2004 年 4 月 16 日 星期五 【晴】

尋晚身痕到幾乎訓唔到，今朝起身一照鏡，嚇死自己 -- 我變左另一個人，醜樣到不得了。
面紅、眼腫、面腫、單眼皮．．．所有樣衰既徵狀我有齊。打俾魚魚，講講下就喊左出黎。
再打返專科診所，佢叫我即刻停食隻藥，晏晝返去俾醫生睇下，換過隻藥俾我．．．

我咁既樣，都唔知點樣出街，面、頸同手都紅卜卜，又痕 >< 結果我揀左戴太陽眼鏡出旺角。
出去俾醫生睇，都肯定係藥物敏感架喇！好彩未嚴重到影響呼吸，食藥退番 D 敏感就得。
拎左藥就搭車返屋企。咁既樣，邊度都唔想去。返黎食 D 野就食藥，推晒下晝 D 補習。

好番之前，邊度都唔想去；而家咁既樣，我點見人呀？！殺左我啦 ><

>>April 23, 2004 at 1:41:54 PM GMT+8

2004 年 4 月 15 日 星期四 【晴】

仲係好唔舒服，但唔返學又唔掂 -- 要睇人地 Present。上個禮拜已經冇睇，下個禮拜到我喇 ><
不過睇完都冇乜頭緒，諗到不如用戲名做 Topic，但內容要講及 D 咩，我真係諗唔到囉！
上 Duncan 堂都算專心架喇！不過又走阿 Jim，因為約左時間去大白鯊介紹個個骨專科醫生。

唔．．．個醫生好似都幾細心，不過我諗睇一劑都唔駛再睇了。咪又係食藥？！又三款。

睇完又未想上表弟度補習，去樂園睇《便利》食魚麵，都磨唔到幾多時間。一個人周圍行。
表弟打電話黎，依依哦哦咁，叫完我又唔講野。「點呢～ 冇野講？冇野講我收線架喇！」
又曳啦～ 買左杯西瓜西米，跟住搵 3C 搭去樂富補習。Heehee ^^ 落車見到魚魚響對面岸呀！

今日補習好和平，因為我已經唔想勞氣，唔想同呢個小朋友講太多野。做野啦！唔想做就罷。
見到阿姨，好彩佢都冇乜野。本來準時走得，不過搞搞下又晏左，搞到要魚魚等，真係衰。
跟住搭一齊巴士走．．．返屋企囉！冇咩特別。今晚拎左 D 相，Post 晒上 Newsgroup =)

只係食左一次骨科俾既藥。一次過食九款藥，人都癲。最慘食完仲要有反應 @@" 大鑊了！

>>April 23, 2004 at 1:11:09 PM GMT+8

2004 年 4 月 14 日 星期三 【晴】

全日都好唔舒服，好累，聲都變埋 ><
兩份習都冇補，因為真係好唔掂，個頭仲係打緊樁。
對夕谷發動攻勢，仲 Add 左兩個網友既 ICQ 添～

好似好耐冇咁樣識網友 lu...

>>April 21, 2004 at 1:24:30 PM GMT+8

2004 年 4 月 13 日 星期二 【酷熱】

黐線架！廿八度 >< 我今日沖左三次涼！晏晝魚魚過左黎，不過唔記得帶帶 XD #15
跟住我地去左食龜苓膏。我第一次食龜苓膏，少少糖都唔落。食到也也聲：食極都有既？！
食完就送魚魚去搭車，跟住返屋企幫魚魚 Print 野、填 Form 拎去寄；要跑落街先趕到～

返黎掛左號，執下野又要換衫出去。好彩爹爹打返黎話載我去富安睇醫生嘖！咁就唔駛咁趕。
醫生話我鼻膜同氣管發炎，賴嚴重咁 ^^" 不過真係好辛苦。好多藥，隻膠囊仲要係臭既 ><
睇醫生個陣真係冇發燒，又冇頭痛，不過睇完醫生先至黎料。響九龍塘等阿曉個陣等到吽晒。
頭又開始痛咁．．．撞到傻 Ken，勁搞笑：「你個條『增強戰鬥能力』既繩呢？」XDDDDD

