2004 年 1 月 17 日 星期六 【颳風】

今朝練習，又遲到丫！今次係因為要去郵局寄野。我以為佢開九點，原來開九點半 @@"
梗係唔等啦～ 唔知貼幾多錢郵票先夠，求其貼左廿蚊就算了。夠喇掛？62 張 A4 紙嘖！

塞埋車，去到換埋衫 Jog 埋圈已經十點。今日菜菜又甩底喇！好彩有 PatPat 同小庭陪。
今日簡直係「屎」！完全唔掂呀 >< 掟出黎既成績仲差過星期二。點解架～ 點解硬係冇 23m？
仲要膊頭痛添！又話 Keep 住要落 Mark，咁我點敢唔練呀？一睇醫生又唔練得架喇．．．
但聽佢地話，都係睇下好 D 喎！唔，咁又要諗個理由先得喎！點樣意外整傷膊頭呢？

「撘巴士時捉住上面 D 扶手，突然煞車，後面有人成個訓左落黎，咁咪整親囉！」OK 喎～

跟住練槍，膊頭痛既影響就更加直接啦！幾乎完全掟唔到咁滯，掟到眼水都咇埋 ><
都有夾硬黎架！不過再傷落去就乜都唔駛玩，結果都係坐多，到臨尾再夾硬掟左幾槍。
其實可以星期一晚或者星期二晏晝去睇，不過一睇，星期二就冇得練，冇得度架喇～
咁即係冇得睇啦？跟住年三十、過年、星期日，等到有得睇已經係年初五，初六又練啦！

要人地尊重你既同時，可唔可以學下尊重人？有時我真係覺得好辛苦。唔好逼我憎你，好冇？

練完沖左個涼拿拿聲走。Heehee ^^ 同魚魚食飯呀！去又一城 Food Court。好開心 =)
原來魚魚唔食炒飯既，記住先。呀原來個次話劇佢真係．．．左架 >< 嗚哇！唔得咁架～
佢成日去埋晒 D 飯局呢，要玩「遊戲」架！咦也，好驚呀～ 唔可以成日咁架喎 ><

食完飯，魚魚就送我去撘小巴啦！又被人搣喇～ 丫我發現佢同佢同佢都鍾意搣我架喎！
（哥，有你份架！哈～）有段小插曲：我擰轉面同魚魚拜拜個陣見到有個男仔追車。
咁我同魚魚拜拜個陣係笑晒兼揮手架喎！就好似向個追緊車既男仔揮手咁，有 D 尷尬 @@"
因為佢可能會以為我係笑佢追車，仲要揮晒手咁串 XD 結果我都係幫佢嗌停左架車。

補習冇乜特別，都係咁啦！考完試，可以輕鬆 D（其實不嬲都算好輕鬆．．．）
補完習落番又一城百佳買葡萄靈。咦，有好多喎～ 咁就好勒 ^^ 我幾驚真係斷貨呀！
返屋企個陣特登買左本《新 Monday》黎睇，不過冇野睇既！成晚上網、食野、睇波囉～

>>January 19, 2004 at 1:37:48 AM GMT+8

2004 年 1 月 16 日 星期五 【陰晴不定】

九點半鬧鐘響，禁熄左訓番，十點自己醒左，不過都係碌到 11 點幾先起身 ^^" 好懶。#8
爹爹爭廁所，咁我咪有上住網先啦！執番好個樣都係時候落街買送～ 呵！今日有人黎食飯 ^^
由於某人比較揀擇，淨係諗煮乜都諗死我。整左兩味好簡單既：蕃茄蛋 + 磨菇肉碎豆腐。

我煮完打俾呢位貴賓，佢個陣先上車囉！冇緊要啦～ 呵呵．．．好味道！（好油呀 "3 ）

餘下既時間都係上網同搞 Non-JUPAS D 野。Submitted！跟住就執齊 D Cert 既影印本，要寄。
結果又遲左出門口啦！同雞雞佢地食飯，係咁以都要執正 D ^^" 正極都係咁上下嘖其實。
本來都好地地，上到車以為冇死啦！點知由窩打老道塞到落彌敦道 >< 遲到囉！勁唔好意思。
好彩青葉仲有位俾我。嘩～ 好快、好靚、好味、好新鮮。不過今日唔係食左好多野咋！

