2004 年 7 月 5 日 星期一 【晴】

今日又著利．物．浦！我始終覺得，利物浦件白色作客係一件極靚既波衫～～～
原來臭 Jay 都寫左張卡仔放響我櫃桶，一個人響會所睇，睇到我眼濕濕 ><
估唔到，做左同事唔夠廿日，已經可以有咁深既感覺。可能係我地性格有 D 似啦！

最開心係佢一句：「我呢個哎也上司對你既評價係：『 RA 既工作，你勝任有餘。』」

最眼濕濕既幾句．．．　「見到妳，好似見到一年前既自己，
　　　　　　　　　　　　多謝妳令我記起，要忘記既應該忘記，
　　　　　　　　　　　　有好既同事，再沉悶工作也可以做得很快樂。」
　　　　　　　　　　　「停車場轉七圈。」

佢真係一個好上司，大家真係好似朋友囉！好過而家呢個多多聲。

Yeah！今朝請救生員飲咖啡呀 o^^o 咩呀～ 我兩個都請架！
因為一個請過我飲 Qoo，一個請過我食三角朱古力 XD
本來有一罐係自己既，但唔醒起今日男同事都返早，
咁冇理由當住佢面請救生員又唔請佢飲，就俾左我個罐佢。
自己出去禁汽水機，點知出到去又見到個實蕉，話我唔禁埋俾佢喎！
結果又禁左一罐俾佢囉～ 不過心情好，請人飲野都開心既 =)

睇 Newsgroup 知道又出左新銀紙，係二十蚊同五十蚊，個設計核突到呢．．．
丫？聽日去 Headquater 上洗腦班，九點半上到五點，肯定悶到抽筋 ><

整左大菜糕，聽日有得食 ^^ 太耐冇整，太硬淨，變左「大菜片」XDDDDD

>>July 30, 2004 at 12:32:58 AM GMT+8

2004 年 7 月 4 日 星期日 【颱風】

救生員今朝請我飲 Qoo ^^ 呵！佢尋日問我識唔識游水，點解咁黑．．．
而家佢次次行過，得我一個的話就會同佢嗲兩句 ^^ 有零食就交換食 =D

　　　　　＊　　　　　＊　　　　　＊　　　　　＊

（（（鈴～鈴～～～ 鈴～鈴～～～）））

我：你好！綠悠軒會所。請問有咩可以幫到你？
客：我想問而家係咪雷暴呀？
我：係呀！
客：哦，好丫！唔該。

十秒後

（（（鈴～鈴～～～ 鈴～鈴～）））

我：你好！綠悠軒會所。請問有咩可以幫到你？
客：咁雷到幾點呀？
我：『雷到幾點？』雷到四點零五分。
客：四點零五分。好丫！唔該。

　　　　　＊　　　　　＊　　　　　＊　　　　　＊

《離開以後》　張學友

近日像每樣話題總不適合你
近日夜深相聚　飄起一抹冷漠空氣
在這天　是你事無大小多麼生氣
誰人亦可知你將別離

落寞地躺在睡床試試抱緊你
但是目光躲避　令我可感到你在喘氣
沒說出　亦領會誰在撩動你
拋開苦痛去解脫自己
讓你那些冷卻熱情另有生機

離開我以後　我會習慣自卑
明天再偶遇　我也不敢偷望你
離開我以後　季節冷暖天氣
我也置諸不理　願名字也再不記起
離開我以後　我會長留這地
晨早到午夜　撲進漆黑想念你
離開我以後　醉了會看到你
夢中方可永久地　接近你

伴著但我在預期你會說捨棄
問事實怎躲避　在倒數將要每日想你
若這刻　若最後無力留下你
將消失勇氣釋放自己
就算某天我吻別人亦當親你

今日用 $60 買左 5 張 Apolo 雪糕乳酪代用券，間中任性下，當係買個開心 ^^"
返到屋企先知原來六座部 Lift 夾死過一個小朋友．．．突然間有 D 驚。

