2004 年 12 月 19 日 星期日 【晴】

台灣之旅第三日！

由於十二點就要退房，真係逼住要早少少起身，沖完涼，執埋o的o野，再分開o的可以丟同要帶返香港o既o野。哼！您都唔響應我o既丟o野計劃o既！好激氣呀！幾乎帶咁多o野去就帶咁多o野走！哼！

執好o野，book埋「飛狗」巴士去機場，之後就要買手信。由酒店o既侍應介紹，去佐一間好近酒店，叫做「港記」o既舖買鳳梨酥同綠豆糕。

被騙呀！畀足晒錢，我o地冇點齊貨，畀佢呃佐一盒220蚊o既十個裝鳳梨酥！我o地又冇拿單，冇得追喇…真係欲哭無淚…

無謂破壞我o地o既大好心情o丫，之後去書局街買書，買佐三本化學書畀妹妹，希望o岩佢用啦！再買佐本書畀自己睇，您都有買呀，仲買佐本《天堂II》攻略畀個妹添…都唔知您幾時又變得咁好死，對個妹咁好… @_@ 好重呀！救命…速速返酒店pack入個grip度先！

放好晒o的o野，就去食麻辣火鍋喇！300蚊一位任食，痴線o架！真係食死都抵呀！好辣呀！食到我噴火…不過又好過癮，因為唔係成日都食到咁怒辣嘛…正正正！o黎台北唔食麻辣火鍋又好似o徙佐o的！好味程度︰☆☆☆☆☆ ☆

打完邊爐繼續買手信，鴨舌、八仙果、煙、檳榔（特別係買畀咖啡仔o既，話畀佢聽死咁難食佢係都唔信要我o地買畀佢…）等等等等…好不幸o丫，最終都o係西門町o既鞋舖搵倒對converse，仲要個店員踩單車去拿添…咁就冇佐940蚊台幣喇…冇陰公！您就梗係開心啦！嗚…我o的錢呀…

五點上車去機場，六點幾先到，因為台北夜晚繁忙時間都例牌塞車！check in居然都仲有窗口位，真係好彩。臨尾再買佐肉鬆…台北中正國際機場o既抽煙房環境認真差… @_@

再見喇，台北！

八點四機十點返到香港。落機仲要行鬼咁遠先走得甩…最後十二點幾先返到入天水圍…陰公！放低o的o野之後，再同您去天耀買宵夜，個肚有o的痛添…

食完o野睇佐陣電視就訓…好死累o丫！

>>May 10, 2006 at 1:59:33 AM GMT+8

2004 年 12 月 18 日 星期六 【晴】

台灣之旅第二日！

由於琴晚實在太累，所以係咁訓訓訓，訓到下晝兩點幾先出門口呀…o徙晒o的時間喇… @_@

今日o既目標係去永康街食牛肉麵同埋「鼎泰豐」，搭地鐵去，落佐車仲要行鬼咁遠呀…早知搭的士啦…

去到「鼎泰豐」，發現呢間o野好high class咁喎…o的侍應好有禮貌喎，o的地方又好乾淨喎！叫佐一籠蟹粉小籠包同一籠蝦仁燒賣，等佐一陣，十隻小籠包同十隻燒賣就熱辣辣咁出現o係我o地眼前喇！小籠包皮薄料靚，肉汁美味，燒賣o既蝦好新鮮，但係o的皮就厚佐o的…一籠都只係290蚊台幣，又唔駛加一，真係抵食呀！好味程度︰☆☆☆☆☆ ☆☆☆☆。

之後o係永康街行，但係點搵都搵唔到「永康街公園牛肉麵」，好失望囉，唔知係咪已經執佐或者搬佐…嗚…

行呀行，同您去佐光華商場買漫畫書，好多舊書呀，但係您志在買新書咁，好多一套套o既漫畫書，仲好平添呀！不過最後您都放棄佐買成套o既主意，只係買佐六本就走。

之後我o地再去佐行誠品，嗯…好普通嗟，又話係乜台北最大書店，咪又係一間書店，咪同香港商務差唔幾嗟…廿四小時書店，一般嗟。您買佐本英文書，話要決心學好英文喎。嗯，畀心機啦，英文有用呀。

