2004 年 12 月 29 日 星期三 【乍雨乍晴】

返A，早上約佐維修部呀衛一齊上隔火層睇漏水…初時睇唔到，但係「小休」一陣之後，突然之間畀我見到樓上好似落雨咁有水跌落街！終於又畀我捉到邊度爆咸水喇！

真係好好彩，咁都畀我屎忽撞棍遇到爆水。不過情況都幾嚴重o下…即影相。下晝再上埋單位影，見條喉越漏越犀利，即刻打畀老細講話urgent case，唔整唔得。今次效率好快，星期五就有人整喇…不過屎渠喎，點都應該快o的啦！

老細今日同我傾佐o的o野，係一個機會，但係並唔係我想做o既事…好無間，唔知點好…

放工去商務睇睇o的電腦書，睇o下有乜方法破解座頭電腦被block之迷。有o的發現喎！！

跟住同您去睇話劇《火之鳥》，睇咁多中英劇團o既劇，呢套都可算係最悶！您仲zzz添… @_@

大家都好累呢…話晒大家今日都返早o丫…返到屋企就即zzz啦…

>>December 30, 2004 at 8:45:57 PM GMT+8

2004 年 12 月 28 日 星期二 【乍雨乍晴】

起身返工都未有咁凍，但係o係座頭就越坐越凍…

朝早繼續研究點樣可以破解o的電腦權限…同埋寫o的resume。仲有o的零星o既文件做…

下晝就被屈出卡喇…唉…點解成日都係我？點解人o地每次出幾張，我就每次出廿幾張？但係又唔想好似其他人咁賴皮…唉…

嘩哈！有料到o丫！但係唔可以講住，要一月一日先講得！恭喜晒！

放佐工，返屋企，食飽飯，九點訓…zzz…

>>December 30, 2004 at 5:40:14 PM GMT+8

2004 年 12 月 27 日 星期一 【微冷】

放假喇！但係都返佐公司一陣間…

返到去見到老細，執佐少少台…吹佐多多水。

放工坐低再吹佐陣，各自歸家。

無端端九級大地震加十米高海嘯，話死佐幾萬人…幾時都話人係贏唔到個天o架啦，以前讀地理讀到natural hazards都知咩事o架啦，不過估唔到今次會咁勁…唉…

明日又返A… @_@

>>December 30, 2004 at 6:44:48 PM GMT+8

2004 年 12 月 26 日 星期日 【微冷】

返B，又有機會巡樓，開心返。

巡樓照例又係行一個鐘，一返到座頭就畀個客捉住，佢話︰「又有水漏落o黎喇！」咁就梗係老虎都唔放過呢個機會啦！但係，目標單位又冇人喎…點解呢…唯有上高一層睇o下個情況啦。

哇哈哈！終於畀我捉到係邊個漏水喇！原來係佢！個客都覺得好誇張呀！影佐相，又要做defect單…煩o的囉…不過總算解佐個疑團。

繼續打resume…Berkeley個網變佐喇，冇晒o的template，我個hard disk又bye佐，乜都冇晒，乜都要由頭打過，慘…

放工同個保安同事學佐好多o野，係關於琴晚o既漏煤氣事件。上樓唔好用電子器材同埋唔好用門鐘就一定o架啦！但係，原來想安全o的，最好就唔好o係搭lift o係同一層出入呀，最好行高或低幾層先好用lift。仲要叫人慢慢閂門，怕咁都會產生火花！唔好心急，唔好熄任何掣，走呀走！

好在，最後都冇事。 =)

>>December 30, 2004 at 5:29:31 PM GMT+8

2004 年 12 月 25 日 星期六 【晴】

琴晚太累喇，食完飯九點幾就死佐上床，跟住係咁訓訓訓…邊度都冇去… @_@

雖然訓佐咁多，但係都仲好累…頂…

兩個呀姐畀人調佐去另外兩座，呢兩位人兄真係過份！

返B啦，無聊少少啦…個客送佐兩個掛牆「福」字月曆畀我，不過都轉送佐畀人喇。

今日開始打返份resume，預備send求職信喇…呢間公司，越o黎越冇安全感。雖然有Warren照住，但係自問同MO班人夾唔埋，亦冇可能可以o係咁o既環境下合作到…唉…

魚唔過塘唔肥…良禽擇木而棲…

晚間，隔佐一座樓o既隔o黎懷疑漏煤氣，不過最後證實係流料，虛驚一場…如果真係出佐事都幾好玩！

放工您o係接我，仲送佐個PC袋畀我添！我就畀佐對新耳筒畀您。之後去華懋睇三點兩個字o既《功夫》(Kung Fu Hustle)，個劇本幾好，周星星有進步，唔似得以前o個o的硬滑稽…嗯…都尚算滿意。