陪阿曉去 agnes b. 擺低隻錶，響 Podium 搵埋阿基就上城軒。原來我對田徑隊真係冇乜感情。
或者咁講：響田徑隊根本冇咩感情可言。其實我應該坐 Patpat 個檯，不過陪下 Cori 都好。
但總括黎講，成晚我都係悶。左邊有左邊傾，右邊有右邊傾。不過我都病到唔想講野乜滯。
未等到食飯我就食藥，因為越坐越唔舒服。可能係盞射燈，又可能係本身病，越坐越慶。
迪迪話 Wing 死我～ 再唔食藥，暈都似。食左好似好 D，不過都係吽吽下。成晚都冇咩好食。

食完飯，無聊左一輪．．．Attendance 我點會唔係 100%？不過事但啦！100% 算得係 D 咩嘖？
我又唔係好稀罕人地講一次我個名。葉 Sir 雖然戇居，但做笑柄起碼可以為大家帶黎歡樂。
總好過 D 老女人，Cheap 到死，偏心偏出面，講野又空洞無物，仲以為自己好有見地。我丕！

終於都走得。有人話送我返屋企 一.一" 唔駛了，有阿曉陪我搭火車返到大學。落雨添．．．
返到屋企，半死咁既樣，咳一咳就眼水都咇埋出黎。沖左個涼，睇埋《小寶與康熙》就訓覺。

「咁你有冇話俾佢聽係『我』呀？」「冇啦！」如果你一早話可以講，我一早講左了。
可能係身體既狀況影響左心情，突然間覺得好煩。你幾時先唔會再好似而家咁一時一樣？
有時我真係唔知你想我點。籌碼？如果我覺得我已經賭夠，我仲留咁多籌碼響度做乜？

無論話題是否吸引　我亦覺感人
而名字換了甚麼稱呼也動心
嘴角是否親吻　心聲一樣近
無論哪樣原因　仍會這樣情深

如果只得一星期　寧願哪日放開你　以後會更回味
哪個角度凝望你　留住哪段晨曦　哪一種方法喜歡你

攤響張床度，個頭痛到好似打緊樁咁，完全訓唔到。接到 Vincent 電話，都係冇野同我講。

>>April 14, 2004 at 2:33:21 PM GMT+8

2004 年 4 月 12 日 星期一 【炎熱】

嘩！今日直情係溫暖～ 好似「夏天來了」咁；快 D 再熱 D，隻手又好番，咁就可以去玩水喇！
今朝搭巴士個陣直頭係熱到有衝動除左件風褸．．．入面係露背喎！（咳咳～）唔該修身。

如果下次出街，可以早 D 打個電話俾我，等我知道我應唔應該出門口呢～ 咁就好勒 一.一
成鬼日唔打俾我，搞到我都唔知出唔出門口好。更衰既係有時上左車會嘈到聽唔到你講乜嘛！
又醒唔起今日係假期，唔記得叫魚魚去排住隊先，本來已經遲啦！仲要排隊，仲要買貴飛～
咩喎！因為我唔知「平」既平在每日既第一場，同埋十點對你黎講會係太早囉！我覺得。
唔．．．不過過一陣又好似冇事發生咁 ^^"《大佬愛美麗》都幾好笑呀～ Daniel 真係好靚仔！

戲中一句：「蠢蠢地先得人鍾意」，有人即刻指住我囉～ 係喎！鍾意我啦鍾意我啦 XD
阿澤一句：「你睇，扯到幾硬．．．D 肌肉～」笑死！由戲院到新城市，一個字：Sweet！
陪魚魚搭火車入大埔，再自己搭返屋企。去惠康買左條糖同埋一包我至愛既梳打餅 ^^
返屋企陪壽星爹食 Lunch -- 冇飯食 XD 分別係食蛋糕同埋送。跟住都係上下網，渡下日晨。

好頹廢既生活。又病啦！個人冇乜力，莫講話做功課丫！根本係連電腦都唔想對 /_\
結果又走左去訓覺。攤下攤下咁，電話都響過幾次，攤到六點幾就話出去食飯，冇得訓。
真係～ 食餐飯都咁鬼麻煩，呢個又打返黎叫我打俾個個咁，你地唔識直接打架咩？！
總之都解決了，落樓下酒樓食個靚飯。都幾好味啦 ^^ 不過就略嫌貴左少少囉！我覺得。

