2004 年 4 月 26 日 星期一 【微冷】

「喂～ｂ？」「嗯！」「起左身未呀？」「起喇～」
「嗯．．．我而家去邊度邊度，跟住去補習。」「嗯！」
「再打俾你啦？」「嗯！」「拜拜啦！」「拜拜～」　　　漸漸地成了一種習慣，一條公式。

頹廢日。唔記得左要去補習 XD 唔係阿公打黎都冇左件事，放假放懵我哩！五點半先去到。
補到七點多，悶悶地，留響度食個飯啦！ 可以同阿姨傾下偈，又可以睇下電視渡下日。
竟然幫阿姨整電腦，但都唔係好整到，剷左 D Adware 囉！但都係搞唔掂 D 咸網 Popup @@"

十點幾先走．．．返到黎都係悶。因為冇帶藥出去，三點幾先食最後一次藥，仲要咬親個咀 ><

>>May 3, 2004 at 1:27:45 PM GMT+8

2004 年 4 月 25 日 星期日 【晴】

今日超有為，冇出過街（習都唔駛補，真係好！）更有為既係執櫃！竟然執晒衣櫃同櫃桶～
雖然其實都執左好耐，不過執落又唔係想像中咁難嘖～ 最好就係今次夠狠心，話唔要就唔要。
係啦！儲落儲落太多唔會著既衫，好彩我 D 衫都係 Cheap Cheap 地幾廿蚊，益下人都得。

哈哈．．．今日最特別既就係我食四次藥，【 邪同學 】四次都響我身邊 -- 電腦另一邊 XD

>>May 3, 2004 at 1:21:14 PM GMT+8

2004 年 4 月 24 日 星期六 【綿綿細雨】

一早起身掛號睇醫生．．．繼續氣管炎；繼續食好多好多既藥。超難食咳藥水兩支。
陳太話應承左帶 Jeffrey 出街，咁我又唔駛補習了。劉小姐又去街。都好，橫豎我又病。
無啦啦又叫左 Kenneth 陪我出旺角。陪佢睇野多過自己睇野，不過都買左件背心。

其實我都早有預謀既～ 夠鐘就去樂富等魚魚。估唔到等左都幾耐。等到，都係去搭車．．．

>>May 2, 2004 at 1:46:07 AM GMT+8

2004 年 4 月 23 日 星期五 【炎熱】

全日賦閒在家。上網 + 睇電視 + 訓覺～ 充斥左全日。心情指數係 -8，強度屬於「高」。
除左睇 American Idol 既個半鐘之外，全日未笑過。連上網都上得唔開心，上到頭痛要熄機。
七點訓到十二點，明明係好眼訓，但碌左好耐先訓得著，訓得唔好。兩日冇見過魚魚喇～

《借過》　主唱：容祖兒

曲：黃丹儀　詞：黃偉文

看看你　誰人可比你好
好得這麼恐怖　真的不知所措
連前度那傷口　也細緻的問到
痛到那種程度　遲一些可會好
還提及上次戀愛　預算與我終老
仍在和她一起　也收起我的好

傷我或是害我都慘不過教我記得一起幸福過
情願我聽不清楚當時誰人口口聲聲不會掉低我
待我差我沒有奈何　為何扮好心慰問　很掛念我麼
還能成為密友麼　你說得真輕鬆　講笑也別太過

你懺悔　無人可比我好
今天終於知道　不該知恩不報
還承認你不知　你錯到一面倒
我會更加容易　拿開拐杖企好
為何又共我講到　念掛我那擁抱
豺狼誠心禱告　難道並沒企圖

你說畢生犧牲不愛我　別拉拖

盡對我好就請躲開我　你讓我安靜行過

因你犯下大錯都慘不過教我記得彼此熱戀過
情願我聽不清楚當時誰人口口聲聲不會掉低我
我到底　可像太傻　為何扮好心慰問　很掛念我麼
還能成為密友麼　你說得可天真　不愛我就借過