今晚既陣容係雞雞、皮皮同 Wowo。多謝晒呀餐飯 ^^ 多謝你地仲會照顧我同關心我。

食完飯都唔知去邊好，結果雞雞走左，得番 Wowo 同皮皮陪我，去左旺電買野兼睇 Printer。
突然間又諗，係咪買部普通野算呢？三合一咪即係 Scan 完再 Print，爭在唔駛駁電腦嘖！
慳番兩三舊喎？！不過普通野屋企又有喎，點睇都係覺得浪費。唉唉唉！真係好煩呀．．．
本來諗住等下都係響旺角食飯既魚魚，不過都係唔等喇！有 Wowo 同皮皮陪我撘火車嘛～

講個故仔俾大家聽～　皮皮：　嗯！等我都學下公司咁，佈置下．．．
　　　　　　　　　　露比：　佈置間屋牙？
　　　　　　　　　　皮皮：　唔！等我過年著到成個 公事包 咁先！（原：利事封）

>>January 19, 2004 at 1:31:19 AM GMT+8

2004 年 1 月 15 日 星期四 【颳風】

訓左兩個幾鐘咋．．．七點幾八點先起身，遲左喇 >< 九點幾先返到恆商。特登返去影印。
搞掂左張影印卡喇！拎番十蚊按金。唉！連用晒退錢都咁多嗲，又話咩畢業先可以退。
黐線架！我又係唔係畢業啦？我畢業個陣冇退之嘛～ 如果咁都唔退俾我，擺明想屈錢啦？！

拎 D Cert 去 Office Certify，班阿姐又係多多聲氣。Chop 幾個印有幾辛苦呀？唔想做，辭工丫！
我唔介意你擺低個印我自己 Chop 架！離晒譜。以前都冇咁衰格架！而家恆商乜都變晒喇～
九點半先搞掂，即撇。返到又一城見仲有少少時間，買左杯珍珠奶茶，飲住上小濤堂 ^^"
一落堂就接到阿 Jim 電話，佢都肯幫我寫 Reference 呀 ^^ 但要我即刻上佢 Office 喎～
等我仲特登跑上去，原來佢係想我教佢搞 Word D 野呀哈哈！不過都好，俾機會我同佢講：
「我星期五朝早要補習呀！可唔可以調去星期四個堂呀？Add/ Drop 個度 Full 左喇．．．」
「冇問題！冇問題。你一陣過黎睇下，有位你咪攝入黎囉！OK 冇問題～」Yo！Off 兩日 =D

跟住上 Duncan，都 OK 好表現～ 呵呵呵！跟住上阿 Jim，逼左 D，但都塞得我落（好野！）
接住又上 Alan -- 以後星期四都要咁，直踩五個鐘 -- 勁多人。勁多野寫，勁多野記囉～
真係有 D 想 Drop 左呢科 @@ 不過有愛人陪（仲係陪足成日添喎！）我唔會咁易放棄架 .\_/.

落堂散晒！唔夠訓加五個鐘喎～ 響梳化坐左一陣，差唔多時間就落旺角啦！點知．．．
有人同我講：四點出門口，四點三四都到啦！我四點五打俾佢，佢話岩岩出門口囉！
我已經好累架啦！你話行街，我陪你都冇所謂，但你要我戇居居響旺角罰企就唔得囉 ><
我都冇乜幾可嬲出口。唉！自己行去美心，都係等架喇！起碼有得坐。齊腳就打牌～
又係十三么既魔力：輸喎今日。都唔怪得我，係我女朋友運氣好，佢一家贏三家。

餐飯都幾好食，不過成十六個人，少不免分幾堆，有 D 自己圍內傾偈，有 D 睇電視。
不過都算係咁架喇！畢左業年半都仲可以有半班人出黎團年，我呢個班會主席都算係咁。
丫！唔記得講：原來搞一餐飯，打點、收錢、找數一腳踢，幾過癮架喎！呵～ 威左。

