2005 年 5 月 28 日 星期六 【晴】

■■■	開心的相交同生日會	■■■
星期日，我地約左去city安靜，由10:00等到10:30就差不多人齊啦，之後我地去親近主啦，地方係我第一次去架，因為上次我冇去到，今次好開心呀，因為坐的地方好好，又有風吹，又比我見到藍天，又唔係好熱。唱完詩歌，我地就分組親近主啦，因為我果組得我同碧茹出，所以我就同碧茹親近主啦，但其實我心裡都好想同碧茹傾計，心裡覺得好似好耐都冇單獨同佢相交同傾計，所以今次我覺得主有安排，起碼碧茹都係咁諗呀。 相交完之後，我地就去city食飯，原來canteen停電，所以我地就係黑黑的地方裡面食飯，之後我地返大牛玩遊戲啦。 今次帶遊戲的係麗香同碧茹，都幾好玩架d遊戲，辛苦晒啦，最攪笑的情景﹕ 1.麗香同曉琳串慧英的那一幕，真係笑死人咁濟。 2.跟住玩世界之最，最快飲益力多，當一叫開始的時候，惠儀仔同慧英都好快架啦，點知小坤仲快，123開始，就話自己飲完啦，真係攪笑呀。 3.玩扮靚的時候，麗香竟然自己收埋自己d野，但又唔記得，跟住我地搵到死死下 4.最後出場的有黑武士生擒蛋糕怪、又有鐵線公主的出現

>>June 1, 2005 at 3:38:20 AM GMT+8

2005 年 5 月 27 日 星期五 【晴】

■■■	大穫野	■■■
星期五的那一日，我地會登左一全版廣告，祝賀曾蔭權選舉特首成功，報紙仲要係大公同文匯，左派報紙報導，原本我地諗住冇其他商會快得過我地，因為星期四曾蔭權先公開辭職，但因為我地冇全國政協的會長，有其他人大代表叫我地要快人一步，就係咁我地由1/4版的廣告，一轉就轉左去登全版，就要落晒d勁人級的會員名稱落去啦，就係咁的情況下，就出事啦。 星期六的一早，竟然創會會長打黎，問我地有冇買經濟同明報，原來人地話我地會太誇張同做作，內容如下﹕ 【明報專訊】曾蔭權(相關新聞 - 網站)剛宣布請辭，預備待中央批准後，才正式展開參選特首的活動，中央駐港官員急不及待地開腔支持曾蔭權參選，而好些左派社團更率先在左派報章上刊登廣告，「全力支持曾蔭權參選」，並「預祝參選成功」。前者有違「港人治港」原則，後者則涉嫌觸犯選舉法例，是典型的「愛他變成害他」的例子。中央駐港官員和一眾左派人士必須自我約束，宜將挺曾的熱情轉化為支持香港建設更佳選舉制度的動力。 至於左派社團在報章上登廣告，預祝曾蔭權參選成功，也是不恰當的行為，因這類政治廣告對曾蔭權的選情幫助有限，卻有可能被計算為曾蔭權的競選開支，令他競選超支的風險驟增，而且登廣告的人在沒有徵得參選人同意下，為他刊登競選宣傳廣告，已觸犯了選舉法例，這是典型的好心做壞事。 就係咁，會長係星期六果日好忙呀，又要call人問清楚，又要叫我地做野，因為我地未經選委會同意下就登廣告，而廣告費用亦會計算在選舉費用之內。而中聯辦又叫我地攪份証明文件出黎比佢地，仲知就係麻煩同麻煩呀，又要call律師，又要call前會長，又要call會長，d電話響過不停，由原本諗住好清靜的中午之後走人，但攪到3:30先走人，其實我地都未攪好架d野，我最後留比亞姐繼續做啦。 而家我地出左封信比選委會，跟住再同曾蔭權果邊再聯絡，之後我地就等事情發展啦，因為根據《選舉（舞弊及非法行為）條例》，任何人如非候選人或候選人的選舉開支代理人而招致選舉開支，最高可被罰款20萬元及監禁3年，咁我估點都唔會係我啦.....