　　　　　＊　　　　　＊　　　　　＊　　　　　＊　　　　　＊

另：一日之內，好似發生左好多事咁，所有野都唔如意。我都唔知點解會搞成咁。
我以為可以同一個人做朋友，原來唔可以，即使係網友都唔可以。玩？玩完就算丫嘛！

真係估唔到，而家想同人做朋友，越黎越唔係我想像中個回事。真係一 D 都唔容易。
大大話話我都上左七年網，我竟然仲未知上網應該抱咩心態！真係好醜怪。
或者佢岩既～ 上網何必咁認真？可能係我白痴啦！仲以為人地會用個心講野。
我有唔少好關心我既網友，所以以為網友都可以做朋友，唔一定係玩玩下。
我真係以為，你肯交個心出黎，人地都會一樣咁做。實際上唔係個個都會咁做。

我覺得：人地對我好，我咪對人好囉！人地對我唔好我都唔一定對人地唔好。
除非我真係覺得個個人唔值得我對佢好啦～ 都好難架其實！但總有人喜歡挑戰我。
世事往往都係咁。你拎個心出黎對人，人地唔一定要拎個心出黎對你，總係多多藉口。
做朋友幾咁閒？點解要咁複雜？！有人認真對待自己，竟然一 D 都唔值得高興．．．

或者，我根本就唔應該為咁樣既一個人而唔開心。所有野，都怪自己太認真。
由今日起，我諗我要改下自己對人既態度。隨便交個心出黎，心好易傷，好易痛。

　　　　　＊　　　　　＊　　　　　＊　　　　　＊　　　　　＊

尋日我同佢講：「阿邊個問我係咪拍緊拖，我話『唔算係』啦！」佢似乎冇乜反應。
咁又係既，我都係講事實嘖！再講落去，佢講左一句：「我知道妳鍾意聽咩咪講咩囉！」

你話我應唔應該開心？我真係唔識笑．．．　盡對我好就請躲開我　你讓我安靜行過

>>April 24, 2004 at 2:22:19 AM GMT+8

2004 年 4 月 22 日 星期四 【晴】

結果真係通左頂，聲都變埋．．．終於嘔左個 ppt 出黎。資料就多呀～ 但好似好散亂咁。
唔理了。趕到返學校，時間岩岩好，仲可以去所所清下個喉嚨先，第二個就輪到我。
總算一口氣嘔晒 D 野出黎，我自己唔係咁滿意囉～ 不過俾幾多出黎就收番幾多，抵死既！

好彩都唔係真係咁差。最令我欣慰既係小濤覺得我歸納得幾好 ^^ 拎到個 B++ 都算有個交待。
上埋 Stylistics 又走阿 Jim 堂，去左 Garden Cafe 食飯。食完行左一陣，今季 Royal 有好多靚野 ><
搭小巴去補習。上到去佢地都未食飯，我就入房恰左一陣。大少話要做功課我咪俾佢做囉～
點知 D 數做到一塌糊塗，錯到七彩。唉！話佢又唔聽，問佢又亂答一通，又響度玩野。
我已經冇乜聲冇乜氣，仲要鬧到聲嘶力歇，真係慌我唔死。救命呀！搵人教下我點教佢丫？

補完大少都仲有兩個要補，不過我真係頂唔順了，打俾第三個話我今日唔去了。冇聲。
果然，補第二個個陣我已經唔多出到聲，好彩我話左唔去補第二個嘖！返屋企訓覺好過。
不過話就話訓，返到黎又唔多想訓喎！趁冇人響屋企，就咁 Nike Bra Top 抖涼 XD 正！
沖埋涼就更加精神，搞到俾媽子哦我唔訓覺．．．十點鐘走去訓，唔記得睇《E.R.》囉 ><

>>April 26, 2004 at 2:08:16 PM GMT+8

2004 年 4 月 21 日 星期三 【酷熱】

聽日就要 Present 喇！我都仲係懶懶閒，唔多積極搵資料，抵我今晚又冇得訓。
已經晏起身啦～ Search 左半個鐘就要出去補習。今日好熱，可以著背心唔著外套 =D
考完試，同呢個小朋友補習就變得無聊，咩佢都識既，又唔肯學 Passive Voice...

