2005 年 2 月 20 日 星期日 【晴】

■■■	好眼訓的星期日....	■■■
前晚因為食完藥跟住訓覺，竟然可以訓到9:00先知第一次醒喎，跟住頂唔順，再訓過，訓到慧英打比我先知我遲到呀，不過因為尋日冇咩人出，所以我放心遲到，去到大牛，因為又食左藥，所以係聚會的時候不停打呵欠，眼訓到咪埋眼都訓得著呀。大妹姐講d咩都聽唔到，最離譜係我可以合埋眼訓著tim呀，真係唔好意思呀。但我真係超級太眼訓啦。全日都係暈暈地咁過左去。 下午我地原本諗住睇阿祖受浸，但另外一個受浸的弟兄原來仲係清緊靈喎，所以拖到3:00都未開始，而我地又要緊住上去相聚喎，所以冇得睇到阿祖受浸，最攪笑係我地見到阿祖的毛巾好似地布一樣喎，我地就問係邊個送架，送條地布比你呀，跟住我就話基智的姊妹，又話同人係同學，毛巾都唔送條比人，不過阿祖就話冇所謂，仲話條毛巾跟左佢10幾年tim，真係笑死人呀。 下午第一次參加家服侍相聚，應該係家團長相聚，因為今次有成30幾人出席，全部都係家團長，下次叫埋慧英去先得，不過真係相聚左好耐，坐到個個都好攰，最攪笑係講找一個黎播vcd時，足足講左2小時，都未決定到幾時播喎，中途仲要加插志明哥同志誠哥講野喎，好似講左2個信息咁呀。當完結的時候，我明白大妹姐點解次次都話要去食d野，因為太頂唔順啦。 起初以為佢地走晒啦，點知原來佢地係2e做功課，真係全部都係懶惰的學生，惠儀仔的數學呀，攪到佢阿爸要吞鎗自殺，補習老師東東山再起再次出馬，仲可以認多個阿爺tim，惠儀仔真係厲害呀。

>>February 21, 2005 at 10:49:46 AM GMT+8

2005 年 2 月 18 日 星期五 【晴】

■■■	舊同事食飯....	■■■
星期六的那一晚，自己仲係度諗緊究竟去唔去同janice佢地一齊食飯，因為自己食完藥就覺得好眼訓，好想訓下覺，所以15，16咁，但當溫小姐打比我的時候，我就答佢ok喎，真係奇怪呀，可能果時病情好轉啦，再加上都應承左人去，咁咪去啦。約左溫小姐5:30係九龍塘等，跟住再去搭火車去大埔，途中話題都係環繞標準啦，去到大埔都差不多6:45啦，去到janice屋企又係見佢地打牌，我就陪alan打左一陣賽車game，都幾好玩呀。跟住再去食飯lu，全程都係講janice兩公婆的攪笑野，真係笑死人呀。 食完飯那那林回家，因為大埔實在太凍啦，今次收獲都不錯，因為janice比左3封利是，餐飯又唔洗錢喎，因為食左300蚊，亞明話佢請客喎，真開心呀。我地又定左下次gathering時間，係去食buffet，真係開心啦。

>>February 21, 2005 at 9:26:44 AM GMT+8

2005 年 2 月 18 日 星期五 【晴】

■■■	又腸胃炎啦我....	■■■
前日個胃就唔多舒服，攪到食小小就頂住，尋日一起身就開始疴，仲係不停疴，一想去就要即刻去，單一個上晝我已經疴左7次啦，雖則個肚冇肚痛的感覺，但成日去廁所，都攪到個人冇心機呀，中午我都冇食飯去左訓覺，唔知點解好疲倦咁，一訓就訓到1:45先起身去買小小野食，又唔肚餓，又唔想食野，都唔知點咁，下午再疴多2次，所以一放工我就去左睇醫生啦。醫生話我腸胃炎，再加上有小小傷風喎，我都feel唔到有傷風，不過佢話有就有啦，跟住我唔洗問，醫生就話係咪要假紙同收據呀，我笑住答﹕醫生你真係醒目架啦。 所以今日我放我自己假，原本都諗住返工架，不過諗下諗下，咁拼命仲咩喎，又唔係有得份，又冇獎架，所以尋日放工時我已同定會計講要今日做咩架啦，會計叫我不如疴清晒佢啦，早d返去訓下覺就冇事架啦，但我話﹕我都唔知幾時先疴清，一急就要去架啦，訓覺我都想訓呀。就係咁的情況下，我休息了半日呀。