>>May 31, 2005 at 8:47:40 AM GMT+8

2005 年 5 月 23 日 星期一 【晴】

■■■	匯景安靜的日子	■■■
早前的日子，心裡有幾個願望好想主幫我達成，其實果d願望不是太難去達到，只是自己沒有恒心同心機去做姐，再加上果d其實不是什麼願望，只是生活上一些小節，但都感謝主幫我能完成。其中一個是能再有機會同時間的時候，我好想去匯景公園安靜同親近主，感謝主祂明白我的需要，星期一我祈禱同主講，好想去，但又怕落雨，又怕多野做啦，當仲係度諗緊的時候，亞姐就同我講﹕我要走先啦，哈哈，就係咁，我大約7:00走人，去到公園只不過7:45。 當坐係遊樂場的時候，回想以往在這裡親近主的情形，真係寶貴主真係活生生的神，回想以往在這裡的情景時，心真係難忘主一次又一次挽回自己與同在。之後，我足足用了半小時為自己祈禱，因為記得星期日家服侍相聚中，婉兒姐講到她每日都為自己祈禱，以往的日子，我通常多為姊妹的禱告，少為自己去祈禱，今次祈禱的對象及目標都是為自己去祈禱。 坐在公園的時候，回想以往同主分享燒賣、粉果的日子 仰望天空的時候，回想以往自己的祈禱與夢想 回想以往艱難的時候，令我心確信主的我的知己與密友 回望以往在公園流淚的時候，令我心感主的確能安慰及倚靠 之後我見遊樂場沒有小朋友，我便同主講，我想去玩下千秋喎，心裡彷彿再次感受主陪我一起成長，雖然有起、有跌，但寶貴愛我主仍與我同在，直到世界的末了。

>>May 25, 2005 at 10:53:17 AM GMT+8

2005 年 5 月 22 日 星期日 【晴】

■■■	如你覺得與主相離遙遠時，那麼究竟是誰搬了家呢?	■■■
以上的說話，是我尋晚睇一本書時心所深刻的，當你覺得同主的關係好遠、好遠的時候，咁究竟是誰搬了家呢? 那真係令人值得思考，因為往往自己會覺得與主關係疏遠或跟隨主感覺好難，唔單止係自己的問題，主都會有小小小小的唔歡喜，但這句反問語句一語道出，搬屋係自己的決定，又係自己話搬的，雖然可能身邊都有不少人搬了屋，可能又有不少建築物改動或者加建，但卻不會影響到我自己的家，雖然往往有可能受其他人的批評或者指手劃腳，但不會令你回到家的時候不好受，也不會難堪。

>>May 23, 2005 at 9:43:13 AM GMT+8

2005 年 5 月 20 日 星期五 【晴】

■■■	休息日	■■■
星期六一起身的時間已經係8:30啦，其實係未訓醒架，但都要起身啦，但起左身之後，又唔願郁喎，坐係個廳度，又訓下覺。就係咁，又等到8:45啦，由於尋晚大約12:00先回家，又連續幾日的開ot，所以比較疲倦，再加上尋日好嬲啦我，就係咁的情況下，把心一橫唔返工。 打番比亞姐，佢真係鐵人呀，9:00已經返到會，咁我就話佢知我太疲倦啦，要休息下，就係咁我又繼續訓，訓到11:00起身，之後就約碧茹同惠儀仔親近主，感覺好耐冇同佢地一齊親近主同自己有時間去享受主咁。 去到大牛又見到慧珊，真係好啦。可以唱下歌同睇聖經，但因為太多人行黎行去啦，攪到個個都唔太專心咁。不過冇打緊啦，起碼我地都有親近主呀。 親近完主之後，我就陪麗恩啦，心好佩服佢對主的信心同堅持。也願主繼續堅立佢為主所持守的。 完聚會後，我又趕住走啦，因為要去maybo屋企，去食薑醋，佢生左個男仔，但一年前先剛剛生左個bb女咋喎，真係驚佢辛苦得濟tim呀。之後就一齊去食飯，然後大約10:00回程了。