返到天水圍，又無端端見到萬寶路禮盒九十九蚊連一個Zippo，您死都要買，結果就搭輕鐵天水圍四圍走，吹脹！最後o係天耀搵到，好在我話去咋，如果唔係就買唔到喇…唔駛一百蚊有個Zippo，都抵啦…

>>December 30, 2004 at 5:30:41 PM GMT+8

2004 年 12 月 24 日 星期五 【晴】

睇佐o的信用卡用積分換飛行里數，發現如果要換由香港至美國o既來回機票，總共60,000英哩，以十二蚊港紙換一哩計，總共要o係一年之內碌$720,000，希望係我計錯啦…真係得人驚…

放完十日假返A，居然七點一就返到公司，返到座頭發現連桌面o的shortcut都block埋，吹脹…不過…ccc…

食完飯無端端又要上樓，話唔知邊度漏咸水喎，上到去睇，再去隔火層吹足半粒鐘，都冇發現。影佐o的相咁囉…

之後o係MO同足球小將有o的口舌之爭，哈，佢又真係幾無聊。祝你好運啦…做o野唔駛講o野。

原來琴日李好煩同佢隻佬黃超人玩清潔，o係度雞蛋裡挑骨頭。不過佢又唔係衰得晒，確實係有不足之處，但係郁o的就話要炒佐兩個呀姐，確實係pk！將心比己啦，人o地得o個四千蚊人工，仲要趕絕人，痴線。

唉…x人公司…唉…

今日教訓佐個笨實同事幾o野，老實講，真係為啖氣囉，打份工要受埋o的唔應該受o既氣，老x都唔「gir」，點都要反擊啦！

>>December 26, 2004 at 6:55:04 AM GMT+8

2004 年 12 月 23 日 星期四 【晴】

今日打牌夾埋波鐘輸佐成千蚊…痛o的囉…

-----------------------------------------------------------------------------------------------------------------------------

事件燥底指數︰100%【嚴重】

聽到個壞消息，就係九座道門爆佐o個件事，公司完全唔幫自己人，完全順應晒個以路人身份投訴o既客，仲要屈同事寫「悔過書」，真係離晒大譜！

呢間係咩公司呀？應做唔做，唔應做就做到足，冇一樣o野係幫自己人，o下o下都要搵個人出o黎祭旗，冇病呀嘛？！

畀著我就真係老x都唔肯寫，大不了唔撈！橫掂而家個market係「工求人」，唔再係好似以前咁「人求工」，真係同呢間公司做人世呀？樣樣都要逆來順受呀？！同呢間x人公司「撐衡」都仲得呀！

公司所做o既一切，都冇一樣係真真正正顧及員工o既感受，當o的員工係機器，些少人情味都冇，為佢捱生捱死，值得咩？

雖然，同事係有理虧o既地方，但係亦不至於向每一個發難o既x客扮死狗呀嘛？！

>>January 2, 2005 at 4:17:10 AM GMT+8

2004 年 12 月 22 日 星期三 【晴】

十二點幾醒佐啦，健健叫我陪佢去柴灣IVE拿佢幾年前讀完o個張cert.…

同佢o係IVE飯堂食飯…嗯…o的o野食都好一般…o的學生個個樣怪怪咁…

晚間，等到您放工食完點心皇，就去華懋睇Shark Tale（港譯︰《鯊膽大話王》），勁低能，不過好好笑！

"What's up man?!" Oscar.

回程時個小巴司機話︰「哎也，唔記得佐入兆康添！」有o的咁o既司機，真係唔得佢死。

>>December 27, 2004 at 12:16:22 PM GMT+8

2004 年 12 月 21 日 星期二 【晴】

無無聊訓到下晝兩點半先起身…

起佐身出佐去恒生add您個account入個e-banking度，之後再上佐堂細佬屋企，送佐個48X CDRW同埋一條64MB RAM畀佢，橫掂而家得一部機，冇乜人，送畀人用總好過放o係度o徙。

今晚做冬…屋企人o係大家樂買佐個盤菜返o黎就算… @_@

>>December 21, 2004 at 9:49:15 PM GMT+8

2004 年 12 月 20 日 星期一 【晴】

起身，您走佐班車，搞到要搭輕轉西鐵轉地鐵再轉巴士先返到機場，燥o的囉…

我就返佐港灣，派手信…唔夠派添… @_@

機場買o既三包薄荷萬獻佐畀老細，大部分食物都去佐保安同事度，無謂對管業班禽獸咁好。

之後返屋企，執好o的o野，發現個grip又爛佐…除佐個鎖扣之外，個前轆都爆佐… @_@

食完飯，打日記…好煩o丫…好似打極都唔完咁o既？！

>>May 10, 2006 at 2:01:31 AM GMT+8