2005 年 4 月 18 日 星期一 【晴】

■■■	GOLF DAY	■■■
尋晚攪LEE攪路，攪到12:00先訓覺，因為要執好晒D野，所以耐左。不過我心裡好有平安，因為我係沖涼的時候，我已為我今日的GOLF DAY祈禱，當中任何一個細節，我都有祈禱，咁就包冇甩拖，哈哈。 早上6:00我就起身啦，因為我叫阿爸叫我起身，當我落到地鐵站的時候(因為我搭皇崗車)，我見到有車啦，但原來那裡不是買飛的地方，我又要走番上去商場買飛啦，當買完落番去的時候，竟然架車唔等我喎，因為我好驚時間預唔好，當我唔開心的時候，竟然比我見到LEE次活動的TEAM LEADER，佢原來住係將軍澳，佢過黎藍田搭車，真係主真係妙呀，主一定知我怕一個人的時候，雖然遲左一班車，但又撞到個熟人喎，令我好放心，因為就算遲，都叫有多個人一齊遲呀，同埋佢話應該唔會遲到TIM。真係主的道路高過人的道路啦。 上到車食左個包之後，我就開始訓覺啦，因為太疲倦啦。訓醒都差不多到上水，跟住就係落車、上車、落車，因為過完關又上車，跟住到皇崗之後又落車，不過感謝係因為之前同cecilia去過2次，所以比較熟d，而集合地點我又知係邊，再加上又有team leader係度，放心好多。 集齊人之後就轉車去西麗球會，到達目的地之後，就見到大件事發生，就係唔知點解張3mX4m的開球禮廣告板竟然係門口度出現喎，嚇死我咁濟，跟住間廣告公司話係球會叫佢放的，而球會果邊又話唔知果塊係開球用的，真係激死呀。之後我叫廣告公司無論如何都要放番塊板落球場，但因為塊廣告板太大啦，冇門口比佢地落到球場，樓梯都轉唔到，佢地最後竟然選擇係個大窗口度將塊板掉出街，嚇到我地工作人員死死下，雖然2樓唔係高，但都好危險，因為佢連人都落埋去，情景係好攪笑，因為樓上有5個人推塊板落街，樓下又有人接住，不停叫。 攪好開球禮果塊板之後，我同會計就一齊坐車去check下18個洞的廣告板是否正確，我對上一次去golf場都係上年的事啦，但都冇落過場，冇踩過草地，今次竟然有機會一去，起初我會諗住好快就完，但坐車只轉一次18個洞，都要45分鐘，golf場真係大啦，仲有機會踩下草地tim。連會計都好開心，因為佢一心想落草地，去睇下人打下波。 回到球會大堂之後，就開始接待啦，因為差不多到11:00，有不少的參加者到，特別係見到林子祥，攪笑的地方係，我地收到報名表時，已懷疑果個報名的林子祥係米真係林子祥喎，當佢一黎到之後，我地個個都望住佢，好攪笑架的情景。之後又有藝人隊參加比賽啦，攪完d參加者，我仲有時間去食下野tim，之後到1:00就開始開球禮同正式打波，我地就上番餐廳等亞may黎，之後我地就分批去晚宴的地點set-up啦。 去到晚宴的地方，原來是十分普通，雖然環境是好古典式，但餐廳卻十分普通，不過因為是大公報找來的贊助，所以地方不是太華禮也是預料之中，但食物就真係麻麻地啦，連d老闆都話我地攪咩咁慳呀，冇錢咩。不過為左增加籌款的款項，所以冇所謂啦。 因為個個都好想快d走，所以我地8:30就走人啦，當宣佈回程的時間時，個個都拍晒手。但那個大公報的安排真係差得十分緊要，連司儀都冇叫，果時先安排人做司儀、程序又冇、食物又冇、咩都冇。真係激死人呀。 8:30抽埋獎之後，我地就回程啦，好開心可以咁快走人，不過返到香港都差不多10:00了。返到屋企都10:50啦，咁就唔見一日啦。明天仲要8:00開會tim，那那林沖完涼之後即訓。

