2004 年 9 月 11 日 星期六 【酷熱】

返B，今日終於頂個清潔呀姐唔順，嗌walkie叫清潔部個科文o黎睇o下o的玻璃同鏡鋼。大佬，抹完仲衰過未抹之前，不如你唔好抹啦！

好彩今晚都叫做有一堆文件做，時間都叫做過得充實o的。不過臨走o個時一座地庫泵房爆食水喉，大大鑊，搞到成幢樓都冇晒食水，連會所都要開埋畀人入去沖涼，真係搞笑！發生o的咁o既事，真係港灣不幸！

放工之後約佐Ken仔喎，仲有Trevor同咖啡仔…去玩喇！打牌！

>>September 12, 2004 at 5:20:05 PM GMT+8

2004 年 9 月 10 日 星期五 【微雨】

訓佐十四個鐘呀，勁！

返B更，都幾爽o丫…

發現今日個呀姐做o野異常「求奇」，o的玻璃同鏡鋼面全部都係水漬，仲要係灰色o既水漬！點收貨呀大佬！成道玻璃門同電磁門睇落都好污糟！好唔掂，完全唔prof o既清潔，呢間清潔公司求其搵o的二打六返o黎，遲早出事！

不過今日佢o地總算做返件好事，就係開始同大堂o的地磚打磨，之前磨蝕佐o個個位原來都仲有得救，希望佢o地快手o的搞返靚我幢樓啦！

>>September 11, 2004 at 1:54:31 AM GMT+8

2004 年 9 月 9 日 星期四 【颱風】

嘩…天水圍o的雨大到低能呀！

兩點返到屋企啦，即訓。

六點幾醒佐，食完飯九點幾，又訓…

訓…

>>September 11, 2004 at 1:48:16 AM GMT+8

2004 年 9 月 8 日 星期三 【雨】

無聊地返A更，都幾慘o架，一般悶。

好在都有份IR寫o下，又有份通告要draft，如果唔係真係悶得死，但係十二點鐘就已經做完喇… @_@

下晝都幾無聊咁過，好在o的大粒o既都去晒training，冇皇管，無聊到四點半就可以收工！

放佐工就陪返您行o下街咁啦，廢事您又話我同您冇二人世界喇…ccc…行到幾鬼死累呀…等到十點半佢o地放工，就同咖啡仔、呀Tim同Trevor去韓燒再打牌…$$$…

>>September 9, 2004 at 8:55:45 AM GMT+8

2004 年 9 月 7 日 星期二 【酷熱】

放假喎，訓到點幾鐘就畀電話嘈醒佐喇…真係慘…

下晝去佐東亞搞轉強積金戶口，佢xy o丫！唔怪得之東亞做極都係銀行仔一間！

三點九開始排隊，四點過o的先排到去櫃台！五個櫃台三個人做o野，做o野慢吞吞，條人龍排極都有十幾廿人，咁樣o既服務，點同其他銀行爭呀？同我搞強積金個男人超級唔prof.，好似乜都唔知咁，講o野又吞吞肚肚，冇力冇信心，叫我點信得過你可以幫我搞掂呀？

同條友講話將o的強積金由安泰轉過去東亞，之前明明打佐電話去東亞問，話交返份安泰強積金轉名form同身份證副本就得，條友居然無端端同我填佢公司份form！ @_@ 點頂呀大佬…搞鬼咁耐，又問我公司名，填完之後又話搵唔到我公司名，仲問偉邦係咪新登記o既公司！！！ @_@

最後佢又打電話畀返強積金部門，搞到四點半先叫我填返我帶去o個張form，仲填到錯晒，要我簽多三、四個名！嘩…好唔掂喎…咁搞法…問佢有冇得上網睇返自己o的資料，佢居然叫我開戶口… @_@

最後都係再打返電話去東亞強積金熱線22111777問清楚，確定係要開戶口先可以網上睇，不過每季都會有statement寄返畀我，同埋o的錢成功轉佐過東亞之後，安泰都會寄返信話我知o既，大約要個幾月。ok啦，如果個幾月都仲未收到安泰o既信，東亞就知死，我一定發難o架！咁o既銀行服務，早o的執佐去好過啦！

頂！原來東亞同恒基係同一個老闆！又係自己錢內自己人袋！唔怪得之o的服務咁差啦！有跡可尋！

>>September 14, 2004 at 1:22:35 AM GMT+8

2004 年 9 月 6 日 星期一 【酷熱】

返B呀，好懞呀今日！

返到去都唔係咁多o野做，都悶悶o地啦…

5A29個女人又投訴我o地有家人有狗吠，雖然佢冇講佢係邊戶，但係我認得佢把聲同埋o個種講o野o既語氣。而且今晚個平台少有地咁靜，所以我知道個女人又吹水。不過咁，見悶悶o地，又即管搵o的機會行開o下。

我問個單位隔o黎o個家人，佢o地都話冇狗吠，用Intercom對話之中亦聽唔到有聲。

之後上到樓又聽唔到有狗吠，過到5座隔火層都聽唔到，上到5座天台都見唔到我o個戶有放狗出露台。用返Intercom打上去5A29又明明有人都唔應，所以唔好意思喇，小姐，你唔同我o地合作我o地幫你唔到喇，就咁完事。