都冇諗住有下場架！點知搞搞下又去左麥記食雪糕 ^^" 我既主要目標係個度既洗手間 ^^"
哈哈！幫肥 neth 錄左個留言，好無聊呀～ 最後同 Toby 一齊撘亡命，鋤住大 Dee 返屋企 =)

>>January 19, 2004 at 1:29:39 AM GMT+8

2004 年 1 月 14 日 星期三 【颳風】

唔想洗錢食飯，唯有煮個公仔麵啦！返恆商做野，竟然遲到喎～ 但個學生依舊冇黎。
唉！近幾次返黎都係浪費時間。七個學生，又係得一個到，有兩個都叫黎左通知我唔讀。
其他？影都冇，不知所謂。最叻係十二點半個個，聞說係自動報名，但從來未出現過。

浪費左個半鐘就去搵阿媽，跟住落番 Library 影印。我張 Copy Card 得番六毫子，要加錢 ><
乞人憎呀！我 Grad 左既佢都屈我加夠 $30，借張 Copy Card 黎駛死咩～ 好鬼死老土架！
結果我影完我暫時知道要影既野，仲有 $20 響張野度囉！即係要特登返黎影印啦？
順便搵 Giano 寫 Reference，條友又響度擺款囉！唔怪得 7B 全班都唔意佢啦！懶乜咁。
最乞人憎係我話「同 Kitty 食飯」個陣，佢又戚起佢個核突咀：「Kitty，好熟牙？」
妳理得我嘖？我又唔係叫妳 Giano，亦唔會叫妳 Giano 囉～ 我冇興趣同你亦師亦友呀！

唔熟！唔夠妳同崔院長熟～ 妳同崔院長係熟到妳可以恃無忌旦咁響 Assembly 訓覺～
跟住又恃無忌旦咁響我面前同 Kitty 講之嘛！呢頭話驚院長睇到，個頭話「睇到咪睇到囉！」

下一站返 City 搵 Prof 幫我寫 Referece。唔．．．個個都唔響度，淨係搵到 Duncan。
哈！自從 Sem A 搵過佢簽名改 TimeTable 不遂之後，我都好似冇去過佢 Office ^^"
估唔到佢咁順攤喎 ^^" 拎住我張 Transcript 猛咁話 Good。嘩～ 仲留意到我換左眼鏡添 =D

搞掂晒打俾魚魚。呵！佢響大圍上車 o^^o 一齊撘左幾個站。佢去補習，我就返屋企。
買左個麥記餐（送 McFish Dipper！）對住部電腦等補習。點知唔記得影印，影埋就遲到 ^^"
唔知去好定唔去好，返屋企食埋個包先。結果都係去。一去到見到幾個黑衣人囉 *驚*
我又冇戴眼鏡，唔知佢地響邊喎 @@" 都咪話唔得人驚！魚魚休息坐埋黎先冇咁驚咋 @@"

魚魚陪我等等下車先醒起自己漏低左條長褲響球場，要返去拎。咁我唯有自己等車啦～

>>January 17, 2004 at 9:25:12 PM GMT+8

2004 年 1 月 13 日 星期二 【乍雨乍晴】

唉！返學第二日就遲到啦～ 真係未習慣咁早起身。自己衰囉！有冇野做都咁夜訓。
天氣又凍，除左會賴床唔肯起身，又要食 D 野等個人暖 D，所以遲囉！打的去火車站。
結果都係遲。最衰係同唔到 Thomas 呀、Leo、Edgar 佢地坐埋一組，好悶架嘛 ><

跟住上 Interp，同番 Leo 坐，發現班中有無數個 Interp 勁人。想繼續羅 A 就真係要加把勁喇！
Jim 又唔俾我同 Leo 答問題喇～ 希望一排冇上，唔會生疏晒啦！CI 係我強項，我要加油～
接到樂樂電話，佢話唔同我食 Lunch 喇喎！我都聽唔到係咩原因，不過事但啦！我都冇計。
不過就打亂左我今日既計劃：放 12 半，6 半先練野，六個鐘我做咩好？聽 Talk 都要等到 3 半。
唉！一個人，唔聽啦～ 都係返屋企算喇！返到黎網都唔想上，縮響半張床度訓左個晏覺。

