2005 年 6 月 10 日 星期五 【晴】

■■■	同芬芬親近主	■■■
星期五知道芬芬係星期六會黎一齊親近主，所以特別係晚上預備下同佢親近主的聖經同資料。 因為今日我要hold遊戲同生日會(其實想搵其他人架，不過冇其他人選比我，最後都係我啦。)所以要買好多野﹕蛋糕、橡根、膠紙等材料，一早行落街，最後都係最遲先到大牛，但當中感恩係，原本諗住去觀塘買蛋糕，因為藍田係冇靚蛋糕買的，最後因為等唔到車，惟有行落去地鐵站啦，去到美心都係冇平蛋糕，最後惟有去聖安那睇下啦，因為我覺得lee d大型餅店係冇得買細細個的蛋糕，但點知竟然比我睇到喎，真係感謝主，人的末路，就係神的出路。 同芬芬一齊親近主的時候，佢仲係好留心聽你講野架，無論你覺得自己講得好還是唔好，佢都碌大隻眼咁望住你，好留心你教佢去親近主咁，真係對我一種鼓勵，因為我預備得麻麻地，我又驚我自己講得太深或者用得太多屬靈字眼，佢會唔明白，但感謝主，佢都可以簡單地明白。雖然時間唔係太長，但都算係第一次的開始，今日都叫左係我對得芬芬最長時間的一次聚會，以前通常我星期六都會遲到，所以冇咩時間同佢傾計，今次仲叫做多左時間一齊。 之後就一齊食師姐煮的米粉，食一碗好似食左10碗咁，因為太熱，會食好耐，又好飽咁。之後就去了3a初信聚會，由於曉琳的同學仔黎左，所以我陪佢傾左一陣計，然後就參加擘餅聚會啦。聚會完左之後，就係生日會啦，第一個遊戲係踩波，今次個個的目標都係慧英，因為佢生日呀嘛，雖然人唔係太多，但個個都玩得好開心呀，多謝碧茹幫我諗這個遊戲同借出汽球比我呀。 第2個遊戲係從報紙中剪出祝福語句送比主角，最冇厘頭的係惠儀仔﹕唔落實中央政策。之後就回家食飯了，因為今晚做節，又係豐富的一餐，食到飽到嘔呀。

>>June 14, 2005 at 6:33:35 AM GMT+8

2005 年 6 月 9 日 星期四 【晴】

■■■	pizza hut小組	■■■
我地尋日去了pizza hut慶祝慧英的生日，走的時候，其實可以好快就到，但去到地鐵站口先記起自己唔記得帶d糉比姊妹，所以又番上去公司拎，其實有諗過唔去拎架，但如果唔拎又唔可以早d比d糉佢地，所以都係跑番上去拎，拎完之後又跑番去地鐵站，真係一個好運動呀。 去到pizza hut都差不多齊人架啦，跟住我地就叫野食啦，其實12個人，我地只叫左個4人餐同2人餐，我都估到係唔夠食架啦，最攪笑係佩思，因為撞跌左杯水，當攪好晒d野的時候，枱面上已經差不多食晒d野，攪到佢咩都話未食，咩都要留番比佢，但其實係咩都冇架啦。最後我地又再叫野食同野飲。 當食完的時候，我就叫佩思埋單啦，咁順便填左張意見調查表，因為佢話有優惠券送所以我地先填咋，填完佢就真係送左張優惠券比我地，就係午餐買一送一，但日期係限於6月29前，所以我地轉送比敏萍姐，之後我地就走啦。 出到去，佢地又話去廁所啦，攪完一輪先走，咁lee個時候，佩思就接到個電話，跟住就拉住我話我知﹕pizza hut話我未簽單呀，你陪我。攪到我地又急急腳步番去pizza hut，跟住果d人話﹕小姐，你未簽單呀，張咭都仲係我度，好彩你張意見表有你電話咋，如果唔係我都唔知點通知你呀。哈哈.....就係咁，佩思又成為眾人話題。真係攪笑呀。 之後又行左一陣，其實走出pizza hut的時間係8:30，但去到地鐵站竟然係9:30啦，最後大家都好疲倦咁回家。

