2004 年 9 月 2 日 星期四 【晴】

星期五day off..
Wong J好耐都無係我日記出現, 當然啦.. 大家都好似好忙咁..(大家忙, 多麼漂亮理由..)

今日原本都諗住唔出街, 但係俾我表姐公司同事徵召左我返去, 整唔記得左邊個同事部notebook.. 老實講, 咁失驚無神返去, 當然要收錢啦... 水腳都要啦..

整完先係兩點幾, 約左Wong J同So Man 係理大等, 一齊食飯,
兩位同學都有一大段時間無見.. 所以都有好多野講,
雖然話題大多是大學生活..

之後同wong j 落黃金(佢話唔想咁做返屋企喎..., 佢仲話成日"貪得意du八達通(我都想知點貪得意)")
行左一陣, 我幫我一個大學新同學quote 左部機就走人啦....

>>September 6, 2004 at 4:18:48 AM GMT+8

2004 年 9 月 1 日 星期三 【晴】

今日又係半日市.. 原時間表上面呢, 係有堂下午的, 但係基於呢堂唔係個個禮拜都有..
所以今日變左半日市..

所以今日約左沾叔同龍儒.. 但係我要等到佢兩條友一點.. 但係我十二點半就放學, 都唔知點等..

係呀.. 唔記得左講今日返學飛車記..
今日眼見時間唔係好夠搭車返學, 又見到K巴剛剛走左,
把心一橫, 反正遲就遲啦, 走左去搭72x.. 上到架GB5890...
我10:01 係大埔文娛中心上車, 居然10:24分可以係九龍塘地鐵站落車..
梗係啦, 個司機咁燥.. 上獅隧斜路前面架貨車慢少少, 即刻"屌你老母hum家剷"....我叮晒..

兩個鐘lecture 真係有d 頂唔順, 好彩唔係太難..

與其等佢兩個, 我不如自己走去poly 到會合佢地..
去poly o既原因其實係諗住同志豪兄一齊食, 頂, 點知志豪兄又唔聽電話, 原來佢根本就無左回事.....
結果我地三個走左去元氣到食壽司, 但根本食唔飽!! 結果走去行尖東邊走邊買野飲...
到四點, 沾叔話幫龍儒抬機去hall, 我走去搵老表打機,
因為要由尖東行去天星碼頭, 所以行過香港星光大道..... 總算叫做到此遊...well, 點都唔夠hollywood 果個靚....
過完海坐叮叮, 結果四點半就到.. 太早啦, 我老表起碼六點先到.. 點算!?
自己打住機先囉.. 今日目標係擊鼓皇存分, 同埋搖鼓啦...
呢期玩fing 手似乎勁番, 但係最難果個track 最尾隻歌都係fail 左... 頂....
仲有東京巴士..

今日見到個擊鼓皇level 14 由, luke.. 我只係感到有點痴線.. 我睇都未睇得切, 佢已經係咁打... 哈哈哈! 超勁!
仲有今日俾人搵左笨.. 去銅鑼灣行街果陣俾個sales 截住左, 佢sale 一樣野, 正路上我唔會買,
但最後我都買左, 就係一個叫callnowyeah的會, 係要俾60蚊買佢張會員卡.. 咁jetso 就係食飯去指定地方食有九折... 雖然我半信半疑, 但結果我都係俾左錢....
所以打完機唔使諗去邊到食, 打個電話去問邊到有咩食就得.. 簡單到出汁.....(其實我係因為有得唔使諗去邊到食所以先申請...)
所以今晚即刻要試試..
結果佢都好彩無點我, 真係有九折, 果間野都唔係太差...
間野叫紅山, 係食西餐, 係就係好貴, 但係佢個扒都食得下人...

結果今日返屋企無搭307, 改為地鐵火車.. 因為我仲有程八折搭埋佢抵d!

>>September 4, 2004 at 11:30:36 AM GMT+8

2004 年 8 月 31 日 星期二 【晴】

一無天地堂我就無寫到日記.. 其實寫日記係一樣sip 時間活動...

9月1日, 對我地黎講唔係開學日..
但係我地都會俾"開學"呢樣野影響到, 雖然唔係搭車影響到, 但係食飯係一大影響..
點解!? 頂.. 今日個飯堂超級多人, 排隊買飛都要排都出門口..
點解咁多人!? 因為其它唔係城大人都係到食囉... 頂.. 又話check 學生証又話呢又話路.. 搞到城大人就無得係城大食, 咩世界!!!
直到等到一點先有啖飯食.. 果班正一仆街仔.. 隔離中學又走黎食... 仲有一對父子, 食完坐係到唔走.. 我如果唔係顧住城大學生的身份? 我屌左佢地好耐啦.. 勁火滾!!
不過未食飯都有少少得著, 就係申請左credit card.. 對我來說, 信用卡係一個儲分工具, 用來交一d 一定要每個月交的錢, 例如上網, 電話之類..