又遲到啦！凍呀～ 執好多衫，又唔知帶幾多先夠，真麻煩。遲少少囉！好彩戴太未黎。
自己 Jog 左一個圈就拉埋菜菜一齊 Jog，跟住同 Gloria 傾住偈拉筋，再慢條斯理躝過去練習。
唔掟咁多啦～ 傷左呀膊頭真係 /_\ 今日仲話要度喎．．．是但囉！我有晒心理準備架喇～
掟左三擲，自己衝左三段就等掟啦！唔～ 有心理準備又唔等如估到阿萍掟 28m 幾囉！
嘿！阿萍連 Yetta 都贏埋，我就仍然係做出衰過第一年玩學界既成績，真係冇．得．彈呀！
事但囉～ 同自己講，要開心 D；唔做衰 D，又邊有進步既空間呢？唯有盡力而為啦唉～

掟埋度成績個三擲就真係冇掟喇！轉個頭就去掟槍。不過右邊膊頭真係唔係好掂 =(
已經有拉筋，不過學小庭話齋，我膊頭太緊。呀！有 D 進步又話傷勒唉～ 咁點算好呢？
唔理喇～ 盡力練啦！不過明顯冇上次發揮得咁好囉～ 阿武又遲黎，今日靠自己多。
又要度啦！已經好努力架喇～ 18.xxm，好過冇囉！後尾自己度左個 20.18m =) 加油啊！

練完就撘巴士去新翠睇魚魚踢波。阿 Beatle 跟埋黎喎，都唔緊要，最慘係佢好煩 ><
又要跟黎，又要問長問短問三問四；最乞人憎係成日哦我走～ 我睇嘖，關你鬼事咩？！
完全唔想理會佢。又無啦啦爆野俾我聽喎：原來 P 君鍾意 L 君！L 君果然係猛人。
不過我又真係估唔到喎！可能我真係冇乜留意大家啦 ^^" 賤男人係真係勁～ 超級勁！

直到散場先擺脫到 Beatle /_\" 魚魚送我去撘小巴。返屋企食飯、上網。其實係好累丫 @@"

>>January 17, 2004 at 8:32:10 PM GMT+8

2004 年 1 月 12 日 星期一 【寒冷】

第一日返學，都咪話唔辛苦，淨係早起身呢一樣野都難倒我～ 碌左幾個字先肯落床。
一早起身食左半碗飯丫！媽話暖 D 喎．．．咁咪提早左「飯氣攻心」既時間囉？
未夠九點就出到九龍塘囉～ 直情係等銀行開門。入番 D 錢落戶口，儲蓄成績回勇 ^^"

真係唔該晒小瑩幫我 Print Notes 啦！不過個傻婆又遲到，等佢等到我第一堂就遲到喇！
上 Duncan 同小濤都冇乜野，可能佢地把聲唔悶啦～ 未眼訓。Lunch 同四美食小菊～
丫～ 原來小菊有河粉食，下次一定要食呀！今日個甚麼燒西冷都唔好食既 ><
跟住再上堂。阿 Paul 都唔係想像中咁差，不過你話好好咩，我又唔覺。冇乜大興趣。
上普通話就真係慘喇～ 曾老師淨係「學生須知」都講成個鐘，仲要 Handout 根本有晒！
救命丫！我上左半個鐘已經恰眼訓喇～ 真係恰著架！係 Break 個陣買左杯 Mocha 先好 D。
跟住個一個鐘都係一半打機、一半上堂。截至目前為止，今年好似科科都好複雜咁。

上埋阿 Jim，去 Library 印埋強人 Thomas 份卷都諗住撇，點知又去左 ARRO 拎 Transcript ^^"
跟住返入沙田補習。原來兩個學生都係聽日考試（同年，但一個係另一個既表舅父！）
補完一個返屋企換件褸又去補第二個。下次真係咪搞，上完成日堂仲咁補，真係人到癲。
行返屋企個陣打俾魚魚冇人聽。凍死我喇！屋企樓下吹到應一應。死啦！聽日仲要 Training...

