2005 年 8 月 23 日 星期二 【晴】



>>August 24, 2005 at 3:53:10 AM GMT+8

2005 年 8 月 22 日 星期一 【晴】

■■■	與慧英的icq	■■■
今早竟然慧英係icq add我呀，真係超開心呀。因為我星期日先話掛住佢，點知，就能夠同佢傾到計，雖然唔係聽到聲，但都好過冇啦。 她的近況﹕ "其實屋企有部電腦可以上網架... 不過因為 56K 所以唔可以平時用黎上網, 要好夜先得... 但通常都會有人用電話，我都係上兩個星期先出左去出面 check email... 但個度只係開到 5:00pm, d time 好難 match。而每次都只是check email, 都無時間覆。 我黑左好多, 但唔知有無瘦到喎。因為我黎左幾日之後, 個重量比我之前印象中的重量少了7lbs, 但前一星期再磅時, 又重返 5lbs 啦。不過係唔慣成日要諗食乜野好囉... 以前阿媽搞掂架麻，但我估我唔會瘦，因為好多人都係呢度都肥返去架。 我睇左大妹姐的e-mail啦，知道司徒受浸，我都好開心呀。 我都睇左你upload 果個 movie... 詩歌欣賞會... 好好笑... 不過我呢度聽唔到聲係呀。我仲有將d信息燒左落 cd 度... 返黎可以借俾你地聽。我的回航時間﹕9月25呀, 返到黎9月27。"

>>August 23, 2005 at 2:19:56 AM GMT+8

2005 年 8 月 21 日 星期日 【乍寒還暖】

■■■	星期日聚會	■■■
連續2日的大雨，攪到個人心情都悶悶地，街又唔想去，係屋企就掛住睇電視，係時候我要整頓一下我的時間表了。 星期日一早，天沒有下雨，那那林出門口，去到牛頭角，又係傾盆大雨，攪到連條褲都濕晒，終於去到大牛門口啦，真係濕得完全呀。不過原來我都好早到。碧茹、惠儀仔同大妹姐就一早到左，因為佢地要負責去買野煮愛筵，真係辛苦晒呀，係最大雨的時候走，濕晒咁返黎。 親近主的時候，因為肚痛諗唔到野，超辛苦咁，不過疴完就冇野啦。相交的時候比倩盈笑死，講講下倩盈仲變了"真神父"tim，真係攪笑呀。由於有倩盈係度，相交時間長了一半，但都好好呀，起碼比個妹妹提醒番我轉頭tim。最後佢仲為我地祈禱tim，因為佢係神父呀麻，下次仲可以去告誡tim呀。 相交完之後，我地就吃飯了，辛苦大妹姐、碧茹同惠儀仔煮野食啦。今次食得好飽呀，唔知係米d長通粉太濟呢?又有長通粉、又有意粉，連沙律都有通粉，食粉都食飽了。 之後我就同麗香夾下星期的寶劍練習啦，今年係我第一年的嘗試出題，此終我覺得比d弟兄做會好d，但無奈地我地d弟兄唔出聚會呢。出完題傾左一陣計就諗住過番去聽全區訓練啦，但坐低的時候，發現我家團的妹妹個個好似遊塊咁，最後同敏萍姐傾過，都係叫佢地出去玩啦，今次的題目又真係深左d啦。 當可以坐定定的時候，已經差不多去到大半了，但志明哥講得好好呀，引導別人決志，唔係我話佢得救就叫得救。 之後又要送惠儀仔走，又冇左d機會去聽，番到大牛已經完了。跟住就睇佢地玩棋啦，有富婆so好豪氣咁講請人食10杯雪糕。真係唔好大佢呀，佢係富婆黎架。 之後就要走人啦，因為師姐打黎叫我叫佢地要走啦。差不多6:30走人。跟住我就回家啦，因為今晚去阿姨屋企食飯。

