2004 年 10 月 20 日 星期三 【微冷】

終於都有日返B啦…

由於琴晚又死佐去打牌，諗住送Ken仔一程（因為佢要返澳洲坐監喇！移民呀，好開心！），因為買醉月始終都係失敗，未成功過一晚，灰o的囉！條友左諗右諗，都係怕冇前途。唉，老實講，大部分人都係戇xx咁過一世o架啦，但求開開心心，唔好害人，咁咪算囉！o係香港定澳洲，生活都係戇戇o地o架啦，冇o格，我都廿五歲啦，都仲係做緊個座頭看更仔，但係我做得開心呀，咁咪得囉！

用一張機票加兩年時間換一個國藉，點都抵！

由於又係打牌活動，又引致您o既不滿…又大吵一番…頂…

平穩地度過今日，係有o的累，工作能力亦有所下降…老細打上o黎話有o野要我幫佢，我同佢講話好累，琴晚大戰。佢就問我o地琴晚玩到幾點，我更正佢，係今日，唔係琴日…佢又問咖啡仔有冇去，我話有。佢就話您o地班友…^$#()(_!~!&%^ 之後再問打牌有乜好玩，我就叫佢試o下…佢就轉話題，話轉頭會上座頭畀o野我。收線。

又係臨放工，先至引到一班街坊o既注意…首先有住戶約我上樓睇牆身裂痕，再到老友鬼鬼o既Ronald走過o黎講波經，之後又有兩公婆走埋o黎講七座o的狗，又話聽到類似虐畜o既怪聲…再拿佐張黃紙，我叫佢不如寫封信好過，因為張黃紙太細應該唔夠寫。接住又到鄭太拿佐雪耳糖水畀我食o丫…嗯…好味！最後仲要上樓睇黃色廁所水同埋廁所水箱邊o的鹽… @_@

放佐工，食魚麵（好咸），返屋企…訓…累…幾秒內就暈佐…

>>October 22, 2004 at 12:34:45 AM GMT+8

2004 年 10 月 19 日 星期二 【微冷】

早幾日o的日記都係甩甩漏漏，硬係要寫幾次先寫得整想講o既o野…

連續返到第三日A，真係有o的頹…

琴晚九點半就訓喇，頂唔蒲，今朝都要訓到五點半先識起身，雖然唔駛急急腳返工，但係成朝咁樣坐法真係幾o徙時間…唉…

作好佐封信畀Alice交去人事部搞放假信o的o野。快手o的啦，要申請visa、買機票…乜都未郁過…

好累，架118亦都好慢，係咁訓…好在，冇好似琴晚咁訓佐入小西灣… @_@

>>October 19, 2004 at 7:44:23 PM GMT+8

2004 年 10 月 18 日 星期一 【微冷】

今日個鼻超唔舒服。

又返A…慘o的囉…六點四先起身，0728打卡…好彩…

琴晚十二點幾忍唔住，打上數碼通，叫佢同我cut佐個「我的核突鈴聲」，之後再投訴佢冇畀選擇權o的客。條粉腸一時又話係門巿問題，一時又話係sales部o個邊o既問題，真係激到我憫憫o地！我話佢冇可能登記自動轉脹就一定要用埋佢送o既鈴聲。佢話唔駛錢畀我，我就串實佢，而家唔駛錢我就要用o架？佢再話係畀o的未用過o既人試用，我同佢講咁我而家用過，好憎呢個服務，話唔想要，係咪仲要迫我用？真係慶到我o丫！！火火火火火火火火火火！十個火！

後尾佢話廿四小時內同我cut，我就反問點解要咁耐，開台畀人又可以三個鐘內？！好x慶！用佐佢咁多年，我自己有兩個電話number用數碼通，拉埋老豆同女友用埋數碼通，居然夠膽死畀o的咁o既customer service我！佢話門巿會清楚o的我o既問題，今日之內再覆我。

我叫佢今日下晝五點後先覆我，點知下晝食食o下飯就打o黎，我叫佢五點後再打o黎，唔好左輪住晒。

放佐工覆我，勁講sorry，又話今次事件佢o地唔夠彈性。哼！咁至係路嘛！好心佢就一早扮死狗啦，硬係要激o的客，同港灣冇得揮！港灣管業就最叻扮死狗o架啦！

>>October 18, 2004 at 9:18:09 PM GMT+8

2004 年 10 月 17 日 星期日 【微冷】

燥底呀！返A！

早佐半個鐘返到公司，星期日，奇悶。

坐佐成朝，搞佐o的文件o野，等B更返o黎食飯…都幾慘…

下晝幫老細摷埋份公契o的反激條文，因為有客唔同意用「泊車證」，仲係咁challenge公司，不過公司有份公契做擋箭牌，一定冇死o既！

放工同您去行街街，順便搞埋o的電話o野。燥o的囉！我用Master Card做autopay，佢硬屈我用佢個「我的核突鈴聲」，我問佢可唔可以唔要，佢又話又得，要開佐之後自己打上台cut！火都o黎埋！寫佐張意見表，再見佢想打發我走，我就順手問埋點樣搞部電話上網，搞佐幾個字都未set好！之後佢搵佐另一個人o黎，我心諗呢班人都幾廢！本來佢想就咁畀佐張menu我自己學點set就算，但係我問佢︰「係咪畀佐張o野我你就唔會教我喇？！」佢就即刻話唔係，咁o既服務真係同港灣管業處有得揮。

