2004 年 2 月 6 日 星期五 【乍雨乍晴】

尋晚雄心壯志話今日晨早返 City 做占，結果咪又係懶？！晏左起身，咩都做唔到。
約左阿曉出佐敦睇鞋（哦！原來係呢間～）跟住響隔離睇 Lecoqsportif，好多野都鍾意 ><
睇完就返屋企。今日自己有 D 靜．．．無啦啦一個人去左沙田，搵極都冇．冇．冇。

14:53:07　你唔好唔開心啦 "3

唉！又胡思亂想．．．竟然買左個孖芝再加杯朱古力新地黎哄自己！再係咁落去，肥死。
同埋唔知係咪近來食士多啤梨新地食得多，又好少特登買杯雪糕食喎～ 好「漏」呀！
本來諗住返去補習，點知個姐姐仔又乜又物，又唔駛補。是但！打俾寶肥叫佢早 D 過黎 ^^"

試左，原來話都冇咁易。天氣凍仲方便，分分鐘掟得死人。不過要想辦法令佢冇咁寡。
搞掂就落惠康買送，今晚又玩煮飯仔。我又整我既拿手小菜（渣野黎嘖 ^^"）正！好味道。
食完就離不開電視同電腦啦！寶肥睇《便利》睇到界損左我隻手。AXN 又做核突片 XD

又約左聽朝食早餐，不過又唔知得幾多個到喇！原來魚魚諗住搵我食早餐架 >< 哎也．．．

>>February 10, 2004 at 12:56:33 AM GMT+8

2004 年 2 月 5 日 星期四 【乍雨乍晴】

準時返學。數過呢，我地班好似真係單頭，咁即係注定有人要自己 Present．．．我囉！
愛人今日又賴床唔返學，我又孤伶伶。放學即撇，竟然係返屋企，又係食奶油麵～
Hea 完一輪就去乙明補習，跟住返又一城，捉埋寶肥去 LOG-ON 買野。哎！又破費喇 ^^"

跟住過新世紀行先施同 ICE FIRE，都係搵唔到我要搵既野。不過就食左個味千吉烈豬扒定食 =P
響兆萬買番條牛仔褲，以填補我買左條褲十三日就爛左既創傷 >< 好彩唔貴嘖！冇錢喇～
跟住行 Trendy，見到我隻錶好貴丫！抵左。再陪大小姐去旺中買冷帽，就撘火車返屋企 lu...

晏晝返屋企之前打過俾魚魚。「你唔得閒？」「我急救緊。」字字鏗鏘。「咁冇野喇！」

>>February 10, 2004 at 12:40:20 AM GMT+8

2004 年 2 月 4 日 星期三 【乍雨乍晴】

叫阿 Des 叫醒我返學校做占，結果都係懶，訓番，冇做到。重點係因為我叫魚魚唔醒。
都唔算晏起身架喇！換好晒衫等電話，結果去埋大圍等佢添！又風又雨，又寒又凍 ><

#9。有 D 驚呀下 @@" 不過應該冇事既。唔緊要啦 ^^" 哈！好耐冇見過呢隻 "It's FUNNY!"

火車地鐵往銅鑼灣，先食一個麥當奴 Lunch，再往 Time Square 出發 -- 有倉開喎今日。
丫開頭搵唔到個度響邊，兜左兩個圈就搵到勒！都幾多野睇，不過冇乜野岩我 ^^"
最岩咪 D 大大件好暖好暖既褸囉！不過平左都要千幾蚊（未平之前二千幾！）我買唔起。
反而魚魚就睇中好多野，又褸又鞋，雖然最後都係空手而回，話要諗定 D 先喎！咁都岩既 ^^"

唔知係咪冷親，又唔夠訓啦！頭痛起上黎。魚魚提議去麥記食個雪糕凍下佢，又得嘖！
食完就返九龍塘。今次到我陪佢等車喇～ 暖左一陣。跟住自己一個買左本《便利》黎睇。
上左麥當奴（又麥當奴！）邊飲熱朱古力邊睇書，消磨時間，夠鐘就落百佳買蔗汁 ^^"