>>May 23, 2005 at 9:30:43 AM GMT+8

2005 年 5 月 19 日 星期四 【晴】

■■■	基金會籌款晚會	■■■
今日係我地會的大日子，因為係2年一度的基金會籌款晚宴，地點萬豪酒店，為左lee個晚宴，足足開了4-5晚ot，通常回家時間係晚上或者凌晨時分，不過由於當中沒有什麼特別事是我跟進的，所以不是太大壓力。 中午去到萬豪酒店食飽之後，就開始做野，由於我知道我一定唔會有時間食野架啦，所以我下午食得好飽，連湯水我都食埋，就係咁我一餐定到夜晚12:00啦。廁所我都知我沒有時去架啦，所以我食完中午飯之後，我去左一次，又係咁定到12:00回家先去。真係勁人呀。 食完飯之後，我地就開始傾工作人員rundown，由於係我負責的，所以我同在場的工作人員傾，而亞姐就攪自己野，會計就同酒店傾啦，跟住冇那那走埋黎話我知，我同一位東莞巿官員book的酒店，那位客人到左lobby但找不到booking喎，咁我就話冇理由架喎，明明book左，仲有張confirmation letter比我tim，咁我比佢一睇，咁就大件事啦，因為我同亞姐都講左係book係銅鑼灣富豪酒店，但佢竟然叫佢去萬豪酒店，就係咁的情況，而我比亞姐話左一餐，佢話我keep住張confirmation仲乜話，要比會計知啦，咁我就話﹕會計明明係知係銅鑼灣富豪架嘛，同埋我第一次比張credit card人地confirm，咁果邊就話張野係我keep，咁梗係我keep架啦。會計就話﹕佢自己唔知點解講比人知係萬豪，佢話佢都知係富豪架。最後我要打電話去人地d高層度話cancel仲要唔收我錢tim喎。 跟住因為有個老闆負責拍賣環節，咁佢就叫佢秘書黎幫手啦，咁我就話我將拍賣果個鎚仔佢啦，佢明明話要，但跟住亞姐話我點解要比佢keep住呀，而那個秘書竟然又話唔知點解我要比佢keep住喎，真係激死人呀。 之後，要同酒店同制作公司開會，我就等亞姐，亞姐就話等我喎，我話﹕我坐係度等你喎，亞姐竟然又話我﹕咁你早出聲啦......真係無奈呀。 然後，我話歌星將會6:00到，而我地執野的房間仍然好亂，咁我同會計講啦，會計話﹕冇辦法，咁我同亞姐講，亞姐話﹕咁我都冇辦法架，而家係咁亂架啦，一係你執羅啦，你淨係講係冇用架。...............那一刻真係想喊呀。又係我呀，d問題係我的問題嗎。那一刻的感覺真係好難受呀。 因為之前會計將場內的一切擺設交左比個男仔負責，咁我已經叫佢得閒去睇下啦，但佢話交左比佢啦，我唔去跟架啦，咁我就話﹕咁算啦。但之後就出事啦，因為每個位度都有一份場刊，但酒店果邊冇派到，咁會計就話﹕我明明交左比佢架喎，我就話﹕你唔好問我喎。之後佢又要我跟埋，又要我去聯絡酒店，咁我就話﹕酒店唔係我負責，你自己跟啦，我仲要去夾rundown。最後比其他人發現係某個座位度，最後叫酒店d人那林林派晒去。 開場後，一齊都叫做順利，不過攪笑的地方係，當d老闆march-in入場的時候，竟然冇人理會佢地，跟住又冇那那上晒台喎，好彩即刻cut住佢地，叫佢地番埋個位度坐。 之後一切都順暢，起碼d老闆都滿意啦。而籌款又去到我地的目標﹕大約有90萬元的收入。