>>August 22, 2005 at 6:32:55 AM GMT+8

2005 年 8 月 19 日 星期五 【乍寒還暖】

■■■	星期六晚的飯局	■■■
星期六晚，我地一行人去了旺角新世紀食壽司，但其實中間係超攪笑。因為我一路都唔知去邊度食，係星期五晚終於問到珮思，佢話去新世紀或者黃埔食，咁我就話去旺角好似近d喎，咁佢就話好啦，去旺角食啦，我諗好架啦，跟住佢又話得架啦，我諗左架啦。冇問題架啦。咁所以我都係唔知去邊度食。 攪笑1﹕ 我﹕珮思呀，我地幾點走呀? 珮思﹕我諗要走d呀，因為要搭火車去呀。 我﹕下...搭火車，我地去旺角咋喎，要火車架咩? 珮思﹕係呀，因為新世紀果度我只係識得搭火車咋 我﹕(o了一個大嘴巴)珮思呀，其實搭小巴都去到架 珮思﹕咩原來搭小巴都去到架，你好叻呀 我﹕係呀，仲好快tim架 攪笑2﹕ 我地去到新世紀之後，因為同佢地失散左，咁打比珮思問啦 我﹕珮思，你係邊呀 佢只答我﹕係3樓呀，你地上黎啦。(咁就收左線啦) 但因為我地個冇一個個知去邊間食，咁我地惟有去到3樓之後就源路行去搵啦。 攪笑3﹕ 搵到珮思之後 我﹕珮思，我地係lee間食呀 佢﹕係呀，元禾呀麻 我﹕下...lee間叫明將喎 佢﹕下...唔係掛，明明係元禾喎 碧茹﹕下..元禾係深水步架喎 佢﹕係咩，lee間係叫元禾喎 我﹕珮思，但你拎住張飛都係叫明將喎 佢﹕係喎，點解叫明將架 碧茹﹕元禾係深水步架喎，係米buffet黎架 佢﹕唔係呀，咁碧茹lee間係米元禾呀 碧茹﹕我點知喎 我﹕珮思，你有冇記錯呀 佢﹕冇呀，不過我只記得個位置咋，間鋪頭名我唔知架喎 我﹕咁係米lee間呀 佢﹕碧茹係米叫元禾呀 碧茹﹕我點知喎，lee間我都冇去過 佢﹕咁等我問下間鋪頭先 最後發現原來明將同元禾係同一間壽司鋪黎。 攪笑4﹕ 珮思話﹕我睇左熱鬥小斑馬啦 慧珊話﹕係呀，咁好唔好味呀 我地話﹕下，慧珊，咩原來你食斑馬

>>August 22, 2005 at 10:27:04 AM GMT+8

2005 年 8 月 18 日 星期四 【乍寒還暖】

■■■	一路都係疲倦	■■■
由7月去完北京同內蒙古之後，病左一場，又忙完一輪，可以叫完氣大傷呀。到今時今日，我都未叫十分有精神。 其實時間運用方面都未叫最好，有時係屋企，會坐係度睇電視，睇到11:00都夠膽死喎 唔係屋企就梗係冇得好講啦，但親近主時間又唔係太多，朝早精神又不在狀態，放左工，又好似超眼訓咁，真係唔得你死呀。 但係擘餅聚會中，主的愛真係好感動我心，上星期同阿怡傾計的時候，我都有講番我的感受。有幾次感動到差點兒流淚，因為真係惟有主的愛才是最真的。 曾經令我感動的祈禱﹕ 為我地經歷好多個曾經，惟有是我地的罪將主推上十架 以往曾經的傷痛，多謝主親自的醫治 以往種種的傷痕/憂慮，感謝主親手的抹去 以往以為自己必定下地獄/步向滅亡，感謝主一次一次的挽回，使我人生步向光明同榮耀 若果要講千次對唔住去換取重生，我深信我講萬次我都願意 若要用今生去換取永恒的福樂，我想我也一定會願意 但主竟然願意將自己比我 雖然有時在地上若有所失，但天家的榮耀是我必得著的。

