2005 年 2 月 27 日 星期日 【乍雨乍晴】

絕妙o既五串一居然過唔到愛華頓o個關，真係心都淡晒…

返A，都幾精神。星期日朝早o的人都未起身，冇乜o野做，座頭部機又「神神地」，做唔到太多o野。成朝執好佐月尾要交o既o野，再做埋o的月尾要交o既功課，咁又一朝。

食完飯，超充實。首先上佐個誇張住戶度，佢話佢個露台有塊磚甩佐，仲要連屍都搵唔返… @_@ o下！唔係咁大鑊呀嘛？！上去一睇，先至把幾火！原來只係o的「紅毛泥」「文」得唔好，真係用指甲刮都刮得淨，真係吹脹！住戶順手話埋道廁所門有問題…一睇，頂！把鎖壞之嘛，唔好玩啦！

之後就去佢樓下o個家，話個門框爆佐。我仲以為好似之前o個單咁個門框離佐半吋添，原來只係離佐幾毫米…之後佢又話個洗手盤塞漏水，都幫唔到咩手，叫佢同老公商量o下先再搵我o地。

跟住又頂呀華去廁所，又去佐半粒鐘，佢xy！佢就真係過癮喇，難為我大把o野要做！你呢o的日子唔會多o架喇，因為我就快走。

最後再落一層o既同一個單位，窗台滲水。超誇，唔知係潮濕出水定係真係滲水，成個窗台都係水！！！呢兩日冇乜落大雨，照計點都冇可能係由外面滲水滲成咁…呢單o野都可以話係港灣七不思議之一！

晚上去佐Patrick媽媽o既安息禮拜。原來佢細佬係我小學同學，呢個世界實在太太太細喇。不過我同佢細佬冇相認。

一如所料，Joseph冇出現，又放佐飛機。對於佢o黎講，佢自己o既事先係最重要o既…唉…電話又停埋，打去屋企又搵佢唔到，睇o黎佢介紹o個份工，都凍過水喇…唉…真係求人不如求已…

>>February 28, 2005 at 11:36:01 AM GMT+8

2005 年 2 月 26 日 星期六 【乍雨乍晴】

名正言順放假，唔小心放佐孖day添…ccc…

訓，訓醒食外賣（我塊雞扒呀！！！@_@~~~ 跌佐落地…），食完返屋企。

爸爸生日快樂。

>>February 27, 2005 at 11:44:27 AM GMT+8

2005 年 2 月 25 日 星期五 【颳風】

射佐！！終於識射波！！仲可以放孖day添！一起身都已經七點二喇，點返o丫，真係飛的都唔掂，打個電話返去保安辦算。

今日本來約佐個客打牌，都要取消喇。

之後係咁訓，訓到點幾鐘先起身，就入天水圍，同您食o野，去睇醫生拿射波紙，再同您一齊出旺角畀返o的o野堅堅，再同堅堅食佐o的o野，我o地就去睇The Aviator（港譯︰《娛樂大亨》），個譯名好差，因為套戲係講一個發飛機癲o既人Howard Hughes。Leonard DiCarpio o係呢套戲真係做得唔錯，七情上面，要癲時有癲，要叻時有叻，要勁時有勁。幾有劇情，唔錯，值得睇，仲做足兩個鐘頭四十五分鐘，抵睇！

睇完返入天水圍訓。

妹妹生日快樂！

>>February 26, 2005 at 9:05:18 PM GMT+8

2005 年 2 月 24 日 星期四 【暴雨】

邊有咁忙o架！成朝都未停過！！！

晨早就被騙喇！今朝遲佐出門口，走佐班車，打畀咖啡仔，問佢返唔返工，佢話佢o係黃大仙，會返工。見冇人同我一齊搭的士，咪繼續等巴士囉，好趕咁返到去，點知條友居然射佐！！燥！