是日頹飯係鮮茄牛飯, 因為我唔食茄的關係, 今日無食10蚊飯, 今日食貴少少, 13蚊o既(我都唔記得左咩飯), 我同學明哥食左個燒味飯, 結果我食完佢先開始食.. 一係都係班街外人!!!

一個頹飯其實未能令我係之後果tutorial 飯氣攻心....

又等兩粒鐘上韓文, 今日有另一個姓金的韓文老師sit 堂.. 我結果講左一句未教的韓文...

放左學之後去維港灣, 整少少野 -
之後八點幾搭特見車 - HM6990 @ 72x 返屋企...

>>September 3, 2004 at 2:43:33 PM GMT+8

2004 年 8 月 30 日 星期一 【晴】

第二天大學生的生活...

==========================
天地堂.. 其實有點難過, 一個很早, 一個很晚..
今日第一堂10:30 lab, C++, 好, 正是一樣我陌生的東西, 但係其實都唔係好難, 話晒都係第一堂, 只係講Visual C++的用法... (或者有無人可以話俾我聽點樣可以係gcc 到complie c++? 我試過, 點知俾個gcc 當左我係c program..)
Hello World, 同埋cout,
如果我話完全未掂過C++ 就係搵黎講, 當然我cout 同cin 都學過, 至於點解我唔學埋落去, 當然同C++係OOP有關啦...

點知一個鐘就完成呢一堂好玩的lab.. 慘.. 三個幾鐘要hea...
唯有一條友走去食飯.. 呢次我係第一次食"頹飯"!!
(p.s. 頹飯即係城大飯堂入面 價值 $10蚊的飯..)
是日頹飯 - 麻婆頭腐飯... 求求其其啦, 不過都食得落口o既...

之後hea 完就去上韓文, 第一次正式咁學韓文.. 老實說, 其實我是為了GPA才會選擇Korean I.. 有點後悔.. 應該一開始話Korean 2... 因為. 有點悶...
不過反而在細班的韓文班中容易識同學.... 很奇怪...
似乎大家都不太拘緊.. 可能是韓文老師的關係吧...
韓知延老師, 這個名字聽就聽得多, 但係今日總算一見...
唯一的一個comment 就係 - 韓國人真係好識化妝, 特別係女士...
哈~ 我諗大家知我想講咩...

>>September 1, 2004 at 7:23:09 AM GMT+8

2004 年 8 月 29 日 星期日 【晴】

居然要等到我開左學先寫日記...

臨到開學果陣就通常有好多人搵你同埋會好多野做.. 永遠都係咁..

呢幾日其實有好多野發生,只不過我無講出黎o者...

話說有一日, 前果排識果個的士司機, 打電話搵我話佢屋企部機壞左..叫我幫佢整整佢...
中左毒o者, 不過最麻煩同最難整係果個about:blank hijacking.. 我都係第一次見呢種"spyware"(與其說spyware, 倒不如直接一點說是病毒...)
不過識呢個的士司機其實真係"緣份", 因為後尾傾計講開, 原來佢老婆係以前莫記教geog 個妹.. (我講緊李惠玲....) 你話個世界幾細....

之後又失驚無神病左, 休息左兩日....
間死人酒樓, 頂... 開冷氣開到好似唔使錢咁... 搞到即場凍親!!!!

8月30 日返學,
第一日, 第一個lecture 我已經遲大到.. 哈哈哈.. 不過果堂太廢..
一, d 野係已經學左, 二..... 算啦...
而且之前停過電, 我去到剛剛恢復正常...

之後唱K.. 原本約左賤健同佢一齊lunch, 但係尋晚水雲(尋晚.. -.-") icq 失驚無神話唱K.. 唉..
點講飯日日都有得食, k唔係日日都有得唱呢....
都好, 等賤健可以過下二人世界.. hahaha...

唱K, 班友一係就出classic(舊)歌, 一係就新到我都未聽過...
...............................

>>August 31, 2004 at 4:55:53 AM GMT+8

2004 年 8 月 22 日 星期日 【晴】

呢期一係懶, 一係就忙..

前幾日我返左廣州一陣, 三日...
原因是我叔婆擺七十大壽... 食一餐..