>>July 28, 2004 at 11:17:43 PM GMT+8

2004 年 7 月 3 日 星期六 【溫暖】

「SHIT x 頂你個肺」
「訂條法例都要有原因啦」
「白色 Tee x 裸體」

今日分別遇到三個麻煩客，經歷十分「有趣」，不得不提：

個案一）
一個「相信係」外國返黎既女人同一個住客落黎辦會員證。
有關入會費、年費，以及各項設施既收費，對方都不斷媽媽叉叉。
兩個女人都係巴巴渣渣架喇！但個住客既態度較溫和，人亦都較講道理。
而那個「相信係」外國返黎既女人就勁寸咀勁多野講勁橫蠻。
「一百蚊？個陣冇 D 咁既野架喎！以前話 $50 係永久架喎！SHIT！」
佢所謂既以前，係唔知幾耐之前既事，講真，你唔喜歡咪唔好俾囉！
「齋入去睇唔駛俾錢？上次收左我錢喎！頂你個肺！入下去都收我錢！」
敢講係你冇講清楚先有人收左你錢嘖！又唔係我收多，隨便頂啦 ^^"

個案二）
有個客問我會所點解有條唔知咩例（唔記得左喇 ><）問李生囉 Huh！

個案三）呢個最精警呀！
會所泳池不嬲都唔俾泳客著住 Tee 或者一切泳衣以外既衫落水，
但有個女仔打黎問「我可唔可以著白色 Tee 入去？」我話唔得啦！
佢再打黎：「咁如果我著白色 Tee 入去呢？」我話會所職員會請佢除左佢。
「咁如果我話我件白色 Tee 就係我既泳衣呢？咁我係咪要裸體呀？」

如果佢係當住面同我講，如果我唔係職員，我真係想大巴大巴星死佢。
呢 D 簡直係八婆之中既八婆，咁都要拗得一餐？你夠膽你咪裸囉！
七棟大廈起碼四百幾個單位望到你，你夠膽裸你咪裸囉！你敢裸我敢睇。

真係一樣米養百樣人。

今日救生員同我傾左幾句：問我以前係咪做會所。佢話我好似咁快上晒手咁。
心．都幾開心的，有人覺得自己快上手 =D 但佢話睇唔出我「咁細個」O_o"

>>August 17, 2004 at 11:31:18 AM GMT+8

2004 年 7 月 2 日 星期五 【晴】

睇中左 Nike 新一批野，分別係全紅色兩件頭泳衣，同埋忍者鞋款涼鞋～
得閒去睇下先 ^^" 套泳衣都幾係貴，但對鞋好似幾抵咁。見到靚就買先得！
不過，泳衣同涼鞋．．．唉！我仲未游過水。仲成兩年冇去過沙灘 ><

「加入左蘆薈精華既 tempo~ 對你好溫柔~」

>>July 28, 2004 at 10:58:07 PM GMT+8

2004 年 7 月 1 日 星期四 【晴】

今日返早，放工去左牛皮沙睇波，仲老遠買左兩支水同結果冇人食既麵包。
完場之後去左麥當奴，食左個好好味既 Double Cheese，同埋新出既綠豆新地！
唔知點解，我食到有蜜瓜雪糕味 @@" 所以我覺得係好好食的 =D Good...

唐安麒話：「食多 D 高蛋白質既食物，胸部線條會靚 D 架！」咁我要食多 D 了。

>>July 28, 2004 at 10:00:18 PM GMT+8

2004 年 6 月 30 日 星期三 【晴】

片段遺失。
只怪我忙到日記都唔得閒寫。

呀！記得喇！！！今日返 Seven-Eleven，即係 7am - 11pm。
其實今日我係返早既，但今晚屋苑搞回歸宴，全世界都要幫手。
本來話幫手唔會有 OT Claim，但搞搞下我 On 埋 Duty，留到十一點。
返足 16 個鐘都唔多覺累，係幾犀利架！我都係一個工作狂 XD
仲好偉大咁一個人坐響 Counter，由得全世界落晒長髮居 Happy。
反正我對呢 D 政治飯一 D 興趣都冇。唔落去仲好，唔駛逼自己笑。
呢個咁既飯局，擺明就係 D 茂利用公帑娛樂自己既機會啦！

第一次覺得自己其實都鍾意呢份工，全因為我鍾意我 D 同事 =)

>>August 6, 2004 at 2:25:12 AM GMT+8

2004 年 6 月 29 日 星期二 【晴】

You have always been a nice friend.
May you rest in peace.
I miss you always.

