牌黎戴．而令到英文部咁混亂既就係繼 7、8 月教科書之後 --- 大專書旺季．

　　開始感到辛苦既前夕已經來臨，由於 Ivan 今日同我調左假，所以我訪問左兩位英文部同事既意見：

　　青媽媽：
　　我：" 你對死亡準備好未? "
　　青媽媽：" o靚仔，（農曆）7 月唔好講埋 D 咁既野！ "

　　Davis：
　　我：" 你準備死亡未? "
　　都係青媽媽：" 未落過地獄，點知天堂係點 ? "

　　算啦！既然大家都唔咪咁驚，唯有繼續以青媽媽既笑料黎迎接死亡既挑戰！今日終於同青媽媽講左 "阿青化" 呢個沙商現象，英文叫 "Chingolization" ，搞到青媽媽笑到連面都紅埋 ^O^

　　到左成 1 點幾，我突然問 Davis："點解玲兒會返工? " （但係玲兒之前已經不下三四次係我地面前出現）之後 Davis 好抵死話： " 梗係啦！你個心都唔係佢度！ " 我就諗左兩秒： "當然啦！"

　　晏晝同左玲兒、華姐姐、琪琪同阿德去左 "紅螞蟻" 食飯，知客哥哥見我地要等位諗住走，即刻整個靚位俾我地．（作者按：唔咪我地想唔排隊，係時間唔許可）之後坐左係一個好曬既位，因為上面係玻璃，再上 D 就係太陽．所以既有得曬太陽，又有得吹冷氣同飲冰水，絕頂好 Feel ！

　　之後成個下晝都係主要包書同埋間唔鐘搵下書，反而要顧埋個金筆櫃比較忙，好多人買計數機，又麻麻煩煩咁．之後有兩個人鬧交，羅小姐又唔係度，搵麗姐幫手，但係原來麗姐唔知管理處個電話，搵左好耐先搵到人黎幫手．而耐既程度係個兩個男人鬧完交，其中一個人走左．簡單黎講，呢單野係因為一個人係傻既，一個人係惡既，惡人棟起二郎腿整到傻人既電子琴，於是視電子琴如珠如寶既傻人就出聲，咁惡人又不甘示弱，所以就一人一句．

　　跟住查查下書，個 SAP 又死左，查唔到書．之後就靠我地 D 記憶黎搵書，都幾麻煩下．但係之後反而得閒左，因為原來淨係我地分店既 SAP 死左，其他門市無事，所以之後聽電話，就可以答： "我地個電腦壞左，可唔可以打去其他門市問? "

　　夜晚個餐同玲兒行左去吉野家買飯食，原來煎雞飯可以走左面個層 "類似蠔油" 既醬，再加牛肉汁，可以話係以客為尊．如果商務都做到咁就慘 lu ，例如英文書皮 + 中文翻譯本內容、紅色筆桿 + 藍色筆芯、中二既封面 + 中三既內容 ... 諗起都慘！

　　返後場食飯時，玲兒突然問：" 紅豆係咪會發芽架? "

　　我地都好殷勤咁答佢：
　　華姐姐： " 當然會啦！ "
　　琪琪：" 擺得耐會發芽架，你小學無試過種咩? "
　　我：" 其實紅豆係種子黎既！ "

　　之後玲兒繼續問："咁綠豆呢?"
　　華姐姐：" 紅豆咪同綠豆一樣！ "
　　阿德：" 梗係會啦，變芽菜囉！ "

　　玲兒繼續問： " 咁紅豆發芽會變做咩? "
　　華姐姐："咁又唔知喎！"
　　我就細細聲話：" 變做紅豆子！（好運中心既一間餐廳名） "

　　點知俾琪琪聽到，爆笑左好耐，問： "咁會唔會生 D 酥炸魷魚出黎? "

　　之後就咁就好開心咁食完一餐．跟住又要留守英文部，無書查既日子都幾悶下，一路打喊路．最振奮既消息就係原來青媽媽同 Davis 都收 9 點，之後本來同 Canny 收夜，但係 Canny 請病假，所以得番我一個，好彩無咩人問書，安然渡過呢半個鐘．收工時要清三號機，唔知點解齊頭多左五百蚊，真係抓晒頭！

>>September 1, 2007 at 5:28:41 PM GMT+8

2007 年 8 月 30 日 星期四 【晴】

Title：火柴人

　　今朝一早約左熊貓美美去搵萬能叔叔，之後去左大家樂食早餐．返工途中係有 D 唔開心，不過之後去兒童部，同恩慧姐姐傾左兩句就無咩事 lu ！

　　之後聽到個電話搵 Ivan ，但係 Ivan 食緊飯，電話入面就問我係咪 W...U...I...，要記住佢唔咪叫阿匯，係 W...U...I...．我就問係咪富惠姐姐 (詳情見 8 月 17 日日記) ，佢就話係，跟住仲恭喜我．咁都估得到，真係細心 + 聰明！

　　晏晝食飯時間仲好飽，於是上去 "友店" 買野，可謂深入龍潭虎穴，結果擄走左熊貓一對 + 方大同 Live CD 一隻，當然信用卡既結餘都相應提高！之後返去寫紙仔，仲要偷偷地擺野入 Locker ，有 D 小偷 Feel ．

　　食完飯應承恩慧姐姐幫手做外聯，於是又做番外聯王子，幫手開單，結果做左兩個鐘就做晒．跟住就出去 Counter 幫手，同後場係天壤之別，好多野做！之後有老師要即刻開單，所以又入去開外聯單，證明同外聯緣份未盡！

　　夜晚放工出左去搞阿鴻結婚既野，小弟將會首次做伴郎，希望到時唔會搞亂檔啦 =P

　　ps. 要像火柴人一樣有不滅既火，要堅持落去，希望等到個日．要做稱職既叻叻人，要努力呀！嘎！！（有 D 似 Kitty 添 =P ）

　　ps2. 叻叻傻瓜匯係唔需要 "唔該" 同 "多謝" 架，知道無 ??

>>August 31, 2007 at 5:36:34 PM GMT+8

2007 年 8 月 29 日 星期三 【晴】

Title：先苦後甜

　　今朝一早返到公司，開電腦係 Counter 對住 Excel 表，要幫英文部既秋銷落貨數，對住一千個 Best-Seller ，逐一衡量現時存貨同預期賣數既關係，可謂痛不欲生，結果成個朝早都係對住部電腦．

　　晏晝唔知點解覺得好凍，凍到要將摺起左既袖放番落黎，應該係咁耐以黎都未試過！最後因為一句說話，而令全身溫暖，連衫袖都可以立即摺番起（有無咁誇張 ?? 有！）之後借 D 意長駐收銀處，幫手入膠袋．期間第一班同事食飯，因為 LingLing 去左大圍，竟然又再次頂收銀，難怪 "大頭目" 行過收銀處，見到我收銀，話要諗下九月安排男同事收銀，相信矛頭直指小弟！

　　夜晚幫熊貓美美清機，今晚無出錯，希望以後都唔好咁蝦碌就好．之後搭車去銅鑼灣搵 Yuki 食糖水，食到 11 點幾就返屋企 lu ！

　　ps. 幫你入袋好開心，如果你日日都收銀就好 lu ! =P

>>August 30, 2007 at 5:21:53 PM GMT+8