>>June 14, 2005 at 4:26:26 AM GMT+8

2005 年 6 月 8 日 星期三 【晴】

■■■	得閒日子3-邀請慧英上黎我公司	■■■
今日中午，我邀請慧英上黎我公司，因為我公司得我一個，其實原來得自己一個都幾悶架，自己唔會同自己講野，有時冇電話的時候，真係好靜架。 原本星期三的祈禱，改為星期四，再加上我公司冇人，所以我邀請慧英上黎我公司，參觀下同祈禱。佢一入度黎都係話﹕嘩...乜咁細架咋。係呀，真係好細架，2步都微波爐，再後2步就係廁所架啦，入面間房都大d啦。都算係咁架啦。 原來我同慧英一齊每星期一日的祈禱都run左一段一時間，心靈彼此都有支持，起碼我講我啦，有一個人定時為自己祈禱係唔同d架。不過這個祈禱只能去到6月最尾的一星期，因為慧英已辭職了。心裡希望她能心靈快快恢復，又想佢搵番份工係我附近啦。 今日的問題又再係纏繞係藍眼睛同老闆的身上，最後攪到我親自打電話同佢老闆傾，因為藍眼睛已經唔再聽我電話，只用e-mail溝通。但當我同佢老闆傾的時候，佢原來又冇話一定要出通告架喎，仲話我知呀，要同d老闆傾好先出，我明架。原來佢同佢秘書之間係冇溝通架，一個就明白，秘書就唔明白，真係激死人呀。 之後，又係攪icac的問題，又再比中聯辦高層指示我地去做野補穫，又要打晒比d老闆問ok唔ok，講到口水乾呀，仲要係不停講喎，但問題係會長仲話我耐喎，真係呀。

>>June 13, 2005 at 8:59:02 AM GMT+8

2005 年 6 月 7 日 星期二 【晴】

■■■	得閒的日子2	■■■
今日又係得閒的日子，但中間不斷收到亞姐的電話，一時又話咁，一時又話咁，咁佢點到我死死下。但今日最激氣係收到個電話，個藍眼睛秘書(點解我會叫佢做藍眼睛，因為佢搽d eye shadow一定係藍色，仲要係好sharp的顏色，即頭好似見x咁，2塊面就粉紅色，個咀就係紅色，但個人係接近40歲的老女人)。 佢不嬲都同我地唔妥架啦，今次佢仲串我喎，因為佢老闆跟緊個project，但因為係亞姐跟緊，咁所以我一直都冇理會，而因為亞姐佢出左團啦，咁佢無那那星期二晚6:00叫我出fax啦，咁我梗係唔出啦，因為未問清楚啦。咁佢今日又打黎，問我出左未喎﹕ 佢﹕你出左通告未呀? 我﹕出咩通告呀 佢﹕尋日叫你出的問人拎取或者資料的通告呀 我﹕未喎，因為另一個老闆有意見喎 佢﹕個個老闆都有意見架啦，你而家係米唔想幫我老闆做野呀 我﹕唔係呀，不過我好難做架喎，佢係話有意見喎 佢﹕咁你即係唔想打我老闆工啦，第2d老闆有意見，你就做人地果d啦 我﹕唔好咁講呀，我都係幫個會打工架咋，冇話幫邊一個打工架喎，你攪錯 佢﹕我一定會同我老闆講番架，你地根本就唔想做，你地係度打龍通 我﹕你唔好咁講呀，況且你都冇比晒d資料我啦，我點寫呀 佢﹕我冇比你，咁洗唔洗我過黎睇住你做呀，咁不如我做埋你果份 我﹕你唔好覺得我好得閒呀，lee度得我一個，我好忙架 佢﹕哈...係咩，我成日都覺得你地好得閒架tim 跟住仲收左我線tim，真係激氣到我死死下呀，好嬲架果一刻，因為冇那那比人咁話法，跟住我就即刻打比老闆秘書問清楚，又打比亞姐報告下情況。之後交左比果個老闆秘書同佢傾，佢仲發脾氣tim，我都費時理佢。