>>August 19, 2005 at 6:52:56 AM GMT+8

2005 年 8 月 13 日 星期六 【晴】

■■■	我地首歌嬴左呀	■■■
星期日的行程好趕急，我地約10:30係又一城等，都等下等下又等到11:00先齊人，跟住就那那林去親近主。因為我地今日下午要返大牛參加詩歌欣賞大會。 係地鐵站等緊人的時候，我已知大妹姐情緒好high架啦，一時又攞bb出黎，一時又又攞拍拍手出黎，最攪笑係，佢叫表演的姊妹唔好第一次就派晒d糖同紙碎，因為驚encall的時候，冇野派(不過真係如大妹姐所料，係冇得再派，因為已經比我地食晒啦)。 入到城大，大妹姐又話要影相，冇那那又唔知為左咩去影相，分組後，我地去到池塘邊，佢地又話要欣賞池邊風光，唱左首歌之後，望上天空，竟然比我望到隻好靚的雀仔，係好特別的，頭有紅冠，對翅膀d顏色又唔同，好靚。令我想到天父連雀仔都造得咁特別，何況我這個人呢。 睇完聖經之後，就同阿怡傾左一陣計，其實都係有計謀地安排，但感謝主呀，冇我想像咁差呀，反而大家有傾有講，仲講得明白佢tim。當中令我感動的是，神沒有因為我地所犯的罪而離棄我，我又何以離棄我身邊一d可能不太被關心或者唔聽話的妹妹呢? 中午飯又係canteen食，車仔麵已經不好食了，下次要改食其他先得。食完，因為慧珊的衫係白色，所以我同珮思幫佢去買底衫，最攪笑係我唔識路，珮思成日叫我跟住佢行，因為佢話佢自己成日行又一城，所以係好熟路，但佢叫我其他地方就唔好問佢啦。 去到大牛差不多開始的時候，又係大妹姐叫影相的時候，我地有一班專業fans幫我地打氣，全場最high的可以叫係我地啦，因為前排大部份都好靜。今次我地首歌得到3個獎呀，真係感謝主呀，我地諗可能人地d歌都係慢歌，而我地首歌都叫快歌，又有舞步，又係學生表演(因為話明係大牛學生詩歌欣賞呀嘛)，所以係子誠眼中，我地已經拎左唔少分。再加上我地主音有mic，所以得到佢唱咩，其他組果d太細聲啦，細到連開始左都唔知道。 中間環節，國章哥哥solo的那2首歌真係超水準，好聽到不得了。我好想聽佢再唱呀。表演完後，我地影大合照，之後就去mc記慶祝，真係好開心呀。不枉班妹排左咁多次。多謝主呀。

>>August 18, 2005 at 1:51:37 AM GMT+8

2005 年 8 月 8 日 星期一 【晴】

■■■	又係開會的日子	■■■
尋日又係開會日子，不過係另一個會-基金會，地點係尖沙咀的小東京，果間鋪係我會的一個老闆開-玩具大王，所以佢請左好多英皇的明星去剪彩，因為開完會之後順便係果度攪埋慶功宴，慶祝我地2次籌款活動成功，足足籌左100萬，d錢全部都係打老闆心口，所以請番d老闆食一餐，而秘書最後只得2位出席。 我地係6:00開會，開會的時候，大家的火藥味都好重，因為基金會會長講左捐出黎贊助的首飾而家話要收番錢，仲要收番12萬咁多tim，但佢又唔想講比人知，只比張debit note我地收錢，我地起初都冇講出黎架，但有一次協會開會食飯的時候，講左比會長知，咁會長就將發揚光大，講晒比d副會長知，基金會熟果d人，前會長知，攪到滿城風雨。由5月講到8月都未停講。 尋日終於了解此事，我地錢照比，但會長只做埋今屆，下屆不能再做，因為我地協議左要修章，會長只做一屆，而其他副會長只做3屆，執委就不限。 講講下，有位副會長冇那那又話要做物業估值喎，咁司庫就話唔需要，就係甘d火藥味又黎啦，一個話要做，司庫就話又唔係要借錢，又唔係要上巿，冇那那晒3000蚊做乜。大家火紅火綠咁，跟住創會會長就話由今屆會長話事，咁會長就話留番下屆先決定啦。就係咁，平息了風波。 開會開到7:15，因為我地約左其他人7:00食飯，所以就了結左開會，食飯的餐係特價餐，因為個老闆係度同我地一齊食飯，平時的450價錢一個人，尋日改為250一個人，但我就覺得麻麻地。d牛好老、d雜菜只係將d椰菜同金茹一齊炒，刺身只得三文魚同吞拿魚，250/人，我諗出面的buffet仲好味過佢呀。 之後d老闆繼續佢地唱k，我地幾個秘書就走啦，因為果時都差不多9:30啦。回到家差不多10:30，沖涼之後就訓覺lu。