睇完書，就去食「王記」牛肉麵，搵佐我o地幾鬼耐先畀我o地搵到呀，真係搵到憫晒呀！食王記之前見到有花支丸，即係我上次去台北「怒食」o既街邊小食，今次o黎到唔知點解冇乜胃口食，粗粗o地買佐三粒同您試o下…好味程度︰☆☆

不過王記牛肉麵又真係好正喎！有o的五香牛肉麵feel，但係o的牛筋好「林」好入味，o的牛肉入口即溶，一o的都唔硬，湯料好味，麵彈牙，而您食o既粉絲，都好彈牙，唔似得香港o個o的冇晒彈性！好味程度︰☆☆☆☆☆ ☆☆☆☆☆。150蚊碗，超抵食！

食完行街街，您買佐條頸巾畀我，之後再行SOGO，同香港冇得比啦，咁細！您見到對converse鞋只係台灣有得賣，但係最細得五號半，冇您著o既五號，冇法子啦，送唔出我o既聖誕禮物喇！

SOGO十點就收皮，逼住返西門町行多陣，返酒店，休息。而您就o係度檢閱您o既漫畫戰利品…之後仲睇佐個無厘頭台灣玩人節目，真係幾低能都有，又抬生豬、又飛牛屎…唔通呢o的咁o既電視節目先台灣人睇？

累…zzz…

>>January 2, 2005 at 2:21:15 PM GMT+8

2004 年 12 月 17 日 星期五 【晴】

台灣之旅第一日！

好慘o丫，要五點起身，出門口搭E34去機場，好彩呢班車唔駛入元朗，咁就可以慳返o的搭車時間。撞鬼，架車未兜晒個天水圍都已經坐滿晒咁滯，第一班車通常都特別多人搭…幾乎連個行李箱都冇位放…

六點半去到機場，拿佐登機證，就去食麥當當早餐，食完早餐入閘，就見到Sammi，嘩！好唔掂呀！成面都係雀斑！又話「招招招」打散晒o既？！「SK II」呃人o既！Sammi成三十幾歲人居然o係度扮十幾歲細路女，短裙絲襪加大大大大大黑超，慌死人o地認得佢咁…但係過關o個時咪又係要除晒眼鏡，咪又係畀人認到晒…o徙氣。

之後去到免稅店，遇到個不知所謂o既sales，佢xy，我o係度數散紙佢居然話我阻住晒！火都o黎埋！我話過，我實會投訴佢！試問咁o既人簡直影衰香港，今時今日咁o既服務態度點得o架？香港人就唔係客？咁無禮貌都夠膽死！火！

上機喇！好o野！去玩喇！

八點半機，全日空o的空姐都仲係咁醜樣，冇變…十點正到台北，做台證，「唱」台幣（一蚊港紙換四蚊台幣，一人換佐二千蚊港紙，即係有萬六蚊台幣！大富翁！），再拿返件行李，十一點左右先搞走人。走之前再去郵局寄佐張post card畀個澳洲客，佢話冇人寄聖誕卡畀佢喎，咪陪佢玩o下囉！不過您好似唔多耐煩咁喇喎…咪咁心急啦…台灣咪就o係眼前囉！

搭國光號由機場去台北火車站（原來比我上次去貴佐十蚊！），搭佐成個鐘呀，台北陽光普照，幾鬼死熱呀！

我o地住o既「一樂園」，雖然唔算係乜n星級大酒店，但係勝在近西門町嘛，台北市都冇乜邊度夠呢區旺o架喇！我o地行佐落去「地下街」，台北忠孝東路o的地鐵站好得意o架，地下有商場連住晒，相對香港o黎講，o的地下商場都算遲起步喇！