>>February 19, 2005 at 3:08:00 AM GMT+8

2005 年 2 月 17 日 星期四 【晴】

■■■	又去美鳳屋企小組	■■■
尋日去了美鳳屋企小組兼簡單相交，我地約左6:30係鑽石山等，不過我6:30先走人，跟住我打比慧英的時候，原來佢係美食廣場買野食，所以我去join埋佢一齊上去，跟住慧英又話等埋麗香喎，咁我地就諗乜麗香咁遲ge今日，原來佢話師姐話佢知係美食廣場食埋野先上去美鳳屋企，但我地眾人都講過咁樣做法喎，當師姐打黎的時候，佢就話係敏萍姐講佢知架喎，但係敏萍姐又話冇講過啦，但唔知邊個講ge。 去到美鳳屋企，已經見到小坤同永康、大妹姐、敏萍姐等人，跟住第兄就落去拎飯盒，因為食飯盒比較方便同簡單，又唔洗洗咁多野喎，但原本我話有10人食飯，但除了慧英自己買野食，又少了kitty同珮思，所以得番7丁人，而美鳳又買了7個飯盒，攪到好似一個人食一個飯盒咁，最後，我地留番個飯盒比美鳳老公，同埋剩低小小咋，都算成功啦。 大妹姐食左小小之後，就話飽啦，又話自己新年都未肚餓過，又話自己想訓一陣，跟住又話要企，最攪笑係敏萍姐叫佢不如去磅下自己重左幾多磅啦，大妹姐話冇呀，因為未磅過呀。之後收拾d野後，美鳳又開始另一個食檔，生果啦、糖果啦、朱古力啦、餅乾啦、飲品啦、瓜子啦、開心果啦、花生糖啦、全部推晒出黎，大妹姐又開始話自己好飽啦，好飽呀，但係佢都會繼續食野架喎，次次都話食埋lee粒啦。真係笑死呀。 之後就係簡單的相交啦，敏萍姐相交自己的近況同間屋時，大妹姐講到d錢好係佢咁，好緊張又肉緊喎，師姐又在旁不停講，好似講數咁呀。 最後我地有個結論﹕大妹姐為左錢會去殺人、師姐就最唔在乎d錢、小坤就根本冇錢洗，所以冇得殺人又冇得狠。

>>February 18, 2005 at 6:58:12 AM GMT+8

2005 年 2 月 14 日 星期一 【晴】

■■■	好似都未好番咁	■■■
尋日起身之後，就同左阿媽、阿姨同家姐、細佬去了飲茶，那時候都差不多12:00lu。其實我一早起身架啦，但因為要等埋家姐、細佬，所以次次早餐時間都延遲去到中午先食，食食下，唔知係咪都係油得濟，已經走去疴左一次。 之後回到家，可能未試過一下食得咁飽，所以個胃唔係好舒服，跟住出左去行左一陣，因為要幫我阿媽買d野，我阿媽同家姐年初八去北海道玩，佢地冇諗住叫埋我去呀，原因係話知我怕凍喎，所以費時凍親我喎，真係對我太好啦。我叫佢去買手信，點知阿媽話自己唔識講果邊d話喎，我話﹕乜買手信要講當地話架咩，有導遊架嘛，你唔好扼我喎。 之後行行下又疴左一次，回到家唔知點解又嘔一次，攪到我咩都唔敢食，又冇胃口食野喎，我估我可能未好番掛。 ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ 今日因為太得閒啦，去左圖書館睇書，跟住去左球場親近主，因為我將公司條電話線飛左落我部手提度，所以電話都響過不停，但因為下午沒有什麼野攪，所以返左公司做左半日野，拆左d信，真係多到死呀，跟住check左e-mail，因為新亞姐暫時都未知幾時返工，所以我要做晒d野，如果我今日唔返工的話，我估我明天開工，真係做死我呀。因為d信又要覆，又有好多請柬，又有好多信，真係做到個人都煩晒呀。 今日為左聽左d野而心裡唔開心同憂愁，係球場親近主的時候，為左lee件事去祈禱之後先去睇聖經，好感謝主，主真係聽我祈禱，主透過聖經講明我心裡的憂愁同煩擾，當晚上再為此事祈禱的時候，就接到電話，電話裡的人比左個更加安心的說話我。真係多謝神，同樣祂確實是復活的主。 今日全日都只係食左半碗通粉，半個熱狗同幾隻餃子咋，個肚食小小野就好飽，好頂住，好想嘔番d野出黎咁，唔通真係有病?