>>May 23, 2005 at 9:11:15 AM GMT+8

2005 年 5 月 16 日 星期一 【晴】

■■■	踩單車日	■■■
星期日終於係6:00做好晒d野，所以尋日可以去到踩單車，因為我真係好掛住，好掛住我的姊妹了。曾經有一晚，夢到惠儀仔唔返聚會，而令我喊醒，又有一晚夢到敏萍姐生個bb，但一生出黎就好似個大仔樣咁，大妹姐仲話同啟明好似樣喎，嚇死我咁濟，哈哈。 去到沙田火車站等齊人之後就去租車，我已經問左2次，點解會約係沙田等，但原來大家都係比人點架，真攪笑。去到租車的地方，因為佢冇輔助碌，所以就要迫惠儀仔學，而慧英就死都要學識。大佬盛好勁呀，由一個完全唔識的惠儀仔可以教到佢自己踩，真係名師出高徒，不過佢要$650/hr，就貴左d啦，唔知惠儀仔有冇錢比呢? 學左一陣，我地就踩出去啦，係背後跟住惠儀仔同慧英，真係睇到你心到驚呀，一個就好似飲醉酒咁轉黎轉去，一個就風馳電制係咁直衝，所以起初的時候，我叫定佢地如果係惠儀仔前面的，要有10架單車的距離，當起步的時候，大妹姐都有為大家祈禱，其實我前一晚都有祈禱架啦，點知大妹姐仲勁，佢全日都為左踩單車而去祈禱tim，確保個個都平安同冇損傷啦。 踩到12:00先去到沙田，跟住我地踩左去馬安山食野，食完之後又起程，今次踩去大埔，到科學園之後我地又休息，裡面d冷氣好勁呀，多謝亞蕉請的雪條啦，其實那時都差不多3:20架啦，而距離大埔公園仲有好遠的路，所以我地決定回程，而又有10鐘的時間，所以我地決定踩多一陣跟住回程，那時候就發揮我單車的威力，因為我果架同佢地的不同，有小小dou頭，又比人整過，所以好快架。講到比人整架車，真係攪笑﹕當我踩踩下的時候，就聽有人係背後咆哮，嘩...嘩...嘩....(老虎叫)，跟住就有以下對白啦，以下對答係一路踩，一路答 那人﹕妹妹仔 我﹕(心諗唔係叫我掛) 那人﹕前面的妹妹仔呀，叫你呀 我﹕(唔係我掛....) 那人﹕叫你呀...喂...我叫你呀 我﹕(我終於都答左佢)你叫我呀 那人﹕係呀，你架單車果波好似唔係好得喎 我﹕係咩...... 那人﹕係呀，有"架..架"聲喎 我﹕係咩，唔係掛 那人﹕你停低先啦，等我睇下 我﹕哦....好啦 當我轉頭的時候，竟然望到一個披頭散髮，身穿紅衣短褲，架單車滿晒hello kitty公仔的一個男人，真係嚇死人呀，心諗唔係痴線架你，跟住好彩阿招都有返轉頭睇下我，因為個男人係咁整，係咁整，一時又話得，一時又話又壞左，跟住都算攪好啦。之後係車程度我地撞到佢4次tim，真係攪笑呀。