>>June 13, 2005 at 6:23:10 AM GMT+8

2005 年 6 月 6 日 星期一 【晴】

■■■	得閒的日子	■■■
由於亞姐去左團，所以只得我一個人係會度，所以時間就係我控制範圍內啦。其實一早都好擔心個團，因為好驚d機票啦、酒店啦有咩問題，因為全部都係我跟進同聯絡的，如果有問題，我就好大件事架啦。所以一早就為左佢地祈禱，求主都保守佢地啦，其實這是我第一次為佢地祈禱，我比較少為左d老闆出團而祈禱，今次為左佢地祈禱，應該我都係為左免卻我不必要的麻煩姐。哈哈。 由於我可以準時放工，就係咁，我星期二的祈禱會可以早到去，雖然話早，其實都唔係太早，去到大約7:30啦，已經係敬拜中啦，但唔知點解我全程都好眼訓，雖然冇訓著覺，但係好疲倦，好想聽入耳d信息，但都係入唔到心，又寫唔到有咩筆記，所以係9:00我就同大妹姐、敏萍姐走，因為大家都疲倦同埋趕時間。

>>June 13, 2005 at 5:21:51 AM GMT+8

2005 年 6 月 6 日 星期一 【晴】

■■■	性格意向	■■■
綜合所有結果，你的性格類型偏向於 社交性格類型 性格類型(personality) 開朗、友善、給人溫暖的感覺、懂得關心別人、易與人合作、社交生活很好、富同情心、有教導能力、易於敏感別人的需要、樂於助人、很有耐性及體諒他人。 工作態度(values) 他們比較喜歡團隊性的工作，工作前需要有充足資料才開始，喜歡與別人溝通之下才進行工作，希望在工作上能幫助到別人。 工作興趣(interest) 這類型的人喜歡做能幫助人的事情﹕像教學、輔導和提供資料。他們一般來說都避免操作機器、運用工具或利用動物來達到目標。對解決社會問題、個人內心問題或教導上的工作尤有興趣。 工作技能(skills) 良好的溝通能力、聆聽能力、耐性、說話技巧、教導能力、設計活動能力、領導及組織團體的能力、團隊合作能力 學習範疇(education area) 教育、輔導、社會工作、幼兒發展、外語、心理學、社會學、宗教哲學、人際關係溝通。 相關行業參考(related occupation) 教師、幼兒護理、社會工作者、心理學家、輔導員、職業治療師、物理治療師。 又好似講得幾中咁喎...

>>June 13, 2005 at 5:21:39 AM GMT+8

2005 年 6 月 5 日 星期日 【晴】

■■■	又係好眼訓的日子	■■■
lee段日子又係好眼訓，好多時候我個腦都好似諗唔到野咁，目光呆濟，好似飲左豬油湯咁，感恩唔洗去團，如果唔係真係打橫出番黎都似。 星期六同星期日的聚會，對我來說只是一般，一般的意思不是沒有感動，只是太過疲倦所以沒有什麼得著姐。 星期六下午完左的分團遊戲，又左一次笑到我流眼水呀，真係笑到死咁濟，尤其是妍妍的樣呀，湯碗面型，2大眼但冇珠，外星人耳仔，齊陰，真係笑死人呀。 星期日下午完左相聚之後，又係疲倦到死呀，跟住大佬盛叫我玩騙局喎，起初我都唔知係咩，跟住我以為玩uno啦，點知唔係喎，原本係話輸左的要請食飯，或者人地請你食5杯雪糕，好彩我唔係輸左果個，輸果個係小志強，佢一鋪輸左360分，所以佢請左我地去滿記食甜品，我地請佢食飯。