>>August 9, 2005 at 7:15:59 AM GMT+8

2005 年 8 月 7 日 星期日 【晴】

■■■	船河由半日攪左全日	■■■
尋日又係一年一度的船河活動，事實上同實際上都幾悶，因為每年也是如此。 約左10:00係匡湖居門口集合，咁我就約亞姐8:50係彩虹，諗住9:15去到可以食早餐啦。尋日一早我仲早過返工的時間起身，7:30就要起身，換衫、執野，8:30出門口，去到彩虹剛剛8:50，但亞姐竟然話我知佢會遲到喎。去到西貢都已經9:30啦，果時已經有老闆到左，初初諗住冇得食早餐架啦，但好彩有個好心老闆問我地食左野未，我地答未呀，佢就叫我地去食野先，橫點10:00先係集合時間。咁我地就那那林去匡湖居惟一一間茶餐廳食野，我地只不過係食左件三文治同飲左杯野飲，跟住就走啦。 今次我地船河活動，由報名的40人到尋日真正的時26人，好心d老闆啦，去唔到就唔好報名啦。等到10:30準時上船，我地有2集老闆的船去，所以每邊差不多坐10多人，我同亞姐就分開船啦。 首先去蘇生的魚排度釣魚，但其實不是叫釣魚，只係可以叫捉魚，因為d魚其實係老闆一早叫人買定放係個魚排度，而船長又唔比野d魚食，所以當我地d會員一釣，佢地就會即係上釣的。哈哈，但因為d魚每條都要錢，所以蘇生當見到d人釣到3條的時候，就話夠啦，食唔晒架啦，放番佢落去啦。 另一隻就安排d會員去捉蟹，但d蟹其實又係前一晚放定係個網度，等d人去捉佢，又係扮野的。但d會員都好開心呀，起碼唔洗真係坐係度等呀。當玩完釣魚同捉蟹之後，蘇生又叫船長煮黎食，只係煮左3條魚咋，因為之後就食飯架啦。 我地今次去布袋澳食海鮮，其實我之前去過架啦，因為果時係標準有個舊同事佢屋企係果度，所以去過度bbq，但今次係去食海鮮，真係大碟到嚇死人，13人一枱，每枱大約食左3500蚊，仲要有好多野食剩，真係浪費呀，男士就係飲酒，女士就唔食野，我地就忙住招呼d老細，攪到冇時間食野。 食完飯之後，又要攪影全體相，跟住就上船去大清玩，起初冇人夠膽落水玩，個個都去訓覺同唱k(好舊果d款)，真係悶到死呀。不過之後，有個老闆話玩香蕉船，又撩d老闆玩，所以最後中聯辦d官啦，會員啦，都有落水玩，唔游都濕下腳。 當我坐快艇的時候，又比個船長叫我玩香蕉船，再加上蘇太又叫我玩，所以我就唔係太想的情況下玩，因為係d老闆面前，又加上我唔鍾意係佢地面前著泳衣，不過我今次有帶多件衫黎，所以唔怕啦。我地玩香蕉船，其實只係坐係隻船度，因為已經叫左個船長唔好整沉我地，所以我地冇跌到落水。 玩左一次之後我就去換衫啦，因為避免晒黑，又避免係d老闆面前著住件泳衣周圍走，十分不自然。之後就係睇佢地玩啦。到差不多4:00就回程啦，因為都要時間回航，返到西貢匡湖居都差不多5:00了。回程時，船長不停叫我靚女呀，靚女呀，跟住我同佢講﹕你唔好叫我靚女呀，我今朝一早比個玩得的老人叫我做肥妹叫到落船，而家你叫我靚女，我會唔應你架。再加上我唔係靚女。跟住佢竟然話約我去燒野食喎之後，不過我話我唔得閒呀。之後佢又叫我，好彩有老闆見到，佢就話佢係工作人員黎架，之後都要招呼d老闆，你唔好撩佢啦。但其實個船長係見我玩得又登我慘，全程坐係船艙出面晒太陽，所以叫埋我去姐，不過我同佢就真係唔係咁熟就真。 番到匡湖居都差不多5:00，跟住落船，攪lee攪路都差不多5:30，之後蘇生車我地去彩虹，我地分別坐地鐵回家。不過由於好晒呀，又好熱，整個人都疲倦都死咁濟。番到屋企，沖個涼就好想訓啦。 最後食埋個飯，大約8:30就訓覺，不過訓到10:00比家姐傾電話傾得太大聲嘈醒左，去到11:00又訓過。真係疲倦到死呀。

