2004 年 2 月 26 日 星期四 【微冷】

YEAH！又去津津食早餐 ^^ 今日 Workshop 派功課，有 B+ 都唔錯架喇 ^^" 我要繼續努力。
但 Duncan 個堂就上到我好迷惘，上阿占又掛住傾偈。落堂去左影報 Non-JUPAS 個 D 野囉！
嘩～ 影左我成個鐘去，結果要買麥記兼打的上表弟度邊補邊食。唉！阿公好多心事咁。

補完表弟補乙明再補火炭，充實到丫．．．補完好肚餓，又想食麥當奴 >< 再係咁，肥死喇！

>>March 3, 2004 at 12:18:55 PM GMT+8

2004 年 2 月 25 日 星期三 【微冷】

尋晚魚魚要睇波，我叫佢訓下先，我叫醒佢睇啦！佢又冇覆我就走左，咁我唔知喎 ><
費事我半夜打去佢飛左線，嘈醒晒全屋人就唔好啦～ 咪冇叫佢囉！點知第二朝就俾佢鬧了。
唉．．．攤響張床度，十個委屈咁，滴左兩滴。講到抵，我都係想佢訓多 D 嘖．．．

約左去麥當奴食早餐啦～ 我又遲到喎！大家都唔知咩面口，真係食都食得唔開心 *灰*
結論就係：叫左，嘈醒左佢屋企人，尋晚會俾佢鬧，但第二朝唔會俾佢鬧，佢又會睇到波；
唔叫咩？係就係冇嘈醒佢屋企人，但佢睇唔到波，第二朝一樣鬧～ 咁梗係揀睇到波喎！

《玩轉男人心》同我想像中既有少少出入，我覺得個女人冇玩男人，係個女人都俾人玩緊。
不過我又唔會怪套野做得唔好既～ 絕對係個譯名譯得衰囉！嗯，睇戲個陣氣氛好好多 "3
魚魚有野做要走先，咁我就呀有送佢去撘送火車啦！跟住左去西田睇「東西」！呵～
打電話俾小傑，原來佢出緊又一城喎！拱我就買左個 Puff，然後撘火車出又一城行街街。
同佢食雞記～ 哎也！雞記 D 野真係好貴，我又蠢，唔食得雞皮又叫巴辣香雞翼，益晒小傑！

跟住夠鐘就去補習，補完習就返屋企。冇乜特別．．．好懶囉！好多功課，但又唔肯做 ><

>>March 3, 2004 at 12:14:28 PM GMT+8

2004 年 2 月 24 日 星期二 【暴雨】

魚魚有叫醒我架！我訓番囉～ 已經唔知第幾個禮拜走呢堂，未試過有一科 Tutorial 會咁走法。
返去上 Interp，突然間冇左份渣機既興致，都係參與下討論好。點解又係我做政府官員架？

大食到丫！明明係去緊表弟度食飯兼補習，都仲買左個包食 @@" 又話減肥，咁落去，點減？！
補完習又返去上堂，架車經過運動場，個腦已經諗到今晚比賽，有 D 緊張．．．唔可以架喎！
結果兩個幾鐘都冇乜專心上過堂，成日睇錶，睇下幾時夠鐘甩難。留到六點，好俾面架喇～

其實我都唔知自己叫唔叫緊張，不過硬係覺得有排都未比賽，唔知咁早 Warm-up 做乜 ^^"
但望住個鐘 D 時間過得咁慢，自己行行企企無所事事，又真係唔知點咁。我諗都叫緊張掛！
行黎行去見到佢．．．感覺好陌生。明明係擦過，佢始終都係眼尾都冇望過我一眼 =(

比賽反而冇咩好講喎！唯一值得開心既係第一同第三槍都幾輕鬆，尤其是第一槍！正呀～
我覺得全程最支持我既就係 PatPat，佢特登過黎睇我比賽，又俾意見我，又叫我定 D ^^
最開心係掟完第一槍，PatPat 好大聲話「靚槍！」真係好 encouraging... 21.54m，第三名。
最尾個槍，因為男仔接住落就比賽，都多 D 人睇既～ 不過我個「哎也」師傅唔得閒理我呢！
戴太就更加係好關照啦！幾乎冇理過我，淨係理 Connie 囉！不過事但啦～ 我咩身份嘖？

等左好耐，終於都頒獎喇！個段時間，同我講得最多野既竟然係 Christopher．．．
其實佢都係一個好人黎。不過我真係唔記得我係點識佢架喇～ 點解我會有佢電話架呢 O_o"
本來以為佢都會串，但佢對我又好似幾 Nice 喎 ^^" 但唔知點解佢咁鍾意篤我塊面喎！