>>April 21, 2005 at 8:56:07 AM GMT+8

2005 年 4 月 17 日 星期日 【晴】

■■■	忙碌的一星期	■■■
因為4月19日我地攪左個golf day，由4月8日開會的那一刻報名情況仍然係慘烈的時候，竟然今星期經過d老闆call人之後，最後都有21隊報名參加，雖然人係多左，但錢就唔見多左，因為當中有5隊係唔洗比錢的，但起碼都達到我地預期的目標﹕30萬元還要多，我都叫有個交待啦。 但這一個星期真係辛苦得要命，因為又要攪golf，又要攪5月20日的籌款晚宴，又要攪協會的function，日日都有人黎拜訪，又要接待，又要見人，又要開會。日日都有不同野攪，真係超忙呀。不過星期五都叫d野都有d毛目，因為廣告牌已經定左，名單已經有，仲係差小小 final再check多一次，同埋小小問題咋，其餘都算ok。 但因為亞姐19號早上要開會，所以只安排我同會計上深圳，另外，就係20號一早8:00竟然又要開會，天呀，咁對我呀，我驚我起唔到身呀。

>>April 20, 2005 at 9:30:01 AM GMT+8

2005 年 4 月 10 日 星期日 【晴】

■■■	星期日的相交聚會	■■■
星期日，我地係相交聚會，人比以往多，由原本諗住內定的人選，改為人人都要相交。心裡好寶貴b/s能透過相交彼此激勵及燃點。 雖然未聽特會的信息，但知道講十架七言，心裡好寶貴，早前買了2本書都是講主在十架上所講的話。寶貴能慢慢思想同細查。更寶貴b/s的相交，當中其實我心裡最欣賞美蘭姐所講的，佢所講的不是深奧的道理，也不是查考聖經，只是她平常一點一滴的片段，但卻令人得以認同及體會當中她的經歷。

>>April 13, 2005 at 11:00:59 AM GMT+8

2005 年 4 月 10 日 星期日 【晴】

■■■	連續2日的相交聚會	■■■
星期六晚同星期日都係相交聚會，星期六原本的同工相聚，由於D同工又好似唔多記起，大妹姐又唔記起，所以果日冇咩同工留低，而我又一早約左珮思祈禱，因為我地組的同工安排左每星期有一次2個2個的禱告安排，我就約了珮思星期六晚，因為我都唔記得要同工相聚。 玩完遊戲之後，我就同珮思一齊祈禱啦，我覺得惟有禱告才能使大家互相更加通透，更加通透才能使大家相處更愉快，事奉更同一，在禱告中也發現其實珮思心靈有一定的根基，她抓住每刻親近主的時候，雖然在忙碌的日子裡，心裡也體會她活出及能散發出基督的香氣。在禱告中，也能明白大家更加多。 完左同珮思的禱告，幾個姊妹一齊相交同祈禱，在相交中，心裡彷彿覺得大家好少時間走埋一齊去祈禱，不是沒有時間，就係太疲倦，又或者心靈沒有負擔。但今次只是幾個姊妹，在相交中感受到個別姊妹的需要同難處，寶貴在難處中我地能互相分擔。又寶貴大家藉著祈禱，能連結大家心靈，大家能彼此扶持，也能一同肩負神的工作。 完左禱告之後，我原來諗住回家，但大妹姐又話睇下弟兄食唔食飯，咁一齊行過去的時候，就見到啟言啦，佢不停問大妹姐可唔可以推薦個姊妹同佢一齊係全區學生度帶遊戲。以下對話係好攪笑架﹕ 啟言﹕大妹姐你搵個姊妹同我一齊帶遊戲呀 大妹姐﹕你唔好搵我果邊D姊妹啦 啟言﹕唔好啦，我搵左好耐，都搵唔到 大妹姐﹕你搵麗媚啦，又或者淑明姐果邊D人啦，我果邊D姊妹唔得架 啟言﹕是但一個亞姐啦，我諗晒D遊戲架啦，你派個姊妹出黎就得架啦 大妹姐﹕我D同工個個都好辛苦啦，你要搵個亞姐，你搵我啦，我係大妹姐呀嘛 啟言﹕下...大妹姐唔洗你出馬呀，搵D妹得架啦 大妹姐﹕我冇妹架，D妹唔得架，我又叫大長妹，你搵我啦，你唔好搵我果邊D人啦 啟言﹕大妹姐，你幫下我啦。維持秩序都好呀。 大妹姐﹕咁你搵我啦，D妹維持唔到秩序架，我啦 啟言﹕............................................ 之後，我地去左食金加利度食，埋單的時候，又玩猜猜誰。

