2007 年 2 月 16 日 星期五 【炎熱】

Title：Day 2 @ 沙田商務

　　今朝因為琴日唔記得問應該返幾點嘅關係，所以一早十點兩個字準時出現係沙田門市，聽完店長羅小姐既早會之後，可以話係 "不枉此行" ．之後就去執下 D Fiction 等開門，執執下就聽到羅小姐叫 "阿煥" ，我即刻認 "係！" （因為好多人都會錯以為我叫 "阿煥" ，所以基本上 "阿煥" 可以算係我既藝名），跟住羅小姐話等我適應下呢度，一兩個星期之後就會俾 D 學校既野我學，Oh !!

　　跟住就返去 Counter ，見阿青推左一堆貨出黎，跟住就拆貨同用電腦收貨，我就久唔久見佢行開左就睇下有咩幫手做下．琴日唔記得講，之前係星光有同事負責門市貨倉（後場）既工作，即係 D 貨運到黎就佢地會拆晒，推埋出黎，而我地就負責擺上架；但係係沙田就無同事負責後場，所以我地要自己拆．仲記得琴日問阿青： "呢度無人做後場架 ? " 佢就話："總之呢度人人都係負責後場既！"

　　跟住阿青前輩就去食飯，我就拆左四五箱貨，儸出黎點數量，之後 Canny 就話："喂！英採 D 貨唔駛點數架喇！" 原來沙田既同事唔駛點零售公司黎既貨，而我係尖沙咀就會點數，呢樣都算係幾大既唔同．之後幫 D 讀者查下書，無野做既時候，就去個架儸 D 書返去包，因為沙田 D 書好多都無包，搞到本本書都俾人揭到 "竅" 起左，所以為免全棟書都賣唔出，唯有將 D 書 "膠袋化" ，留剩一本俾人睇．雖然有 D 唔環保，但係為免 D 書印左出黎無人買，到時更唔環保，唯有 "犧牲小我" ．對唔住呀，地球叔叔！！

　　由於今日係大年三十既關係，所以我地七點鐘就閂門 lu ，跟住大家都收工迎接新年．

>>February 19, 2007 at 5:07:04 PM GMT+8

2007 年 2 月 15 日 星期四 【炎熱】

Title：ReU with Camel

　　今晚收工之後，立即快步行去王家沙，因為 Camel 返左黎同我地食飯．除左 Camel 之外， KK 亦都好耐無見，應該有四五個月咁上下，所以都幾 Miss 佢地．

　　食完飯之後，就去左 Sky Platform 飲野，行入去既時候，門口張檯個幾個女仔一路望住我地入去，一路細細聲講野，一路笑，突然覺得我地好似酒吧 D 舞男咁樣，真係想黎番 Part Table Dance 先．之後坐低左一陣，好耐無見既 "張國" 同 "肥瓊" 就黎左，仲有神秘嘉賓 --- 就係 Camel 既女朋友 Sally ，佢地中學一齊左，到依家都成七年 lu ，真係犀利！跟住我地傾下近況，傾到十二點就搭車返屋企 lu ．

>>February 18, 2007 at 5:30:14 PM GMT+8

2007 年 2 月 15 日 星期四 【炎熱】

Title：Day 1 in 沙田商務

　　傳說中萬眾期待的我（未免有點自誇吧！！！），今日終於要到沙田上班，一朝做預多兩三個字返工，因為怕等巴士同埋搵唔到後門入去．去到附近，差 D 行到去正門，都未見到路入後門，幸好小弟仲算係做左 24 年既沙田友，相信未至於會係新城市呢個 "地頭" 盪失路掛！

　　結果，小弟 "瀟灑地" 踏入沙田門市，見到黎緊要相處兩個月既同事．雖然係第一次見，但係佢地都好 Nice ，都有同我互相打招呼．跟住企左一陣就開早會，今次主持早會既同事有介紹我，而我心裡面不斷提醒自己要搵機會介紹自己，未免重蹈去星光既覆轍：就係去左成個星期都無人識！！結果，我搵到機會就 "插嘴" 用 "招牌語句" 介紹自己： "Hello ! 我叫阿匯，匯豐銀行個匯！" （當然事後知道呢個方法的確好 D ，雖未至於全部人記得，起碼都有 D 同事記得丫 ^.^ ）

　　跟住，本來做定心理準備去中文部 "重新做人" ，點知喜出望外地編左去英文部．之後，傳說中既 "阿青" 就帶我去行一個圈，介紹 D 同事俾我識．尾站係我地英文部同事既棲身之所，就係收銀處旁邊既小 Counter ，仲要同雜誌部同事 Canny 共用，即係起碼四五位同事共用一個 Counter．

