2005 年 3 月 12 日 星期六 【乍雨乍晴】

■■■	星期日都要返工...	■■■
星期日就係會展攪左個團拜，有成40個商會參加，個個都係老闆，所以我地會派左我同會計去做幫手。 約埋副會長的某秘書一齊食飯去，所以星期日我冇join家團的活動，反而比時間我訓耐左，真係好好呀，好耐冇試過訓咁耐啦。去到灣仔剛剛11:45，但等等下人，等到12:15先去食飯，途中會計話我知，會長call佢，問我地相處的情況，我心知不妙啦，因為早上我miss左一個call，那check番那個call原來係會長打比我架，我梗係冇打番比佢啦。不過心裡又一再擔心，好辛苦呀，日日都有不同的新發展，日日都唔舒服咁。 食完飯跟住就去會展啦，去到原來我地叫最早，之後開始工作人員會議，傾完之後開始分工同安排工作，大致上都差不多啦，個個function都差不多架啦，不過我被派到台上負責，真係打醒十二分精神呀，免得有任何錯誤。其實當晚程序都係十分順利，台上的工作人員某些是十分好，但有2個十分攪笑，一個就話自己唔想行，一個就問點解次次都係佢出去，我就話﹕因為之前安排左你地2個係歡樂小姐羅，最後我都係要搵人代佢地啦，一個叫佢去做，佢竟然話﹕其實唔洗去佢自己都識啦，我講﹕我都知，不過係要個女仔帶一帶姐，你都唔想呀。 我地食飯的時間係4:00-4:30，但中間又走左出去開工作人員會議，都唔知點攪架，個walkie成日轉channel又唔話人知喎，咁要黎都冇用啦。開會途中負責人又成日聽電話，攪到mc極唔like，問問題又不停問我喎，大佬我係負責台上架咋，唔係咩都係我負責架。 我地當歌星唱歌的時候就返位坐低，坐低的時候，副會長又過黎啦，最攪笑係蘇生叫我睇住個場喎，咁我就答佢我係工作人員黎架。但原來蘇生的意思係叫我睇住yic喎，我即刻話我睇唔住喎。那時莫生就出現啦，原來係佢爆比蘇生架，真係衰呀，之後佢竟然話不如你去蘇生果邊做啦，叫蘇生請你啦。咁我就話﹕多謝你喎，又幫我鋪條路，條條路都係通yic喎。 完晒全個function之後都差不多10:45啦，之後拎埋利是就搭的士走啦。途中又見到果個壞心腸的同事，人真係醜惡呀，攪到身邊d人冇左份工先安樂的。搭埋的士，利是只餘下100蚊咋，做足全日都係得番100蚊，真係世界錢好難賺呀。

