2005 年 1 月 28 日 星期五 【颳風】

燥底o既一日！

六點八先畀妹妹嘈醒，死得！六點十出門口，又唔想用兩舊水搭的士返工，咁就冇佐一日人工！但係又畀我突然之間諗到條橋︰搭的士追返架巴士！

結果用佐廿蚊，搭的士去返臨上東區走廊之前尾二個站，追到，七點五落車，飛返公司，07:29打卡…呼…

上晝都幾多o野做，淨係幫老細諗新年畀業委主席份新年賀辭都夠死。不過好在，突然又諗起特首年年都有賀辭，可以「抄考」o下…ccc…特首今次總算幫到o下我呢個小巿民。

下晝無端端又搞咩巡村，睇供水設施喎…雖然有o野學，但係冇佐成個下晝…結果四點半走唔到，因為要做埋兩張defect單！！！約佐郵姐五點半o係筲箕灣，用Windows 98 CD交換大陸肉乾，遲晒大到喇！！！

公司o的電腦又不知所謂，畀PA用o既電腦一部冇駁printer，一部上唔到公司Server，一部hang機hang到爆，淨返呀Wing部機係正常… @_@ 結果「攝」佐佢個位o黎做o野，仲搞到佢做唔到o野，要去另一部機做，激嬲佐佢，仲變相令佢遲收工，真係非常之唔好意思…

呀Wing，對唔住… @_@

結果我五點二離開公司，臨走講粗口，畀老細踢佐一腳… @_@ 飛的出旺角，五點半先上到102，六點三先到筲箕灣…好在郵姐而家冇做o野，得閒等，如果唔係就又唔好意思多一個人…

返到屋企死有線又上唔到網，即打去嘈，嘈完好快搞返掂，真係唔嘈唔得！邊有咁唔stable o既網絡！

我好憎港灣呢個工作環境︰
1) 成日迫人OT，仲要用埋o的x制度，做兩個鐘先得一個鐘頭補假，戇居！
2) 限制我o既發展，座頭電腦block晒o的功能係一個好例子，變相迫人做看更，冇得做文件，點叫做PA？！
3) 放工不定時，令我失去同女朋友、朋友、家人以及私人時間，亦令我同佢o地關係變差！
4) 做佐九個月，仲係成日串錯我個姓「LEI」，半分尊重都冇！
5) 人工加得二百蚊，完全否定我為公司作出o既貢獻！

離開港灣的日子不遠矣…

----------------------------------------------------------------------------------------------------------------------------

女朋友叫我寫一百句我愛佢畀佢喎…順o下佢意啦…

我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您！我愛您

>>May 10, 2006 at 2:48:59 AM GMT+8

2005 年 1 月 27 日 星期四 【陰】

返完兩日B，今日放假o架，但係晨早又要去上堂。下晝返佐母校！同以前o既老細傾偈，好開心！

今朝晨早出門口，由天水圍出發去將軍澳上由公司搞、關於保險o既堂，但係中途要返公司換佐制服先，廢事異相。搭完輕鐵轉西鐵，九點二先返到港灣，好趕急！搭的士去太子轉地鐵，遲佐少少，好在老細冇話嗟。

個course係由公正行同埋保險顧問公司cosmos o既人講，講佐o的case study，學佐好多o野，好有用，原來保險真係好得意，管業處要買公共地方o既全保同第三者保，而住戶就要買室內o既結構保（火險）同埋家居保。好過癮，唔夠訓都冇眼訓！

之後同老細食飯，食完飯條友去搵以前公司o既SPO Eva姐，佢而家都做唔知APM定PM喇…於是我就一個人搵巴士返浸會（好在有咖啡仔遙距幫手，如果唔係就要焗住搭地鐵！！），諗住問o下報course o的o野。

浸會，好多開心日子o既地方，好耐冇返去喇。先去佐新校o既持續進修學院，問佐關於課程o既o野。原來要讀張cert.，要o係夏季課程開始o個時註冊，註冊佐再報courses，先有得claim返政府錢！嗯…都好，咁咪可以遲o的先拿舊錢出o黎，或者再諗清楚o的先報，都好。

浸會真係變佐好多，有學生宿舍喇！行返去舊校，經過中間個公園仔，諗起以前點樣同呀Ben夾硬拉住呀Charles，迫佢吸我o地o的二手煙同埋傾偈…嗯…好耐冇見，真係掛住佢o地，仲有家姐…