可是三日兩夜, 食一餐, 無理由一餐食兩晚, 所以還是有其他東西搞的..
第一日去到廣州, 坐係到等親友... 之後都係做果樣野 - 食飯,
之後返去天河果面有地方俾我地住兩晚..
不過無咁早訓, 因為我地做一樣香港無咁正o既野, 睇奧運..
大陸實在太多電視台啦, 有d 台會24小時做奧運咁濟, 勁正..
唔記得邊日, 中國女子75kg 級舉重果個勁過份, 172.5kg 唔夠, 仲要舉182.5kg, 即係四百磅.. 癲架!起碼係3個正常人加埋的重量.. 點舉得起.....
我睇到眼都突埋....
如果唐功紅第日唔做運動員, 可以做女公安.. 一手捉住一個小偷.. 嘿嘿..

中國第二個得人驚係女子網球雙打... 我完全估唔到中國女子雙打可以入八強, 更莫講話會估到佢最後攞金牌..

第三樣得人驚係男子氣步槍, 美國選手居然係最後一鎗.. 射左過隔離.. 結果0分...
但係佢射左過隔離果到如果計就得人驚.. 10.8環...
中國死好命地升左上冠軍..

仲有張怡寧又係超勁, 輕輕鬆鬆先嬴左"磨爛蓆"南韓妹... 之後嬴埋北韓阿姑...
超勁...

講番食果餐先..
其實只係食, 話說得不多, 沒有太多人認識的, 除了經常來往的表弟妹之外, 其餘我都可以說是不認識的...
不過廣州擺酒同香港有一個最大分別, 就係食的時間不一樣.. 六點鐘就開始, 八點幾就食完..
香港!? 未到九點你都唔使旨意有得食...
仲有佢地菜係一齊上咁濟, 香港係食完一道先另一道菜上...

仲有呢, 我係廣州買左三件衫呀... 好開心呀~

不過因為23號四點要上番cityu 個網register 科, 所以唔可以玩多日..

呢個假期的bonus 係, 九月可能有野做~ 搵到1d 應該搞唔成但係又值得花時間的東西.. =)

>>August 24, 2004 at 3:20:08 PM GMT+8

2004 年 8 月 16 日 星期一 【晴】

城大CS Dept First Gathering Day..

說真的, 話就話入過城大幾次, 但係真果句其實我來來去去都係識去canteen, 同埋地下圖書館, 入到去可以話幾乎係唔識入, 今日一行總算搞清楚小小地方同方向

今日一點鐘到, 去之前去見潔慈姨..
其實即係暗示我又即將繁忙lu..

先講番今日城大之旅, 行一大段路殺上宿舍(說真的, 真的很像居屋)
其實吹水同玩同聽野囉,前兩者比重較多..我同group 九個人, 六男三女.. 其實一早就知分唔勻..
加上勁多人係Asso 上黎, 一早已經俾人mark 晒啦, 落到手咩...?
不過我讀大學都係為左讀書o者.. 睇黎呢班人有部份唔係咁識電腦, 還好還好.. 如果一開始就高手林立, 我真係唔知點算...
同埋加上d 遊戲真係... 我幾乎想用低能, 但係又算係好玩o既.. 今日識左一個friend, 佢叫做MING, 佢係poly hd 過再AL 經JUPAS入黎的, 再得人驚d 都有呀... 有個係讀完iED PE 之後再由零開始.... 滴汗...

今日同時係amy 同梁瀞芝音樂比賽, 所以我城大果到一完活動即刻飛巴士返大埔.. 嘩.. 好快呀..
25分鐘左右已經到, 不過唔見左$10.2....
我返到大埔果刻, 已經比賽完, 佢地攞第三.. 算唔算報上年一戰之仇?

之後走左落Rainbow 食糖水...

========================
各位, 如果你想係八點後睇日記, 係load 完日記之後"!立即!"按browser 內的停止掣, 咁就唔會逼你install 個咩撚 Alexa Toolbar...

>>August 18, 2004 at 2:36:11 PM GMT+8

2004 年 8 月 12 日 星期四 【晴】

聚餐日..

今日一聚3c 舊生及其它frd 係鍾智泉的浩召下出席今晚的聚餐..
前一晚我同志豪兄仲擔心緊會唔會又明星打邊爐..
好彩只係食小菜...

邊食邊吹水呢d 就例記啦,
但係我地食完最終都係去吹水.. 呢次浩浩蕩蕩十幾人殺去海濱, 點知太多人,
所以轉移目標去左圓州仔公園..

去到果到, 蓆地而坐..
最初的話題都係大學之類, 但係唔記得左邊個raise 左一條好高深的問題:
就係"30歲前想做(到)到三件事..." 哇.. 很難.. 我的目標大多都不可以在30歲可以完成的..
包括結婚(我連30歲搵到女友都唔敢話係目標, 因為一定無可能)...
以前可能夠擔話30歲搵到自己的另一半... 而家, 男人40之後我諗都無咩可能...
開公司!? 都可以o既.. 有2600蚊咪得囉...
買車都有d 機會(二手車好平o者)...
買樓我諗就唔得...