女朋友：（普通話）你是最好的，你知道嗎？　阿倫好靚仔！

2003 年度～ 我最喜愛金曲：古巨基《必殺技》

你近來又再有空　我在防備　別發功　　　你未提及　我也知　既是前度　沒法子
能免強戒絕心痛　但喉嚨還在痛　　　　　如這聖伯納得意　分予你當玩意
你在懷舊　我也懂　還稱讚我夠上進　　　數十年後　我也知　如果見你　我願意
但可惜那時你都不相信　　　　　　　　　像一關過完再單打一次

　　　　　　　　　　我道行都低估了你　我以為撐得起
　　　　　　　　　　一句為什麼不找找你
　　　　　　　　　　我練到再倔強　再絕也　也永沒法比

求你別要　如從前純熟地碰我　　　　　　求你別說　仍能如良朋地對我
而我問我　為何還能夠碰傷我　　　　　　而我問我　為何還能對得起我
不要讓我　一敗塗地　輸得更多　　　　　不要讓我　一敗塗地　輸得更多
求你別說　錯過我　其實亦愛我　　　　　求你別說　錯過我　其實亦愛我
何以技癢　放過我　你已仿彿有神助　　　何以技癢　放過我　你已仿彿有神助
一關心我已經　等於再殺死我　　　　　　一講起你已經　等於再殺死我

>>January 13, 2004 at 2:01:00 AM GMT+8

2004 年 1 月 11 日 星期日 【颳風】

十點就自己醒左，橫豎都係，諗住襯有人未起身就試下 Print 野啦！結果都係失敗。
你估我話買 Printer 係多錢得滯咩？我真係有需要架～ 聽日返學喇，Notes 都 Print 唔到。
City Print？車錢都蝕埋啦～ 而家仲要玩 Quota！仲有我補習 D 野，又返去 Print 喇喎？

上左陣網，食左個麵就去補習，跟住特登出沙田搵埋寶肥買左兩疊顏色紙～ 橙、藍。
然後去 Des 屋企徙佢墨！Print 左好耐，搞到佢遲到添！跟返屋企，五點未夠已經食晚飯 ^^"
跟住就一路上網．．．勁無聊，咩都冇做過。聽日就開學喇～ 今個 Sem 要加把勁呀！

>>January 19, 2004 at 10:37:59 PM GMT+8

2004 年 1 月 10 日 星期六 【颳風】

尋晚訓得四個鐘，今朝一早就要起身執野去 Training。比計劃遲左少少，下次唔准了。
唔係好多人到左嘖！拿拿聲換衫、Jog 圈。勁人終於出場了，講真，我真係好沮喪。
眼見戴太對佢照顧周到，諗下自己，擺左都唔少心機時間練習，由始至終都未起眼過。

　　　　　＊　　　　　＊　　　　　＊　　　　　＊　　　　　＊　　　　　＊

小學個 D「也也烏」就無謂提，其實由中一暑假入田徑隊開始，一路都冇咩特別好既成績。
中二到中三既階段聽林 Sir 講轉去玩 Throwing，結果拎左我第一個，亦係唯一一個學界獎牌。
係九龍及港島區（Division 1）Girls C Grade Discus 既銀牌，係第一個我珍而重之既獎牌。
跟住一路都有報下公開賽，拎過唔少獎牌。仲記得一個人發住燒去業餘田總個比賽。冠軍。
以前我有對過 Yetta 架！我最記得佢，高高瘦瘦，南華會嘛！公開賽成日見，我贏過架 ^^"

中六七呢？恆商既田徑隊名存實亡，以學校名義報公開賽都係我自己搞掂，學界我玩晒。
兩年 Sports Day，兩個 Event 既紀錄都係我既 ^^" 不過疏於練習，個陣既成績仲差過 F.2 / 3...