舊校門口靚佐好多，似返o的樣，以前好似後門咁，完全唔起眼。返到上去，搵我大學時代o既老細︰MS Wong。
http://www.hkbu.edu.hk/~chem/staff_mswong.htm

佢好錫我，好識欣賞我o既優點，亦都提醒我要留意我o既不足。係佢令我對化學呢科有更有興趣，對organic chemistry呢個有更深入o既認識。上到去佢房，原來佢上緊堂，於是入lab睇o下先。

冇乜變呀，不過多佐o的要用錢買o既o野，例如電腦、chemicals、大型抽濕機咁…之前o既RA李老師仲o係度呀！因為MS收佐佢讀PhD，今年四月都畢業喇！時間真係過得好快，我已經差唔多離開佐浸會四年喇！

我個名同電話居然仲o係個lab塊白板上面！！！同李老師傾佐兩句之後，就去上老細o既堂。好耐冇聽過佢講書，不過佢o的notes同埋演譯手法都仲同以前一樣，仲係成堂只講英文，仲係將「如果」講做「如古」，哈哈。

等佢落堂，上返房傾偈，傾佐差唔多兩個鐘。傾o下而家o的學生呀，傾o下我o既發展，亦都傾o下我讀M. Phil. o既事。

呢個行頭好細，好多o野唔係你唔講就冇人知。MS話知我quit佐個學位，覺得好upset，但係佢知道我係一個幾硬頸o既人，知道我唔會巴結o的老細，亦都知道我以前中大o個邊個老細係咩人，因為今年又有師弟過佐去跟佢，都有返o黎講o下o個邊o既生活，真係慘，只有祝佢好運。

MS同我講呢o的係際遇問題，一直話︰"This is Life."同埋"C'est la vie."。佢以前o係瑞士做研究，法文非常之好。我明白，一條住o係金魚缸o既魚，一日畀人放落大海，見識過，再畀人捉返放返落金魚缸之後，睇o野都會唔同佐。可惜，我並冇機會去外國。

佢o既教學理念不變，非常之有鼓勵性，令人好舒服，有受支持o既感覺。我係深受鼓舞o既。有一段長時間，我都一直唔敢返學校見呢個恩師，係因為我覺得我好失禮佢，我係佢教出o黎，但係我冇好好o係中大完成我o既學位，令佢、浸會大學化學系、浸大蒙羞，我要放低一切一切同中文大學有關o既o野，以後亦都唔想再同中文大學扯上任何關係，呢個係我o既負擔。

同佢傾偈，個人開懷佐，如釋重擔。雖然，我已經一早學識點樣去面對我o個兩年o既失敗，亦證實自己唔可以再做化學，我係屬於另一個field o既人，我唔係一個輕易放棄o既人，但係當時我不得不放棄。但係，如MS所講，一切都係際遇問題，一個人身邊o既o野係會對一個人有好大影響。

之後再返入lab，見o下個師妹。原來我o既事佢都知，估唔到自己出名成咁… @_@ 睇返李老師o既thesis，裡面有好o既成果，超滿足，超感動。雖然我o地做o既螢光物料並未有o的咩大貢獻，但係最令人興奮，就係相關o既物料，舊年已經o係香港有得賣，就係LG o既OLED display電話7100，估唔到真係做到！雖然唔係我o既研究，但係同樣感動。

MS知道我做o野o個度係Metro Harbour View，原來佢都有聽過，原來我個屋苑都唔係咁差，起碼連一個沉醉化學o既大學講師都有聽過，仲知道o的樓價添…利害！我以前個lab，可以望到我而家做o野o個度，真係勁！靚景，係浸會先有。

時間唔多，但好珍惜。深深感謝黃文成老師的教誨…四月返去請佢同李老師飲茶。ccc…

>>January 29, 2005 at 10:11:09 AM GMT+8

2005 年 1 月 26 日 星期三 【颳風】

繼琴日之後，今日又上樓搵滴水，真係凍死！

下晝上樓，突返返風，隔火層寒風陣陣，真係凍到隻o野咁…最慘就係三點上去，搞到四點半，都仲未搵得晒o的咸水漏水源頭，真係大鑊！早兩日Ivan上樓影相又受傷…

四個內井位有八條咸水去水管，而家其中三個內井位o既平台已經濕晒，即係影響緊六個單位，都咪話件事唔急，而且真係濕得好緊要…

睇佐陣，終於畀我發現佐其中一個漏水o既位置，但係正正就係其中一個日日落o黎投訴o既住戶o既單位外牆！！都唔知點同佢開口講話佢個單位有事…但係影響到佢o既就另有其人，咁就慘喇…仲要繼續搵…

