2007 年 7 月 9 日 星期一 【晴】

Title：回鄉探親三日遊

　　經過 "培僑直銷" 之後，小弟連續第二日要六點起身，因為一早就要搭火車去羅湖過關返鄉下．媽咪、我同細佬過完關先至係八點，緊接行過隔離既羅湖商業城上旅遊巴士，一路上都見到廣東省經濟起飛既痕跡．


深圳市內其中一棟大廈 --- 很有杜拜既感覺

經過近兩個小時既車程，終於都返到鄉下 --- 中山，首先迎接就係呢個建係山上既 Slogan ："孫中山故鄉人民歡迎您" ！ 10 年沒見了，你好嗎?



然後落車就搭的士去搵阿姨同姨丈食 "早餐" ，除左姨丈同姨姨之外，仲有當年仲係 BB 既表弟同埋當年係小妹妹既表妹．

我細細聲同細佬講： "表妹真係只係能夠用亭亭玉立黎形容！"

點知細佬話："唔知點解覺得你講特別咸濕！"

我都覺得有少少呢個感覺，所以都唔再反駁 =p 之後食完飯，就搭番的士去我地條村返 "祖屋" ．呢條村個名叫 "下陂頭" ，由於讀音係中山話，所以讀做 "下 B 頭" ，而我同細佬細細個覺得個名好得意，又唔知點解 "陂" 會讀做 "B" ，所以曾經叫過做 "下皮球村" ．咁耐無返過黎，當然要係村口既牌坊影張相先！



返到 "屋企" 見到同樣放假回鄉既堂姐與堂姐夫，同埋姑媽 + 婆婆 (祖母) --- 亦都係今次千里迢迢返黎既目的．婆婆既身體一日不如一日，真係令人擔心，希望返黎探下佢會令佢開心 D ，亦都希望婆婆可以支持住，情況可以好轉！

之後媽咪見到出面既龍眼樹長滿龍眼，幾十歲人竟然爬上石屎牆上面摘龍眼：



夜晚去左依家中山最多人行既購物區 --- 大信商場，還有出面既 "新步行街" ，不過由於無咩岩睇，而且又好熱，所以都係行左一轉，就入番商場嘆冷氣算 lu ！



第二朝起身，一早去左飲茶，行番過黎既時候，路經村裡面既 "林家祠堂" ，於是我地行入去睇睇．裡面除左有林氏宗親既歷史以外，仲有一幅現代林氏宗親既合照．由於屋企裡面有好多人都落左黎香港，所以呢幅相入面只係得婆婆做代表．



跟住下晝既節目，我地幾個 (媽咪、姑姐、堂姐夫同我) 去左一個附近既釣蝦場釣蝦．釣蝦還是第一次，要隻蝦食 D 餌好容易，但係要佢地上釣就好難．試過有幾次都 Feel 到隻蝦食餌，但係釣起既時候就係無蝦．由於姑姐同媽咪傾計，所以得我地三個人釣，而堂姐夫未夠半個鐘就釣到第一隻蝦．所謂 "釣開有條路" ，跟住佢就久唔久有蝦上釣，而我就繼續等．可謂 "皇天不負有心人" ，等左足足個半鐘頭，終於有蝦上釣，超開心！





跟住放番個鉤再釣過，唔夠 3 分鐘又有動靜，仲諗住好旺，點知一扯上黎得隻蝦鉗．細膽既我當然拎左去叫姑姐幫我整甩佢，然後再釣過．結果經過 2 小時既苦戰，我地三個 "釣蝦初哥" ，堂姐夫以 11 隻蝦拋離我地，我以 1 隻 "蝦鉗" 之差僅勝媽咪 1 隻蝦既成績．之後我地出左去食飯，而呢 13 隻蝦亦都成為我地既美食 lu ！

最後一日假期，我地訓到 9 點先起身，我同媽咪執好埋行李，同埋姑姐一家去打邊爐．很特別既打邊爐方式，因為除左自己撈野食之外，侍應們會幫我地落野食同埋將水面既泡 "拂" 走，唔咪好慣呢 D "皇帝式" 既服務．

食飽飽之後，堂姐夫婦同我地搭的士去左巴士站，我同媽咪買飛上巴士搭番深圳，臨走前仲同堂姐 + 堂姐夫合照一幅添！咁就完成我地既 "回鄉探親 3 天遊" lu ！



ps1. 希望婆婆既病情早日好轉，起碼唔駛咁辛苦已經好好！

ps2. 釣蝦好好玩，有機會要再去玩，可以靜靜咁諗下野幾好！

ps3. 回程車程中，睇番 D 以前老豆寫番鄉下既信，其中有封係請示老人家批准老豆 + 媽咪結婚既信，睇到好感動！

>>July 10, 2007 at 4:02:36 PM GMT+8

2007 年 7 月 6 日 星期五 【晴】

Title：培僑直銷

今日去培僑書院做直銷，去到我本來咩都唔識，咁岩 Johnny 問我識唔識收錢， Minnie 同美子即刻答："佢最鍾意收錢！" 於是就去左小學 Counter 收錢，但係個度連收銀機都無，要計數就要用計數機自己計，而載錢既盤都係無， D 散銀要一包包擺係檯面，紙幣就擺晒係個膠袋入面慢慢搵．而當得閒既時候，就要數下銀紙，將多餘既錢紮埋一齊，留低少少用黎找續．