大隊兒影左都唔少相，我就同投擲個班影多。自己又冇帶相機，唔知拎唔拎得番晒 ^^"
不過發生左一段小插曲：當大家影完其中一張團體相，有人發起抱起阿萍黎玩啦～
結果我係俾人一手推開左。當時真係有 D 不滿，即刻「嘖」左一聲，跟住行到老遠。
Well，我知佢冇心既，我諗佢連自己推開左邊個都唔知～事但啦！我又的確係唔多起眼。

大伙兒去樂富食飯，好彩成檯人我都識架嘖 ^^" 諗番起一年前既一個 SMS．．．咁就一年。

今日等住過馬路個陣時，因為趕，有人拜然拖住我隻手橫過馬路，一拖就拖到巴士站。
好耐冇試過有咁既感覺喇！仲不其然咁笑左出黎 ^^" 好傻，但好開心。真係由心度笑出黎 "3

>>March 7, 2004 at 2:10:03 AM GMT+8

2004 年 2 月 23 日 星期一 【微冷】

（太耐之前既野，太遲先補番。簡潔～）成晚有恰冇訓，晨早起身趕功課，都係趕到死死下。
託 Benny 幫我交一份，Print 緊先發現又有錯，改完再 Send 再 Print，自己都唔好意思 ><
跟住一路半恰半訓、死做爛做，錄埋音，食左個晏再 Dub 埋落 Cassette 就飛身返學交錄音帶。

仲要落 CSC Print 野 -- 冇 Printer 真係好麻煩 >< 交完功課仲有時間上阿 Jim，不過算了。
跟住捉左寶肥陪我去沙田，諗住買禮物俾媽媽啦！但行勻晒都諗唔到送乜好。唔想亂買。
最大收穫竟然係 Burberry Weekend 既香水版！不過好細支．．．仲有支 HUGO BOSS =)

夜晚幫大小姐補習～ 就黎考 Mock 喇！唉～ 佢再唔擺多 D 心機落英文度，神仙都救佢唔到。

>>March 2, 2004 at 1:15:52 AM GMT+8

2004 年 2 月 22 日 星期日 【晴】

今日魚魚比賽，早上到下午既節目都係睇波，又熱又曬。但個度有好多壞人，唔准除衫喎～
不過 D 比賽都幾好睇 ^^" 最緊要證實左我係好犀利的！我話入就入，宴客就宴客 @@"
中間去過大家樂食左個飯，中途又飲左杯涼茶。太熱喇～ 直頭熱到個人吽晒。中暑咁款。

要趕返屋企切蛋糕，所以冇睇到最後一場。返屋企個陣個頭痛到丫！不過個蛋糕都幾好味 ^^
跟住都知好多野做架喇！姑姐黎左都唔得閒招呼佢，自顧自做野，不過仍然係做得好慢。
夜晚姑姐響度食飯，我又唔知做乜咁好胃口，添飯喎．．．跟住又懶啦！成日掛住睇電視～

魚魚個胃唔舒服，但我幫唔到佢喎！叫佢睇醫生，又話屋企有藥，但叫佢食藥佢又唔食．．．

「SORRY．．．」「？」「對唔住呀～」「做咩呀？」「惡囉！」「少啦．．．」
「唔好嬲啦！」「冇嬲額．．．」「唔好唔開心啦！（少少啦？）」「少少啦！」

>>February 27, 2004 at 2:22:46 AM GMT+8

2004 年 2 月 21 日 星期六 【微冷】

今日既生活係搞 SAS、早餐食超級三文治、練習（今日擲 21.23m）、食飯、補習同補習。
除左朝早遲到、練習腰痛膊頭痛、晏晝食小菊、補習錄音同飲奶茶之外，冇咩好記了。
反而今日無啦啦想發多 D 翕風，講下 D 講完都唔知邊個明既廢野，抒發一下自己既情緒 ^^"

今日又見到一個人，有一段時間，大家既距離好近（Physically），但感覺係「唔係好熟」。
上年同一時間，佢會大大聲同我打招呼，大大聲同我傾偈，大大聲寸我，又大大聲同我講笑。
今日，佢唔會再同我打招呼，唔會同我傾偈，唔會同我講笑。過去既，單靠我，追唔番。

　　　　　　　　　　＊　　　　　＊　　　　　＊　　　　　＊

　　　　愛情不是一面倒的，別人有權愛上我們，也有權不再去愛。

　　　　　　　　　　　　　　　　　　　　　　　　　　--《讓自己值得被愛》阿寬

　　　　　　　　　　＊　　　　　＊　　　　　＊　　　　　＊

　　　　　在臨別時候通話　並沒記錄　而我們的過去　沒聲色的結束
　　　　　但唯獨　遠處那面掛鐘　可以給我紀念這秒的痛
　　　　　並無任何幸福事　活現眼前　連愛情的證據　亦得不到半點
　　　　　沒留念　也欠缺舊信件　竟看不見　怎麼可再相見