丫！我竟然俾兩個自稱來自一間 Production Agency 既男女截停，又問我有冇興趣接 Job。
我都唔知點解自己對呢 D 野有 D 抗拒感，可能係我對自己冇信心（即有自知之明）啦！
雖然佢地既 Criteria 係搵 Sporty（唔係搵靚女呀！）不過，成個又一城大把人 Sporty 過我喎～
加上佢兩個個樣咁 Young，又兩手空空，袋都冇個喎～ 講左分幾兩分鐘野都唔俾卡片我。
係啦！唔俾卡片我，等我唔知佢咩公司、係咪呃人。事但啦！講到底我都係興趣不大。

補習又有利是收 ^^" 不過今日發現自己教錯野：Praises In School -- 我以後都會牢牢記住。
可能係耐冇見，小朋友又真係懶左啦（定我惡左呢？）個傻豬仔 D 搞到眼濕濕嗚咽晒咁喎！
做功課，Comprehension 答錯左，我教佢改啦！佢又唔肯改，叫多兩叫仲想喊咁款喎 @@"
嘩～ 嚇得我丫！原來傻豬仔係驚媽咪見佢用咁多塗改液，會鬧佢呀 ^^" 真係傻．．．

補完習一落樓，嘩！簡直就係凍到不知所謂 >< 彊晒囉我係。上左車就好 D，直駛馬鞍山。
返到屋企冇野食，煮左碟奶油麵俾自己。個酸辣湯真係難飲到不得了，唔好再推廣喇～

>>February 6, 2004 at 11:13:19 AM GMT+8

2004 年 2 月 3 日 星期二 【暴雨】

哎！今朝好叻咁醒左架～ 訓番之嘛 一.一 再醒已經係八點半，快極都遲啦！又要打的。
撘火車睇 Interp 份野。第一次睇過先上堂 O_o" 我始終都覺得睇定先唔係咁好囉～
份野都幾難，CI 仲難囉！我做到好憫，完全冇心機做。唔可以俾自己咁 >< 我要 A 呀！

三個鐘，都唔知點過。魚魚又出街，話本來想出黎陪我架！不過我落堂佢都未出門口囉 ^^"
結果上左爺爺度，自己炒左盒星洲炒米上去食 -- 唔知點解突然間想食，都幾好味啦！
跟住睇電視，都幾悶，越睇越眼訓。啊～ 原來今日有人上去幫叔叔沖涼。出門口凍到丫 ><

上 Duncan，捱得住冇訓覺。電話響囉 ^^" 樣衰左；阿武打黎：「如果雷暴警告，唔駛練喎！」
又會咁奇怪既？！放左學就去練習。今日有 Gloria 同雞雞，仲有 PatPat 等埋我 Warm-up =)
頭三擲餅都掟得幾好。第四擲唔好囉！所以唔再掟了。戴太行過：「四大標槍出妳。」
感激．．．多謝 Yetta 俾機會我。多謝阿武、小庭、PatPat 同菜菜既支持。You are GREAT...

不過 "我 x 標槍 = 傷" 似乎係一條公式，我硬係走唔甩架喎！背脊、腰、膊頭．．．腳。
嘿～ 結果都係拉傷左。抖？！點抖？戴太一行過黎咋，Gloria 幫我按緊摩我都彈番起身呀！
雞雞仲要勁唔識趣，大大聲響度問我點樣整傷 ><" 不過戴太冇乜理我。咁，都正常既。
用我「學番黎」既 Concept：（大約啦！）見到你受左傷，會關心你緊張你既先至係朋友。
咁我響呢個田徑場既朋友就只有小庭、謝立、PatPat、菜菜、雞雞同 Gloria。少到哩 @@

走啦！撘巴士入大圍。今晚又有魚魚陪我等小巴 ^^ 拐下拐下行得好慢丫！好少會行得咁慢。

緊緊擁抱以外　我用甚麼感到被愛　沿途陪著你　手鬆下來
遺留十寸空間　誰相信你在乎我　若罅隙拉闊　隨時會分開

誰都知雙手可緊扣　不依不捨的背後　這個信念有多溫柔
從害怕會被擁有　直到氣力不夠　十隻手指終於找得到對手．．．

單手插袋，十指緊扣既感覺好好。哈！又令我諗起 LOG ON 推出既情人節雙人手襪 ^^"
話咁快就暖番晒。有架好吉既小巴，唔上唔得啦 ^^" 返屋企食飯、上網、沖涼。
咁既天氣敷冰，簡直係「非一般既感受」啦！不過我乘機敷埋 Mask，一次過搞掂 ^^

