2005 年 10 月 30 日 星期日 【晴】

■■■	好飽的一餐飯	■■■
今日因為要開例會，所以好早就出了去。地點係灣仔萬麗酒店，其實我唔鍾意過海，因為好浪費時間。開會時間由3:45-7:00，坐係度又唔係冇野做，又不停攪野。 之後就係食飯時間，由7:30食到9:30，足足食左2粒鐘，但真係好好味D野食，食到個肚飽得好緊要。係晚飯的時候，個個都要講表揚下會長d威水史，連我地秘書處都要講。情況真係令人唔知點咁，因為d老闆講就話冇所謂，但我地秘書處係打工架麻，點講呀，講好又唔係，講衰又唔係。當我諗住講咩的時候，會長又搵番d陳年舊野出黎講，又話我d性格啦，跟住又講自己點樣教我啦，又話同我用心去傾計啦，講到我好似好有問題咁，跟住冇那那走埋黎同我握手喎，真係嚇死我咁濟。 之後，我地食到差不多9:30走人了。因為太飽，所以我揀左搭地鐵回家。之後同曉琳傾電話，因為佢正日生日呀麻。傾到11:20先返上樓。但沖完涼都係太飽，訓唔到覺，胃係咁有胃氣咁，所以要做下運動，大約成12:30先訓覺。

>>November 4, 2005 at 10:56:57 AM GMT+8

2005 年 10 月 25 日 星期二 【晴】

■■■	頻密的接待	■■■
星期一﹕接待中央統戰部，地點灣仔皇朝會，d大陸人唔係食野架，係飲酒同食煙，攪到我件衫臭晒。紅酒飲左16支，但係得3圍咋喎。我同會計因為冇飲紅酒，以橙汁代酒，但話要干杯，杯大橙汁要飲晒佢，攪到成日去廁所。返到屋企都要10:30啦。 星期二﹕中午接待內蒙古團，班友仔又係唔係食，又係飲酒同食煙，1圍飲左3支紅酒，個間房就煙霧迷漫，好彩我坐左出面，同2個工作人員叫點心食。攪到3:00先回程。 星期四﹕夜晚去了香港仔珍寶食飯，今次我地帶左18支紅酒去，飲到佢地面到紅晒，不過今次唔單止食煙咁簡單，仲要比人夾住影相，好樣衰架d大陸人，幾驚佢塊面痴埋黎呀。不過我醒目呀，我拎住部相機，係度不停同人影相，冇咩人同我影。最後坐佢地車返灣仔地鐵站，途中又話去唱k，又話要係車唱歌，真係費時理佢地呀。返到屋企都要11:30啦。 (相片1﹕珍寶景，相片2﹕同亞姐影，相片3﹕同會計影，相片4﹕同未來會長影，相片5﹕同工作人員影) 原本星期五約左舊同事食飯，但因為真係太辛苦，所以冇去，回家10:30就訓覺。要彌補不足。 下星期一又要開會加食飯，原本話唔食架啦，點知比未來會長話，秘書處係冇權話唔食，因為係我請客，所以又要留低食飯。

>>October 31, 2005 at 5:57:59 AM GMT+8

2005 年 10 月 22 日 星期六 【晴】

■■■	澳門旅程的感恩	■■■
起初諗到要去澳門，我覺得是件苦事，因為沒有了星期六與b/s見面，沒有一夜好好的休息，又要面對d老闆，心裡唔多願意同暢快。 但當我地星期五晚係酒店去廁所的時候，忽然心裡想起，我早前同主講過我好想去澳門玩。跟住我就諗起，我上次同上上次同b/s去澳門的時候，住的酒店就係我去澳門住的那一間酒店-皇都酒店。係廁所的時候，諗起怪不之我咁熟啦，原來我黎過的。跟住我就諗起上次黎的攪笑野，又諗起同b/s的趣事。同時也感謝主答允的心願-令我從遊舊地。 感謝主答允的小小的請求。果一刻即係冇咁upset，之後因為有機會同亞姐出去走一走。又有機會去義順，不過因為太夜，所以關了門，又有機會去手信街。又去葡京。又係上次去過的地方。之後回7-11，又令我諗起同秀芳、翠萍佢地果次去澳門玩的事。 之後我係廁所感謝主，無論我地每一個意念，其實主都好想幫我地達成，就算只不過一個小小的心願。多謝主使我有機會再去澳門，雖然今次係公司的關係去，但唔洗我比錢，都算好啦。仲有機會比我諗到主的愛。 主送比人的禮物唔會孤寒。