>>May 18, 2005 at 4:42:05 AM GMT+8

2005 年 5 月 14 日 星期六 【晴】

■■■	主仍然愛而家的"你"	■■■
星期日大約9:00先起身，因為要去擘餅，如果唔係我諗我可以再訓耐d。 去到大牛，因為麗香遲到，又搵唔到燕瑜同晶晶，所以自已一個坐，坐低的時候，又係好眼訓同冇精神，心裡又掛住做野，所以冇乜mood，志明好多次叫我地笑下啦，開心d，但自己都覺得好似好難咁，好想笑，但笑唔出，心裡實有不少的掛慮，又疲倦，心裡想難度真係要笑咩。 擘餅中間的時候，志明哥分享信息，心裡好感受同好羨慕他同主的近，也體會他所講的是深深體會b/s的需要，不是帶著命令而講，而是充滿情感的流露﹕他只講了一句，就足以帶我回到神面前﹕弟兄姊妹，主仍然愛著今日或者叫做而家的"你"呀。無論你而家如何，無論你同主的關係如何，無論你覺得你如何，無論人地睇你覺得如何，主仍然仍然愛著而家的:"你"呀。多麼寶貴呀，主真係又真又活，祂把我由一個死沉的心靈，透過哥哥所講的，又再一次提升，直到天上，係無限的神體會我地這個有限的人，真係無論如何都不可以使我與神的愛隔絕。哈利路亞 擘餅中看到不少年長的哥哥舉起勝利的手勢，我深信他們所背負的擔子不會比我少，因為看見他們的時候，彷彿看見他們工作的壓力，家庭的擔子，心想﹕難度我會比他們多嗎?我只是工作1-2天的憂慮，家庭對我來說沒有什麼的牽掛。難度因想小小的事，我就不能笑、不能享受主嗎? 感謝主透過一切比我知道祂仍然愛著你和我。

>>May 17, 2005 at 1:32:53 PM GMT+8

2005 年 5 月 13 日 星期五 【晴】

■■■	日日都是工作天	■■■
星期六的那一天，由於估計將有更多的工作，所以心裡已有打算黎唔到擘餅聚會，所以將全部野交比慧英，但原來慧英都係遲走，原本諗住佢可以準時走人tim，點知又係唔得，如果佢真係辭左職，起碼更多野可以交比佢，但那時我咪死，因為通常佢得閒，我就好忙，我好忙，佢就好得閒，黎緊佢係超得閒喎，咁我咪超忙。救命呀。 星期六的那一日原本諗住可以做到份工作人員的rundown，但事與願違，其他野都未做得晒，就已經4:00啦，但我又唔想星期一返工，因為亞姐話佢星期一會返黎做野喎，所以我以最快速度睇下自己可以做到幾多，跟住剩番果d諗住星期日就回來再做。

>>May 17, 2005 at 1:53:36 PM GMT+8

2005 年 5 月 12 日 星期四 【晴】

■■■	日日都是工作天	■■■
星期五開完會之後，竟然我同亞姐都有個念頭﹕想死呀.....(講笑姐)，因為中午開的會議，正是為了下星期五的籌款晚宴而開的，中間1-2個月的籌備，但星期五的那一日，d老闆好似患了老人痴呆症咁，乜都唔記得，d rundown全部改晒不得止，連個場地都改埋，由長型的setting改為橫向，咁就大問題啦，我地場地的一部份酒店是租了比其他公司作seminar之用，所以我地冇得用黎set-up，而制作公司要最少4小時的set-up工作，就係lee個point度，d老闆不停講，最後我地叫埋制作公司上黎傾，最後得出的結果就係改。要制作公司用最少2小時set-up，而酒店就要迫佢地提早交場，連歌星reherseal的時間都cut左，唉....一句講晒﹕我地想死呀。 因為開會開到3:30先完，咁我地又約左司儀5:00係金鐘開會，中間的時間，我地就去左另一個老闆的公司坐下都攪埋d工作，之後4:30就搭地鐵去金鐘啦，時間就係咁過左，去到同鄧梓鋒開完會到差不多6:30啦，跟住就回公司啦，因為全部野要重新做過，又要重新傾過rundown同工作，連會計我地都叫佢留低，因為要重新分配工作。 叫左飯盒，坐低一傾就去到12:00啦，起初大家都唔覺得咁夜，只係覺得好疲倦，跟住一睇時間，即刻嚇左一跳，原來已經12:00了。那林林執野走人，亞姐仲話﹕其實我話走架，係你地唔走咋。因為會客室裡面冇鐘呀嘛，咁我地又冇帶錶，所以比亞姐欺騙左都唔知。 回到家沖涼訓覺的時間都1:00了。.................

>>May 17, 2005 at 1:33:14 PM GMT+8