2005 年 3 月 28 日 星期一 【晴】

■■■	雲南省考察團的~~第5天~~	■■■
第5日，又係一早就起身啦，日日都要一早起身，食完早餐之後就去機場啦，去到機場會長又講一輪野，攪到我地要係機場派boarding 同機票，最攪笑會長係講佢自己d私事同屋企野話晒比人知喎，真係醜呀。 跟住回到香港之後，會長派車車我回公司，係回公司呀，點解會長咁好人，其實因為佢有份紀念品係我個箱度，佢想即刻拎番，所以先派司機車我咋，仲要係我要返公司做野呀，因為明天有個接待啦。 返到公司，攪好晒d野，諗住休息下到6:00啦，因為返到公司都差不多2:30啦，食埋野都3:00啦，點知竟然有個基金會的老闆想叫我地5:00去開會喎，真係命苦呀，講左好耐都唔明，最後我惟有出絕招，就係話比會長聽，我明天d野都攪好，又剛剛返，連會長都話佢想收賣人命呀，唔好去啦，就係咁的情況下，我可以逃過一難，如果唔係命都冇呀。 原本有諗住出特會架，不過太攰啦，所以回家休息，執好個行李之後，食完飯就訓啦。都算係咁多日以來最好訓的一日了。 但回想中間的細節時，往往想到主的安排是最好的，又比我見到天開的情景，令我最感到主無論在何處，也是最想我這個人得安慰同享受主的愛，那一個情景真係好美，美到彷彿是一張照片，但卻永在我心，無論何處、何時、心靈景況如何，主仍然用那份永不改變的愛愛我。

>>April 7, 2005 at 1:43:51 AM GMT+8

2005 年 3 月 27 日 星期日 【晴】

■■■	雲南省考察團的~~第4天~~	■■■
第4日，又係一早就起身啦，因為今日又趕飛機飛返昆明，係機場入閘的時候又出事，因為d官員話boarding 要對機票名，而中旅因為想安排d夫人同先生一齊坐，所以將d坐位對調，所以張boarding係唔對張機票名，又要再一次召集番d人黎，又要重新派過boarding 又要再派隊過關，真係超麻煩呀。 入到候機室，諗住又比會長話啦，點知佢今日心情特別好，冇野喎，仲話明白係中旅的好心tim，令到中旅徐生舒一啖氣呀，因為佢比會長話過無數次，仲話返到香港之後要休息番1-2個月tim。 上到機，因為坐位不安排一齊坐，所以有d亂啦，但都叫ok，但另一問題又出現了，因為有一團員想一家人坐，而佢又安排係會長後邊坐，中間頂住條路，會長即刻起身話佢，話佢的內容不用講都知係果d啦，因為全程都坐35分鐘，而佢又唔係郁，所以會長好嬲，全機都聽到佢話佢咁濟，我見到的情景仲攪笑，另一邊的團員全部都不敢正視會長，全部望向窗，而那個團員只好坐係度聽佢話佢，而會長就好似精神有問題d人，坐係度不聽鬧佢，但因為已經要起飛，會長係坐佢前邊，一路係度鬧佢，情景真係好攪笑架。 落到機，就安排去參觀景點啦，都算好架啦，d老闆都去睇，都係咁上下啦。之後又係坐車，同坐車，最後晚餐終於可以一試雲南米線啦，正宗的雲南米線係有超多油係面，因為要保存熱度，但係又好好味喎。 回到酒店又開始pack野走啦。因為明天坐早機返香港啦。

>>April 7, 2005 at 1:35:09 AM GMT+8

2005 年 3 月 26 日 星期六 【晴】

■■■	雲南省考察團的~~第3天~~	■■■
第3日，又係一早就起身啦，因為今日要去麗江參觀，車程由上車到落車，足足去了5小時，真係搭車搭到傻。落車就係中午啦，又係食中午飯的時候，因為搭車搭得多得濟，所以冇咩胃口食野。 中午去了麗江古城參觀，果度叫左最靚的參觀點，因為以古城建造，但裡邊全部都係商店，好多地方有得遊玩，同我地一齊的太太團就好似發癲咁，不停買、不停買，叫佢地向前行都難呀。 不過那地方真係好靚，之後就去黑龍潭同木府參觀。地方都ok啦，不過又係果d咁ge地方啦，冇咩特別。但都叫好好架啦，有影相，有山有水咁。 之後又係回去食飯，又係果d牙膏羊肉、又係果d辣野。晚上，去睇左個表演，都叫ok啦，睇完就返房訓啦，因為間酒店好靚架，張床大到4個女仔都訓到呀。