　　　　　一個冷漠　一個決絕　不多不少　不相伯仲　你我再也不拖不欠
　　　　　但我又為何發現　在腦內剩餘紀念　已剛剛足夠跟我糾纏
　　　　　一句說話　一個決定　清清楚楚　乾乾脆脆　你我永遠不拖不欠
　　　　　但慶幸尚能發現　在印象尚留紀念　每一刻都記得　你甜蜜過的臉

我唔介意付出，亦唔要求回報，只係我知道並冇太多人 珍惜 我為佢地付出既一切．．．

嗯。呢排好多人都話「覺得」我好幸福喎～ 係咩？唔係掛 @@" 點解會有咁既錯覺架？！
幸唔幸福呢 D 野，其實好主觀架嘖！你睇我好，我睇你好啦！係真係咁好？自己至知。
你可以將 D 開心無限放大，將 D 唔開心收收埋埋，呃到人呃到自己咯，咁咪可以「開心」囉！

丫其實魚魚都幾識睇我眉頭眼額，不過，知我唔開心又點丫！嘿～「解鈴還需繫鈴人」。

>>February 25, 2004 at 2:40:08 AM GMT+8

2004 年 2 月 20 日 星期五 【微冷】

今日都算自動自覺起身，仲落街買送煮飯 ^^ 今日試新野，又滾湯，好叻呀！哈哈 =D
Mr.P 食左少少，佢都話好食呀！不過下次唔好俾 D 腰果「林」，咁就更好吃勒～
最得人驚係我食晒成盒豆腐 @@" 呢排突然好鍾意食。不過更弊既係我唔覺意飲左蜜糖 ><

食完飯就係整腰既時間～ 好耐冇整過喇！因為近排好左好多，係岩岩個課又傷，仲要係左邊。
因為左邊要用凍，右邊要用熱，哈哈～ 變左「冰火」！（哈哈．．．）跟住都係上網囉！#10

夜晚竟然係去左練習；跟阿武去左深水步練。本來想度個 Mark，但個場完全唔同，度唔到。
仲要冇態，連插槍都唔識，要由頭學過。最慘係呢度痛、個度痛。真係好憎自己咁樣。
都冇乜心機練架喇～ 可能我真係唔鍾意個場啦！覺得自己唔屬於個度，練都練得唔自在。
加上自己既狀態差到咁，阿武又唔得閒教我，又痛，八點幾就收檔，坐響度打機、畫公仔。
其實真係有 D 唔開心，飯都唔想食，不過又唔想搞要阿武咁為難，都同佢去左茶餐廳。

噢！原來今晚《子是故人來》大結局呀！淨係睇得個尾 @@" 不過餐飯好好味，又有人請呢！
呵呵．．．兩個送都好：咕嚕肉 + 西蘭花炒豬頸肉。一路食一路傾，都講左好多好笑野。
魚魚打俾我話佢出旺角見個人，不過到佢返屋企我先岩岩有野食，所以同阿武一蕭撘 86C ^^
撘車又勁傾勁傾，唔知做乜講講下又講到我 D「光輝史」，嘿～ 時間過得真係快呀可？！
食完個飯，撘埋程車，冇咁唔開心喇～ 呵！仲有人送我送到屋企樓下 ^^ 成十二點先返到去。

最搞笑係架車行到半路，我地見到一條興建中既天橋，伸展去一棟幾靚既「住宅」架喎～
我見棟野好新，環境好似又幾好，就講左句：「住到呢度咁上下既地方都唔錯架喇！」
冇耐阿武就指住另一邊窗問我：「喂，點解個邊寫住『往香港城市大學』既？」．．．宿舍。

>>February 26, 2004 at 12:17:21 AM GMT+8

2004 年 2 月 19 日 星期四 【微冷】

唯一會一個人響食肆坐定定食一餐既，應該只會係去麥當奴同津津。都係津津好 =)
今日知醒，抵我可以他他條咁食。返學校測驗，冇乜野掛！我中左個「大快朵頤」喎～
跟住上 Duncan，我個邊唔知做乜咁嘈，搞到 Duncan 好似有少少不滿添！弊喇．．．