>>August 8, 2005 at 7:35:41 AM GMT+8

2005 年 8 月 3 日 星期三 【晴】

■■■	開會開到11:30呀	■■■
尋晚我地會攪第11次論壇，真係唔知要攪幾多次，因為lee個其實係2年前的會長攪出黎，但攪攪下，攪到今年仍然繼續，雖則冇咩做，但其實多一個咁的附屬會，令我地做多好多額外野，但今年會長又唔明白，成日叫我地唔好理啦，唔好攪咁多野，你估我想攪架，前前會長叫我地做架咋，真係麻煩。 不過論壇對於我來說係冇咩野做，但亞姐又要我地3個一齊去(佢、會計同我)，去到尖沙咀美麗華酒店剛剛好6:30，但已經有老闆到左，因為天氣太熱啦，所以D老闆去完第2度開會之後就過左黎。那那林SET好晒D野之後就可以坐定定等D嘉賓到。 差不多7:30，老闆都差不多到齊晒，開始的時候都算順利，我只係負責影下相，睇頭睇尾，即係2打6羅。跟住就係食啦，今次比起上次係帝苑好味好多，但價錢就相差好遠喎，上次帝苑差不多一個人要500/個，今次只係350/個，但今次竟然好食過上次，款式同味道都好好，真係衰在上次D老闆一定要係帝苑開會，如果唔係我一早換左酒店啦。 最後的美點雙輝，唔知點解佢分少比我，我得2粒，而會計就仲慘，唔記得佢果碟，所以經理特別係地下BUFFET果度，拎左3隻燕窩蛋撻比我地食TIM，哈哈，咁就賺左啦。 論壇傾完題目之後，係最痛苦的時候，因為要定下次論壇的日期同題目，我地由10:30開始，會長話好快架咋，傾15分鐘就走架啦，點知一傾，竟然傾到11:30呀，仲要係其實只定了日期，其餘的就冇定度啦，真係激死，不過冇辦法啦，個個都係老闆，一個話果日唔得，一個話果日唔得，一個話要請果個嘉賓，一個話請另一個。個個講過不停。 11:30，有個老闆個女打電話黎問佢番屋企，佢地大家先知果刻係11:30啦，所以那那林執野走，之後我地先執野再走，但亞姐仲慘，因為佢要傾埋D手尾，所以我同會計走先，今朝聽聞佢尋晚攪到12:30先走人。 回到家都差不多12:00，因為會長比我地搭的士，不過如果佢唔比，我同會計都諗住搭的士啦，大佬11:30啦。那那林沖完涼，上床訓，今朝差不多7:30先知醒，不過真係好疲倦呀。

