2005 年 9 月 9 日 星期五 【晴】

■■■	傾電話	■■■
前幾日睇左子誠哥哥的e-mail，當中提到年青人的事奉，而當中的一點係﹕ 多「煲電話粥」，ICQ只是輔助性交往工具。每星期應用一個晚上半小時至一小時，向你牧養的五至十個少年人打電話，那樣就可以每人談五分鐘。然後每次選擇一個對象談上十五至三十分鐘。 所以我尋日搵左個一路想搵，但又冇搵過，又一路唔記得左佢電話的姊妹傾電話。 我同佢足足傾左1小時15分鐘，好彩係報紙講左傾手提係唔會導致腦癌咋，如果唔係，咁傾法，我驚我好快見主啦。哈哈... 傾計當中，我感受每一妹妹已成長了，好多時都有自己的意見，也有自己的思想，我應同的。也應同時代不同了，好多野會纏繞佢地去跟隨主。但我最終的一句也是﹕無論世界點變、聖經的話係永遠唔會改變。我也好想陪伴佢地一齊成長。 當中也提及﹕哥姐最好照顧弟妹三至五年，陪伴他們直到成為組長或團長。 我回想，也陪伴過多人的成長，但未陪伴到佢地成為組長或團長，我深信每一個都有能力做到。也深信惟有看見主才能為主放下一切。 惟有深感受、經歷主愛的人，才會甘心為主放下一切去跟隨主 也有體會主十字架愛的人，才會學懂如何謙卑、如何事奉 事奉幾多同愛主幾多，不會是一個正比。當你越愛主時，你會越願意為主去服侍神的家，不計算做幾多、做d咩野，就算叫你洗廁所，你都會願意。難道人越事奉得多就等於越愛主，咁冇事奉的人係米等於唔愛主呢?

>>September 10, 2005 at 4:35:11 AM GMT+8

2005 年 9 月 9 日 星期五 【晴】

■■■	靈修team	■■■
尋日有出靈修team，但因為去到小巴站竟然冇車喎，一等就等左10分鐘先有車，去到觀塘已經一支箭行上去，真係好快架啦，但因為係斜路，真係喘晒氣咁濟。 去到竟然今次出得最多人，有柏航、淵龍、阿祖、雅婷、碧茹、惠儀仔、遲來的慧珊同阿怡。真係多人呀，好開心，個個都有黎呀，我想都一樣。因為我遲到啦，攪到柏航開始先，佢原來已經唱左好首歌架喎，但其實佢地好快就要走，所以睇聖經的時間得番5分鐘，跟住睇左一陣，佢就走過黎話不如介紹下淵龍比大家識，咁所以就介紹下，原來佢係唔識我、碧茹同惠儀仔咋喎，最攪笑係佢問阿祖識唔識慧珊喎，跟住雅婷就話﹕同班都唔識，咁不如死左去啦。哈哈...柏航係唔知佢地係同班的。相識完之後，佢地就要走啦，因為阿祖的標準時間係8:02分啦，好快咁走，但最攪笑的又係雅婷﹕佢咩都未執，一路行，我幾驚佢跌晒d野出黎。又書、又水、又盒、又聖經，又書包。 親近完主之後，惠儀仔比我睇佢d攪笑學生相，真係笑得死人，好似日本人咁，有一張個嘴好大，又紅，真係笑死咁濟。

>>September 10, 2005 at 4:34:59 AM GMT+8

2005 年 9 月 8 日 星期四 【晴】

■■■	小組	■■■
尋日係小組的日子，係小組裡面大家都有相交，其實係好開心的一件事，因為我地事奉不是一味單單靠做，而係心裡有力量，同樣也需要b/s的支持同激勵。 同時，也彷彿了解多左b/s的需要同艱難。需要我同樣都要負擔去支持人，但同時，我也希望得到別人的支持。因為有時真係心裡孤單。前幾日發夢，夢到同依麗、秀芳同翠芳去澳門玩喎，真係好想再去多一次呀。 相交完到已經9:30了，惟有分組簡單的祈禱便走。

>>September 9, 2005 at 7:32:36 AM GMT+8

2005 年 9 月 7 日 星期三 【晴】

■■■	第3次游水	■■■
尋日又去了觀塘泳池游水，但其實早都病病地，但中午飲左杯傷風茶之後，竟然好番好多，屆臣氏真係得喎。 去到泳池，竟然冇咩人喎，換衫的時候，竟然一個人都冇，之後去到泳池啦，人數只得20人左右，真係正呀，今次可以舒舒服服、暢暢快快咁游啦。今次的成積係游了4個塘，仲要係游左4個都係直池，沒有人阻住我tim喎。真係開心呀。 不過由於我走的時間已經遲左，游完4個塘之後，我就走啦。回到家，因為太肚餓啦，煮左個麵食，我知運動完之後食野會肥架，但冇計啦，太肚餓啦。睇完電視就訓覺lu，因為太疲倦。