>>June 6, 2005 at 10:07:17 AM GMT+8

2005 年 6 月 3 日 星期五 【晴】

■■■	我又唔洗出團啦...哈哈	■■■
原本安排我跟去的浙江團，尋日下午會長去完icac接受完調查之後，就話冇事，只係會作簡單警介，所以佢決定去番浙江團，之後佢就叫埋亞姐一齊去，因為原本都係亞姐去的，所以亞姐就去番，而我就留低係會度做野。聽完亞姐講之後，我就開心到死，但亞姐就超唔開心，因為佢覺得佢同會長好難夾到。 跟住亞姐就話打比出機票的公司啦，睇下出左未，有冇得改啦，我一問之下，原來我那一張機票已經出左，咁同亞姐講番的時候，佢又再同會長講番我的機票已經出左啦，原本佢諗住會長會講話咁都係叫我去啦，點知會長話﹕咁咪用小小錢改名羅，唔係咁都要我教你呀。哈哈.....yeah....注定我唔洗啦，因為其實我真係唔想去架，亞姐見會長都係唔會叫我去，咁佢就轉移目標叫會長叫埋副會長的秘書一齊去，因為佢係負責跟寧波團的人，所以會長就幫我地叫埋佢去，但其實佢係超唔想去，唔知會唔會嬲左我地tim。 之後，我同亞姐的工作就開始調轉，我負責跟團的事就轉比佢跟，佢跟下星期的野就轉比我跟，但佢一路講的時候，就一路話其實應該係我去喎。我都唔理得佢咁多啦。

>>June 4, 2005 at 2:55:24 AM GMT+8

2005 年 5 月 31 日 星期二 【晴】

■■■	我又要出團啦	■■■
我地係6月7-10日攪左個浙江、江蘇考察團，原本我地係諗住我同亞姐都一齊去，咁所以我就冇咁著重去跟團裡的事，大部份都係亞姐同2個副會長的秘書跟進。但係5月30日開會的時候，因為會長發現人太少啦，再加上會計又唔做，咁唔可以個會冇人架嘛，所以決定由亞姐去，我留守係會啦，果一刻真係開心得好緊要呀。 跟住事情就有新發展啦，因為長毛指控我地會，咁廉署又接手調查，咁會長就決定唔去團，留守係會，而佢又叫亞姐一齊留守，睇下情況如何，跟住會長就同我講，咁冇辦法啦，你去啦。......我只能回答﹕哦.... 就係咁的情況下，我要接手跟進的工作，係全部野都係我呀，我一個人要帶2箱物資，又係深圳搭飛機，仲要係冇旅行社，自己一個人攪晒酒店、機票同其他人協調的工作，但個會仲有好多野做喎，真係想死咁呀。 在此，希望各位都為我多禱告，求主使我有智慧、聰明，又使萬事為我效力。仲要有健康的身體。多謝晒。

>>June 3, 2005 at 1:59:03 AM GMT+8

2005 年 5 月 30 日 星期一 【晴】

■■■	坐benz送信	■■■
因為星期六會長唔係香港，而封信我地key左佢名後fax，所以尋日一早就上黎我地會度簽名跟住我就坐左會長的benz車去送2封信，地點係灣仔，但問題係因為會長又係要去過河剪頭髮，所以我就同佢一齊坐車，跟住司機仲要車左佢去先，問題就係咁發生啦，因為我話其實我搭地鐵會快d架喎，但佢點都要我搭埋佢架車，咁咪搭，點知司機竟然用東隨，之後係鰂魚涌放低會長之後，再經太古之後再去灣仔，坐車坐到我頭都暈呀。 送完信之後就返會繼續執野開會，開會的時候，會長竟然話要引咎辭職，因為係佢太急，冇諗過當中細節，所以佢要負責任，而今日報紙又有新進展，內容如下﹕ 四五行動成員梁國雄下午到廉署，要求調查上周有團體在報章登支持曾蔭權(相關新聞 - 網站)參選特首的廣告，是否違反選舉條例。 梁國雄表示，他認為廉署認徹查兩個團體是否故意刊登廣告，支持曾蔭權，企圖影響選舉結果，以及令到曾蔭權可以節省部分競選經費。梁國雄稱，廉署已收到他的信件，而執行處會研究他的理據，再決定是否立案。 事件發展會係點啦?我地唔知，不過中央就反應冇問題，會長最驚係連全國政協都冇得做姐。

>>May 31, 2005 at 9:15:21 AM GMT+8