成朝唔停手呀…一來要搞掂o的保險o野先啦，老細又無端端催我交份7座喉管滲漏報告畀佢，搞到真係唔得手！恒基維修組又話要上隔火層睇漏水，搞到又要上去見o的煩人，話畀佢聽邊度漏，佢又話唔明顯，唔整住。哦。我明明睇到有，你話冇，你係專家，你贏。仲要再開兩張修茸單…忙佐成朝…

座頭部機又short short o地，成日無端端用用o下自己熄機，個word又貼唔到o的圖落去，超燥！

下晝巡樓，先叫做有得鬆o下…落到七樓，去到水電錶房門口，居然發現門後面有o野頂住，於是用力去推啦…點知…有個男人o係門後面！！！佢出到o黎，我仲猛問佢有冇事添呀…見佢走佐，再去睇o下門後面有乜咁吸引佢呢？入到去一睇…原來係個客！！！！佢兩個擺明係o係度偷情啦！！！！ccc…畀我撞到正添！證明我o地呢度保安嚴密！不過佢兩個就真係瘀到爆喇…ccc…

部電腦終於整好晒喇！yeah！但係仲差條天線喎…

妹妹今朝居然要入急症室，真誇…

>>February 24, 2005 at 11:38:44 PM GMT+8

2005 年 2 月 23 日 星期三 【颳風】

超累…一起身仲個胃仲好唔舒服，食佐少少o野都已經頂住頂住咁…可能係琴晚餓得滯咁訓啦…

今日唔知點解，連o的報價都畀埋我做…真係誇…冇人做咩？！

下晝真係好唔掂，頂唔順，點都要蛇一蛇…

放工返屋企即訓，訓得一個鐘又話食飯…format佐部機再o黎過，因為琴晚裝裝o下又有error，索性再裝過，費事煩。

食飽又再訓…zzz…

>>February 24, 2005 at 9:22:21 AM GMT+8

2005 年 2 月 22 日 星期二 【乍雨乍晴】

天文台呃人，又話高返兩度，假o既。

八點三起身，今日要見工。九點出門口，冇車，搭的士。點知…塞車！！！平時五十蚊都落到灣仔啦！今日居然要八十蚊！但係個身上面得七十蚊，好在個司機好好人，仲話我見工就應該預早o的出門口，畀人o地個第一個印像唔好…mmm…

九點七上到去，一等…跟住填佐份form。再等…入去做test，draft proposal同通告。三等…做完再做logical test。四等…之後先有得見人事部o既人。全程用中文都夠膽死！！！傾佐好耐呢，差唔多成個鐘！希望佢請我啦，不過有o的地方答得唔好。例如點解要走同埋物業管理仲可以加入o的乜元素…十二點七先可以離開新鴻基中心…