食飽飽就拿拿聲飛去搭車。果然，呢 D 時間總係會眼白白睇住走左架車，跟住就有排等。
好彩，魚魚都一齊遲，出到去都係差唔多時間，不過就為左「潮江春」又黑起面上黎。
今晚有少少悶啦！一來係冇人同我講野，二來係個場太大，好遠咁。兩個鐘，話咁快就過。
去完 7-11 就搭 73 落番九龍塘轉火車。落車之前，有人叫我快 D 住宿，等佢可以黎玩喎～
仲要玩「七日七夜」添！玩七日七夜會瘦十磅？咁都唔錯喎 XD 我想瘦喎～ 簡直係優差啦！
跟住有人用唔咸唔淡既普通話講左兩個字，我聽唔明，又俾人話我蠢 >< 今次我決定嬲。

去到大圍，本來諗住 Byebye 就算架喇～ 又無端端俾人召左落車，落大堂打個轉又返上月台。
原來．．．呢 D 就係情趣 o^^o 差 D 俾潘仔睇到添 ^^" 甜晒～ 跟住就真係 Byebye 返屋企喇！

今日先知道原來有人會抄起晒 D SMS．．．雖然有可能係個個都抄，不過都值得開心喎 ^^
起碼我自己都未有咁做先。前排整機已經冇左好多 SMS 喇 >< 睇黎我都要養成呢個習慣至得。
更驚既就係有人話我知今日睇過餅帶，仲問我睇唔睇添～ 聽完都一額汗，但又想睇．．．

>>April 13, 2004 at 2:36:37 AM GMT+8

2004 年 4 月 11 日 星期日 【晴】

今朝起身，感覺上，覺得魚魚好似仲未響澳門返黎咁。不過算啦～ 我有我既生活 =)
見唔係咁舒服，準備好 D 練習先去補習，盡可能都唔講咁多野。點知原來個學生都病。
補到咁上下接到電話，都好 ^^" 輕輕鬆鬆兩句鐘。補完行過去新港城買蛋糕俾爹爹～

爹爹五十歲 生日喇！預祝爹爹生日快樂！

返到黎成個晏晝上網。突然心血來潮，想去探一探大邦媽咪。唔～ 尋日知道佢入左醫院。
嘿！之前成日話想食佢整既炒年糕，成日話探佢，點知而家真係去「探」佢．．．
先去左大邦屋企，俾番支老笠左佢好耐既腳架佢啦～ 諗住終於有相睇，點知原來係冇。
冇所謂啦～ 都唔爭在個一日半日。坐左一陣就行去那打素探 Auntie。入左醫院唔准咳喎 @@"
其實我好驚探人，都唔知講乜，不過 Auntie 見到我都好似冇咩唔高興，咁就最好啦！
咁岩又遇見大邦個大舅父同舅母。輪流探左一陣，都冇咩講 D 乜，講心嘖！祝早日康復。

走之前接到魚魚電話，今日都係唔會見面的了。跟住就一行五人一齊打的去大埔墟火車站。
唉！黎開附近，打個電話俾你睇下你響邊嘖！唔係逼你陪我～ 唔駛咁隱晦喎！講多句都嫌多？
事但啦！都唔係第一次係咁了。過埋今次，我知我以後盡可能都唔好再煩呢位朋友係啦～

我返到屋企，媽子都未返，結果要爹爹落手落腳煮飯。我就唔知做乜咁累，電腦都唔願對。
想訓，但攤上床冇耐媽子就返，仲要開呢樣閂個樣特登嘈醒我 一.一 真係冇陰公呀 ><"
起身食飯，唔係特別好送，阿哥又未返。不如搬出去啦！D 人今晚又唔返黎訓了．．．

夜晚睇波囉～ 場波都唔悶架！就係爭左 D 入球。結果和波，阿仙奴以七分優勢繼續做榜首。

>>April 12, 2004 at 10:41:01 AM GMT+8

2004 年 4 月 10 日 星期六 【微冷】

特登較左五點幾鬧鐘，叫醒魚魚起身去澳門。成朝都冇覺好訓 ^^" 今日咩都睇自己 lu...
一訓就訓到成點鐘，起身出練習俾學生，同爹爹兩份食左三樣野：飯、麵、烏冬。
尋晚唔記得幫部 PDA 叉電，搞到又勁晏先出得門口，又遲到 >< 不過今日好 Productive @o@