件事足足擾攘佐成四、五個字，都幾好，打發o下時間。之後又有個細路o係座頭陪我傾偈，都幾好，又打發佐半粒鐘。而家o的細路真係越o黎越聰明，唔知係咪同食邊隻奶粉大有關… @_@

放工唔記得閂locker，好似連件褸都冇放返入個locker度，真係懞到上心口！一心諗住放假，完全唔知自己做乜… @_@

收到小道消息，原來自私精Esther走人喇！恭喜晒港灣！唔知今次升唔升到呀Wing呢？話晒而家都叫做做過「大頂位」啦！又睇o下o的人有乜藉口！哼！

>>September 7, 2004 at 1:51:53 AM GMT+8

2004 年 9 月 5 日 星期日 【酷熱】

琴晚都係頂唔順，食完飯九點半就訓著佐…搞到約佐超人都冇出去。

星期日，成朝都非常之悶，冇乜人出入…

好辛苦先等到放工咋！今日終於都做完7座o既filing喇，平時冇乜機會做，今日總算了佐件心事。

放佐去就去佐荷李活，諗住買個加菲貓啦，點知佢o個度冇我早兩日o係City Super見到想買o個個款，唯有搭返車去尖咀啦，點知佢又冇新貨喎…佢有四個款o架，一隻係伏o係度，一隻係企o係度垂低手，一隻係抱抱樣，仲有隻係隻手搭住佢隻熊仔卜姬。本來想買抱抱，但係最後唯有被迫買佐我覺得冇咁鐘意o個個啦…不過畀一隻錢有兩個公仔，又好似抵返條數喎！

見聽日返B，就去機場接您收工一次咁大把啦，點知您今晚早收，但係見到您o個個開心樣，都好過癮o架！

>>September 7, 2004 at 2:53:11 AM GMT+8

2004 年 9 月 4 日 星期六 【酷熱】

嘩，您又返三放十二喇，原來大家都係做full-time o個時會咁o既…有好有唔好啦…

今日返A呀，去到彌敦道先至塞車，太奇怪喇，全部都係巴士，郁都唔郁！遠睇見到太子o個頭擺佐架巴士o係度，原來個十字路口車親人！好在最後都o係七點五返到公司…

悶死人o既一朝，真係返工等食晏…慘！

佢老鼠！無良公司為佐籌夠數，居然迫o的小職員申請「恒地會」信用卡！連o的一個月得六千蚊o既保安都唔放過！痴線o架！張卡係東亞，仲要核核突突咁！我見避無可避，就索性申請佢張金卡，一於睇o下佢點批畀我！不過…好似交form o個時唔記得簽名添…ccc…

放佐工拿塊底板畀人整，個電腦醫生只係話唔駛擔心…唉…我都打定晒輸數喇…

>>September 4, 2004 at 7:20:02 PM GMT+8

2004 年 9 月 3 日 星期五 【酷熱】

偷懶，冇返學友社。訓到六點四先畀健健叫醒，話約佐Henry Yiu食飯問我仲去唔去…即刻換衫出門口，788加船，七點二就到尖咀啦！

食飯就去佐意粉屋，四個人︰我、健健、Benedict同Henry Yiu。有好多年冇見Henry Yiu喇，簡直係消失佐咁…四、五年都有喇…條友一樣咁多o野講，一樣咁唔怕事，好過癮。

食完飯再行佐陣就同Henry Yiu先走，又係搭船轉巴士，大家都累喇…

>>September 4, 2004 at 11:47:16 AM GMT+8

2004 年 9 月 2 日 星期四 【晴】

聽日放假，今晚可以玩盡o的！

今日好鬼火！火o既原因係今日Warren話畀我知我畀業委打電話去Ivan Wong度過佐「兩棟」！！！o個個死八婆話我對o的唔幫大狗戴口罩o既狗主有優待，我只是講佐句「SARSo個時人要戴口罩都辛苦啦，狗要戴口罩都辛苦o架，真係有o的不人道…」，就畀呢個死八婆話我冇正確o既心態對待違反規例o既住戶，話我心態唔正確亦唔會出力執行規例…以後都係唔同個死八婆同佢老公講咁多o野，以為佢好心問候o下我，想傾偈，原來係陰x我！火！十萬個火呀！

聽到呢個消息，我即晚就見到晒三個狗主啦，即時話畀佢o地知我畀呢位咁怕狗o既業委投訴我冇盡忠職守。大家都話會合作，其中一個仲話狗繩我就會用，口罩我就一定唔會戴o架喇… @_@ 多謝大家支持…

不過呢個業委都算賤喇！今晚仲保安辦事處投訴樓下隔o黎個單位放隻狗o係露台，要我即刻上樓跟進，我去到佢露台，一o的狗吠聲都冇！佢話佢開緊冷氣，聽唔到有聲，但係怕嘈親其他住戶會投訴。哦。真係「先天下之憂而憂」喎！自己投訴仲要賴落其他人度，真巴閉。

放工打牌，打完牌返屋企訓。今晚打得唔係好開心囉…

知您返工辛苦喇，咪咁憫啦！

>>September 4, 2004 at 11:49:02 AM GMT+8