>>February 4, 2004 at 11:48:29 PM GMT+8

2004 年 2 月 2 日 星期一 【微冷】

一早起身就俾媽媽鬧。夜晚返黎就話返完一日工，個人燥 D 嘖！晨早流流都有得鬧？
咩事呀．．．無啦啦又話我唔係讀書。我返九點半，我八點鐘起身都綽綽有餘啦！
點就時間，我清楚過妳啦！遲左咪打的囉～ 無啦啦發咩癲嘖？咁都可以鬧一餐架喎 ><

結果我咪又係八點四先落床？結果我咪又係準時？做咩嘖而家？！唉！大清早就咁唔愉快。

七個鐘上左六堂啦！上 Duncan 堂未醒晒，上小濤就好得多。仲竟然約左佢去食 Lunch XD
係，係我約既，係我自己想約既，絕對唔係張同學約架 XD 食左個牛仔髀，攤到凍晒。
傾左好多無聊野 ^^" 小濤話我多野講丫！係上佢堂嘖～ 我個人認為就算係佢堂都唔係好多。
佢話喎「：阿邊個話俾我聽，阿露比唔出聲就即係有心事呀！呵呵呵．．．」係架咩？
哈哈！咁我出聲都唔代表我冇心事既 ^^" 雙子座並唔係你諗到咁簡單架！心事喎，我大把。

食完飯上阿 Paul，即使飲左兩支益力多（其實冇關係 XD）都難免會恰眼訓。真係好悶。
跟住買番杯咖啡上普通話，睇下 Milk 又聽下書咁。上阿 Jim 都叫有聽書抄 Notes 既 ^^"
放左學就去補習。嗚 >< 又係我個叻仔表弟。頭頭都好地地，越補佢就越放肆，勞氣死。

好不容易捱左兩個零鐘，揀左地鐵轉巴士返入黎。竟然俾我響巴士度撞到肥仔嘉 <----- XD
同佢閒聊左成程車。跟住補多個半鐘習，返黎上網，又聽魚魚講，開左電視睇百分百感覺。
估唔到又幾好睇，幾好笑。今晚唯一特別既就係魚魚早左訓，我都早訓左，有 D 唔慣 ^^"

《迷你》　唱：陳曉東　曲：張亞東　詞：林夕　編：張亞東
－－－－－－－－－－－－－－－－－－－－－－－－－－－－　其實佢好多歌都好正！

和你借一根煙　下次相遇你　才回贈給你
那日　假使好天氣　請跟我笑著談天氣
迷上你的手勢　彈去那煙蒂　如流動飛蟻
我在　漆黑中觀禮　沉默　會更矜貴

迷上你　彷彿愛上空氣　我但願認得你　誰要　與你一起
迷上你　不須要你歡喜　暗戀只得這一個定理

迷上你的恤衫　白與灰相間　能迷惑雙眼
要是愛你這樣難　留在這看台無須出發

迷上你　喜歡你看的戲　隔著萬丈的美　誰又要與你一起
迷上你　不須要你歡喜　暗戀只得這一個定理

暗戀不等於想接近你

>>February 4, 2004 at 1:53:20 AM GMT+8

2004 年 2 月 1 日 星期日 【微冷】

今朝又幫中五女生補習。丫，而家兩個鐘都幾易過，冇計，呢個姐姐仔做野做得慢 XD
不過我都唔他條架！好多野都要自己做，冇理由齋睇答案架嘛！要解卷架．．．
原來爹娘都要出街喎～ 淨番我一個響屋企。由尋晚開始，已經連續四餐奶油麵喇 ><

是日唯一餘興節目係去牛皮沙睇波。經過間 Pizza 速遞，睇見 D 燈箱就餓喇！正到丫 O_o"
本來 11 點幾就熄燈走得架喇！見佢地話傾野，等多陣啦～ 點知佢地都唔係傾既！
嘩！成班人煩到呢～ 講黎講去都唔入正題，講左半個鐘都唔知講乜。Huh！走先喇都係。