>>April 4, 2005 at 8:11:14 AM GMT+8

2005 年 3 月 25 日 星期五 【晴】

■■■	雲南省考察團的~~第2天~~	■■■
第2日，一早就起身啦，又係melody小姐啦，因為佢要化妝又要執野，最攪笑係服務員黎收行李的時候，佢仲話未得，攪到我都落唔到去食早餐同點名，佢仲話﹕我其實唔食早餐都得架。我話﹕我落去唔係為左食早餐呀，係為左落下d人到左未呀。 跟住，我自己落去先，食左一陣之後，就同中旅夾下行程同資料，之後就推d人上車啦，例牌都遲幾個字架啦。之後去到機場啦，中旅就話拎住boarding pass就可以上機架啦，但有老闆問﹕點解唔比埋機票呀，冇機票好似唔得架喎。我果一刻仲話﹕中旅話唔洗喎。就係lee個時候，有團員比張boarding 時，果邊d人就話要睇機票啦。咁就出事啦，因為45個團員分開過關，要搵番佢地出黎，仲要不停叫名，因為要對番個名，仲要攪番張boarding pass ，真係熱到死tim呀。 之後的結果就梗係中旅比人話啦，尤其是會長啦，佢出名脾氣勁，仲要係大火氣，鬧到中旅徐生死咁濟呀。順利上機之後，下午就去香格里拉啦(小數民族的地方)，但由於為於3500呎高海拔的地方，我已感到自己有高山症，就係頭好重、腳步行得快就好浮，唔行就好沉、全身都好辛苦咁。去參觀個地方時，因為係寺，所以我冇入去，係門口等，就係lee個時候，心口覺得好厭悶，好想嘔咁，好彩lee個時候，見到佘生有個氧氣筒係身，問佢拎黎吸左幾啖，好番好多，因為上次係九寨溝都係咁的情況，所以不致太緊張，同埋知道係咩事。 等d團員上番車的時候，大部份人都有高山症的現況，所以那那林車佢地番酒店休息，因為今晚又係接待d官員的晚宴，返到酒店後，中旅安排我自己一間房，不是我要求架，係佢有特權安排。所以可以自己話事，不過因為個頭太辛苦，想訓到訓唔到咁濟。 晚宴地點好彩係我地酒店，所以行落去就係啦，食的時候，個個都冇胃口，因為休息得唔係好多，又係我要派書仔同紀念品啦，又要映相啦，又係忙到死，又係冇得食，不過我都唔想食，又係食果d牙膏羊肉、好辣的不知名食物、白飯等唔鍾意的食物。 之後，因為佢地有安排去睇show啦，所以我揀選唔去，我寧願揀選返酒店休息還好。因為明天又要早起上路。

>>April 2, 2005 at 3:17:27 AM GMT+8

2005 年 3 月 24 日 星期四 【晴】

■■■	雲南省考察團的~~第1天~~	■■■
第1日，我地乘搭中午機去昆明，但我一早就要起身啦，因為24號夜晚都仲要開會，返到屋企都超眼訓啦，未執好野就訓啦，再加上係會度我要拎野走，所以我9:00就返去執下野啦，會長約埋個司機比我tim，車我同會計去機場。 去到機場，已見到中旅的徐生同會長秘書，原來佢比會長話佢，唔去yic幫我手，真係話得好呀，因為佢確實咩都冇做過。 陸陸續續見到我的團員到啦，幫佢地攪好行李之後，就推佢地去美心食飯，費時係度等我地啦，所以我都推埋會長秘書melody去，因為佢唔係度都幫我好大忙架啦。 等到差不多d人齊晒之後，我地就上去分boarding pass同証件，途中我叫melody幫我拎d証件出黎，佢都唔知攪咩，竟然冇拎晒出黎，攪到我幾驚呀，因為唔見左人地的証件喎，我一路問中旅徐生係米比晒我架啦，一路係咁叫會計搵啦，最後原來meoldy佢自已冇拎出黎，真係嚇到我地死死下。分晒d野之後，距離我地最遲入閘的時間只剩下10分鐘，所以我同melody那那林食碗飯，跟住就飛入閘，我地果團全部人都係最遲先上機，因為個個都係大老闆，官員，個個都唔想等。團員有理工校長、城大教授、中聯辦秘書長，最高級的人員黎架啦。 去到昆明之後，就上車返酒店，因為約了見雲南省省長同其他官員，安排晒團員上房之後，我同melody只得20分鐘比我地換衫同執野，因為我地有2個商會的紀念品同書籍，真係快到嚇死人呀，落到酒店大堂的時候，好彩會長未到，去到國賓館，又係一輪的安排坐位同派發物件，最後就係合照啦，因為我又要拎紀念品，根本就映唔到相，所以惟有叫人幫手，真係忙得緊要呀。 之後，因為同d官員食飯，全晚我都唔係食到幾多，因為好忙，又要顧住映相，又要顧d老闆，又要顧d太太，個會長秘書淨係問我﹕有野你就叫我做啦。..................不過係冇做過野。 之後返到酒店，melody就沖涼啦，沖完之後到我，佢跟住又話要洗頭，但問題係佢冇洗頭水喎，要我借比佢，佢話酒店果D太CHEAP啦，咁我問佢﹕究竟你帶左咩黎架，佢竟然話﹕我帶左3件大褸。我話﹕嘩...你都好多野喎，帶3件大褸，但其他野就冇帶啦。 執好野之後就早D訓啦，因為明天一早要起身，5:30morning call，6:00早餐，6:30走人。melody小姐又話要開燈訓喎，我話唔得喎，我唔慣喎，你不如開床頭燈啦。就係咁樣之下先有得訓。