>>March 19, 2005 at 1:42:02 AM GMT+8

2005 年 3 月 11 日 星期五 【晴】

■■■	好辛苦的一個星期...	■■■
上一星期係有史以來覺得過得最長的一個星期，係十分漫長，又難過，難過係因為心情的矛盾，因為星期四同常務副會長去茶餐廳傾計，傾完，個常務副會長竟然話我係因為亞may的源故而離開，都唔知佢點聽野架。不過最後佢都祝我good luck啦，我仲以為事情已經解決啦。點知....... 星期五接到會長的電話再call我，當傾左一陣之後，佢就叫我﹕星期六你上黎我公司啦，我今晚搭夜機番香港，一早就攪左你lee件事先啦。我真係十萬個唔請願上去佢公司，當日我即刻話比慧英同敏萍姐知，叫佢地為我祈禱，因為我真係怕得要死呀。我識我會長多年，佢份人又記仇、又成日話我落佢面，仲要係佢上任的時候，我就走喎，由董建華落台講到我唔做呀，真係唔知要坐幾耐tim呀。當晚我好迫切為自己祈禱，求主搭救我脫離仇敵的手，同樣我求主使我清楚祂心意，不過照樣我祈禱都係求主使我明白祂心意，不是按我的心意而行。 星期六上到去會長公司，心裡雖然萬分不情願，但都要面對，起初以為佢會不停的責罵，但感謝主，他只是不停說他的威水史同經驗，當我講到我地缺乏溝通時，佢問我﹕究竟你地點合作架，我問佢﹕佢send e-mail比我羅。會長即刻彈起，然後叫晒3個秘書+1個經理入黎，講低我地的合作方法，好似係度做戲咁，大家都十分驚訝。不過佢都講得我好對，就係我心地係善良，工作是絕對沒有問題，但與人合作，係要大家一齊合作，唔係單顧自己的事。 講下講下，由12:00講到1:00都唔想比我走咁，我惟有講﹕會長，你比我諗下啦。(其實係想你放過我啦)，跟住佢又講我的不是，以為係舊人，唔理d新人點做，成日講野冇禮貌，對d老闆好似仇人咁，唉.......你放過我啦。我最後惟有答﹕係，係我的錯，我要改。 去到1:30，會長話﹕等我了解左先啦，我會約幹事傾計架啦，你唔好同人講，你要幫我手先得架。我睇住你大架，由果時莫生果時我就見你架啦，睇到你而家咁大個，你話有冇感情呀，你諗下啦。.......(其實仲有好好多，費時打佢d廢話。) 之後，走人的時候，真係辛苦到死呀。因為心裡想走的念頭好似又打沈左咁，想走又走唔到。去到大牛又好趕咁，仲要了解d妹的情況，真係唔多想知，又唔多想去理會，因為心裡實在太辛苦了，又有種感覺好似冇人理會我咁。算吧。可能好似會長咁講，我係性格孤癖。 擘餅之後我就走啦，因為我約了舊同事去食飯，其實心裡唔多想去，因為冇mood去，好煩為了自己的事，冇咩心情，但因為是慶祝coco的生日，所以去了。在途中的時候，打了給亞may，一路傾，一路傾，佢都係叫我走的，但最終都係我自己最明白我自己。 食飯的時候，再問眾人的意見，佢地都話﹕走咪走，冇理由唔比人走架。我都係咁諗，但都係好煩，心情唔多好。食完之後就走啦，因為太疲倦了。

>>March 17, 2005 at 3:06:34 AM GMT+8

2005 年 3 月 8 日 星期二 【晴】

■■■	冇那那做左team leader....	■■■
尋日一連開2個會議，第一個係基金會議，大家講的係吹水，不實際的會議，但確實又有好多野要做架喎，因為對上一次開會的日子係去年9月份，大家講過咩都唔記得，又開始新一輪的吹水。因為4月份攪個golf啦，5月攪個晚宴啦，2個都係d大穫野，所以我唔係好想去跟呀。 尋日開基金會，d老闆一時又話請成龍，一時又話請周星馳，一時又話周潤發，但個個都話唔識人，再加上會長根本就冇主意，一味講甄妮有幾好，一時又話拍賣野，唉.....坐係度都好似受罪咁呀。由12:30坐到2:45先走人，但冇野定到出黎，仲要係話要盡快定晒d野出通告啦。佢地都痴痴地架。 之後就行去理工再開另一個工作人員的會議，因為星期日係會展攪左個團拜，有成40個商會參加，個個都係老闆，所以我地會又要派人去啦，派還派呀，冇那那叫我做team leader，問題係我連個活動攪d咩都唔知呀，team 咩leader呀，仲要係攪台上的一切事務喎，真大穫呀。而同team的人，我估佢地個個都係大亞姐，所以更加難叫佢地做野。 分組傾番工作安排的時候，個個都唔知做咩，分分下，我果組攪到最遲先走得，因為我唔知果d又要去問負責人，真係唔好意思呀。 之後大約5:45走人啦。自己走左去食下午茶，真係舒服啦。食完就去大牛祈禱會啦。