>>April 11, 2005 at 5:36:56 AM GMT+8

2005 年 4 月 4 日 星期一 【晴】

■■■	去掃墓	■■■
4月5日係清明節，全家總動員去了掃墓，地點係柴灣，一如以往，阿媽買好多野，阿爸又抽燒豬，又係例牌去到柴灣行上去，又煙完一輪之後就走lu。 中午又係例牌去飲茶，飲完茶之後，我就諗住做好多野啦，1. 去九龍灣配con，2.去剪頭髮，3.去買衫，4. 去安靜，5.去陪大妹姐，6.回家上網聽特會信息。但你估我做左邊一樣..... 我首先打左電話去問大妹姐啦，因為我知佢要去睇跌打啦，又一定會去安靜啦，咁我同大妹姐講去陪佢啦，咁原來佢係朱記安靜緊，睇完跌打就要回家啦，咁講講下，我就開始好疲倦啦，咁佢又話其實唔洗陪都得架。就係咁，我就冇去陪佢啦。 咁既然佢唔洗我陪，咁我就冇打算去九龍灣啦。又由於好疲倦喎，所以唔諗住去剪頭髮啦，因為一剪又剪好耐啦。咁我就行左藍田匯景一陣啦，衫就冇買，諗住買鞋，又買唔到。 當想去安靜的時候先發現我原來冇拎聖經，咁就惟有選擇返屋企上網聽信息啦，當我上到教會的網頁時，原來佢地冇整好特會D信息，我之前幾日係見到架，有得DOWNLOAD架，但原來未得，咁又冇得聽啦。 之後我就決定............................去訓覺，因為太疲倦啦。哈哈.....由4:00訓到7:00先醒，因為要食飯啦。 食完飯之後，沖涼、跟住又訓覺。就係咁我咩都冇做過，果然中了之前有B/S的預測。我咩都冇做就係惟有去了訓覺。

>>April 11, 2005 at 4:47:39 AM GMT+8

2005 年 4 月 3 日 星期日 【晴】

■■■	慶祝兒童節	■■■
4月4日係兒童節，我梗係要同d兒童一齊過啦，佢地唔單止係兒童，仲係傻仔tim，有傻仔一號同傻仔二號，仲有個老師tim。我地一行四人，夜晚去食元綠壽司呀，感覺好耐冇食咁，好似好味左好多呀。 我地明明約7:00係尖沙咀等，我已經遲左小小架啦，不過傻仔1,2號都未到，仲要我等tim，真係傻仔呀。之後因為老師有病在身，起初諗住佢黎唔到，不過最後老師都有出現，不過好彩佢出現咋，因為傻仔食到唔停口，食到我肉都痛埋呀。不過見到傻仔食得咁開心，都扺啦。 一坐低，傻仔已經自己開始拎野食，起初係1碟平野，跟住就越食越貴，仲要拎一碟全場最貴的36蚊花之戀喎，嚇死我咁濟，但佢地食野係好快架，一眼見到佢地拎碟野番黎，第二眼就唔見左果2件壽司啦。真係唔知真傻定假傻。 食完壽司，傻仔一號話未飽，去行左一陣街之後，就去食糖水啦，其中最感動係終於聽到傻仔一號話自已好飽呀。終於最到佢講話自己飽啦，原來叫碗合桃糊比佢就得架啦，仲知我第一時間比佢食左先啦，不過佢話食左之後，好似要死咁，因為佢有啖呀，仲食d咁"傑"野落去，唔死都唔得啦，不過我地話都未聽過食糖水會食到死喎。 食完之後就要走啦，因為1個傻仔話要趕番去睇大長今，一個傻仔就話要行通宵，真係唔知邊個係傻呀。