>>March 31, 2005 at 9:53:26 AM GMT+8

2005 年 3 月 22 日 星期二 【晴】

■■■	我要出團啦.	■■■
日 期 時 間 行 程 安 排 3月25日 11:30 香港國際機場七樓離境大堂集合 (星期五) 13:30 由香港乘坐【CZ342 1330/1540】飛機前往昆明 15:40 到達昆明巫家壩機場後乘車並入住酒店 18:00 官方拜訪活動，與省政府領導官員會面及宴請 20:30 返回酒店 (五星級佳華威斯汀大酒店) 3月26日 06:30 於車內早餐後(行李跟車)，由昆明巫家壩機場乘搭內陸機【MU5947 0805/0900】飛抵香格里拉機場 (星期六) 09:30 到達香格里拉機場後前往參觀 [松攢林寺] 12:30 午餐 14:30 參觀 [碩都湖、納帕海] 16:00 入住酒店(五星級中甸天界神川酒店) 18:00 晚餐(由迪慶州政府宴請) 晚上 返回酒店休息 3月27日 07:45 於酒店內享用早餐 (星期日) 08:30 乘車往[麗江]遊覽【車程約4.5小時】 09:30 參觀[長江第一灣] 1:30 午餐 14:00 餐後前往參觀黑龍潭公園及木府 16:00 入住酒店(五星級麗江官房別墅酒店) 18:30 晚餐(由麗江巿政府宴請) 20:00 夜遊 [麗江古城] 21:00 返回酒店休息 3月28日 06:00 於酒店內享用早餐(行李跟車) (星期一) 06:45 由麗江機場乘搭內陸機【MU5713 0850/0930】飛返昆明 11:00 參觀 [大疊水瀑布] 12:30 午餐 14:30 乘車前往 [石林]參觀 15:30 參觀[西山龍門] 18:00 晚餐 19:00 入住酒店 (五星級佳華威斯汀大酒店) 3月29日 07:30 於酒店內享用早餐 (行李跟車) (星期二) 08:15 乘車前往機場 10:35 於昆明巫家壩機場辦理登機手續，乘坐【CZ341 1035/1230】飛返香港 【行程結束】 請大家多多為我祈禱啦。 求主保守天氣，機程同車程 求主保守我靈魂同身體 求主使當中安排一切都順利 求主使我唔好比人鬧

