2004 年 9 月 1 日 星期三 【晴】

平淡o既一日。

下晝又無端端畀人拉佐落MO做無謂filing。好無聊，只係叫我將一大疊folders裡面o既o野拿晒出o黎又唔駛分類咁放晒入一個box file度，真係好無聊，o的o野都唔知有冇用o既，就咁file落去就算，根本就係冇o野做是但畀o的o野我做就算，無聊到爆廠。

維修部偉哥冇過到大埔，佢話佢自己冇得調site，留返o係港灣做。都好，有個維修部o既人可以拍拍膊頭幫o下手，幢樓o的o野都可以做快o的！

今日開佐兩張清潔單，冇乜點見過o個兩個新呀姐，都唔理得咁多，以後公事公辦。

臨食晚飯之前又畀個業委捉住，佢以為自己真係好巴閉，自己一個人驚狗就講到成條村o的人都驚咁，o係度話o的大狗唔戴口罩。哦。你呢o的就真係「狗」眼看狗低喇！你講到自己咁巴閉，不如你親自同o個幾個狗主講，叫佢o地幫o的大狗戴返個口罩啦！我o地管業廢o架，幫唔到手o架！

畀佐大假紙Warren，諗住請12月15至22號去美國。今個月得閒去申請VISA先。

>>September 2, 2004 at 2:31:03 AM GMT+8

2004 年 8 月 31 日 星期二 【酷熱】

今日係兩位清潔姐姐o既last day，興姐話要請返我飲茶喎…哈…別了…興姐、香姐…以後我會開多o的清潔單同嗌多o的walkie做死間無良清潔公司o架喇！跟進返啦！

呀Wing真係好o野，居然畀佢執掂個更表我九月得幾個A更，真係抵讚！

又一個月喇，窮佐成半個月，今日終於有糧出喇！仲出多佐錢添…唔知係咪o的驗身費退返畀我，又或者係之前當風更o的錢呢…我今個月一定要還清超人條數，我唔要再做負資產！

開始要諗o下點樣儲錢…如果一日用40蚊返工，下個月返23日，就要用大約1000蚊…好似太理想喇喎…mmm…未計一日用5蚊買汽水飲添…不過今個月應該仲未駛用錢買煙，因為而家仲有存貨。mmm…今個月儲2000蚊唔知得唔得呢？

十三下晝匆匆忙忙咁打電話話有急事要上大陸…嗯…搞乜鬼？

>>September 1, 2004 at 1:38:27 AM GMT+8

2004 年 8 月 30 日 星期一 【雨】

一起身沖過涼就仆出去喇，因為今日約佐兩位呀姐去飲茶嘛…

佢兩個鐵定被炒o架喇，真係冇天理。過埋聽日，都唔知幾時先可以見喇… =(

慘喇，拿個火牛返去畀個老細睇，試佐發覺又冇壞，佢話我可能塊底板bye佐…o下…唔係嘛…

之後再返柴灣拿新信用卡，前兩日冇端端收到恒生寄佐張新o既中大卡畀我，佢老鼠o丫！咁大間公司都唔知點做o野o既，我都話佐唔要o架啦，我要同中大脫離一切o既關係，中大呢間「一流」學府我真係高攀唔起！足足搞佐成半粒鐘先搞掂晒o的銀行o野…放閒日幾好o丫，好多o野都可以做。

>>September 1, 2004 at 2:34:59 AM GMT+8

2004 年 8 月 29 日 星期日 【雨】

琴晚放佐工同咖啡仔、Trevor、Michael去佐打牌喎，打佐成晚六粒鐘有多啦，居然最後八圈埋數只係贏兩蚊，其他人要贏要輸都唔過廿蚊，真係唔知講乜好…

打完牌返屋企訓佐幾粒鐘又話要返工。

今日全日冇咸水，o的電話、Intercom係咁打落o黎…係呀係呀，爆佐街喉，成區冇晒咸水呀，唔好意思…今次終於都唔關我o地事喇。

放工之際又有住戶報告咸水水箱o的水流到成地都係整污糟晒個地，搞到收工都要上樓，搞到十一點幾先有得走人。

今晚只係得奧運閉幕，好鬼悶，兩點就訓喇。

>>August 30, 2004 at 5:18:44 PM GMT+8

2004 年 8 月 28 日 星期六 【雨】

PK！太可惡喇！香姐同興姐畀公司炒佐尤，而拿膠板去賣o個個10座呀姐馮月娥居然乜事都冇！

所以幾時都話︰「殺人放火金腰帶，修橋補路無屍骸。」唉…我o既心情好矛盾，因為件事係我拿出o黎講，但係偏偏死o既，係我o個座o既呀姐…簡直係我累佐佢兩個！冇天理呀！呢間咁o既清潔公司我又睇o下佢可以風騷得幾耐！新請返o黎o既清潔工我又睇o下佢可以做得有幾好！如果我o個座o既兩個呀姐都算係做得差，我都唔可以o係港灣搵到有邊座算係好…

綜合香姐與興姐畀人炒尤的原因︰
1) 太關心遺失的膠板
2) 有日用一把遮楔住3座L3度門
3) 被屈夜晚冇倒垃圾
4) 之前同一個被炒的女工傾偈
5) 因為15A的裝修工人丟馬筒到9/F而同住戶嘈交最後被投訴
6) 業委報告7座不潔