之後同您去食o野，食日本o野，o的蝦蝦好美味呀！不過o的三文魚就真係差少少，個師傅真係唔多掂…

>>October 18, 2004 at 9:06:22 PM GMT+8

2004 年 10 月 16 日 星期六 【微冷】

放假o丫！

訓訓訓…

大休養，因為明天返A… @_@

>>October 18, 2004 at 8:47:52 PM GMT+8

2004 年 10 月 15 日 星期五 【微冷】

又係未停過手呀…慘…

下晝無聊地要搞個handover presentation，甩晒轆，眼見個轆甩到飛佐落山，連執都執唔到… @_@ 好死囉…個powerpoint走晒位，又一次過彈晒所有o野出o黎…所以幾時都話高科技信唔過o架啦，尤其是係o係港灣呢o的咁「高科技」o既地方…淨係要駁部電腦連個screen已經搞佐半粒鐘，我同咖啡一開波就甩轆喇，之後搞佐半粒鐘先裝返個轆咋，但係轆始終都甩佐，裝返上去都係有o的問題…結果個presentation就o係甩漏之中過去。學咖啡話齋︰「呢o的o野就好死o既嗟…」過佐去就算喇！

夜晚又要捉有線！火！原來佢o地入大樓o既方法係同o的用戶做簡單問卷，做完就洗樓！一收到投訴就上樓，追佐我幾層樓…辛苦到呢…捉到佢，一手PDA，另一手職員證。我問佢o係度做乜，佢居然答我︰「推銷囉！」頂佢o丫！火都o黎埋！捉佐佢落o黎，因為琴晚冇報警，今晚老虎蟹都要報！

佢xy！叫佐關sir上o黎，佢叫我問保安辦旺角警署電話，我打通佐保安辦，就叫佢聽。因為一睇就睇得出條粉腸想射波過o黎！不過仲衰o的都有。佢問完個電話，就畀佐個電話我，叫我報警。唔係嘛？！我唔係怕報警，我係要報o既我晨早打佐三條九啦！而家分o下大細好！我同佢講︰「關sir，我係PA，你…好似係咩ABS呀呵？！真係點排都排唔到我報警啦！」

報佐警，都冇用。因為只係可以口頭警戒就完事。

結果兩日儲埋要寫三份IR…頂…放佐工留堂寫…邊寫邊同郵差玩「幸運輪」，結果四點幾先走… @_@

>>October 19, 2004 at 8:36:15 PM GMT+8

2004 年 10 月 14 日 星期四 【微冷】

超多o野做呀！冇陰公！成日未停過…

下晝無端端要落MO做無聊o野…要作返ISO o的o野喎…好假囉！最憎做呢o的咁假o既o野。講埋晒o的咩過唔到ISO就唔知會點…呵！又睇o下會點…作作o下o野又無端端叫佐我去搬紙，話咩買得太多紙返o黎冇地方擺喎…真係荒天下之大謬啦…呢間公司…唉…

好在，突然間又叫我上樓同Man Lai一齊去睇僭建喎…咁就走甩佐喇！哈…同屋宇署o的人上上落落好多幢樓，好唔明白解個屋宇署成個黑面神咁…搞搞o下又夠鐘食晚飯喇…

食飯前落MO幫Warren搞封urgent律師信，結果得食飯只係食佐三個字… @_@

食完飯返o黎一陣，就有個師奶話條鎖匙開唔到門入唔到屋…之後有個婆婆走落o黎話血壓高，問我點去搭的士。見佢好似有o的神智不清咁，真係驚佢出事呀！於是問o下佢想唔想叫白車，佢又話好喎！結果由保安辦事處幫手叫白車送婆婆入院…

叫完白車要寫IR啦，不過未有時間寫IR，又要開始捉有線！有線！我好憎有線！有線o的sales全部都係「爛橙」！

今晚無端端畀人洗樓，好在Ronald做無間道o係度幫手，係咁打電話畀我通風報訊。呢頭個sales行出門口，佢已經響晒電話話o係CCTV度認得佢，叫我捉住佢！呢條女，幾串呀！叫佢畀證件登記，佢居然拿個住戶證出o黎！！！原來係個租戶o既證！有線已經o係港灣紮營喇！見佢串實實，就話我o地可以報警，佢就話︰「你咪報囉！」