入左 City，我同 Yetta 既成績已經有明顯既距離；我都有努力練習，起碼我 Full attendance。
兩年幾冇練習既後果，真係唔講得笑，疏於比賽令我冇左一個運動員應有既心理質素。
唉！三個比賽（Sports Day、四大、大專）我一個都把握唔到。輸得好徹底；輸晒俾自己。
機會呢 D 野，你唔把握，佢唔會留響度等你。今年，阿萍練習已經掟到 25 米喇，我呢？
今年 Sports Day 幾乎係上年既翻版：我再一次輸俾佢，等同將四大同大專既席位拱手相讓。

響呢個所謂 Team 入面，我冇辦法做 Positioning -- 我完全唔知將自己擺響邊。格格不入。
上年嘛～ 比較傾得埋既係隊長，但只係換黎大家七咀八舌，好似小學生咁講是講非。
真係會聽我講野既只有 Cori 一個。但我地練習既據點天各一方，傾得幾多？陪得幾多？
今年，隊長走左（雖然返黎做 Trainer．．．）我就更加有「唔知自己響度做乜」既感覺。

好彩仲有小庭肯同我傾偈、講笑；仲有阿武，雖然佢嫌我蠢，但都好有心機教我掟槍。
但除左佢地，除左塊 JSC 01，除左兩塊藍色餅，除左個六枝標槍，除左阿姐同阿叔．．．
呢個運動場並無太多值得我留戀既野。響呢個場，我成日大笑，亦流過好多好多眼淚。
有無數次，我為左自己既表現而坐埋一邊喊；有唔少次，我為左戴太既說話而悶悶不樂。

　　　　　＊　　　　　＊　　　　　＊　　　　　＊　　　　　＊　　　　　＊

我練左年幾，都唔及一個無論身型同質素都好過我既「壁球手」、運動員。我可以點？
係，係我自己技不如人，只係我都擺左唔少心機，點解你總係睇唔到？一眼都好丫！
行黎行去既時間，我根本唔想練，亦唔想坐響度懶懶閒，我情願哩響洗手間，喊完就算。
喊完出黎，突然好似幾年前既自己咁，拎住個餅，就當佢係我憎既人，一下擲出去。
哈！即刻掟得唔差啦 ^^" 不過又有邊個睇到？兩擲又兩擲，有少少鬥氣既心態，唔肯停。
有一下阿武話：「妳要咁講，咁我都冇野好講了。」突然醒一醒。係囉，做乜要咁？
人地睇唔到，有乜緊要？只要我做到成績就有目共睹。可能係最後三個月喇～ 要珍惜。

阿武連拉筋都教埋我 ^^" 不過我真係蠢，唔識 "Gut" Patpat XD 膊頭有 D 痛添．．．
除左未解決到槍頭太高既問題之外，但其他野都有進步。要用後二殺波既手法掟喎 .\_/.
掟到全世界都收檔，我都唔肯走。個一刻，真係有好大鬥心。我唔會衰俾你地睇。
多謝阿武；多謝小庭。多謝你地俾左無限既支持我，亦都好俾心機教我～ 我會記住。

唔記得帶毛巾，好彩有 K.Swiss o^^o 沖完涼出黎，Vincent 都走埋，話拎衫喎！冇左件事。
都唔知幾耐冇試過咁樣，一個人戇居居咁行去窩打老道撘巴士！去廣源食個飯再補習。
唔知係咪今朝冷親，練習完又累啦！渾身唔舒服，坐陣巴士都想嘔咁款。返屋企換衫即訓。
斷斷續續訓左四個鐘，起身就食飯同上網，夠鐘就睇波，跟住打牌 XD 假期最後一晚 lu...