For Gillian, my friend.

>>July 28, 2004 at 8:59:44 PM GMT+8

2004 年 6 月 28 日 星期一 【酷熱】

今日著左魚魚買俾我個件法國隊背心，因為約左佢，節目仲好豐富添 ^^"
朝早我地去沙田睇《木馬屠城》，Brad Prit 同 Orlando Bloom 真係好靚仔啊！
但原來做大王子既 Eric Bana 都唔錯架 @@" 而套戲亦都好好睇。四個讚～

我地睇完就分道揚鑣，各自去補習，然後又響旺角等 -- 去買雪糕筒，練習用。
結果買左半打，仲買左兩個波同一對手套。上過樓係咁以睇過下 D MP3 "3
跟住食左個食龜苓膏，上到火車站又決定食個飯先返屋企。今日全程都有人拖 o^^o

「我真係好鍾意妳呀．．．妳有冇諗過嫁俾我呀？」靜。「你肯娶我先算啦！」

>>July 20, 2004 at 1:14:51 AM GMT+8

2004 年 6 月 27 日 星期日 【晴】

懶左好耐冇修眉，頭先一猛猛鬼死咁多，痛死我了．．．
後日起返早，搵多 D 機會食龜苓膏先得。綠豆沙得唔得架呢？

《愛情歲月》　鄭伊健

要是我沒有記憶怎會懷緬　要是我沒有從前
難道我便會共你　通過任何試煉　伴你走到終點

我恨我沒有掩飾心裏視線　我恨我尚有弱點
望見她走過我面前　苦裏帶著甜　難道愛情未擱淺

但歲月最清楚　她不算什麼　曾憑著勇氣愛上天真的我
留下不多不少一些經過　將片段重播　一生不夠多
願你亦看清楚　她不算什麼　曾成就當初開開心心的我
如若我狠心得轉身閃過　不要在乎我　不必戀上我

可以扮忘記　都可將你掠過　純綷幾鍾意 D 歌詞罷！

>>August 6, 2004 at 2:25:33 AM GMT+8

2004 年 6 月 26 日 星期六 【酷熱】

尋晚睇左半場波，恰晒眼訓，半場休息就去訓了。結果法國咁就輸左，咁就出局。
起身就上網睇 News，跟住煮番 D 隔兩日既飯送黎食，然後沖個涼就出門口。
諗住響樓下配匙比新同事，點知個師傅行開左，搞到我配唔到都仲要打的去火車站。

返到粉嶺又好似唔多夠時間，結果都係返去打左卡先，然後再出過去街市配鎖匙。
咁鬼熱仲走黎走去，我都算唔話得喇掛？哈！今日著番件 Riise，靚呀！件衫。
新同事．．．同我想像中有少少出入，我仲以為會係幾靚女，幾醒咁既樣架添！
咁佢又唔係醜，又唔係豬頭丙 XD 係今日都冇咩交流，因為佢要學野，我就忙到死。

夜晚我拍 K.M.，其實都係自己一個多，好多濕碎野做囉～ 做到個人好悶、好吽。
Eric 無啦啦打過黎問我「有冇咩特別野」@@" 可以有咩特別野呢？怪怪的 ^^"
結果又遲左少少走。離開會所、搭車、返到屋企都冇打俾魚魚。佢會打來的吧？
原來佢今日拗柴．．．唔知幾時先可以睇番佢踢波呢？咁就可以看住佢，照顧佢了。

「唔係淨係佢地幾個問起你架！今日四民、阿 Wing 一見到我就問：『朱古力呢？』」

>>June 27, 2004 at 2:08:59 AM GMT+8