上阿占就傾足成堂傾 ^^" 跟住自己去食左個麥當奴（逼不得已架！）跟住就去樂富補習。
補完撘小巴過番九龍塘轉巴士。今日特登帶左 Hard-free 聽《森美小儀》，跟住報新聞喎～
乙明村發現子彈？！我當時就係去緊乙明，仲正正係去緊個棟！早左到，打去冇人聽！
結果走左去行百佳．．．冇計！個度乜都冇。又買左 D 糖同朱古力 ^^" 補完就收工返屋企。

魚魚又提起肝炎針既問題，究竟我有冇打呢？睇針咭就冇囉～ 聽日打去診所 Check 先！
唉！又煩番上網既問題。好討厭囉！你犯錯在先，仲影響到我喎而家！我鬧你係好正常囉～
但估唔到魚魚仲大反應過我，打成篇野．．．「唔通你諗住同我搬去．．．？"3」傻架 o^^o

>>February 25, 2004 at 10:20:57 PM GMT+8

2004 年 2 月 18 日 星期三 【微冷】

今日勁晏起身，上網 Hea。接到「通知」原來屋企 Cut 左 i-Cable 仲準備申請和記。
但因為和記呢期好多人申請，最快要三月幾號先有得用，即係我二月底三月頭冇網上。
仲有原來以後上網費由我同阿邊個一人一半。丫點解我可以今日先接到「通知」既？

我真係唔想發爛渣架！但我真係冇辦法唔發爛渣囉～ 你地識唔識咩叫尊重人架？
錢就我俾，話事就永冇我份。如果係咁，我寧願俾足成份錢，我自己申請一條線算啦！
唔駛一陣上唔到網呀乜乜物物，要整又唔俾我整，要用就要等，仲要受氣俾人鬧 ><

食左個飯，上多陣網就去補習。唔覺意遲到添！跟住舊地重遊：補番駿景園喎！
好彩淨係補個大仔，而佢都「好似」生性左好多。哦！淨係補 Oral 呢～ 難唔到我既 =)
等小巴返屋企時接到魚魚電話，佢好似好累好累咁。本來想見個面，不過．．．
都係算了。返屋企食飯之前爭扎左好耐，買唔買麥當奴食好 ^^" 食飽就上網、訓覺囉！

>>February 24, 2004 at 12:07:42 AM GMT+8

2004 年 2 月 17 日 星期二 【微冷】

逢星期二，唔係 Absent 就係遲到！五個禮拜喇 >< Tech Tran 我都唔知學到 D 咩返黎。
上左半堂囉！攬左 D Transparency 返屋企打，當係將功補過囉！我唔想自己再係咁懶散。
Mock meeting 就勁好玩：Leo 扮嫖客 XD 不過我無啦啦有語言障礙，唔知自己翕乜 O_o"

晏晝上左爺爺度食飯 ^^ 睇左陣電視，落左格就訓左陣晏覺，跟住返番去拎鞋、上堂。
頭半堂冇 Leo 陪，悶死左；下半場佢返黎啦！不過又要不停睇片，仲要睇完好似冇睇過咁。
唔～ 呢科 Introduction to Mass Media 的確係同想像有 D 出入，點都好啦！我會盡力而為。

好開心！因為有意外驚喜：魚魚黎左 City，仲等埋我陪我行過去 JSC 添 ^^ 真係好勒～
不過今日唔係好掂，再次受背傷困擾，仲要連平時冇事既左邊都傷埋，今勻真係大鑊喇 ><
背傷固之然係有影響，但自己又唔知發咩神經，學佢地話齋：「回塘」囉！點搞呀？！

乖乖地跟 PatPat 由基本做起啦！點知老女人過親黎就「阿之阿左」，我唔覺有咩建設性囉～
講野都唔緊要，妳唔知我做緊乜、為乜就唔好咁多野講啦！唔係行行企企就係坐、傾偈？
喂！做唔到成套動作，由插槍慢慢做起，都唔得，坐低諗清楚個動作係咪都唔得先？！
「今次又賴咩呀？」我頂妳個肺！我幾時有賴咩呀？我傷都冇話妳聽啦！條腰痛，我想既？
話我唔做俾妳睇下嘛？我做個陣妳有冇睇呀？冇囉唔該！全村人都睇到冇囉～ 谷鬼氣 ><

自己發神經，已經谷住谷住想喊架喇！仲要硬食幾句．．．真係未試過激氣到想喊架！

收檔之後俾 Gloria 按左一陣，佢話腫左囉～ 唉！今日又唔知做乜咁多野拎，個袋重到嘔 ><
好彩搭車返到大圍，有魚魚幫我拎袋兼送我去小巴站。上到車，發現原來真係好累～
返到屋企又係攤響張床度懶下懶下，都有聽話即刻敷冰既！敷到訓著左，成 12 點先食野。

>>February 19, 2004 at 2:16:37 AM GMT+8