問佐Warren，同埋保安辦肥佬關過上埋座頭，搞佐陣先肯登記，話我態度唔好，所以唔拿證出o黎！哦！一定係啦，怕我會報警o丫嘛！以為有住戶證就大晒o丫嘛！

臨放工先接到VIP投訴有線…原來呢個有線衰神唔單止串，仲賤！個客兩公婆都夜返，得個菲傭同個細路o係屋企，點知呢個賤人居然夠擔死問個細路老豆老母叫咩名，電話幾多號同埋大門o既密碼！！！！過份！見個客身為人母眼有淚光，就知佢幾激動，完全唔似平時o既佢！

憎死有線sales！！

傾佐半個鐘，十點十一個字呀婆個女先打落座頭搵呀媽… @_@ 結果又要幫佢問o下呀婆去佐邊間醫院…傾佐幾句，覺得佢o地兩母女真係幾得意，始終血濃於水，即使有時係嘈交，但係大家最關心o既人都係對方！

雖然未停過手，但係今日o既事真係好感人呀！

>>October 18, 2004 at 8:47:26 PM GMT+8

2004 年 10 月 13 日 星期三 【晴】

痴線！又放假！

訓訓訓，訓到半路畀老細嘈醒，叫我去幫佢買海狗公園飛…佢係咪痴佐線？！一睇就知佢要媾個CSD姐姐啦！燥底。

之後返學友社，連續返佐兩個禮拜三… @_@

再返港灣，之後去打佐八圈…燥底…四圈不振症一直困憂我…我頂！

>>October 14, 2004 at 9:26:08 AM GMT+8

2004 年 10 月 12 日 星期二 【微冷】

唔好以為返A好得閒，今日真係忙到嘔血…

照顧完o的客仔出門口，一心諗住聽日又放假，今日一定要搞掂兩張defect單，但係Warren要我幫佢寫份IR，咁就冇佐半個上晝，因為寫極佢都話唔o岩心水…吹脹…慘o的囉，無端端畀Ivan Wong屈佢做錯o野，話o的signage報價遲佐好多，但係o的報價明明係Eric做o架！！！明明係人o地甩轆，老細已經幫佢執返個轆，但係呢個世界往往小人當道，唉…

下晝仲有briefing，好在都可以趕o係briefing前搞掂兩張defect單，briefing完之後再執o下份project，同埋睇o下咖啡仔整o既powerpoint，再幫Warren了結埋份IR，終於可以放工喇… @_@

睇返咖啡仔日記，先記得原來以前曾經嬲過佢一陣子。其實都只係件小事，雖然我自己總有執著o既地方，但係o係呢間公司做得耐，已經習慣佐一連串o既甩轆事件喇…開始唔會咁無聊地執著。再者，同一team人，要對外不對內，先可以頂得住呢間公司o的小人！o個時又真係燥底佐o既…哈哈，真係唔好意思啦，咖啡仔…

真係不打不相識，識落又幾o岩傾喎，個轉捩點就係有一晚我、咖啡同Trevor去完食o野吹水再去食糖水繼續吹水，先發覺原來大家都咁尊重我o地o既偉大老細，可能有同一目標，為佐幫輕老細，大家不遺餘力，打死拼盡。Warren成日都讚咖啡仔雖然讀書少，但係勝在肯做…咁又係o既，你話咖啡仔有邊壇o野唔係又煩又「傑」先畀佢做o架…

力力與咖啡，同一屋簷下，同聲又同氣，咁至最o岩key！

>>October 13, 2004 at 3:06:40 PM GMT+8

2004 年 10 月 11 日 星期一 【微冷】

開心返，今日有波踢。

起佐身返佐公司，但係得到一個噩號…老細居然射波！！！問唔到佢關於project o既事…13號就交喇老細… @_@

晚上約埋個客Ronald同埋佢姪仔同佢姪仔個friend去踢波。唔好玩囉，因為左邊膝頭哥有o的痛…郁親都「格格」聲，轉到身但係起唔到步追，就係咁頭兩球波就係咁輸…

Ronald雖然有腰傷，但係都頂唔住要落場踢返兩腳，佢打龍o架，幾勇呀，真係幾驚佢又整親…守佐差唔多半粒鐘，佢居然冇失波喎，果然係勁！不過佢一走佐唔夠五分鐘就畀人炒，最後大敗一比五…

踢完波同您落觀塘，試佐間上海o野，只係一般貨色，但係收費都唔平…bad-listed…

聽日要返A更… @_@

>>October 12, 2004 at 11:00:17 PM GMT+8