但最弊個學生越黎越懶散，俾個 Preposition 練習佢做，改左頭六條已經見到佢錯足六條！
所以罰佢今日冇得玩 Scrabble。不過今日都真係做左好多野啦～ 做足 100 分鐘練習 =P

補完習，諗住搵人飲杯野；有人話自己會響九龍塘附近，點知又去左銅鑼灣，仲要斷線～
當冇電囉！但我覺得，講講下野斷左線，覆番對方，俾對方知道發生左咩事係好基本既禮貌。
算啦～ 都唔係第一次咯！好彩我未落九龍塘嘖～ 可以搭巴士返屋企。返黎上網、睇電視。
等到七點幾八點，終於接到魚魚電話喇 ^^ 跟住打俾阿 Ken，可以約時間出去睇波食飯。

見我夜晚出去，娘親都冇咩講野了，淨係講左句：「唔好成日掛住行街買野啦唉！」
講真～ 我有幾可買無謂野丫？費事嘈，所以我都冇俾 D 咩回應佢。搭巴士慢慢搖出去。
遲左少少，不過實唔係我最遲。大興又甩底，我就帶阿 Ken 去旺電買 Screen Protector 啦！
買完又去左睇風褸，跟住就去食野既地方。啊！原來呢間咩「金馬餐廳」係有波睇既～
不過 D 電視真係大得可憐，個別 Waiter 既態度又唔係幾要得咁囉！野食就大份到食唔晒。
其實都冇乜點睇波，主要都係食野，顧唔得咁多野，又唔係睇得舒服，兩場波又唔係精采。
阿 Ken 掛住同阿曉傾偈；冇計啦！始終我未去到個個階段，又唔係個個圈子，搭唔到嗲。
我出黎既目的都係送支 Paul Smith 香水辦俾阿 Ken，佢好似都幾鍾意支野，咁就得啦 =)

坐到阿曉嗌走，都冇人理場波完未，咁就散。上左小巴就打俾魚魚啦！佢去緊人地屋企。
返黎即刻掛起件褸吹風～ 鬼咁大陣煙味，多得阿 Ken 唔少。嘿！今晚要開始做功課喇 .\_/.

>>April 11, 2004 at 3:03:20 AM GMT+8

2004 年 4 月 9 日 星期五 【微冷】

今日阿武約唱 K，不過一波三折，首先有 Ryan 同 Coni 甩底，跟住阿武哥又話唔舒服喎！
等緊車個陣接到 Daniel 電話，話響九龍塘等，可能改睇戲。我完全唔知佢都去囉～
點知出到去又話照唱勒～ 臭阿武丫！害我俾貴足足一倍既車錢，自己就直接搭車去 ><

余成都幾搞笑喎，佢唱 She Bangs 簡直係七情上面，同 William 有得揮。果然係阿 Jay 呀下！
不過阿武早走，Vincent 又咁遲先黎，都未玩夠。但某人 D 行為真係好難頂囉～ 救命！

一．乜歌都唔放過，隻隻都有佢份，仲要扮女聲，勁得人驚～ 留番隻歌俾我得唔得呀？
二．我已經唔望佢架啦～ 仲成日望住我，好難頂囉！你唔係 expect 我同你黎個情深對望嘛？
三．我兩次同人講起我隻手敏感，兩次都有人伸隻手過黎想摸我隻手！妖你狼唔狼 D 呀？
四．我擺明想撇你你就唔好死跟啦！話俾你聽有車返九龍塘都要跟我去樂富，搏咩嘖？
五．我唔覺得某人唱歌特別掂囉！但人地走音佢就陰陰咀笑，仲望住我笑，黐孖筋！

幾經辛苦先撇甩到 D 騎呢人士，打的去摩士。其實好近，不過晏左走，駛少少錢都要架喇～
睇完波，去左樂富中心食野。Heehee ^^" 響牛車水食左個飯 + 粉。魚魚又問左我 D 問題。
始終佢都關心我既「煩惱」既～ 都叫講晒俾佢聽啦！連最新消息都報告埋，諗起都覺難頂。
有咩吸引到我．．．「甚麼都吸引」得唔得？跟住去禁錢 "3 再去鴻福堂食龜苓膏～ 苦呀！
鍾意點樣？哎也！點講喎～ 應該問既時間你又唔問！「我全部都鍾意喎～」我都係 o^^"o