晚間安全過度。

晏晝Joseph打畀我，叫我準備好我o既resume同covering letter，佢會介紹我去佢公司interview。嗯…港灣，離開你o既日子已經不遠！

>>January 28, 2005 at 10:29:41 PM GMT+8

2005 年 1 月 25 日 星期二 【微冷】

事件燥底指數︰95%【嚴重】

Rebecca射波王，係咁射個波上座頭。火！

話說臨食飯之前，佢打上7座，話有個七座o既客投訴裝佐有線電視之後一直都睇唔到CCTV同埋衛星電視（即係睇唔到大廈天線提供o既台），問我o地管業處做過o的乜，叫我覆客。

經過幾分鐘o既討論後，我發覺我所知道有線呢件事o既料，可以答個客o既o野，佢都已經答晒，我就問佢想我覆o的乜，佢就話總之我覆…

之後講o下講o下，話既然管業處寫過信去有線，亦都可以搵返o的信，copy個副本畀個客，但係問題就出現佐喇。

如果係出畀住戶o既信，我o地可以好容易咁o係flat file裡面搵返個副本（如果正常出信程序冇做漏），但係而家係出信畀其他公司，咁就要o係outgoing document o既files裡面搵返喇。而呢o的files，以我一個CR team o既座頭仔，根本冇辨法可以拿到，於是我就叫佢去搵，因為佢係Admin team o既人，呢o的文件係佢老細Tracy Wong keep住o既。

我同佢講到呢度，就開始有o的火藥味。我話摷返o的信緊係你o地team負責o架啦！因為我根本拿唔到呢o的文件，有o既只係電腦o既soft copy，冇經理簽名，真係有冇出過街都唔知。不過真係吹脹，呢個Rebecca居然講佐句︰「咁你即係唔理7座o既客啦！」又話我講o野一輪咀，唔畀機會佢講o野。

真係火都o黎x埋！之後佢再話將個波畀我老細，我話︰「你唔可以次次都將個波踢上o黎就算o架喎，都已經唔係第一次係咁o架啦！」最後佢問我覆唔覆個客，我就話︰「冇料點覆，聽日至算。」收線。

同一間公司，居然有o的咁o既人，可以分工分得咁清楚，佩服。佢有事就識駛我o地o的人，我o地o的o野就冇話幫手。而家人o地威喇，升佐SPA，但係睇佢咪又係一世做SPA！

之後打畀老細，問佢有線個case跟成點，了解情況後，夜晚見到個客，同佢傾佐陣。解釋返我o地做佐o既o野同埋我o地企o係中間做唔到o既o野。個客都明白，亦都讚同有線呢間公司真係一間好pk o既公司…

>>January 28, 2005 at 11:27:44 PM GMT+8

2005 年 1 月 24 日 星期一 【微冷】

放假放到傻…係，又放假喇… @_@

訓到兩點先起身，上佐陣網，去剪頭髮，好似平佐喎，七十八蚊…

剪完返學友社，遲晒到，搭巴士都搭佐個幾鐘，真係過晒火位。

返完學友社返港灣，搵咖啡仔食宵，食完再入天水圍陪您。

您想我入o黎陪您咪出聲囉，又要玩隱悔…吹脹！

諗緊讀書o的o野︰
1) Diploma in Property Management
http://www.cityu.edu.hk/ce/cec/51018
學費︰$13,500 + 報名費︰$140，冇持續進修基會。逢星期三18:30-21:30，星期六14:30-17:30，約讀一年。

2) Professional Certificate in Conference and Event Management
http://www.sce.hkbu.edu.hk/pgm/by_pgm/certdip/documents/cp0080.pdf
學費︰約$6,400 + 報名費︰$120，持續進修機會退返80%錢。逢星期一19:00-21:30，星期四19:00-21:30，約讀半年。

3) Diploma in Business (Conference and Event Management)
http://www.sce.hkbu.edu.hk/pgm/by_pgm/certdip/documents/cp0076.pdf
如果讀 2)，就會讀埋呢個。

以而家o既情況o黎講，1) 同 2)可以一齊讀，但係就一定要狂返A… @_@ 不過就算只係讀 1)，都要返A o架喇，仲要星期六一定放假，因為好難編roster編到AABB咁…