>>January 12, 2004 at 12:04:57 AM GMT+8

2004 年 1 月 9 日 星期五 【晴】

今日 11 點先起身。叫醒過魚魚，不過佢都係 12 點幾先起身，仲問我會唔會煮飯食。
不過今日唔止我一個響屋企，唔煮喇～ 唯有等下次啦！不過知你想黎食，我好開心囉 o^^o

去鑽石山拎番 D 相，終於發現個相袋喇！原來係上次個 Staff 收起左囉～ @#$%^&*€．．．
今日我又冇帶張單啦，換唔到丫 >< 算喇唉～ 個幾蚊，我再出黎，車錢都唔止呢個數啦！
去九龍塘補細佬仔，再撘巴士返馬鞍山補中五傻婆。響 Circle-K 買左個包，仲有朱古力手指～
你話個傻婆蠢又唔係，但唔知點解硬係錯漏百出，笑話連篇；連佢阿哥都笑個下先慘 XD

補完響電梯口打個電話俾魚魚就返屋企。Yo！約左雞雞皮皮同 Wowo 食飯～ 青葉！！！

>>January 11, 2004 at 9:58:57 PM GMT+8

2004 年 1 月 8 日 星期四 【微冷】

今朝四點有波睇，尋晚等唔到咁夜，諗住七點起身睇 Delay。醒過，訓番～ 又發夢喇！
可能壓根底兒真係幾緊張成績，發夢都見 ^^" Earned Hours 多左，但就未睇到成績。
七點幾起左身啦～ 即刻開電腦 Check，不過仲係未出。睇波～ 好耐冇睇過利物浦贏波喇 =)

打俾魚魚，原來佢都冇起到身睇波。叫佢繼續訓。九點鬆 D 收到 Benny 既 ICQ msg：
出左成績喇！一睇就發晒癲，完全不能自己。第一時間打俾魚魚。好殘忍咁又嘈醒佢。
不過佢冇乜反應．．．未訓醒，冇計。第二個係摷醒老豆，直情係飛上床話俾佢聽 ^^
不過佢又係冇乜反應 >< 跟住打俾 Bernard，都係未訓醒（搞錯丫！十二點幾喇～）
再打俾哥哥～ 我都想第一個通知你，不過你個邊零晨兩點喎，又要打手提，比較麻煩。

雖然開心，但有少少唔知可以同邊個講，因為知有 D 朋友都唔係考得咁滿意，我驚．．．
不過我知道，如果你地錫我，你地一定會替我開心。我難得叻番次，我希望你地會鼓勵我。
3.58。由中學開始，八年半以黎，第一次咁有成功感。第一次考試拎 A+。真係好開心 ^^
多謝自己努力；多謝 Duncan；多謝阿 Jim。下個 Sem 一定要繼續努力，再努力，更努力！
最應該開心既係 CGPA 由 2.99 上到 3.12，僅僅有番報 non-JUPAS 既資格！要計劃下喇～

好開心 ^^ 換衫去街。傻左，要著裙著 Boots 開心下。出鑽石山羅相兼補晒相，又失敗啦 ><
頂～ 補相要帶相袋架，我又冇帶囉！今日又帶銀包喎，單都冇又點拎相？兩頭唔到岸。

撘地鐵出油麻地，遲到添！搞到訓唔醒既小傑唔高興，仲要有人玩奶玩到遲大到囉 @@"
陪小傑去零食物語，再行萬寧，跟住先上大久保。原來 Lunch 咁少野食，唔怪得平咁多啦！
撞到 Phoebe 喎 ^^ 佢問起我成績丫，我都唔知點答好．．．淨係話 CGPA 過番 3 囉～ 唔。
終於等到阿 Neth 黎，食野喇～ 小傑掛住睇《行運超人》，睇完又睇都識笑，真係服左佢 ^^"

阿 Neth 食完就返 UST 浪費青春，得番番我同小傑。撘地落佐敦，一路行落尖沙咀。
等埋寶肥就去 SaSa 買野換 Masks ^^" 再去新海、海運個邊百無了賴地閒逛．．．
勁！第一次行 Agnes b.，見到我鍾意個隻錶，好貴 >< 諗落又好似真係 DKNY 個隻斯文 D。
仲見到我想買個個袋，比人地講既平，不過比自己想像中貴。唔～ 都係唔岩我架喇！
跟住乜都行下，最後一站：McCafe。棄凍朱古力取凍意大利咖啡。朱古力好味 D。

名乎其實天光飲到天黑 ^^" 小傑響碼頭走，我就同寶肥撘小巴轉火車。好眼訓丫．．．

>>January 11, 2004 at 9:43:29 PM GMT+8