>>March 10, 2005 at 5:13:56 AM GMT+8

2005 年 3 月 6 日 星期日 【晴】

■■■	終於辭左工啦....	■■■
今日再同果邊confirm左d資料後，我就係中午的時間fax左我辭職信了，當問會長秘書收到與否時，她竟然話﹕我當我自己冇收過喎，幾攪笑呀。我心裡想，希望一切順利啦。 下午再收到常務副會長秘書的電話，又係問我點解要辭職呀，咁我冇講咁多呀，只係話想去讀書啦，再加上太忙啦。咁傾左一陣，我諗佢會匯報比老闆聽啦，以為一切事好順利啦，點知到5:50的時候，會長就打比我啦，一傾就傾左9個字，仲要係全部佢講野，我只係﹕哦，係，唔係，咁咋。會長d話語，真係廢到唔廢的廢話，他的內容大致如下﹕ brenda我不嬲都咁錫你，你知架 (嚇死我呀，錫我) brenda我都冇用粗口話過你呀，係咪先(你試下呀，你一講，我即走呀) brenda我好重視你架，你冇理由唔知架(好似係你話炒我架喎) brenda我好明白你架，讀書係好事黎架，你去讀書我梗係贊成啦。不過.......(太長啦) brenda如果你做得辛苦，我比2個打雜你用啦。(04年都已經係咁講架啦) brenda你知唔知呀，我不嬲都唔贊成d人開ot架。(唔洗做咩) brenda你唔好好似d細路女，成日話唔做先得架，出到去比人見你成日轉工就唔好啦。(我都係轉左2份工咋喎) brenda如果你有事，咪準時走啦，你到而家都係開ot的話，唔係你的錯，係亞姐同會計的錯，佢地幫你唔到。(咁當會計辭職的時候，就會係變左我同亞姐的錯架啦) 就係咁的情況下，我一味只可以﹕係係係，唔好咁講呀，當我想同佢的時候，佢又話我插咀喎。經過45分鐘的折磨後，會長就話﹕你自己諗下啦。

>>March 9, 2005 at 8:31:32 AM GMT+8

2005 年 3 月 4 日 星期五 【晴】

■■■	心裡有平安....	■■■
今個星期的心情好難用言語去表達，有憂慮的時候，也有平安的時候，之後又有牽掛的時候。 當我頂唔順亞姐的時候，有個姊妹就問我識唔識得人要搵工喎，我即刻話﹕我呀，我呀，我呀。經過講解之後，其實都冇咩好講解，因為份工基本上係冇野做，我只知簽contract，chase外國data，其餘就咩都冇啦。不過我心裡都好想一試。 星期二晚上的祈禱會，其實我唔係聽得好多野，因為我心裡要緊住回家打cv呀，星期三send左比姊妹啦。之後係星期三的晚上去了祈禱，心裡好想明白主心意，但係，今次的祈禱不同以往，以往可能要求主比份工我，但今次我係求主帶領我，不是一定要做得成果份，而係睇見主究竟想我點。祈禱完同唱完詩歌之後，心裡好有平安。 星期四就收到電話叫我見工啦，當晚我仲諗住佢會叫我講下d英文啦，因為同其他國家拎資料架嘛，攪到我好緊張喎，因為而家份工作係唔洗講英文架，講國語最多啦，我只係預備左介紹自己一part野都預備到11:30，但我太眼訓啦，所以我揀左去訓覺，臨訓前又係祈禱交託。我想當人最冇助的時候，就係去祈禱的時候啦。 星期五的一早約了姊妹係地鐵站等，因為姊妹帶埋我上去，實在太好啦，因為我係白痴黎架。去到填完水蛇春咁長的表格後就等見工啦，當坐係度等的時候，我聽到隔離房又係interview，果個又係女仔啦，咁我以為會見佢啦，因為佢好似係講咩assistant果d野，等我仲好留心佢講咩tim，但原來唔係，入來的是2丁友，友善到不得了。之後我諗住佢叫我用英文自我介紹啦，點知佢地冇問過，佢地只係問左我3條問題﹕第1.你知唔知lee份係做咩架。第2.你而家人工好高喎，點解你要走呀。第3. 你仲有冇咩問題呀。就係咁就見完啦。仲知我唔預備啦，都唔需要講英文ge。 當佢地聽到我話開ot開到11:00或者12:00的時候，個男人好攪笑咁講﹕好少女仔肯咁樣做架喎，咁怪不之你咁高人工同埋要走啦。個女仔聽完之後，就話我地一定唔會開ot開到咁夜。我回答係﹕高人工係要有代價架。 星期五的下午已經收到電話出offer啦，我將會星期一回覆架啦。不過有d細節野要問下，問清楚就可以confirm啦，希望一切順利啦，因為我驚會長未必比我一個月即走，亞姐都走左3個月先走得，而lee個新亞姐我就更加諗唔知佢比唔比我一個月即走。尋日同會計傾開新亞姐的時候，佢竟然話自己都係3月尾遞信喎，我叫佢唔好呀，我驚比會長覺得好似我玩野咁，但會計話佢諗左架啦。跟住講講下佢話不如一齊遞信tim，不過最後我都係果句，我星期一會遞架啦，你諗下啦。 尋晚臨訓前繼續睇本書，裡面有ｄ說話好好架，佢講點樣為之事奉，好多人以為要有工作才叫事奉，但原來聖經上咁講﹕所以弟兄們、我以　神的慈悲勸你們、將身體獻上、當作活祭、是聖潔的、是　神所喜悅的．你們如此事奉、乃是理所當然的。 原來不是按工作，而是自己將自己獻比神，完完全全比過神，由神決定你人生同方向，如此便是事奉。之後，作者為自己祈禱的內容大約﹕當有事要決定的時候，佢求神不要照佢意思，如果他意思係使自己沒有益處，或者會難阻神在他身上所行的旨意時，他求神不要按照佢咁自私的想法去行，而係按神的心意去帶領。所以我晚上的祈禱也是如此。如果份工係唔好的時候，我求神不要按我的意思去將份工比我，反而我求主使我明白祂旨意如何而去決定。