如是者由九點做到五點，之後搭的士返去商務繼續開工，由於無帶制服，所以 "借 D 意" 著住便服開工 =P

發現經過今日既訓練，發現未來如果唔做商務，可以向兩方面發展：

1) 銀行 Teller --- 因為成日數銀紙

2) 水果檔小販 --- 因為成日係膠袋搵紙幣找錢...

>>July 10, 2007 at 4:24:37 PM GMT+8

2007 年 7 月 5 日 星期四 【陰】

Title：爛 Gag ＠兒童部

時間：下午三至四點
地點：沙商兒童部 Counter
人物：阿匯 + 恩慧 + 保守估計 200 本書既地攤 + 間唔中埋黎擺低書既老師

背景：今日由於英文部幾齊人，所以可以過去幫恩慧搞外聯，而今日既功課係 22 張紙既報價 List ，雖然只得一半係英文書，但係都係要逐本逐本打書名 Check (作者按：最後以兩個小時搞掂)．由於恩慧要面對難度達四級 (三級係滿分) 既外聯，所以小弟係兒童部 Counter Check 書，同時等候差遣...

（老師剛放低一堆書，然後繼續 "出外打獵" ）

恩慧："阿匯，其實你諗住幾時先去剪頭髮? "

阿匯："終於都有人留意到我 D 頭髮好長喇！其實我諗住去剪好耐，不過未有時間... "

恩慧："無時間?? 但係有時間放假都返黎 (沙商) 行既 ?? "

阿匯："係囉... 本來諗住早 D 起身剪埋先出街，不過唔捨得咁早起身．"

恩慧："快 D 去剪啦，長到好似乞兒咁喇！"

阿匯："其實我想留到言承旭係 "白色巨塔" 入面咁長既髮型，遲 D 去拍 "白色書塔"！ "

恩慧：" ... "

>>July 6, 2007 at 4:31:48 PM GMT+8

2007 年 7 月 4 日 星期三 【綿綿細雨】

Title：奮勇作戰

　　今日適逢青媽媽同 Davis 都放假，而 Ivan 上午要去派書單，下晝又要閉關寫 Report ，所以基本上大半日，都係得我同 Canny 係 Counter 留守．一朝早開工入去後場，阿德就話有幾箱貨係英文部，為免阻住地方，於是儸部板車一口氣推左六箱貨返英文部，可以話係滿載而歸．

　　臨離開後場前，羅小姐見到我推住咁多野出去，就話："小朋友，今日得你一個係度，仲推咁多出去? " 我就答： "推埋出去啦，唔駛阻住地方嘛！" 於是返到 Counter ，除左繼續 Serve 客外，就係拆貨同包書．之後同 Canny 悶悶地，見佢又唔咪幾開心，就同佢傾下計．我仲扮埋 "顏聯武" 既聲音，原來係幾好笑既 ．而其間發現：當得閒既時候，可以好得閒；而當唔得閒既時候，就會同時有三四個客 "圍揼" 我地，例如買金筆 + 問書 + 問 VCD ， 真係令人有 D 頂唔住．

　　好彩之後都唔咪好忙，結果四五點就拆完 D 貨，仲上左大部份，都算係幾獨立 lu ，起碼無當初咁驚！心中既那個信念還是繼續提供動力，要 "盡全力" ！而 Ivan 大佬呢個時候都 "刑滿出獄" ，我仲問佢駛唔駛 "檻火盤" 添！

　　臨收工之前，同琪琪係門口送客，有一對男女出門口既時候令防盜 "咇咇聲" 響，之後係佢個袋入面搵到兩本漫畫同文具，俾羅小姐 "逗兩逗" 之後，就 "懷疑" 佢地偷野．結果因為個女仔無錢，就留低個男仔係度，叫佢返去屋企儸錢返黎．搞到我地都遲收工，之後搭巴士去左旺角，因為約左嘉敏同阿溢唱 K ，補祝番敏爺生日．結果玩到一點幾就返屋企 lu ！