「我算唔算錫妳呀？．．．嗯，得閒買 D 小禮物俾妳，好冇？．．．多 D 陪妳仲好啦，可？」
「淨係得你問我，你自己都唔講既？」響巴士上，終於．第一次．聽到我想聽好耐既說話。
短短的十分鐘，心，很甜很甜。知足，自然常樂。我會記住今晚既所有對話，一世都會記住。

返屋企睇阿仙奴對利物浦，睇少左半場，半場阿 1-2 利，估都估唔到～ 點知下半場仲精彩：
開波冇耐阿仙奴就扳平，冇耐仲反超前添！結果利物浦輸 4-2，亨利 Head Trick... Wow！
今晚終於追番晒 D 日記喇！不過應該走左好多常客。仲同 Vincent 哥傾電話，原來佢乜都知。

聽日魚魚去澳門玩，我就唯有自己搵 D 節目啦！聽晚可能同阿 Ken 同大興睇波、食飯囉！

>>April 11, 2004 at 3:04:18 AM GMT+8

2004 年 4 月 8 日 星期四 【晴】

星期四，放假同唔放假對我黎講都冇乜大分別，尤其是係我呢個 Sem 成日有意無意咁走堂。
算早起身架喇！但咩都冇做過，淨係上網同睇電視、整番熱碟送同 D 炒飯，食左野咁囉！
見放假，就改早左乙明既補習時間，可以搭 85A 去樂富，爽死。最老土係走左架車先發現 ^^"

唉！補表弟又係補到一肚氣，我真係唔想再補了。留低左張紙條俾阿姨，幾乎成封信咁長。
內容大意係話表弟上堂態度差劣，多次提出唔要我幫佢補習，仲親口承認特登「玩野」！
咁我補落去仲有咩意思嘖？佢唔高興時我又要勞氣，最慘係我覺得佢乜都學唔到囉！
唔係我唔肯教，係佢根本唔肯學，咁我擺幾多心機落去都冇用架喎！軟硬都試過晒啦～
我收阿姨錢，但佢個仔又學唔到野，我收錢都收得唔安樂～ 徙阿姨錢時又徙我自己時間。

好谷氣！真係冇試過補習補到想喊。見到魚魚都冇乜心機（丫！補習之前都見到佢響對岸～）
不過有聽我呻，又陪我搭巴士同等車，乜唔開心都暫時唔記住啦！幸福，可以好簡單。

今晚自己煮烏冬食。沖完涼敷 Mask 敷到訓著左 ^^" 起身睇埋韋小寶就訓喇～ 要訓番多 D！

>>April 10, 2004 at 1:29:12 AM GMT+8

2004 年 4 月 7 日 星期三 【暴雨】

本來諗住食麥當奴早餐架！不過又唔知醒。起身諗住做功課，但又集中唔到，做唔到。
洗頭沖涼換衫返學。首先去銀行交左 $4,200 留位費 一.一 托 Thomas 幫我買左件三文治囉！
跟住就乖乖地做功課，但份野有好多野要執，做得好慢，又要補習喎！辛苦 Winny 了。

去補習之前買左個大話蛋糕，諗住試下隻 Hazelnut Mocha 啦！嘩～ 難飲到丫 @@"
接到魚魚電話～ 佢出左黎左又一城 ^^ 飲左杯好大杯既青蘋果綠茶，跟住就去搭地鐵。
約左小傑同阿 Neth 食飯，最開心係連 Katherine 都黎。劉瑩照例甩底，以後都唔叫佢了。
去左「BB 任食特區」，都 OK 丫！最緊要係有得食又有得傾 ^^ 過左好開心既一晚～
不過期間表到一個無厘頭電話，係某某既女友要 Check 佢個電話，就用某某個電話打俾人。
嘩！坦白 D 講句，我覺得呢條女係白痴幼稚低 B 兼討厭囉～ 唔係咁既女都仲啃得落嘛？

俾人趕走之後就去左睇 VCD，等埋肥 Des 黎就去食糖水；又帶左佢地去魚魚帶我去個間～
食左個西米涼粉～ 正！跟住就各自各亡命返屋企。手，仍然係咁核突．．．好慘啊 ><

>>April 10, 2004 at 1:17:37 AM GMT+8