>>August 4, 2005 at 9:52:25 AM GMT+8

2005 年 7 月 31 日 星期日 【晴】

■■■	創興水上活動中心盡興忘返	■■■
尋日一早起身的時候，天已經下大雨，心裡其實唔係咁想落雨去創興玩，不過諗下橫掂去創興又係濕，落雨又係濕，所以都冇所謂啦。 我地約左8:00係彩虹等，當我起身的時候已經7:15，執好野的時候都已經7:30，但果時係超大雨，所以坐多一陣先出門口，跟住我就祈禱啦，同主講出門口的時候唔好落咁大雨啦，果然，去到7:45之後就細雨左，去到彩虹都未算我係最遲，但其實我係超眼訓，好似遊魂咁樣。 坐巴士的時候，不停同樂恩同倩盈玩。轉眼間就去到創興啦，briefing完左之後，就係玩一陣間遊戲先，多謝燕瑜、樂恩同妍妍的預備啦。雖然中途都有落大雨，但竟然會濕水的話，就尤佢濕啦，我今年都叫醒目啦，由頭到腳我都帶一套，濕左都唔驚啦，所以我好盡情咁玩。 玩到12:00就去食野啦，可能今年唔熱呀，再加上濕左水有小小凍凍地，所以食野特別食得多，尋日我已經預備左1個杯麵，原本諗住比大佬盛的，因為起初講過包大佬盛食宿，我都有帶麵包果d，但感謝主喎，比我知道麗英多左一個杯麵出黎，所以叫佢讓埋比我，咁我同大佬盛都有得食杯麵啦。真係好開心呀。 食完野之後，等佢地換好衫，我地就下水啦，原本諗住玩水上單車，但比人玩左先，所以我地後一批的惟有等啦，但原來都有4個弟兄冇得玩，所以就叫左大妹姐去另外book多3隻康樂獨木舟，感謝主呀，比大妹姐book到，之後我就同樂恩一隻艇去玩啦，今次係我第一次玩獨木舟，原來都幾好玩架，但控制方面就難d啦，起初成日轉彎，之後都叫控制得好d，後來當佢地隻鳳艇出黎的時候，我地、妍妍、亞康同啟賢一齊夾攻佢地，但最後因為佢地有秘密武器--紅色大不不，攪到我地個個濕晒。 當教練見到我地玩的時候，起初都驚會比佢地話，因為以往咁多次都係比教練話我地唔聽佢講野呀，d野放到亂晒呀，玩的時候又玩錯呀。但今次d教練竟然同我地一齊玩喎，佢地見到我地就係咁撥d水埋黎，見到我地唔濕就攪到我地濕晒，之後仲幫我地去捉住燕瑜的那一獨木舟tim，真係好玩到不得了。之後我見大妹姐竟然同d妹玩水上單車喎，我即刻舉報佢的行蹤，最後全架車都濕晒，冇一幸免呀。 玩完獨木舟，我地就轉玩鳳艇，不過其實時間差不多夠架啦，我地玩到3:00其實要走，但佢地都比我地玩到3:10，真係好呀，有多10分鐘玩，不過原來玩鳳艇係好用力架，扒到我隻手斷開咁濟，我預言明天我隻手應該攰到死咁濟。我地玩的時候，最攪笑係倩惠，因為佢冇帶衫換，但佢都夠膽坐落黎玩喎，一路扒，一路叫﹕我冇帶衫架，唔好整濕我呀。不過d教練都係當聽唔到咁，起勢咁撥d入過黎，倩惠就一路叫，我好想返屋企呀，我返唔到屋企咁點算呀。真係笑到你咁濟。 去到3:10，終於我地都要走，我地上岸之後，都仲有同教練有說有笑，今年真係好玩好多呀。之後換衫搭車走人，去到西貢的時候，個人好似虛脫咁呀，好想回家訓覺。但最後去大食大妹姐最愛的車仔麵，之後坐小巴返觀塘，再轉小巴回家，返到屋企那那林食完飯就沖涼訓覺，因為個人已經疲倦到不得了呀。訓覺的時候好似係10:00鐘。

>>August 1, 2005 at 10:24:20 AM GMT+8