頭痕… @_@

>>January 25, 2005 at 2:40:54 AM GMT+8

2005 年 1 月 23 日 星期日 【微冷】

琴晚同Joseph傾電話，傾佐o的前途問題，佢而家o係怡和做緊PO，外國人公司，唔錯。佢一知我要坐座頭都罵罵聲…唉…命o黎o既…希望佢幫到我啦…

朝早都幾忙，但係o的o野都濕濕碎咁…仲要上樓睇漏水…頂…又有屎水喉漏水！但係今日又冇發現…

食完飯再上隔火層係咁睇，睇到金睛火眼，好多條渠都有漏水跡象，都幾頭痕…

>>January 23, 2005 at 7:35:24 PM GMT+8

2005 年 1 月 22 日 星期六 【微冷】

放假，起佐身去高登買佐個40G harddisk，睇晒成個場Maxtor最平賣$365，即買，買完幫一幫襯馬會，再返屋企整機。

同妹妹部機裝佐XP，以後冇咁燥，見到佢成個桌面都放滿晒o野，好亂。以後分幾個users，方便o的，各顧各。

而家o的harddisk薄佐喎，搞到我都唔想裝落部舊機用，留返第日我自己部新機，非常好！

丟佐兩個IBM harddisks，以後唔會再買，希望o的harddisk壞少o的啦… =(

>>January 23, 2005 at 7:07:25 PM GMT+8

2005 年 1 月 21 日 星期五 【微冷】

又返A，不過明日又放假…

一起身，睇睇部腦，出事…個舊IBM harddisk又死佐…xyz$&^&^&%%$#$)(#@(！

上晝無無聊，不過有大發現，就係City個course招生喇！死都要報，但係要公司o既工作認明，搞搞佢先…

pk…下晝無端端briefing，仲要第一輪講佐個幾鐘，搞到四點三先到我o地brief，呢個講完又到o個個，仲要最後係YM講，痴線！廢話連篇！搞到五點幾先走得，低能！

放工返屋企食飯，食完飯洗埋碗，本來諗住出街，但係又畀妹妹捉住幫佢整返部notebook上網，搞佐都幾耐o下…

之後去買麥當當帶入天水圍畀您食，再一齊睇佐上次買o個隻VCD，戲名唔記得喇，不過我會叫佢做「地心蟲蟲」，因為係講咩地球磁場壞佐，要o的人駕住架「蟲蟲車」鑽入「地心」放炸彈，整返郁個地球。好一般o既科幻片，無聊橋段，亦都好佩服個編劇可以幻想到個地球中心係咁…爛片…唉…

>>January 23, 2005 at 7:20:31 PM GMT+8

2005 年 1 月 20 日 星期四 【微冷】

今日放假，之後仲隔日放添…

中午時分您蝦我貓貓，跟住鬧交。我同您都好耐冇鬧交喇…

下晝要同婆婆去覆診…今次勁呀，由兩點睇到四點，簡直係冇一秒鐘係白等o既。

睇完老人科，個醫生又轉介去眼科排期，話有糖尿唔可以唔睇眼。不過去排期前仲要拿葯同打流感針。之後再去驗眼，發覺個護士好似好緊張咁，話要快o的睇先得，結果排到下下個禮拜就有得睇。快成咁，都幾得人驚…唔係咁嚴重呀嘛？

搞到又要改更表，呀華畀Esther咋型。

返到屋企又訓，訓到食飯。食完飯又訓… @_@

>>January 21, 2005 at 12:53:25 PM GMT+8

2005 年 1 月 19 日 星期三 【乍雨乍晴】

返B，都唔係咁忙。

疊更走返落MO跟返o的保險o既cases，第一次聯絡到保險公司o既Charlotte，佢都幾好人喎，唔怪得之老細成日打畀佢啦！cc…

雖然今日老細仍然射波，但係YM冇發作喎，疊更時間總算順利過度。

晚間冇乜o野做，又可以搞o下o的cover letter同resume。臨放工之前停車場繳費處爆walkie話o個度塊大玻璃爆佐！！Control呀達即爆機︰「唔係嘛？咁大鑊？！」超好笑！塊強化玻璃起碼三米乘一點五米咁大o架！八卦完先收工。

放佐工要等埋您收工，又可以同夜班o的同事傾o下偈，真開心。食完o野，返屋企訓覺。

>>January 20, 2005 at 12:00:57 PM GMT+8