買佐落地o既第一杯「珍珠奶茶」，好味呀，茶夠滑，珍珠夠咬口，真係唔係香港o個o的可以比較o架！行呀行，拉住個死人箱，都幾辛苦…終於都o係十二點前到酒店喇，仲即刻可以check in添！好o野！唔駛拎住行李流浪！

放低o的o野，抖佐一抖，您係咁話好肚餓，但係又累喎…唯有即刻出去食o野，食飽再返去訓…ccc…

我o地去佐食「老董」牛肉麵，好美味呀！好奇怪間o野一個人都冇，但係o的湯真係好香好好味，o的麵好彈牙，o的牛肉…嘩…好味到呢…幾乎想飲埋碗湯呀！最抵死就係一碗都只係120蚊（即係30蚊港紙），仲要係香港食唔到o架！！好味程度（十粒星為滿分）︰☆☆☆☆☆ ☆☆☆☆☆。

食飽飽四圍行，您就買佐兩條核核突o既「老天祿」滷水鴨舌，您話好好味，我就話好噁心喇…咪搞我！抖順條氣返房小休一陣晚間再戰！

起佐身就出發去行士林夜市，但係途中您又要買滷味食，超級唔明點解台北人咁鐘意食滷味，咸到死，居然通街都有得賣，有人買o黎食，仲好似寶咁…怪！再試佐好出名o既「阿宗麵線」，勁多人食，但唔多o岩口味…好味程度︰☆。

仲有，台北好多加菲貓o架，哈哈！！

台北都係冇變，樣樣o野都係香港唔興先到佢興，例如o的糖果啦、貼紙相舖咁…

去到搭地鐵，用佐500蚊買佐張台北八達通︰悠遊卡。好貴呢，但係做個紀念啦！而您亦開始染上佐儲地鐵飛o既惡習…去到士林，好多o野食、好多o野睇，就好似香港o既女人街咁，但係地方就大好多，可以睇o既o野亦都多好多。

飲佐杯我o地認為行程中試過最好味o既珍珠奶茶同埋食佐條香港已經絕種o既「熱狗腸」，好味程度︰☆☆☆☆☆，再食「鹽酥雞」，好味程度︰☆☆☆☆☆ ☆☆☆，呢度o既鹽酥雞同香港o個o的又好唔同，即使係返炸仍然係好味好多，而且o的小販個個都咁有人情味，同香港o既差得遠。

台北小販同香港小販好唔同，香港小販只係識得要錢，態度又差，抱住唔買你就蝕底o既心態，但係都仲要死纏住你唔放。台北小販好唔同，好熱情，好落力去推銷，但係買唔買係由你決定，亦唔會死拉住你唔放，又超好禮貌。香港人，再係用o的咁pk o既態度去生存，實死o架！