　　由於今日都無咩貨黎，所以都無咩做，於是就自己行來行去認識 D 架，嘗試將 D 記憶 Key 番落去呢個新環境．經過第一日觀察之後，發現星光同沙田有以下不同之處：

　　1) 星光有五位英文部同事，而沙田英文部同事只得四位，其中一位係副店長 Ivan ，成日都要處理其他野，若果我地剩低三位其中一位例休，即係得番兩位同事．
　　
　　2) 因為沙田個英文部 Counter 鄰近 "飾櫃" 同埋 "VCD 專區" ，可以講話係 "山水會聚" ，所以呢 D 本來係文具部負責既野，我地要做埋：儸計數機、儸金筆、配 VCD 同 CD ... 可以話係八面玲瓏！

　　3) 由於沙田英文部 Counter 唔係係英文書 D 架附近，唔怪得成日人地打黎搵書，要遲 D 先覆．

　　4) 全個沙田英文部得一個 Counter ， Counter 得一部電腦，而雜誌部同事又係用呢部電腦，所以想用部電腦做中長時間工作係無可能！！

　　5) "阿青" 姐原來係勁好人！！而 Davis 有點似嘉敏！！！

　　6) 沙田好多書無包，同埋擺係架上面無 Show 封面，記得詹小姐講過 Show 多 D 封面先可以吸引讀者，所以我用左一兩個鐘將 D 書執下 Show 面．好開心阿青行過話："果然有功架，執完之後係靚 D ！"

　　7) 係沙田好難搵 D 書，可能係因為未熟習 D 書點擺，亦覺得 D 書擺得幾散．

　　8) 聽電話要搵其他人唔可以用擴音器全場大聲嗌，要 Transfer 去嗰位同事嘅電話機先可以嗌．

>>February 17, 2007 at 8:16:21 PM GMT+8

2007 年 2 月 14 日 星期三 【炎熱】

Title：匯匯の教室



有 "後面"、"回原處"、"還"、"後退" 嘅意思

例句：　She went back home. [ 她回家了 ]

通常要 "還"，之前都會 "借過"、"攞過" 等等，好似 Back To (someone)、Pay Back …

咁某超級市場最新推出嘅 “Money Back”係點解呢 ?

顧名思義，就係該超級市場 "攞" 得市民太多錢，要 "還" 番俾大家．

因此，當大家使用呢張 "優惠咭" 得到 "優惠" 時，無需太開心，只不過係超級市場將你地之前 contribute 嘅 Money "Back" 番俾你地而已！

Dictionary Source: Yahoo!

>>February 18, 2007 at 3:49:17 AM GMT+8

2007 年 2 月 13 日 星期二 【炎熱】

Title：情人節

　　雖說情人節是一個 "節" ，但香港還未將之列為公眾假期，所以都係要返工．只係香港算係自由既地方，雖然公司無假俾我地呢 D 打工仔，但係打工仔可以自己請 "病" 假，因此今朝返工，火車上竟然出現有空位既奇景，而 Office 既空置率亦都創新高！

　　今日係係零售公司實習（下稱 Hea ）既倒數兩日，懷住 "就黎出獄" 既心情，自己做起野上黎多左少少幹勁 --- 繼續對住某書店 Catalog Check 下我地有無賣過．好漫長咁 Hea （上稱為 "實習" ）完之後，就匆匆就去百佳買左盒 Mini Toblerone 返星光，因為一來要搵班同事，二來要 Meet 情人 --- 心心仔！

　　怎料，原來心心仔已經早有準備 "心意小禮物" 俾同事，結果我就逐一搵同事派兩樣情人節禮物：心意小禮物同埋 Mini Toblerone ．見到 D 同事收禮物咁開心，自己都好開心，特別係 Candy 媽話想擁抱我一下添！

　　跟住，係星光做左個幾鐘義工就收工 lu ，同左心心仔去創興廣場既漢陽苑食韓燒，雖然時間少 D ，不過都 OK 啦！

>>February 17, 2007 at 7:18:23 PM GMT+8

2007 年 2 月 12 日 星期一 【炎熱】

Title：中採四天速成班

　　今朝返到 Office 無咩好做，因為我琴日將三聯個表 Check 晒，所以係度上下網．跟住有位淩小姐過黎教我 Check 青衣同沙田既訂單，睇下佢地 D 訂貨數量駛唔駛增加同減少（人家係自己分店都未搞得掂 D 訂貨數，點去 "批評" 人地 D 訂貨數呢??）

　　之後做完之後，臨收工之前，司徒小姐就埋黎同我講下聽日既工作：

　　"睇番佢地 D 銷貨數" 、 "留意 D 供應商" 、 "幫門市訂貨" 、 "睇下有 D 咩貨適合佢地" ...