>>March 5, 2005 at 4:59:52 AM GMT+8

2005 年 3 月 3 日 星期四 【晴】

■■■	我頂唔順果個新亞姐呀....	■■■
對住亞姐直頭係無奈呀我。 星期四由於會計冇返工，全日我同亞姐對話不過10句，而佢亦都唔會主動同我講野，佢會用e-mail的方法同我溝通，我都唔知佢攪咩架，佢幫我聽左個電話之後，佢唔會話我聽係邊個打黎，佢會send e-mail話比我知，真係痴痴地。 之後，佢就唔聽電話啦，因為佢話d電話全部都係搵我架喎，佢要講果d都講晒啦，唔洗聽啦喎，所以我自己聽番晒d電話。 我將佢叫我打的通告比番佢叫佢print番出黎，佢竟然話﹕我唔白你講咩喎，你冇printer呀，printer壞左呀，還是你冇信紙呀，要我去print。咁我答佢﹕不嬲都係幹事去做架喎，你print番啦。佢竟然話﹕pass黎pass去，做咩呀，你隻手有事呀。 都唔知係咩人黎架。..........................

>>March 4, 2005 at 10:03:04 AM GMT+8

2005 年 3 月 1 日 星期二 【晴】

■■■	我頂唔順果個新亞姐呀....	■■■
今日好激氣呀我。 今日亞姐一早就話要開會喎，跟住問我地2個人有咩job duties喎。咁會計就答佢﹕我主要做會計，其餘就協助會務啦。咁佢問我啦，我答佢﹕我係協助你手頭上的工作同admin d野羅。佢竟然話我﹕你連你自己有咩job duties都唔知呀，咁好嚴重喎，會計都答到啦，我心諗呀﹕大佬佢係做會計架嘛，咁梗係答到你啦，我係秘書架喎，點答你呀。 跟住佢又話要執果d紀念品喎，咁我話冇地方放喎，佢又話我﹕你答冇地方放係解決唔到問題架，而家咪係要搵地方羅，你講lee 句話直頭冇幫助呀。跟住話﹕不如星期六一齊執啦。我咪話﹕ 好似會長果日同你講，叫你執架喎。佢竟然話﹕叫我去執，咪即係一齊囉。 都唔知係咩人黎架。..........................