自己一個人等車。小巴收左工啦！行條靜英英既小路出番靜英英既馬路～ 仲要等勁耐 ><
架巴士好靜，又冇乜人，好悶。一個人，個腦不禁又諗起野黎．．．係「克制」。

>>February 4, 2004 at 1:40:18 AM GMT+8

2004 年 1 月 31 日 星期六 【颳風】

今朝要練習，有新環節：早餐環節。哈哈！本來話成班人去食既，結果得番我同阿武。
佢似乎真係冇乜黎過又一城，由地鐵站上黎都可以去左冰場～ 我地約左響 Super Sandwich XD
食左個好飽既早餐 ^^ 正！希望下星期或者打後既日子，可以有多 D 人一齊黎食早餐啦！

練習嘛，最值得講下既咪戴太又同我講野囉！「我知妳乖，黎得好足，但都要睇成績．．．」
呢層我梗係明白啦！其實，自己技不如人，我都唔係今日先知，我知自己可以去到邊囉！
或者係以前有好有系統既練習，有人好俾心機教自已，有傾得埋既隊友一齊練習啦～
而家，我覺得每一次都係自己練習，練習時間同機會又少，好多野，都唔可以同以前比較。
我寧願每個禮拜練兩日田徑、舉一日重，練三日排球。而家？彷彿冇晒 determination...

「妳自己覺得，餅同槍，邊樣會好 D？」邊個估我話餅話？唔記得左添～ 但我答槍。
我知道，一直係咁練落去，餅，我已經唔會再有進步。入左 City，我連 23m 都未掟過！
中六七我唔練呀，出去比賽都可以做晒六擲轉身，而家？你叫我練習個陣做，我都做唔到。
感覺就好似武俠片入面，某某俾人廢左武功咁。好得人驚喎！真係完全喪失左呢種能力。
標槍嘛，至少有阿武真係會俾心機教我，小庭真係會俾意見我，每次都留意我出左咩問題。
但而家咁，又有傷，又唔做占，我真係唔駛旨意有得出。其實出唔出我已經唔重要了。
我都有付出過；我都係呢個 Team 既一份子丫！可唔可以唔好唔出我就唔當我係 member？

少有地早走。夠啦其實；每邊六擲，我做凸有餘了。我唔想以後都舉唔高隻手．．．

魚魚響門口等埋我，一齊撘的士落大角咀。踢完一場又行落花墟繼續。不過佢唔舒服喎 ><
好彩佢食左兩隻熱狗，咬左兩粒糖就好 D 嘖！「因為 D 糖有．．．"3」哈哈！甜到漏？
發生左「幾乎打交」事件 @@" 都幾得人驚架喎～ 好彩最後都冇事。花墟真係多無賴。
坐左成個晏晝，又唔知做乜凍番喎（今朝明明好熱架嘛！）凍死。自己上左新世紀。
響麥記食左個豬柳漢堡，跟住周圍蕩．．．接到電話又落番麥當奴。食左個士多啤梨新地 ^^
跟住就撘火車返屋企。響巴士度打左個電話，不過冇人聽。轉個頭電話響，原來係哥哥。

返到屋企再同哥哥傾左一陣。唔，我真係冇乜心機傾，而且好肚餓 O_o" Yeah！有奶油麵～
成晚都係得我一個響屋企，唔係上網就係睇波，睇到恰著。同魚魚傾左一陣電話啦 o^^o
跟住又繼續睇波，再同愛人傾左一陣 ICQ（愛人唔好咁唔開心啦！）等埋魚魚電話就訓 lu...

>>February 2, 2004 at 9:59:06 PM GMT+8

2004 年 1 月 30 日 星期五 【颳風】

今日又放假喇！12 點幾先起身 ^^" 沖個涼洗個頭，諗住煮個麵食。丫！接到魚魚電話喎～
陪佢過海報 Course。講起讀書 D 野．．．唔，唔同人講同一番說話，真係會有唔同既效果。
然後返 City：我去銀行，魚魚就要影印。撘火車返屋企啦！佢竟然出閘，去 CU 喎 /_\"

撘巴士返屋企個陣，好似好多野諗咁，但其實又唔知自己諗乜。唉！諗咁多做咩丫 ><
響屋企樓下食左九件魚，肥死丫 ^^" 不過熱辣辣既麥樂魚柳係十分正架～ 雖然係一個人食。
好彩食左野先返上去。我都不過係唔夠飽（早午餐都冇食喎！）摷野食都俾阿媽話 O_o