　　天呀！我之前無學過中文書，淨係 Check 左四日中文書既 Trainee 咋，咩佢地咁睇得起我地呀 ?!

>>February 13, 2007 at 2:20:26 PM GMT+8

2007 年 2 月 11 日 星期日 【晴】

Title：Non-Working Business Day

　　由於琴日來回左 "兩大" --- 大圍同大尾篤，今朝一早起身對腳都幾痛（好明顯平時少運動 !! ），幸好仲係返 Office ，可以坐成日．但係坐左下太過眼訓，而又唔可以係檯面訓，所以走左去 Toilet 訓左兩次，每次半個鐘．

　　但係第二次訓醒，係 Toilet 出黎既時候，發現 "大頭目" 離遠咁望住我，之後有所行動，就係拎左堆 "2006香港書展" 既首日封出黎送俾我地，但係佢就好得意咁收我地一蚊 "象徵式收費" ，仲俾左個好得台既豬仔錢罌俾我地入錢添！

>>February 13, 2007 at 1:53:10 PM GMT+8

2007 年 2 月 10 日 星期六 【陰】

Title：怒踩單車日

　　今日一早就同阿溢一齊去踩單車，十一點幾係大圍出發，踩到十二半已經到左大埔．好彩今日無咩陽光，又有少少涼風，所以一路都好舒服．跟住我地去左昌運中心食飯，食完又再繼續踩去大尾篤．途中去到大埔海濱公園，條單車徑就掘頭．之後要入去工業村，搵路去番汀角路先有單車徑入去大尾篤．由於 "工業村" 的確係一條村，仲係好大既村，所以少 D 方向感都好易迷路．經過一輪迷網之後，先搵番汀角路．

　　唔知係體力問題定係路程問題，踩親由大埔去大尾篤永遠都係耐過由大圍去大埔既，踩到去已經三點幾．跟住同阿溢上左去船灣淡水湖既堤壩坐左一陣，睇到 D 人放風箏都幾舒服．坐左一陣因為有蚊飛黎飛去，所以我地就走 Lu ．

　　跟住踩下踩下，去到工業村附近，見到有個牌指入去海濱公園，點知又係入左去工業村．雖知今日係星期日，三四點既工業村唔好話車，連人都無一個．幸好兜黎兜去，終於去番海濱公園，就好似係黑暗中見到曙光一樣（所以下次都一定要跟住富善村先得）．之後踩到去廣福村，阿溢就入支箭咁踩左去，跟住我就自己一路踩，踩到去沙田先見番佢．

　　還完車之後，我地就搭火車去左太子，陪左阿溢係旺角買左對皮鞋，跟住佢又陪我去睇野，行行下去到尖沙咀，阿溢就返屋企，我就去番星光行．上到英文部一個同事都無，就去左文具部同 Ada 同 Crystal 傾計，傾左一陣就係 CS 見到嘉敏兄，之後同佢傾傾下就收工 lu ．

　　放左工就同心心仔去左沙嗲王食飯，終於食到傳說中既 "脆蝦棒" 喇！

>>February 13, 2007 at 1:41:58 PM GMT+8

2007 年 2 月 9 日 星期五 【炎熱】

Title：豬年快到了！！

　　成日都淨係掛住幾時有得離開 Office ，不知不覺就到新年 Lu ！



>>February 13, 2007 at 12:57:05 PM GMT+8

2007 年 2 月 8 日 星期四 【炎熱】

Title：明將任食之夜

　　今晚放工之後，就搭巴士出左深水埗，因為約左嘉敏同阿溢一齊去明將食壽司．由於部巴士行得太慢，所以去到唔單止佢地已經坐低左，仲叫埋野食添．我坐低無幾耐，已經有三文魚同蟹子壽司各四碟送到面前．跟住我地好快咁清晒，再繼續叫野食．

　　對上一次去明將任食都應該係一兩年前既事，好耐都無試過食咁多．正當我已經勁飽既時候，身旁既嘉敏兄，竟然再叫多兩碟三文魚壽司，同埋中華沙律 + 多春魚各一碟，再加油淋淋既三文魚肉一碟，可謂嘆為觀止！

　　食完之後，我地三個就漫無目的咁沿住青山道行到去長沙灣，之後再行返去深水埗搭車走．我就出左去旺角同心心仔行潮流特區 Lu ．

>>February 13, 2007 at 11:50:15 AM GMT+8