>>September 8, 2005 at 8:26:44 AM GMT+8

2005 年 9 月 6 日 星期二 【晴】

■■■	靈修team+太豐富的午餐	■■■
尋日又係靈修team的日子，我唔知點解好驚自己唔知醒咁，但次次都係鬧鐘未響我就醒左啦，今次都係，我大約6:15就醒左，跟住訓到6:45就起身，可唔可以下次訓到6:45先醒呀? 去到公園其實已經7:35分，但一個人都未見喎，我就諗冇理由我記錯呀?今日係米星期二呀?跟住我知我冇記錯之後，我就安心親近主，因為我知主係最欣賞我的。 之後陸續見到d人黎啦，其實睇聖經的時間唔多，碧茹冇帶聖經、雅婷要食早餐、惠儀仔一味話熱、阿祖....就一舊雲咁、慧珊就遲到。雖說沒有時間，但我卻好珍惜同寶貴這小小時間，雖然真係可以話係得10分鐘(可能都冇)，但我知同深信，主係最寶貴同欣賞我。 祈禱完之後，有阿祖的標準時間，所以就離開。而我就返工啦。因為尋日中午，老闆請食飯，所以著得斯文左小小，但我都係超唔慣，causal才合我多d。 中午食飯的地方係沙田賽馬會，佢公司司機係12:10就黎接我同亞姐、再加另一個老闆的秘書，3丁人一齊搭車去荃灣，再join埋老闆同佢秘書，但我地去到荃灣之後足足等左20分鐘先見到老闆落黎，之後再由荃灣去沙田，好似遊車河咁，一味搭車。 去到沙田馬會，原來係食西餐架，我竟然變左個大鄉里咁，因為d刀叉係超特別、好似個s字咁的刀，又枱面已經有4隻杯，4把刀、3支叉，款款都不同，見到都嚇死人呀，最大問題係本menu係全英文的呀，真係d字長到嘔呀，好初我地幾個女仔係由老闆秘書發板叫野食，如果唔係真係醜死人呀。 之後我地就揀左頭盤同甜品係出去拎(buffet形式)，而main course就叫左2款4個人share。佢d野食真係超好味呀。d魚生超新鮮、粒士多啤利超大粒呀，真係見到未見過呀，又紅又好味，d沙律又係超好味。我食左小小魚生、1粒壽司、小小沙律、2粒士多啤利、鴨胸做頭盤(費時比老闆見到我食咁多啦)，佢仲有兔仔肉架，不過我驚，所以冇食到。而主菜的牛柳粒同立魚呀，又係超水準呀。而甜品我就再食3粒士多啤利同tiramisu，果杯tiramisu又係好正呀，佢d蛋白好滑，而底下的咖啡同林酒呀，食一杯就剛剛好呀。 唔知係米因為食得太飯啦，尤其是中午呀，食得過飽，還是係車上凍親，回程的時候，因為又係要去荃灣，跟住先番荔枝角，車程太辛苦呀對於我來說，跟住我返到公司就嘔啦，嘔番晒d士多啤利出黎，一嘔完個人就開始病病地咁，好似傷風咁，個人把聲又變埋，跟住亞姐同會計都話我不宜出外食飯，因為我平時都係公司食飯架麻。

>>September 7, 2005 at 9:19:08 AM GMT+8

2005 年 9 月 5 日 星期一 【晴】

感激慧英的來電

尋日中午接到慧英的長途，其實佢係星期日都有打過電話來的，但因為聚會中，所以冇接到佢電話，佢有留言比我架，大致上問下聚會情況咁羅。佢尋日又打黎比我，一傾就差不多傾左1小時零15分鐘。咁次貴羅....佢，不過計過都好似12蚊度咋。

大致上都係講下近排的情況啦，佢的情況，我地的情況啦。佢話係果邊只係逢二、五出去，其餘日子都係好得閒，咁所以點解佢有咁多時間打比我啦，再加上佢打黎的時間大約差不多9:30pm。

我睇過佢d相，都應該唔係瘦左好多，又冇肥度。但聽佢講食d野就真係難習慣啦。我估我﹕食薯仔麵包、薯蓉加洋蔥、青椒、生菜、粗米飯.....oh no...比我應該適應唔到，所以如果我出外，我會揀去番馬來西亞，支持阿爸、阿媽。我期望我出年可以去一去。

跟住又講下同工啦，又講lee、又講下路，我等著慧英的相交同分享呀。係電話已經感覺佢唔同啦，又有好多得著，好想佢快d返黎喎。唔係留係溫哥華咁耐啦。

之後傾到電話爛咁濟先收線，我會比心機架啦，慧英，多謝你的電話呀，我知你有睇我的日記，所以你先打比我，傾下計，我會支持我自己，但希望也有你的支持。

>>September 6, 2005 at 4:03:43 AM GMT+8

---

2005 年 9 月 4 日 星期日 【晴】

1分鐘的回想


聚會完結時，光志哥哥話比大家1分鐘的時間靜落黎，為自己祈禱。

當我思想面前的時候，心裡突然湧出說話﹕
求主使我回想以往我怎樣愛你，將來日子，我願比以往更愛你。

當回想士培哥哥講面前所遇到的波濤時，我心裡又湧出﹕
我不想遇上大風大浪，因我知我自己敵不住，我只願主泛起漣漪便足夠。但如果主真係覺得我頂得順，我願我自己有更大信心踏上。