玩 Scrabble 玩左成個鐘（補足成個鐘習先玩架！）玩到尾小朋友發脾四，搞到我都唔多高興。
其實呢個小朋友好叻，都幾乖，不過有少少縱壞左。我串錯左一個字，我見到佢偷笑．．．
聖人都會犯錯，我望都望佢叻過我，不過真係唔希望佢一朝得智。做人謙虛 D，成就會更高。

補完就拿拿聲飛番落九龍塘，原來玩玩下過晒鐘都唔知。又話七點，無啦啦又變左六點九！
仲要打極電話俾 D 人都搵佢地唔到，仲話俾我聽坐晒入去，就黎開始添！冇理由架嘛～
以我地 Sports Teams一貫既做法（哈哈！）邊有可能咁準時架？！結果咪又係坐晒響度等 O_o"

Yeah！有張 $100 既 Royal Sporting House Cash Coupon ^^ 不過真係唔知係計 CGPA 定 SGPA 囉！
如果真係計 SGPA 而又係因為個老女人唔知頭唔知路搞錯左，我諗我會殺人囉！&@)$(e^!%#

無聊完一輪，影左 D 相，就係開餐既時候喇！我都病到冇咩胃口，咩都唔想食添．．．
不過同呢班人一齊都夠開心啦～ PatPat 係真係好人黎架 ^^ 同余成熟左，我都對佢完全改觀。
唔知做乜今晚咁受歡迎 *比起平時，好似個個都話要同我影相咁 XD 連 Annie、Alex 都係～
見到 Yetta 同 Kenny 佢地拎住 D Board 相，都有 D 羨慕既感覺，我都希望自己有咁樣既成績。
如無意外下年應該入得番 City 讀 Degree 既，應該仲有機會玩田徑，到時再努力 D 啦！！！

影到咁上下就走了。「妳走拿？．．．又約左人？！」約左魚魚響火車站。真係唔好意思。

魚魚買左白糖糕，仲有西米糕添！不過佢似乎唔知我鍾意食西米糕。算啦 ^^" 白糖糕都好。
返屋企擺左 D 相上谷，Carrot 睇完又話：「最尾個張你個膊頭好正！」真係識講笑 XD

>>April 26, 2004 at 1:35:12 PM GMT+8

2004 年 4 月 20 日 星期二 【酷熱】

最後一阿 Paul，我都係冇上，因為做唔切 Mass Media，又唔夠訓。不過都趕左返去上 Interp。
唔返唔得啦！要 Test。因為阿 Joy 遲到，就做 MocK Meeting 先，有機會講下英文囉～
不過都冇咩用。同病多少有 D 關係，不過主要係集中唔到，成日都聽唔清楚 Speaker 講乜。

Test 得唔好囉！我自己都知 一-一 最唔開心就係 Thomas 都留意到，仲三番四次挖我瘡疤 ><
跟住又去南山村食飯，仲要去遠南豐！但我好似越病越勁咁，胃口都冇埋，冇晒精神。
食完就吽吽下咁行返去 CSC 嘔埋份 MM 出黎。一嘔就嘔到五點，交去白鴿洞算了，冇上堂。

跟住返落 CSC 等電話。驚所所收唔到，唔敢去所所戴 Con，點知魚魚打黎個陣已經到九龍塘！
拿拿聲去所所啦！跟住又要我買包，點知 Canteen 間美心又冇晒排包，激死 >< 趕到我丫！
結果俾魚魚催左兩次，仲有少少黑面，問我去左邊．．．唉～ 更衰係搞到身水身汁立黐黐 ><
呢程車都唔知叫坐得開心定唔開心。今晚去牛皮沙嘛！要餵蚊 >< 不過就幾好睇，有人入番波！
我有拍手架！不過四民同菠蘿就慘喇，整親，有排都唔駛玩。阿誠個妹妹仔就食左個波餅～