>>March 23, 2005 at 11:17:30 AM GMT+8

2005 年 3 月 17 日 星期四 【晴】

■■■	以後唔可以搭的士去開會	■■■
今日開副會長會議的時候，個司庫竟然話我地亂用錢喎，好似搭的士咁，去邊度都搭的士去係唔得架，唔好亂洗錢先得架，我地d經常性開支有限呀，咁我就話﹕上次因為亞姐都未返工，得我同會計去開會，咁個會就冇人啦，所以我地為左慳番d時間，所以米決定搭的士羅，佢竟然話﹕時間唔好差得好多架咋，橫點都係遲啦，3個字又係遲，半小時又係遲，咁不如搭地鐵啦。咁我就話﹕再加上我地有時有好多野拎架嘛，咁如果得2個女仔去拎根本就拎唔到，佢就話﹕如果有需要的時候，可以call會長呀嘛，叫會長用小巴車我地去喎，真攪笑呀，拎2袋野都要搵小巴車我地去呀。不過佢咁講，我就惟有講‥下次我地會選擇清楚先搭的士架啦。 跟住再話我地訂報紙啦，因為每月比多20蚊報紙鋪頭，所以佢話咁樣又係浪費，叫我地如果有需要的話就去買啦，咁會長話下次你地安排人去買米得羅，唔洗人地送啦，又係咁啦，所以下個月開始，我要負責埋買報紙的工作，因為佢話係秘書做的喎。是但啦。又係我架啦。 開完會之後，佢地就叫左我地出去，因為佢地秘密開會，傾炒亞姐，咁lee個時候，rebecca就話不如搵番may番黎做啦，就係咁，大家一致贊成啦，而我就成為左會長的心腹，所以佢加我人工，我應承大家會請大家食飯架，尤其是秀芳、大佬同慧英啦，多謝體諒同支持。

>>March 23, 2005 at 11:14:40 AM GMT+8

2005 年 3 月 16 日 星期三 【晴】

■■■	冇那那又去左會長公司....	■■■
今日好地地，過左半日，因為當亞姐見人的時候，我心裡已想到要走啦，但唔知點解一早就聽到會長好惡咁話亞姐，亞姐都唔知發生咩事，鬧到佢喊咁濟，當我地想細問的時候，會長又打比我啦，叫我下午同會計一齊過去佢果邊，又問我地識唔識打字，冇那那又問亞姐識唔識打字，又問ｌｅｅ又問路。 咁當我地再問亞姐的時候，佢話會長話佢請人的時候，唔叫佢打字，只係比張倉頡紙佢寫碼，所以會長話佢羅。咁我就話其實大致上都係咁架啦。咁我就話咁關我識唔識打字冇關係架喎，又唔關會計事，冇理由燒埋落佢地度架。 咁我地就好緊張啦，當搭車的時候，我即刻打比rebecca啦，問下佢8唔8到野啦，同埋會長知亞may番黎未啦，佢原來話會長唔知亞may番黎，佢老闆都未講，再加上佢話會長心情好飄忽，所以好難估佢做咩叫我地去佢公司啦。 當去到佢公司之後，原來佢話好唔鍾意新亞姐的做事方法，覺得佢好唔掂，又唔識organise野，又唔識做野，連小小野都要教佢做，覺得佢好唔得，咁我地就知啦，原來佢想留我地而炒亞姐，當佢問會計的時候，會計就好堅決咁講要走啦，其實我地係樓下都傾左一陣先上去架啦，所以佢的決定我唔太意外，所以會長叫佢走先喎，咁我就死啦，一坐又係2小時啦，仲要係又要講番果d野啦，又係果d同果d啦，今次仲厲害，話我同佢好夾喎，佢當我係佢阿妹喎，要照顧住我同睇住我成長喎，真攪笑呀，好似講到一家咁，但點計我都唔會係佢阿妹啦，佢做得我阿爸架啦。跟住我話不如比我諗下啦，我見你都見工啦，會長仲攪笑呀，佢話要唔要我跪你先留低呀，橫點lee度冇人呀，我跪你冇所謂架。咁佢竟然行出黎，我又即刻企係身，佢行到我面前，當佢想跪的時候，我即刻話唔好呀會長，我受唔起呀。會長就話，咁當你留低啦，如果你係出邊有咩攪唔掂，你call我啦，我電話24小時為你服務，無論係做工又好，其他事都好，我都會幫你架。佢心諗d野真係怪呀。 之後又傾左一陣，傾到我都識得背d野出黎啦。傾到成4:00先走人。 返到公司之後就confirm晒d野啦，跟住就同舊亞姐傾左一陣之後就可以執野走lu，因為約左小組去pizza hut食野，去到的時候原來已經叫左野啦，但原來係好少野食咋喎，但明明話買pizza買一送一架嘛，唔係好明好似冇食過野咁，之後就去左食糖水啦，但果間d糖水就真係麻麻地，我叫左個芝麻糊加湯圓啦，d芝麻糊係用水黎開架，d湯圓仲驚，好似放左好耐咁。之後食左小小就放棄左lu。