Lawrence 夜晚黎左食飯。唔，我對佢個樣、成個人都覺得好陌生。有 D 唔知點咁囉！
又唔係話怕左佢既；我覺得自己好似越黎越唔識同人相處，又或者係「選擇性」與人相處。
以前我覺得自己好大方、好豁達，而家就好似．．．又唔係小家，但就唔夠以前爽。

夜晚響 ICQ 同哥哥同 Winny 都講起近來 D 野。尤其是哥哥，總係一盤冷水照頭淋 /_\
無可否認，佢有時又真係講得幾岩既，不過我真係好唔鍾意佢開口埋口都提住個個名囉！
睇電視，有線電影台賣情人節廣告，俾我 Capture 到以下呢幾句，幾岩我心意：

　　　　　　　　　A kiss is more than a kiss.

　　　　　　　　　　　　　　It worths a thousand words;
　　　　　　　　　　　　　　It's a wonderful way to express love;
　　　　　　　　　　　　　　It's the silent language of the heart.

係喎～ 原來仲有半個月就情人節喇！上年情人節好似唔多關我事咁；今年唔知會點呢？

>>February 1, 2004 at 10:41:03 AM GMT+8

2004 年 1 月 29 日 星期四 【颳風】

終於都返學喇～ 自己煮左碗麵。又係星期四，又係上 Workshop，又係響火車譯野 ^^"
找埋條卡數，見到蕩媽。我地竟然撞衫丫（顏色！）上小濤同 Duncan 都好開心。
上阿占就悶慘 D 喇！因為冇左愛人陪～ 仲要自己搬凳丫！呢間房真係細到喊架喎～

放學陪大興出旺角睇電話。先響焗森林食左個拉麵 ^^ 跟住睇勻成個旺角。摺機好咩？
結果俾我說到睇 T610/ T230 =D 我覺得 T230 係抵到爛丫！慳番千幾蚊買第二 D 野好過啦 ^^"
響中原見到買 T610 送個隻馬騮仔。雖然個樣係「猙獰」左 D，但曉郁架！好過癮～
大興又係唔好彩啦～ 壞左部電話已經係黑仔，睇中左部電話，又會咁岩周圍都冇貨既？
睇晒就響許留山食個甜品。而家響許留山出示 903 idCard 冇折喇！咁張卡即係冇用了。

Miss 魚魚 Call 添！半個鐘頭之後先發現。打俾佢啦～ 佢又唔知做乜怪怪聲氣 O_o"

搭火車返屋企。上左巴士先接到魚魚電話。唔 >< 如果魚魚早少少打黎就好喇．．．
原來自己都幾累，返到屋企就攤左響張床度。魚魚真係返屋企先喎！又講起電話上黎 ^^
又係女學生丫：「係咪覺得少左個威脅哩～ 哈哈！佢點會威脅到妳丫？傻既！」

又睇 Pearl 同 AXN 學英文，連電影三台都做《美色殺人狂》。聽日又放假，做下野啦 ><

>>January 30, 2004 at 1:13:10 AM GMT+8

2004 年 1 月 28 日 星期三 【乍雨乍晴】

有進步呀今日，十二點半識得起身 ^^" 仲有 Muscle pain 添！即係尋日練到 D 野勒～
無啦啦 Search 富豪海灣個 Website 黎睇，大到丫．．．第時我間屋都會係咁大咁靚架！
食左個飯，打埋幾篇日記，咁又虛渡一個下晝。本來話做占架！不過又做唔成 @@"

有兩個 Auntie 上左黎拜年，係媽媽以前 D 工友黎既，都幾 Nice。最好係唔駛我招呼乜滯。
不過有客人響度，我係咁以都要扮下乖女，斟茶遞水、買送煮飯呢 D 都走唔甩架喇！
多得落街買野，我逗多街坊一封利是 ^^" 今日人日，拆埋利是，二千鬆 D 囉～ 少過上年。
今年既財運一定好好呀！繼收少姨媽個份之後，今日又發現吉利是封！犀利呀哩？！

都叫郁左幾行 FYP，不過真係要擺多 D 心機同時間落去喇！7 Credits 架．．．俾心機 ><

>>January 29, 2004 at 2:06:56 AM GMT+8