>>October 31, 2005 at 7:00:08 AM GMT+8

2005 年 10 月 22 日 星期六 【晴】

■■■	BBQ	■■■
今朝一起身已經9:00，約左10:00係大牛等，最後call師姐叫佢等埋我，點知原來唔係我最遲。 車程中，我訓了覺，真係超眼訓呀。去到大棠，又係果個地方去親近主，但親近主的時候，好舒服，唔單止清風送爽，仲體會主的愛與情。風吹草動，比我地知道，神好掛住我。相交中，體會神當我地未祈求之先，祂早前比過我地，可能係我地從未諗過的。 主的救恩，我地真係未諗過神會將救恩比我地，仲要係無條件的，世界上好多野都要以物換物或者等價交換，但寶貴愛我地的主沒有要求我地要比d咩野佢，佢就將救恩臨到我身上，奇妙嗎?希奇嗎?如果你唔覺得，我諗你真係要細想主的愛。 相交完，同碧茹傾左一陣，之後就開始bbq啦，一燒就不可收拾，連原本諗的遊戲都冇機會玩，因為太少時間啦，惟有改係下次玩啦。我地燒到3:30就執野走啦，因為要4:00搭旅遊巴回程。返到大牛後，又開始相聚，今次係聯團後的第一次家團長相聚，不過我真係太眼訓啦，個腦都諗唔到野，一味話係係係，麗媚同亞wing就不停講野，講過不停，又發揮佢廢人講廢話本色，廢話連篇。 去到7:00，原來佢地班弟兄仲未走，又睇下相，又攪下野，最後吹佢地先走，不過我太疲倦啦。最後回家沖涼，訓覺。

>>October 31, 2005 at 5:48:10 AM GMT+8

2005 年 10 月 21 日 星期五 【晴】

■■■	澳門第2日行程	■■■
第2日，我地set左7:00 morning call，我地執好野之後就拎埋行李check out，唔係好明，去的時候又咁重，走的時候又咁重，買的手信真係重得咁緊要? 我食左好簡單早餐，(炒蛋+1條香腸+1件蛋糕+1杯coffee)。就走啦，因為亞姐係下邊counter攪退房攪唔掂。澳門的5星級酒店真係麻麻地，國語又唔得，英文又唔得，好彩同佢講廣東話咋。最後又係我同亞姐包尾，d老闆自己走晒，我地就攪退房，攪到遲到先走，不過好彩係佢有bus車我地去旅遊塔。 去到又攪d老闆坐位，大會冇安排坐位的，又係自己攪。都唔知個大會攪咩。上半場好架啦，有大約300人坐係度，之後因為午餐我地被安排去第2度食，原來係旅遊塔食架，不過何源燊果仔話請客，所以就坐車去食飯，起初諗住好好啦，點知又好似d屋村酒樓咁，cheap得緊要呀。 食完飯去會場，冇左一半人，因為d大陸團趕住去買手信同訓覺。台灣團得番幾個，我地d老闆就走晒，得番d講者同d工作人員，我諗得番50人左右，場面好樣衰。不過今次唔係我地攪，所以我地都冇理到。 之後同會長傾過，因為大約5:30就完結，我地試下趕去碼頭搭船，原本我地買左7:15的船飛走，但我地要做後補。去到碼頭6:00船已經開左，我地惟有等6:15的船，我拎晒d飛排隊，d老闆坐埋一邊等，最後真係感謝主呀，因為老闆坐豪華位，咁我都估一定要位，係剩下我地3個普通位的有冇位，感謝主呀，當我埋到去的時候，剛剛剩番3個普通位。就係咁可以早d返香港。 返到香港，原來諗住搭地鐵再轉的士返屋企。點知去到碼頭，因為會長去廁所，所以遲左走，見到我地的時候，佢竟然叫我地搭的士喎，真係超勁開心呀。 返到屋企點知冇人，亞媽去到亞姨度，最後惟有又係食出前一丁做晚餐，不過因為太疲倦啦，食左小小就沖涼訓覺。第2日仲要去bbq tim。