>>March 23, 2005 at 11:05:09 AM GMT+8

2005 年 3 月 15 日 星期二 【晴】

■■■	會計走，但舊亞姐又番黎做....	■■■
正當決定要走的時候，會計又遞左封辭職信，剛剛又聽到以前亞姐(may)會番黎做喎，真係難去取捨。因為明明決定左走，但會計又走，又攪到件事情複雜化，跟住rebecca又話我知may會番黎做，堅決咁要求我留低，唉......事情究竟會點架，好似日日都有新進展，日日都要新消息，日日都唔同，我祈禱求主指引我路姐，唔係咁都唔得呀。 尋日開完基金會會議，事實上同實際上我都唔想去知，同去理，因為實在太多野攪啦，我最怕麻煩架啦。不過又要去做，問新亞姐時，佢竟然話﹕我都唔知你地傾咩野。....................真係勁呀，開完會都唔知我地傾左咩，最攪笑係cecilia，佢到坐車回來的時候，先問新亞姐係邊個老闆的秘書喎，真係攪笑到暈呀。 lee排日日都係聽到會長的電話，好煩呀，好似一部錄音帶咁，不停播番果幾段說話，不停講，不停講。聽到人到煩又厭。 不過最近學習祈禱的方法都係求主使我明白祂心意如何，教我如何走天路。每次好煩的時候，我就去祈禱，心裡果然有平安，平安是最重要，當心亂如馬的時候，我就去祈禱，求主引導我走義路，明白祂心。當我每次咁樣祈禱後，往往都有出人意外的平安臨到。主確實冇謊言的神，主又是我腳前的燈、路上的光。

>>March 22, 2005 at 10:24:45 AM GMT+8

2005 年 3 月 13 日 星期日 【晴】

■■■	會長過黎我地度...	■■■
今日亞姐去左會長果邊傾計，我就親亞姐離開左的時候，再打比會長，confirm我都係走啦，咁會長那時候都好燥咁講野，你係要走我都要同亞姐傾架啦，等我傾完先啦。收線之後，我就諗如果順利的話，咁我都可以4月11日番新工架啦。 下午亞姐回來的時候，佢眼紅紅喎，咁我就問佢咩事啦，因為會計今日請假，得番我同亞姐係公司啦，咁亞姐就話會長話佢，話到佢好似佢公司隻狗咁，佢話send e-mail有咩問題先，會長反應大到嚇死人咁。佢又話唔識打中文好有問題咩。好似佢好大問題咁。咁我就話﹕算啦。會長係咁架啦，其實佢係好奸架。你自己小心d啦。跟住佢就話﹕會長下午過黎喎。聽住之後，嚇死我呀，又過黎，大佬唔好啦。最慘係又聽番果d樣，又要call會計番黎一齊聽啦。 4:00會長加秘書，再加常務副會長的秘書同我地3丁友一齊開會，會長一開始就講﹕都唔知你地攪咩鬼，3個人都有咁多不和。講完亞姐又講我，講完我又講會計，講完會計又講番亞姐，輪流不停講。足足又講左2小時，之後佢叫我﹕不如你當幫下我，幫我多一星期啦。咁我見佢咁，就話好啦。我都諗事情已經明朗化啦。一天光晒。 當會長走的時候，會計竟然遞封信佢比喎。嚇得我地死死下，會長興到呀，即刻推會計入去會客室，因為那時候，我仲係度執緊野啦，我地都唔知發生咩事。會長果一刻好似想食人咁呀，不停話會計係度玩野，佢好似失控咁，不停用支筆指住會計，嚇到我地死呀，好似想打埋佢度咁。原來會計就話其實都諗左好耐，因為亞may走所以冇辦法啦，但當穩定左之後，佢想轉番去做全職會計，但那一刻會長真係惡得要命呀，雙眼通紅，個嘴翹起，2隻手不停郁，把聲大到嚇死人咁，真係好想打人咁呀，嚇到我地咁多個唔敢出聲。當會長走左出去之後，又頂唔順條氣喎，又走番入黎再鬧過，又講會計玩野，又話﹕你小心d呀，我識好多人架，如果我你d資料佢地，你估有冇人會請你啦。跟住又話﹕你係小職員黎架咋，唔好以為咁樣可以玩到我呀。情況再一次失控呀。之後鬧完又走左，那一刻會計先開始喊，但其實我地個個心都震晒。 之後常務秘書又做和事佬咁，同會長傾，會長又第一時間同常務傾，常務又打比秘書又傾，真係辛苦呀。之後會長又打比我啦，又叫我不如考慮留低啦。

>>March 19, 2005 at 2:49:10 AM GMT+8