哈哈．．．「拜拜領隊！」傻架 ^^" 今次終於唔駛自己走，有人陪我等車。好彩仲有小巴嘖！

>>May 3, 2004 at 1:41:56 PM GMT+8

2004 年 4 月 19 日 星期一 【炎熱】

放得假太多，返得學太少，好耐都冇試過覺得咁辛苦。尋晚訓左，今朝先起身完成全功課。
哈哈！作左首詩出黎 ^^" 總算有貨交，不過都係走左第一堂。親自交番俾 Duncan，交代下咁。
Lunch 去左南山村，跟住去 Library 溫普通話，最後都係出左術 一-一 成班一齊偷睇試卷 XD

放左學冇去樂富，因為今日要傾阿 Paul 份功課。其實都唔係傾咩啦！都係揀兩堆野出黎譯。
影埋印就撇得，都未分工。咁少時間，去補習又唔係，於是上左爺爺度食飯，順便拎埋雪糕。
本來應該去黃大仙轉巴直返屋企，但我又想見人喎！於是就去番又一城轉火車，等下電話。
點知．．．唉～ 搭到大學都仲未接到電話，心灰意冷，個人又好累，巴士都唔搭，打的算了。
上左的士開左車先有電話到，講咩都假。返到屋企掉低左兩盒野，開一開電腦，恰左一陣。

仲要出去補習 一-一 補完都九點半喇！累到阿媽都唔認得。電話既另一邊，仍然一貫咁求其 =(

>>April 24, 2004 at 2:30:35 AM GMT+8

2004 年 4 月 18 日 星期日 【晴】

個樣終於正常番 D，可以出街 ^^ 七點鐘先起身，八點鐘先出門口，九點鐘先去到跑馬地。
九點半佢地就踢完喇．．．挾埋阿陳，返番時代大家樂食早餐。食完就逛左陣未開晒既時代。
跟住突然又去左觀塘倉，行勻晒，大家都冇收鑊 ^^" 反而就睇到兩對可能岩 Vincent 既釘鞋。

越整就越累，同魚魚一齊搭巴士返去，都訓左一陣既 ^^" 因為太晒，所以唔搭小巴，搭火車。
返到屋企都冇乜時間訓覺，上一陣網就要開始做野。到十點我都仲問緊人：Green Hair 即係點？

個波碌緊過黎，就響我 1m 之內。我唔截，個波會碌到好遠；我截，人地就唔駛執得咁辛苦。
係，我係唔識踢波，但截停個波唔係咁難嘖？我又唔係諗住踢。幫到人，何樂而不為呢？

「唔好．．．黐線架！做咩要幫人嘖？你幫左人人地唔會多謝你架！」
「我唔駛佢多謝我架喎～ 佢唔鬧我就得啦！」「你踢走左個波人地鬧你添呀！」

「而家係你鬧我囉！」 我諗我未試過咁樣駁你咀。

人地鬧我係人地無理取鬧，但點解無理取鬧個個要係你？上一次就多餘，今次就黐線～
個一刻我真係好唔開心。我份人係點，你應該好清楚至係。我係蠢，但我只係善良左 D 嘖！
善良既人唔應該俾自己深愛既人咁樣鬧囉！如果阿陳唔係同我地一齊，我一早喊左出黎。

>>May 3, 2004 at 2:22:03 PM GMT+8

2004 年 4 月 17 日 星期六 【晴】

一訓醒又抽筋；尋日抽左腳，今日抽右腳。不過抽完筋，左腳仲痛過右腳。嘿～
仲係未好番，仲係周身痕，仲係單眼皮。唉！繼續推晒所有補習，繼續困自己響屋企。
夜晚魚魚去打籃球，本來話帶埋我去，而家唔帶了。算啦！你唔怕，我都怕失禮你。

>>April 23, 2004 at 1:44:30 PM GMT+8