>>July 6, 2007 at 4:01:08 PM GMT+8

2007 年 7 月 3 日 星期二 【微雨】

Title：精選遊覽團

容祖兒 --- 密友

彼此間再親　而在眼裡都不配襯
如若靠近　途人便會指控變犯人
即使關了燈　誰又介意家中接吻
然後一吻　無奈讓我醒覺有別人

傷口早太深　無謂勉強死撐獻吻
如若一吻　誰人便放開最愛下沉

注定傷心　誰明白我已被困
難道我再有力氣　苦苦去等
等一天當我不再恨

我暗地裡豁出去
見面也於家裡
可惜那字句仍沒法擊退

與密友愛不對
與密友欠登對
反對　若這樣愛的情侶

我　再沒法豁出去
快樂已經粉碎
只因發現旁人又說幾句

有著各種差距
這樣愛太不對
反對　密友若化身情侶

>>July 4, 2007 at 3:34:37 PM GMT+8

2007 年 7 月 2 日 星期一 【微雨】

Title：精選遊覽團

言承旭 --- 你是我唯一的執著

窗外的大雨　淋濕冰冷的空氣
好羨慕　天空可以哭泣
孤單的往前進　我答應過我自己
要贏到世界交給你

都放在心裡　愛就失去了意義
為什麼我到現在才醒
等待有多委屈　你是否傷透了心
告訴我來不來得及

忘了多久沒有擁抱你
我沒有流淚的時間　沒有後悔的餘地

請原諒我那麼執著　為了夢追到天空角落
伸手捉住風　我放開了你
沒想過沒有溫度的愛有多痛

請原諒我讓你一個人過
失去了你　還要夢想做什麼
這一次　我會握緊你的手
一錯再錯　什麼都不懂的是我

請原諒我讓你寂寞　這世上至少你要懂我
這一次換我在夜裡等候
從今以後　你是我唯一的執著

>>July 3, 2007 at 3:14:44 PM GMT+8

2007 年 7 月 1 日 星期日 【綿綿細雨】

Title： "宵夜直落" 演唱會

　　今晚收工去左 GreenBox ，因為 King 同何亨係度唱緊 K ．一去到發現雖然佢地得兩個人，但係就俾左間間勁大既房，比起上次同 "你好商務遊覽團" 個間 Party 房還要大，King 訓左係度唱，其實夠晒我地三個各佔一面大 Sofa 訓，不過驚訓著左．

　　之後由於 King 第二日要返工，所以 11 點就走．得番我同何亨繼續唱，唱下唱下我仲企係 Sofa 上面唱，仲走黎走去，都幾好 Feel ，同螢幕上 D 歌星開演唱會差唔多．最後唱 "離開以後" 既時候，更加就晒 3 邊 Sofa ，就好似人地係紅館開 3 面台咁，不過都已經聲到沙埋．最尾何亨以一首 "儸命舞" "儸命地" 完成！跟住 3 點幾就走 lu ．

>>July 3, 2007 at 3:26:44 AM GMT+8

2007 年 7 月 1 日 星期日 【綿綿細雨】

Title：沙商之 ... 未解決 !!

　　雖然 "未解決" 呢個 Term 已經 Out 晒，但係要形容呢件事，只能夠用呢個 Term 先能夠貼切！

　　只能嘆 Ivan 大佬 + 英文部，呢排真係多災多難 lu ！

>>July 2, 2007 at 8:28:00 PM GMT+8

2007 年 6 月 30 日 星期六 【綿綿細雨】

Title：回歸日好去處

　　今日唔駛返沙商，一早約埋恩慧係大圍搭的士去東涌，去做書展．經過半小時既車程，就去到映灣園既會所開工．或者個邊會所太似酒店，一直都係好有度假 Feel ，好難得到 5 點鐘個人都仲未醒， D 客問問題都要等一秒鐘先答得出問題，當然英文同普通話要更加多時間去 Load ．

　　而全日既節目除左收錢同埋同恩慧傾左幾陣計之外，最主要就係睇左張小嫻既 "我終究是愛你的" ．故事主線係講述女主角，得到養母既遺產之後，聘了一個私家偵探跟蹤自己，變相多了一位 "守護天使" 時刻在身邊．當中還有女主角身邊出現的幾段 "霧水情緣" ，但係女主角得到遺產後不愁衣食，經常周圍去，包括酒吧同埋 Coffee Shop ，搞到睇完全本書都唔覺有高潮位，但點解都仲有咁多女仔買，難道... ??

>>July 2, 2007 at 8:19:14 PM GMT+8

2007 年 6 月 28 日 星期四 【綿綿細雨】

Title：重現於英文部 Counter

　　經過多日來同 Minnie 既努力，較趕既外聯單終於及時開晒，終於鬆一口氣，所以今日可以長駐於 Counter ．不過都係發覺鐘意去開單多 D ，看來都係上左癮 lu ，唔知駛唔駛俾人捉去 "戒毒" ??

>>July 2, 2007 at 8:28:46 PM GMT+8