邊食邊行，行到好鬼累，您就終於忍唔住落手買佐件格仔恤衫，都要450蚊o架！買完o野收隊，但係都趕唔到尾班地鐵返西門町，唯有去到台北車站打的…

點知我o地遇上一個老伯司機，一上到車就係咁同我o地吹水吹唔停，仲叫我o地唔好打牌，話佢之前打牌輸佐好多錢… @_@ 咁都得…佢好好人呀，不過真係好客到得人驚…

買水餃做宵夜，好味程度︰☆☆☆☆☆ ☆，食完睇多陣電視就訓…zzz…

>>December 27, 2004 at 2:51:21 AM GMT+8

2004 年 12 月 16 日 星期四 【晴】

大功告成，屋企兩部電腦回復正常運作，亦可上網，總算係o係過台灣之前了佐件心事。

下晝出去同舅父搞埋份旅遊保，再買o的濕碎o野，就返屋企食飯。

食完飯再將o的可以o係台灣丟o既o野放入個行李箱度，所謂可以丟o既o野例如係o的舊衫啦、膠樽呀…等等等等…總之走o個時個箱只係可以放手信，唔可以放其他立雜o野！

仲要入天水圍同您匯合…辛苦o的囉…

>>December 16, 2004 at 10:07:49 PM GMT+8

2004 年 12 月 15 日 星期三 【晴】

終日整機，聽部機已經整返好喇，中佐o既毒亦都暫時唔見佢返發。

訓到好訓呀，下晝整機，整整o下又去訓，訓醒食飯，食完又整，終於都完結佐個噩夢。

唔夠時間，聽日先整埋爸爸部機。

新modem經router上網冇問題，但係爸爸部機唔知點解個舊IP release唔到，換埋LAN card都冇用，唯有format佐佢再裝XP…

>>December 16, 2004 at 1:34:26 PM GMT+8

2004 年 12 月 14 日 星期二 【微冷】

心情一般。

由於琴晚o係天水圍訓，所以今日順路返公司幫老細執台…都幾燥o架，佢o的文件…執佐幾個鐘，都係執佐佢左手邊企o係度同埋台底o個o的…仲有好多好多未執… @_@

Billy仔今日買餅返公司請大家食，聽日就返新工喇…祝您好運啦！

晚間，同您、咖啡仔太安樓宵夜，返到屋企兩點…zzz…

>>December 16, 2004 at 1:35:03 PM GMT+8

2004 年 12 月 13 日 星期一 【乍雨乍晴】

星期一，放假前一日，心情都好o的！

不過又燥佐，今朝一開機又發現中毒…咩事呀？！

成朝都忙住打份老細無端端彈過o黎o既proposal，又冇料，都唔知點做，做到一半就食飯，下晝都冇再做喇…

下晝上樓影相跟牆裂，因為連放十日大假，所以唔做唔得，仲要急住做…

做完收工，順手落更衣室訓返一粒鐘，等咖啡仔食飯。

返學友社，居然冇一個組長同組員返，得我一個！！！燥o的囉！好彩有兩個社工車輪轉幫手聽電話…

>>December 13, 2004 at 10:49:35 PM GMT+8

2004 年 12 月 12 日 星期日 【乍雨乍晴】

嘩嘩嘩！不得了！六點半先起身…

不過今日係星期日，加上有城巴咁好o既服務，冇遲到！不過好眼訓呀！

死有線未等到我返o黎就已經上佐o黎喇，真係離譜！換完之後又係一插就中毒！！火火火火火火火火火火！又要我打上去嘈！o徙我時間！

又要我format過架機！燥爆！有線renew佐o的config.之後，又好似冇事喎…

好累呀…但係訓唔著…嗯，我一定要寫信去嘈有線！

>>December 13, 2004 at 9:37:26 AM GMT+8

2004 年 12 月 11 日 星期六 【乍雨乍晴】

起身真係有o的累…但係星期六喎，冇理由唔返嗟！

朝早有少少悶，突然間老細又拿o的o野上o黎話急住要，就快快手做完。結果都係…比較悶o既一朝。

屋企幾日上唔到網，好唔容易先打返晒之前幾日o既日記…

放佐工又急住去尖咀喇…終於搵到Danny Ng，但係佢話個PC袋隻扣要自己去深水步配返，買到隻扣就收一百蚊人工。嗯…您好失望喎…世事冇完美o架喇，鬼叫個袋係爛佐咩，邊有話一定搞得掂o架…

後尾又過返銅鑼灣，o係三越o既PC counter話有得整，仲唔駛畀單添…不過要收百五至二百五蚊，咁整唔整呢？

累o的囉，仲要成晚騰來騰去…食完捽碟就返屋企沖涼訓…zzz…

>>December 12, 2004 at 9:25:04 AM GMT+8

2004 年 12 月 10 日 星期五 【乍雨乍晴】

放完假，又係四個A o既開始…

平常渡過，下晝又可以上去巡樓，開心返。

放佐本來諗住同您爸爸食飯，但係因為要拿您個PC袋去整，結果要由尖咀搭返車去太子，去到仲要話搬佐，仲要係搬佐去尖咀！真係幾燥都有…

最後因為冇時間，聽日大家都返早，結果去佐食金太郎就算，但係您張卡又過佐期…mmm…唔好唔開心啦，冇事o架…

我又點會話就咁就離開您呢~~~

>>December 11, 2004 at 1:18:29 PM GMT+8