>>October 31, 2005 at 5:04:50 AM GMT+8

2005 年 10 月 20 日 星期四 【晴】

■■■	澳門2日1夜論壇	■■■
星期五同星期六參加左本會同其他3個商會合辦的論壇，地點係澳門，開頭仲以為佢地會攪得好好睇睇，點知唔知係咪文化唔同，好似攪到好大陸feel咁。食的食物又麻麻地，真係差得緊要呀。 星期五，我地約左3:00係港澳碼頭等，所以我同亞姐1:00就走人，去到碼頭商場食麥當勞。之後就等老闆黎啦，最攪笑係會長到的時候，佢同佢助理一齊到啦，佢一黎到就話助理仲咩帶咁多野呀，我黎係叫你幫手架，你帶晒自己野唔得架，你估你係老闆呀，不過佢助理又真係誇左小小，一個人帶個手提包，又帶個旅行:琚A反而人地d幫手都係帶一個紙抽袋咋。 我同亞姐2個人，一人一個:琚A我果個仲要係超大的，我帶晒會果d野，自己野就只有一袋仔。我放了30本年刊(100頁的書)、30盒dvd，1個紀念品(另外3個我又要搵個旅行袋袋住)，會呔5條、都已經冇位啦，我件睡衣同牙刷只可以接到最細放入去，真係慘呀。 入到去等船的時候，我記得果次落船係要落樓梯的，我就超驚啦，因為個:痚_碼over 20kg，點落樓梯呀，諗緊的時候，有個工作人員問我地搭唔搭lift喎，我話乜有架咩，佢就話，係工作人員先搭得，不過我估你個:琣n重，同埋見你地同d老闆一齊，好似好高層咁，所以佢比我地搭咋，真係感謝主呀，因為d老闆真係唔理我地生死，尤我地2個女仔自己攪掂。 去到澳門，一出就有人接車，但因為我地要趕去見澳門特首，所以沒有時間返酒店，去到澳門禮賓府，原來係係d好似住宅區中間，有一個矮矮的建築物，就係禮賓府，再加上係小得可憐呀，令我印象大打折扣呀。係門口度等特首，由明明話提早5:00接見，等到5:30先出黎，特首真係特首，遲到到有掌聲。跟住的接見，原來都係門口講幾句，同第一排的重要人物握下手，跟住影大合照，影lee張相就真係辛苦呀，差唔多要企到出去門口先影得晒全部人，不過我淨係影自己果d老闆咋，其餘果d唔影都吧。 之後就返酒店啦，一返到酒店，亞姐就一支箭咁去reception果度拎安排房間，可憐的我就要一個拎2個箱，一個旅行袋，由旅遊巴返酒店，真係超辛苦呀。去到酒店又即刻去counter幫亞姐手，當分好晒d key後，我地返得房都已經6:45，7:00就話開始晚宴，得15分鐘，我又要即刻開箱，拎番晒d書、其他野出黎，一個人抽6袋野，去晚宴，不過好彩係晚宴地點係酒店內，如果唔係真係重死人。 去到晚宴地方，原來又係細得可憐，長型擺設，2邊肯定睇唔到野，我地又要霸一張睇到的好檯，之後又要搵老闆落黎坐，又要call人。當開始的時候，我再一次証明澳門人d國語係唔得架，因為果個司儀d國語，冇一個字係聽到，最重要係當佢叫國內代表出黎發言的時候，冇人出黎喎，原來佢讀錯人地的名字，人地叫王平，佢讀左黃平，當佢出黎的時候，仲教佢讀一次正確的讀音，真係瘀到爆呀。 之後晚宴，因為我地全場走去派野，派我地d年刊同dvd，冇時間食飯，再加上佢地d送係麻麻地，全部都係燒豬bb，燒豬手等，我只係食左個所謂的翅，之後就冇食啦。 當晚宴未結束的時候，其實都有好多人走架啦，因為佢安排得唔好，又冇話比人知程序，又冇話幾點做d咩，最後安頓晒d老闆走後，我地拎番晒d交換完的紀念品返房。 之後因為亞姐話要去買葡京曲奇餅，好彩我仲記得點去，所以就一齊去，落到去lobby，見到個熟的經理(因為拎房的時候，佢原來都係青島政協，我地有個老闆又係，所以同佢熟左)，之後佢叫我地唔好搭的士啦，搭佢地bus去啦，就係咁免費左一程車。 去到葡京，搵黎搵去都搵唔番果間鋪頭，之後我地去賭場果邊，問下人，佢又再教我行去，感謝主搵到啦。我地2個人買左5大罐曲奇。然後又坐車去鉅記買手信，2個人又買左400蚊走。真係滿載而歸。 返到酒店，因為未食野，所以去左7-11買杯麵食，番到酒店先知個杯麵冇fork，又要問酒店拎，食到晚餐的時間已經係11:30，應該叫宵夜先真。之後又開始pack野，又要執野，又要沖涼。最後攪到1:00先訓覺。