下晝仲有大把o野做！

首先要過旺角，拿返DBS o既二百蚊百佳禮券，您同媽媽一人一百蚊，真係手心又係肉，手背又係肉，唯有平分…

之後再衝去旺角火車站隔o黎間港專幫媽媽報course，再落地鐵站activiate張八達通o既信用卡自動增值，就過黃金搵Billy仔。咖啡仔居然暫時甩底，吼！

電腦總共只係買佐$3,140，雖然張display係cheap o的，但係可以慳返成五百蚊都抵啦…希望下個月易捱o的啦，因為如果City收我要交學費喇…

Setup個Windows，搞到訓得幾個鐘… @_@

>>February 23, 2005 at 12:39:04 PM GMT+8

2005 年 2 月 21 日 星期一 【乍雨乍晴】

又係好凍…好在呀華有個暖爐… @_@

朝早要prepare見工o既o野，但係都幫老細搞佐幾張通告同memo。

下晝巡樓，但係無端端又有漏水，所以即刻衝上去睇！嗯…影佐相，有兩個位要開單…雖然唔係100%肯定，但係開佐先算喇…有殺錯，冇放過！

放工返屋企，夜晚再陪您…cc！

>>February 22, 2005 at 2:29:19 PM GMT+8

2005 年 2 月 20 日 星期日 【乍雨乍晴】

痴線…邊有可能凍成咁… @_@

上晝都係準備o下星期二見工o既o野，康業個網頁都幾多o野睇喎！

好難先等到下晝食飯，又凍、又餓、又悶、又眼訓…好慘…

食完飯再捱義氣搬埋淨低o既收樓小配件，收工！

返到屋企有線又唔得，即刻打上去xyz！火！

>>February 22, 2005 at 2:25:29 PM GMT+8

2005 年 2 月 19 日 星期六 【乍雨乍晴】

琴晚十點幾就訓，凍冰冰，最好就係訓！ccc…

朝早好悶，真係好悶…不過無聊o既上午都總算有o的趣事，就係某同事o係會所個廁所開完大之後唔記得拿返個電話，轉個頭返去，就已經唔見佐喇！！之後仲報埋警添！聽講話個電話仲係新買o既添喎！都話港灣有賊o架啦！

燥哩！所以幾時都話貴重物品要跟身就係咁解喇！呢o的咁o既case我估o係香港一年發生過萬次啦！而且咁多個衫袋褲袋都唔放，係要放底o係廁所o的膊位度，又確係抵死o的，責任自負啦！我唔係講風涼話呀，今次當買個教訓囉，不過個教訓又好似貴佐o的…但係冇法喎，唔貴又點會提醒自己唔好隨便放底自己o的貴重o野呢？

不過呢位同事咁大個人都唔化o既，唔見佐個電話打畀老細係咁講，阻住佢做野，又唔理佢老細係有幾咁忙同埋個人有幾咁燥底…大人o黎o架喇，做o野時間o係度要老細同你處理埋晒o的私事！老細真係得鬼閒理你o既感受咩！跟佐老細咁耐，都未知佢o既脾性…公私分明啦！

冇佐電話唔緊要，冇佐o的電話號碼o個o下煩o丫嘛！想當年我o係機舖掛住打機o係個後褲袋度跌佐幾個電話啦，有o的仲係超級心愛而且絕晒版添喎！經過多次教訓之後，我到而家都冇再放電話o係後褲袋喇，驚死o丫嘛！

下晝又要做搬運工人，痴線！

放佐去拿個信用卡換o既Samsung monitor，冇得試，但係返到屋企試都冇死點，嗯…好滿意。

今日得知一個非常十分之好很恐怖o既消息，好得人驚…唔想再諗…唔好搵我分擔啦唔該…諗起都有o的想嘔…help me…

>>February 20, 2005 at 8:46:12 AM GMT+8

2005 年 2 月 18 日 星期五 【雨】

放假呀！打完牌入到天水圍都十點喇…陪佐您一陣您又話要返工… @_@

之後返柴灣拿信用卡，聽日再去過拿贈品！

下晝再訓訓訓。

死人i-cable自星期三上唔到之後，琴晚有人應承我會跟，結果都係冇回應。垃圾。不過爸爸拎過o的線，之後又上得返！激死！

好累o丫…

----------------------------------------------------------------------------------------------------------------------------

After discussion with Billy-chai, there is the updated information for my PC.

Parameters of My New PC:
Intel P4-2.4GA (800 FSB, SOCKET478, 2400MHz, 1024KB) -------------$967
ASUSTek P4S800-MX (SiS661FX, microATX, SOCKET478) -------------$510
Innovision GEFORCE FX5500 (128MB, DDR RAM) ------------------------$520
Samsung PC3200 DDR-RAM (512MB) --------------------------------------$593
LITEON SOHW-1633S DVD±RW (Internal) ---------------------------------$500

+ Maxtor 40GB HD (purchased before for backup of data)

Total Cost (Excluded Case and Transformer) = $3,090

>>November 10, 2005 at 10:58:56 PM GMT+8