>>March 2, 2005 at 7:43:13 AM GMT+8

2005 年 2 月 28 日 星期一 【晴】

■■■	我頂唔順果個新亞姐呀....	■■■
今日好嬲呀我。 1.今日佢返9:20啦，咁明明得15分鐘遲到啦，咁我去問佢，你有事呀，佢竟然話﹕冇事呀，不過我驚我要等你地開門咋嘛。.................... 2.今日叫亞姐同我scan d相，我已經講得好清楚save係邊同埋淨係要張相，佢竟然將全張form scan一次，仲要另外save左唔知去左邊，跟住再講過，之後同我轉左 formate，我話要jpg呀，佢竟然save左做點陣。大佬你係2萬幾蚊的亞姐黎架，scanner都唔識得用。 3. 今日佢蛇左2個鍾話去領回鄉証喎，咁返黎叫佢填表啦，佢話﹕我係因工去換架喎，仲咩要我填表請假呀，如果唔係要出團呀，我唔拎tim呀。幾死串呀.................... 4. 因為我叫佢去填表，佢打去會長果邊對質，究竟對方係咪咁講過喎，幾衰呀。 5. 再加上今日家姐著左我件褸呀，我仲更加嬲呀....................

>>March 1, 2005 at 10:04:23 AM GMT+8

2005 年 2 月 28 日 星期一 【晴】

■■■	記者招待會....	■■■
尋日論壇果邊開左第2次記招，由於份新聞稿好遲先攪好，攪到出門口的時候推遲了半小時，去到美麗華都已經12:20啦，已經見到ATV的人已到，我惟有那那林攪好D野啦，但問題係，尋日又係新亞姐第1日返工喎，佢明明話攪開活動架啦，但尋日佢咩都問我喎，簽名簿點放呀，冇簽名筆點算呀，裡面點呀，新聞稿呢，唉.....咩都要我答，咁我不如出埋你份糧啦。 我起初就攪好裡面D SETTING，跟住就係出面，一頭汗，但新亞姐就不停問野啦，我真係想講，一早又唔問，黎到先問咁多野，不過冇計啦，坐的士的時候，佢仲係度不停講自己電話，都唔知我頂唔頂得佢順呀。 之後我就比左我地會的相機佢入去影相啦，因為諗住比個機會佢入去睇下野，再加上我地2個位SET左係出邊，我又驚有人黎喎，所以我係出面解問人問題啦。點知佢入去只影得2張相喎，當我翻睇的時候，先知出事，補到補唔番啦。咁當我問點解影得2張咁少時，佢話因為重喎。但係部相機已經係數碼黎架啦，佢都話重喎，跟住仲話下次我會帶自己的相機架啦。唉............之後呀，佢仲答我喎﹕你可以問番d記者拎番d相咪得囉。我就即刻話﹕記者?你識邊個呀，你問呀，d記者唔會比番你架，你咁勁呀，你熟邊個呀，你去問啦。 回程的時候，佢仲好串咁講，我唔想日日都要係度等你地喎，你地會準時架呵....。咁我話﹕我冇遲到喎，9:15前喎。佢竟然話﹕係咩，我唔知喎，我9:00已到係門口啦。咁我就講﹕會長一早講左啦，有15分鐘遲到架喎，佢竟然話﹕我冇聽過喎。 之後講起鎖匙就仲嬲，佢問自己幾時有啦，咁我就話1個月啦，佢就問﹕點解係一個月呀，我驚有時我放得遲喎，要你地等就唔 啦，因為我住得近呀嘛，你地住得咁遠，要你地等我，唔係咁 啦。 咁我就話﹕咁我要問下會長先喎，因為未返夠一個月，我地唔會比KEY佢架喎。 咁佢就話﹕咁一係我自己問啦。佢會明白我ge。 咁我咪話﹕是但你啦。

>>March 1, 2005 at 7:28:55 AM GMT+8

2005 年 2 月 23 日 星期三 【晴】