>>October 31, 2005 at 5:06:18 AM GMT+8

2005 年 10 月 19 日 星期三 【晴】

■■■	同姊妹食飯	■■■
尋日約左碧凝同晶晶食飯，因為好耐之前話約碧凝，又咁q地約到晶晶，原本話上上星期，點知晶晶又唔得，咁就改期，跟住因為我又要去澳門，所以又要改期。 星期二的那一日，撞到晶晶，同佢話我星期五唔得，咁要改，我就話，冇理由改明天架，佢竟然話我﹕我得喎。真係吹漲呀。之後我就約碧凝啦。佢其實唔得架，因為又係約左fd，不過我叫佢改期啦。就係咁，我地星期三去左觀塘amp食飯。 但因為我星期五要去澳門，好多野未整好。我都驚我會遲到，但感謝主，因為我幫中旅買船飛，搵佢買原來都會平d，如果係散飛的話，因為套票點都平過散飛，但我地d老闆係有錢人，所以冇所謂啦。之後中旅果邊，約我6:30係地鐵站交收船飛，所以我可以明証言順咁走人。 我地食飯的地點係叫做﹕Relaxing Tea House，最攪笑係晶晶book位的，但佢竟然唔知係邊架喎。去到諗住佢帶路，原來佢帶我地去客戶服務櫃台問路。真係笑死。 去到果間野，都幾靚架，又冇人喎，可以坐好耐先走果隻都得。坐低果侍應就問我地食咩啦，最攪笑係佢介紹飲花茶喎，足足介紹2次左，都係一模一樣的說話，最緊要最尾果句﹕你地餐茶如果改飲花茶都係加3蚊咋，好抵架，試下啦。真係又笑死。 食飯途中，都係講下自己的情況，講下家團的笑話，講下工作啦。其實我最想就係碧凝返聚會，不過我估都要一段時間先得。唯有繼續祈禱啦。我唔灰心，主都唔會灰心，還比我熱心tim。 之後傾到差不多9:30先走人，由7:30食到9:30，好飽呀，食野都ok喎，計過每人都係80蚊，都算係咁啦。走的時候，又到晶晶傾下計，不過今次一傾就傾到11:00，眼訓到死咁濟。又傾佢熟的姊妹情況，又傾佢自己，最後因為太夜啦，惟有各自離開。期望下次再有機會再約過。

>>October 31, 2005 at 3:49:50 AM GMT+8