>>September 5, 2005 at 8:52:33 AM GMT+8

---

2005 年 9 月 4 日 星期日 【晴】

■■■	星期日的行程	■■■
星期日一早，我約左芬芬去銅鑼灣親近主，原本諗住約佢係九龍區，但因為之後又係新伊館，咁冇理由又搭車走黎走去啦，咁所以我約佢係銅鑼灣等，但我估唔到的是，因為尋日係星期日呀，銅鑼灣竟然一早有咁多賓賓。 去到銅鑼灣sogo出口，已經好似去了菲律賓的地方咁。周圍全都是菲傭，全都是喎。去到麥當勞，根本係入唔到門口架，入到去一望，又係全部都是菲人，真係嚇死人呀。咁最後我地去了大家樂睇下，原來菲人係唔鍾意食大家樂的早餐架，所以我地係最last minutes叫左早餐食。 食完，我就用我有限的記憶帶芬芬去中央圖書館，我地坐左係delifrance的地方唱詩歌，之後我地就入去圖書館睇聖經。其實時間唔係好多，當相交的時候，敏萍姐打黎，跟住又到碧茹打黎，跟住又覆call，之後我地就要走啦，因為約左碧茹係灣仔食飯。 途中又接到大妹姐的電話，同芬芬等左好耐先搭到電車去灣仔，去到灣仔地鐵站，又撞到大妹姐喎，但因為要等埋碧茹去食野，再加上又要等埋kinki，所以都係叫大妹姐走先，跟住我地同碧茹去食完野，再等埋kinki就去伊館啦，途中又撞到倩瑜喎，真係多人呀，但其實果時都已經差不多2:45啦。 入到去惟有坐係台後邊，睇唔到d字，最感謝主呀，kinki都好感動呀，喊足全場咁濟，但其實佢信左主架喎。但都咁感動，真係難得。佢其實都想轉下教會，希望佢係我地度能夠習慣啦。而芬芬d問題，有d都幾攪笑，但答完佢之後，佢就會話﹕你好叻呀。但其實d答案係好簡單架咋。哈哈。 聚會完之後，碧茹、芬芬同kinki就一齊走。我同敏萍姐就去大家樂匯合大家，由原本食到的茶餐，到最後只能食到西多士咋，真係唔抵呀。食完，又去排隊啦，真係玩排隊咁。 晚上的聚會係敬拜聚會，全晚都係咁唱下歌，思想下主的愛。都幾好feel。 完聚會走的時間都差不多10:00啦。回到家差不多10:45啦。真係疲倦得很呀。

>>September 5, 2005 at 8:31:30 AM GMT+8

---

2005 年 9 月 4 日 星期日 【晴】

■■■	星期六冇那那返工	■■■
星期六其實安排左下午可以出一陣聚會，因為晚上有個接待四川省的晚宴，所以夜晚我一定係出唔到聚會。 咁我早幾日問亞姐啦，佢起初就話冇所謂啦，可以自由活動，跟住回來就走啦。但前2日再問佢的時候，佢就話﹕我地大約幾點到呀，我就答﹕大約5:30-5:45啦，亞姐就話﹕咁即係要4:30走啦，咁中間得番2個鐘度，咁不如係會度開會啦，橫點黎緊d活動咁多，都要分下工架啦。咁我即係o了一個大嘴巴。之後亞姐竟然叫埋會計留埋開會，佢仲o得大過我，因為佢明明係返半日架咋，佢又唔洗夜晚tim。不過大家都係無奈。 所以星期六下午我地就留左係度--開會....。由2:00傾到4:50先傾完喎，之後就即刻走人啦。去到灣仔皇朝會剛剛係5:45，時間真係差不多咋。途中都比我撞到不少b/s tim，不過人地係去聚會，我就去開會。 等到6:45，d四川人終於黎到，招呼完一輪之後，因為只安排左2張大枱，人數已經坐到每張16人，所以我同亞姐、同領隊，安排另外食飯，費時迫住佢地啦。問左老闆之後，老闆都話好，因為d錢唔洗佢比，而係個會比錢的。原本諗住去旁邊加張枱，但又話full左，跟住又話可以食上海野，但之後又話我知full左，最後惟有安排食西餐廳，我叫左個羊排set-dinner，每人128，但都係麻麻地咋，因為環境唔係一個西餐廳的西餐廳。 食完落到去，佢地又剛剛食完飯，跟住又係拍照留念的時間，影完相之後，就握下手，離開了。我地執好野之後都走啦。回到家大約9:45左右啦。都算早啦。

>>September 5, 2005 at 8:03:15 AM GMT+8

---

<< 26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  >>