>>February 15, 2005 at 2:03:32 PM GMT+8

2005 年 2 月 12 日 星期六 【晴】

■■■	馬鞍山親近主	■■■
星期日，我地家團去了馬鞍山親近主，這是我第一次去的公園，原本諗住好大好大的公園，好舒服咁親近主，但原來佢好近民居，有好多人行黎行去，又唔係好多地方，攪到我大失所望，如果早知係咁，不如去彩虹公園親近主還好，因為我對搭咁耐車有d反感，我會暈車浪呀，去到公園要有好長時間去休息同回氣，如果唔係我驚住我會嘔呀。 不過果日親近主都好開心呀，因為當放假的時候，我係屋企真係好少時間去享受，因為全屋都係人喎，好難係屋企親近主同唱歌比主聽，好開心果日去到公園，望望天、想想主，令我整個人好似回復氣息一樣，在果日的敬拜裡，我禱告﹕感謝主無論晴天、陰天、雨天，都與我同在，感謝主無論春天、夏天、秋天、冬天，主對我的愛仍不改變，感謝主無論我地的心靈如何，主仍歡迎我地返到神面前。 親近完主，例牌都係相交的時間，但因為要搵返倩盈所以遲左小小，跟住又要輪住個個都講下野，所以又遲左小小，再加上個個都有好多野想講，所以由原本諗住1:00完，一遲就遲到1:45都未完，攪到要大妹姐去搵位食飯先，跟住我地仲要送埋d妹走先到，去到大妹姐佢地都差不多食完咁濟呀。 食完飯，例牌又行一陣果度啦，不過過程係每行一段時間就有不同的b/s要走啦，走走下只剩下我地3丁人(大妹姐、慧英同我)，最後行到差不多諗住走的時候，大妹姐因為要去天水圍所以去睇下馬鐵究竟可以搭去邊，原來係可以搭到九龍塘，而因為我又好怕要搭巴士返去，所以我建議不如試下搭馬鐵啦，最後我地一齊搭馬鐵去大圍再轉九廣鐵路再轉地鐵，雖然聽落好似好麻煩，但其實好快又舒服，雖然係貴左d，但對於我來說，真係舒服到不得了，下次會建議下搭西鐵去其他地方。 去到九龍塘，因為慧英話想行下又一城，所以我同慧英一齊行左一陣先走。

>>February 15, 2005 at 1:33:56 PM GMT+8

2005 年 2 月 11 日 星期五 【晴】

■■■	原來係全家都食錯野呀....	■■■
年初三的那一日，因為阿媽話去阿姨屋企食飯，但佢家住西環，再加上我的肚不是太舒服，所以就同阿媽講我唔係好想去啦，我起初以為會比我阿媽話我，點知，阿媽反而叫我多d休息喎，真係好啦。 返到屋企，點知見到家姐係度，原來佢胃痛，又係唔舒服，咁跟住又見到細佬返黎喎，原來佢又冇去到阿姨屋企食飯，又話自己唔舒服喎，跟住當阿媽同阿爸回來的時候，阿爸話自己尋日發燒發冷，幾辛苦呀，之後我先話我自己都係呀，又係咁喎，家姐又話自己胃痛，阿媽又話自己疴呀，原來發現全家都係食錯野，跟住就開始估究竟我地係食錯d咩野，估黎估去，跟住阿爸就話係年初二中午的那一餐攪到出事的。好似要查出係咩事咁。 之後阿媽就將d剩低果d飯菜全部放棄晒，但阿媽都留番d蘿白糕，不過我次次都唔敢食呀，雪櫃都仲有tim，都唔知食到幾時呀。 星期六早上到了大牛親近主，雖然人少d，但係我覺得唔在乎人多，人少，最在乎自己心靈是否集中，同體會主的同在。擘完餅之後，同左大妹姐行左一陣，因為慧英同d妹撇低大妹姐，自己去左睇戲，所以大妹姐係度不停話﹕要嬲佢地嬲到年初七呀。 之後，我就去了賀年，又係一連串的食飯，唔係食飯，係不停食送，食送同食送，因為d送係當你枱面有一碟送食完的時候，就會有一碟出現，填滿那一碟的空缺，真係食到你死都得，食完飯之後又有蛋糕食，回家的時候，仲可以又食又拎，真係嚇得死人。