>>April 9, 2005 at 3:44:57 AM GMT+8

2005 年 4 月 2 日 星期六 【晴】

■■■	好眼訓的星期日	■■■
近幾個月其實星期日逢親到聚會的時候，就會開始好好好眼訓，係好自然的好眼訓，嚴重到好想搵個位訓覺tim。唔知點解架喎，星期六就冇事，星期日一早都冇事，但到星期日係大牛聚會就會係咁架啦，一開始聚會就會慢慢眼訓，到中間時段就會更加眼訓。 好似今日咁，真係眼訓到不得了，敬拜的時候係冇心機，當聽大妹姐講野的時候，係左耳都入到入唔到一句話，仲要係訓著左tim呀。真係唔好意思呀我，但我真係太疲倦啦，美蘭姐話我精神恢復唔到，或者冇咁快恢復唔得咁快，所以咁容易疲倦喎，咁就死火啦，我唔想次次都係咁喎，可以點呀。 下午開始我地新組合的第一次同工相聚，好多人呀，我好似冇試有咁多同工一齊相聚，感覺好新鮮，因為我未試過同妍妍同燕瑜一組架，今次係第一次，講起都攪笑，同燕瑜咁耐，都冇試過一組，相聚時，我問佢3個問題，1.深入介紹自己，令人認識你更多，2.近期的心靈得著，3.需要代禱的事。 當大家答第1條的時候，原來個個都唔熟自己，因為如果認識自己多，咁就更加容易令人了解自己同明白自己的感受。真係要玩下了解自己的遊戲先得。但最攪笑係珮思的問題，佢竟然叫妍妍揀理科，理科前途好，仲要妍妍做護士或者醫生，因為老人家係將來越來越多喎。但我地話如果妍妍真係做左護士，咁d病人就死啦，因為妍妍實叫佢，你唔好郁呀你，你試下郁啦，我實拎支針插你。跟住又問妍妍，你逢星期幾學打波呀，妍妍話﹕我冇學打波喎。跟住當碧茹的時候，珮思又問碧茹﹕你逢星期幾練波呀，碧茹就話﹕我退左隊好耐啦喎。跟住到慧英相交的時候，佢竟然話自已，近期又耳鳴、嘴又生瘡、眼又痛。咁珮思又叫妍妍去讀醫科，醫下慧英，不過我諗妍妍未讀完，慧英都死左lu。哈哈。 今次相聚耐左d，因為個個都要講野，又要定目標同屬靈同伴，又要定禱告時間同人物。不過我最想就係同工們相熟，惟有心靈上的相熟，才能彼此相愛，同走天路。另外，就係心靈的需要，主不是要一個工人，而係要一個明白主心的人，美好的心靈才能幫到身邊人，事奉上我不怕沒有人，不怕多難處，只怕沒有一個跳動的心靈，彷彿死水一樣的不流動。惟願大家心靈係敏銳聖靈的帶領同彼此通透。

>>April 8, 2005 at 12:13:46 PM GMT+8

2005 年 4 月 1 日 星期五 【晴】

■■■	妍妍生日會	■■■
星期六完大左擘餅之後，我地就慶祝妍妍的生日啦，不過雖然話係慶祝，但玩的對象不是妍妍，好似變左係慧英咁，因為我地玩傻仔一號的時候，慧英輸得最多，佢起碼轉左30個圈或以上，所以佢稱為傻英。 今次玩的遊戲全部都係傻人先玩的遊戲，好攪笑。玩扑傻瓜的時候，小坤玩敏萍姐，話比佢知有人叫你呀，咁佢又走去叫人喎，咁小坤就話佢你輸左啦。 之後，多謝珮思為我地預備晚餐，十分豐富，仲有麗香的粉果tim，好正呀。一餐十分豐富的晚餐，食到個個都飽晒。

>>April 7, 2005 at 11:32:56 AM GMT+8

2005 年 3 月 30 日 星期三 【晴】

■■■	假期後的小組	■■■
3月31日，月尾最後一日，就係我假期後第一次見b/s的日子，今次小組係因為大妹姐唔記得同工相聚，所以特別加開的，小組中間，大妹姐冇那那係度唱大長今，就黎聚會的時候，大妹姐話會唱果首歌架啦，當係詩歌咁唱。 一去到大牛，就見到麗香，一見佢隻手直頭嚇死呀，因為係損晒，又紅又腫咁，嚇死人呀，當問佢情況的時候，原來佢踩單車攪到咁，但佢心情都唔好，可能心情唔好掛。 今次傾4月份的小組安排時，當傾點樣慶祝師姐生日的時候，佢成日叫人唔好理佢，要理會kitty呀，又要慶祝妍妍生日呀，跟住又話諗下幾時啦，好似講到大把人約佢咁。跟住我地惟有打比kitty問下佢啦，只幫kitty慶祝啦。跟住我話，好似上年咁啦，我地自己去食飯，慶祝師姐生日，但果次師姐係冇出現架喎。 之後去到9:00，我同大妹姐講，要返屋企睇大長今呀，所以好快地就完結我地的同工相聚。原來下次唔洗講咁多野，只要話返屋企睇大長今就得架啦。

>>April 7, 2005 at 7:59:40 AM GMT+8

2005 年 3 月 29 日 星期二 【晴】

■■■	回來又要忙碌過~~	■■■
一早就去了尖沙咀開會，早上8:30約左，但去到9:00先見到老闆到達，仲知我地約9:00啦，因為8:30去到尖沙咀係好辛苦的一件事。 開完會之後，都去到11:00，回到公司之後就預備晚上的接待，真係忙過不停，令人厭倦呀，不過今晚的晚宴的地點係皇朝會，食物一流呀，碗翅足足有十兩重，我地仲影左相tim，都幾攪笑，因為好似鄉下仔出城咁。 完左之後，就回家休息了。因為實在太疲倦，好似冇休息過咁。

>>April 7, 2005 at 7:51:25 AM GMT+8