返工等放工，今晚總算有o的o野做，唔算太悶。

收佐工去食o野，食完就訓…

>>September 7, 2004 at 1:52:59 AM GMT+8

2004 年 8 月 27 日 星期五 【酷熱】

唔係好記得自己做過乜添…

返工囉…食華昌囉…放工囉…

仲未有時間整電腦添…

原來呀Wing冇得升做SPA喎，只係升做「大頂位」。聽講話係有人話佢冇經過「大頂」呢個位冇可能升佢喎…咁o既情況都冇o野好講啦，公司小人當道…唉…

>>August 30, 2004 at 5:28:45 PM GMT+8

2004 年 8 月 26 日 星期四 【驟雨】

雖然終於恨到可以返B，但係身體好似唔多習慣咁，成日都累累o地，又有o的頭痛…

今日其實都冇乜特別o野做，個CRC又熱到死，o的熱氣係咁由個櫃台下面「供」出o黎，真係唔多想坐o係度做o野…好熱好焗呀…

放佐工同班清潔姐姐興姐傾偈，原來前兩日7座拆落o黎o的膠板畀另一個呀姐偷佐去賣仲有下聞。只係講佐畀Warren聽，又變佐成個MO裡面o既事。清潔公司怪興姐做乜咁關心o的膠板，仲要乜都同座頭講…不過公司又衰o既，完全冇指引話o的膠板點處理，而家好o丫，件事揚佐，o的公家o野可以歸返公家，唔駛畀一個人毒食晒。不過興姐都慘喇，晚晚倒垃圾倒得咁辛苦，仲要畀清潔公司無理扣佐三百蚊倒垃圾糧。唔倒又唔得，會連日頭份工都冇埋…而家o的公司真係pk！

呢間清潔公司，份內o野又做唔好，對o的員工又衰，真係對上對下都唔掂…唉…呢度o的客對清潔有要求係o岩，之但係請著間咁o既公司，根本冇可能做得o的咩出樣啦…唉…

>>August 27, 2004 at 2:51:12 AM GMT+8

2004 年 8 月 25 日 星期三 【酷熱】

呢個月最後一日返A，之後轉返B。

成個上晝都好多o野做，要趕起份大堂lift損毀報告畀Warren。眼見十個「問卷調查收集箱」居然要兩男(Eric、Oscar)一女(Esther)推架車仔去收，就可以知道呢班人幾咁無能同埋幾識拿正牌蛇王。

有個客話我o係度做o徙晒，唉…呢個客同我拍晒膊頭傾偈o架喇，估唔到一個小小o既管理員都仲有人賞識，幾時都話7座o的客根本唔係衰，係管業激嬲佐佢o地先會令到佢o地咁火，我覺得7座根本冇一個客係VIP！所有住得o係7座o既我都當佢o地係我朋友o架啦！

下晝就pk喇！明明唔係我落管業當值，又畀人屈佐去做o的問卷點票！我仲有成疊o野要filing！！佢xy！成個MO都係人，連搵張台做點票都冇，辛辛苦苦搵到個位，又冇凳坐！嬲嬲o地走佐過去PA房做，三兩下手腳就搞掂啦！之後再做埋自己o的o野。

不過最睇唔過眼就係o個個Esther喇…果然係同Michael之前o既警告一樣，呢個女人真係自私到爆o既。眼見8座疊問卷係最細o既，就即刻自己拿住o黎做，work load大o既就畀晒人，仲想畀三座樓o既問卷我做（好在走得甩），真係射波專家喎！我真係唔知呢班咁o既人走埋一齊可以做到o的乜出o黎…成班都係垃圾！o的客果然係講得o岩，鬧得準！

港灣人專線︰
http://www.mhv.com.hk/plus/index.php
我的新居︰
http://www.tokuhon.org/mhv/forum/

因為電腦壞佐，冇乜時間搵工，放工搭正四點半過o的打咭即走，費事又畀人捉住做埋晒o的戇x o野，呢度絕對唔係多勞多得，放工就一於少理，走為上著。之後過佐黃金買火牛，點知返到屋企居然用唔到！！！灰晒！一駁電部機就著喇，但係完全冇畫面！！！灰呀… =(

郵差明天回美國，一路順風！我會努力儲錢，希望十二月可以有錢過美國啦… @_@

>>August 25, 2004 at 10:58:48 PM GMT+8

2004 年 8 月 24 日 星期二 【雨】

今朝一返到座頭，就知道佐件唔開心o既事…有一個客過佐身…

其實都只係間唔中同佢有兩句，但係估唔到人就係咁化學…佢老婆都幾慘，見佢個樣好sad…

上晝因為無聊地又有拍拖更，總算有o的空位畀我走，但係呀華就慘喇，幾乎走晒十座做頂位去廁所…

下晝做佐o的filing，收工。得到個消息，原來Michael會轉site升做APO去屯門，即係MO又少佐個真係做o野o既人。唉…聽講呀Wing升做SPA頂Michael個位，但係IT同roster o的o野都唔知由邊個跟喇…唉…恭喜Michael之餘，多多少少再同o的住客一樣，對呢個管業心淡。

本來有得同Trevor踢波，但係落雨取消，變佐同您食飯，再送您返工。但係您返佐一陣工就話唔舒服要走… @_@ 可能係因為您返今朝份工太早喇，您未習慣o的時差都未定…

>>August 25, 2004 at 10:09:45 PM GMT+8

2004 年 8 月 23 日 星期一 【酷熱】

休息日，係咁訓…訓到冇預早少少出門口去黃金買火牛… @_@

夜晚返學友社，其實累到有o的想射波…

今晚得三個組員加兩個組長一個社工，一個組員一條線，電話聽過唔停…

聽完食過麥當當，乖乖搭車返屋企訓覺。

>>August 25, 2004 at 10:02:23 PM GMT+8