>>February 14, 2005 at 3:23:14 PM GMT+8

2005 年 2 月 9 日 星期三 【晴】

■■■	傷風還是食濟左呀我....	■■■
繼食左4餐屋企的蘿白糕後，今日開始個人呆滯d，唔知點解呢，好似唔想食野咁，又好似發冷發熱咁喎，唔通我病左，咁就大件事啦，阿媽實話我今年唔利我啦，又話新年就病，有排講啦，今晚又係d親戚黎晒我屋企，我都唔係好明架，尋日黎左，今晚又黎，太多人啦，嚇死咁，我問阿媽點解又黎我屋企食飯架，阿媽竟然話﹕因為阿婆同阿公都唔係度，我阿媽係最大，所以開年都要黎食埋飯喎，以往就去我阿婆屋企食，咁我估以後佢地都會黎我屋企食飯啦。其實食飯果時我都唔想食，由朝到晚都好想訓，唔通lee個係開始病的徵兆，唔好呀，主耶穌，我唔想比阿媽煩住我呀。食完飯之後，個人開始發冷，其實我已經著左2件衫，都好凍，諗住沖個涼會好d啦，點知發覺自己d骨開始好痛，個頭又痛痛地，攪到個人暈暈下咁，沖完涼之後，即係食左2粒幸福傷風素，同埋話比阿媽知﹕我病呀，阿媽叫我即刻去訓覺喎，佢地又係開四方城，都唔知佢地幾點走呀，訓訓下，就開始全身出汗同發熱，唔要d被又凍喎，真係辛苦呀。果一刻我惟有求主快快醫治呀。

>>February 11, 2005 at 12:49:26 PM GMT+8

2005 年 2 月 8 日 星期二 【晴】

■■■	等人黎賀年	■■■
由於我阿媽係最大，而今年阿婆同阿公都唔係度，所以d阿姨同舅父等人先後黎我屋企，先係三姨，跟住五姨同六姨、跟住舅父、再跟住simon姨，由下午3:00去到夜晚9:00，都係一家又一家的人黎，而當晚，我地就去左阿姨屋企食飯，由於表弟妹佢地好肚餓，我地一齊食晒阿姨屋企的飯，仲要佢煮麵喎，但都同樣掃晒，跟住d湯又係，嚇死人咁，攪到d大人冇野食，跟住又係照往年一樣開四方城，所以我同阿爸走先，費時無聊啦。 回到家，唔知點解好似好眼訓咁，放假係咪會令人眼訓架，我尋日一訓可以訓到今朝10:00先起身架喎，可以真係得架，下次再訓耐d先。

>>February 11, 2005 at 12:39:36 PM GMT+8

2005 年 2 月 8 日 星期二 【晴】

■■■	行花巿	■■■
由於我屋企係年廿九已經食了團年飯，所以年三十晚我屋企簡單食飯咋，但我阿媽又要叫我做果樣做lee樣，所以攪到成9:45先去大牛玩遊戲，落到去都已經成10:15啦，玩到12:30度，我地就同班兄弟一齊去行花巿，開始的時候，又要去m記坐下同食下餐，最攪笑係大妹姐，佢明明話好飽，但最後都同珮思一齊食過餐。 跟住我地就去左觀塘行花巿，行花巿途中竟然見到何明華d學生，最後比迫都買左5隻雞鎚，用黎搥骨之用。 最後我地大約3:00走人。

>>February 9, 2005 at 10:00:12 AM GMT+8