三個目標... 真係好難...
或者10年後對我真係太遠啦...
10分鐘後仲存唔存在係呢個世上都可以係一個問題....

>>August 16, 2004 at 9:11:48 AM GMT+8

2004 年 8 月 10 日 星期二 【晴】

尋日就我地JUPAS放榜啦, 今日就係中五放榜...

所以早上返左去圓玄一次..
今年圓玄放榜結果真係有d 得人驚.. 理科最高係27, 文科最高係26.. 真係滴晒汗..
不過問番莫記都係得人驚.. 10個6A以上.. 痴根咩... 下年又多十個學生拔尖走人... 唉...
再加上今年有人8A.. 我地果年一個二個都炒Oral...
不過圓玄果幾條勁友都走左去莊啟程.. 我始終覺得咁樣好似好衰仔咁... 圓玄加下對你地唔好咩...

其實今日返去係有人叫我幫佢睇下圓玄今年放榜咩景..
今年圓玄都唔錯, 但係今年對外收分好似低左, 唔出奇, 因為恩記都開多左班中六..
結果今年十個莫記人入左圓玄....

========================
下午去城大攞offer letter..
攞果下就好快, 因為順路, 所以淫友, 阿四同賤健都同我一齊去..
首先係去城大飯堂.. 原本我真係諗住食個頹飯睇下有幾頹.. 點知一見到就知頹得濟.... 唔敢食..
所以叫左個一粉兩餸... 都叫做食得下o既..

食完飯就去攞offer letter, 之後我地四個就俾人圍...
d 人成日以為淫友係黎reg.. 真係好, 幫我擋晒d 人... =)
結果大細o我都唔去, 但係淫友係咁嘈, 叫我一定要去.. 去咩野呀.. o 無咩用. 我入U目標只係想爆GPA.. 3.5 啦..(真係目標, 我都唔知得唔得..), 最好入埋Dean List.. (發夢)
結果我只係參加左一千零一個會 - 電影學會, jet-so 係有首影飛攞(<-- 賤健話第日問我攞黎同邊個去睇喎... 仲要靠晒我.....) 同埋借碟... 都好, 睇戲係我一個最大的hobby...

之後阿四走先, 我地落左新基地打機..
呢期新機有台灣game 擊鼓皇.. 其實來來去去又咪係打個鼓...
不過呢個就有好多台灣歌, 有孫燕姿呀.. 哈哈哈.. 神奇呀..
不過呢隻歌居然係8粒星, 真係中招唔知咩事...
同埋呢部機有得插卡... 搞到我好想買番張卡....

>>August 16, 2004 at 4:47:03 AM GMT+8

2004 年 8 月 9 日 星期一 【晴】

原來上一篇的日子不是八月十日, 是八月九日... 我自己搞錯左..
(無理有唔講大學d 野淨講睇戲架嘛..)
====================================
大學之路 .

今日原本諗住訓到十點幾先上去睇jupas 個result, 反正早d 遲d 都唔會搞到no offer或者多左個offer..
點知俾志豪兄打話嘈醒左.. 話叫我去睇下.. ok 啦, 好彩有我個jupas code..
仲有offer 肯俾我... 同預計之中一模一樣.. CityU Computer Sci.
ok 啦, 不過不失叫做有書讀, 但係始終我都係想入Engineering 多, 但係鬼叫我pure 炒咩..
或者到時year 1尾成績好d, 轉year 2 果陣轉系囉.. 無咩辦法.. 唔通repeat 咩!

莫記人照舊發癲... 超勁, 無眼睇..
我地圓玄都唔差呀.. Wong J如願以償入唔到first choice.. 哈哈哈..
isaac 就可以同佢係hall 到玩network game.. (呢兩條友..).. 坤坤就去左Stat (佢想讀喎)
係我咁頹o者.. CityU.. 不過其實degree 就算, 我無咩太大所謂, 只係始終無engineer 真係...有d.. 咩囉....

下午原本要有人話出去有野搞o既, 但係最後無左回事,
等到夜晚沾叔先話出黎飲野..
原本都無諗住飲酒架啦.. 點知志豪兄一到就走左出間台灣飲品舖... (咩都無叫過, 坐完就走, 簡直係.......) 去到after 5, 沾叔就講咩事, 但係唔講邊間offer 佢, 學軒居然就咩都唔講, 成晚掛住SMS... 頂......
十二點幾先返屋企.. 嗚..

>>August 11, 2004 at 1:03:41 PM GMT+8