2004 年 6 月 15 日 星期二 【晴】

今日加場。（一個月唔夠之後睇番，我已經唔知自己講乜野「加場」@@"）
#20．好犀利呀！好開心 o^^o 不過我諗我都係減下肥好．．．加油呀ｂ！

原本今日上去簽約，但朝早接唔到電話，唯有自己打去啦！好似唔知點咁。
人事部話老細未簽張 Contract 出黎囉！都唔知點做野既。結果約左聽日。
但我聽日就返工囉！聽朝一早過去長沙灣簽約，然後返粉嶺喎！咁都得既 @@"
又要 Formal Dressing．．．真係有 D 難倒我。希望呢份工會做得開心啦！

>>July 7, 2004 at 8:15:08 PM GMT+8

2004 年 6 月 14 日 星期一 【晴】

今朝響馬鞍山補習，跟住又要出去火炭，辛苦到丫．．．最慘係今晚 Grad Din ><
補完火炭幾乎要搭的士返入黎。去到 Salon，點知又話多人，要等半個鐘喎！
等半個鐘唔係問題，等個半鐘先係問題。我話四點九要走，佢四點九先得閒幫我整。

仲要整完我覺得唔靚．．．算了。返屋企換過套衫就落樓。好彩爹爹肯載我去嘖！
去到見到大家都簡簡單單，好彩我都冇花枝招展 XD 不嬲都唔會。唔失禮就得。
所謂做 Receptionist，工作無聊至極，係幾位老師黎個陣，係咁以幫佢地戴下襟花咋！
阿 Jim 同 Elsie 見到我都碌大對眼，一定係俾我呢個 Look 嚇親啦！難得一見嘛～

無無聊聊咁過左成晚。食又食唔飽，玩又玩得唔盡興，係一般 Grad Din 既正常得著。
一次傳獎品同答問題羅獎品都有我份，不過一份係釣魚機，另一份係粉紅色纖身縮骨遮。
唔係粉紅色就好啦．．．送左俾 Brenda。最大既得著係分別同左 Elsie 同 Jim 傾偈囉！

夜晚靜雞雞一個人離開，始果同 Yanice 一齊行上火車站。其實咪又係自己返屋企？
見唔到魚魚，佢見唔到我呢個 Look lu... 不過冇緊要啦！咁既樣，唔見好過見囉～

>>July 6, 2004 at 8:45:50 PM GMT+8

2004 年 6 月 13 日 星期日 【酷熱】

「我去踢波喇！」「小心 D 喎！」「好啦 ^^ 聽妳話啦！好冇？」「好～～～」
「 聽『晒』既話又誇左少少．．．」「你都唔會架啦！」「Haahaahaaha......」

唔覺唔覺，聽日就 Grad Din。夜晚上左姑姐度拎番條裙同借個袋。搭錯車，蕩失路添！
好彩都去到嘖！不過好晏先食飯，諗諗下都係唔搵阮熙了。我又唔留得夜喎，算。

"Somtimes When We Touch"　by　Rod Stewart（Mann/ Hill）

You ask me if I love you, and I choke on my reply...
I'd rather hurt you honestly, than mislead you with a lie.
And who am I to judge you on what you say or do?
I'm only just beginning, to see the real you...

And somtimes when we touch, the honesty's too much,
and I have to close my eyes and hide.
I wanna hold you til I die, til we both break down and cry.
I wanna hold you, til the fear in me subsides...

>>July 6, 2004 at 8:34:34 PM GMT+8

2004 年 6 月 12 日 星期六 【晴】

今日去粉嶺見工，原來係長沙灣既 Second In 黎既，Recreation Assistant 即係會所二打六。
之前想總部，今次直接去屋苑。第二次被多過一個人 In，但上次一對二，今次一對三 @@"
仲要係個個部門最大個兩粒 + 康樂主任！開頭都有少少緊張，不過越 In 越好（我覺得～）

我見佢地都好似幾滿意咁。個 Vice Manager 仲有一次問聲話我答得好添 ^^" 都幾係開心架！
六日九個鐘，返朝 7 晏 4 或 晏 2 晚 11，佢話 6.5K- 7K，不過我寫 expecting 7K 應該冇問題喎 ^^
佢肯請我我都可以諗下做唔做既，雖然個 Job Title 好似 Cheap cheap 咁，但都叫大公司丫！
而且係 CS 野，呢份工既經驗對將來都幾有用。嗯，等消息吧！（其實我都有 D 想做．．．）

「當我忙碌時，會想想你架～」「^^ 想起我就好了..」「想架想架~"3」

>>June 27, 2004 at 3:29:09 AM GMT+8

2004 年 6 月 11 日 星期五 【晴】

罕有地少少都唔期待今年既生日。唔係怕老，而係怕唔開心。
有人話個人會陪我囉！佢一開始話我知陪我個陣，我係幾開心的。
但唔知點解．．．不如 Skip 左佢，可唔可以架？都唔知做乜 =(

>>June 27, 2004 at 3:16:09 AM GMT+8

2004 年 6 月 10 日 星期四 【酷熱】

這絕對是一家很仆街的黑店：　駿昇企業國際有限公司 Global Max Int'l Ltd
　　　　　　　　　　　　　　地址　美麗華大廈 22 樓 2202 室
　　　　　　　　　　　　　　電話　2377 4212　　　　　　　　　　　大家千萬別上當！

點解？呢間公司就響當眼處掛左一支 Slogan Flag，上面寫住：群策群力．快速上位。

咁我 send 左 N 咁多封信/ Email/ Fax，有時真係唔知邊份打邊份，
而且有 D 電話打黎未必係最近既申請，所以真係好難搵得番自己搵過咩工。
尋日又係咁樣接到個電話，間 Cheap 野淨係話自己係駿昇，叫我去 In 啦！
咁我返屋企摷勻晒都搵唔番係咩工，咁見唔係好遠又有時間咪去囉～

咁我準時早五分鐘上到去啦！除左個門口 OK 得體之外，D 人都怪怪雞雞，
後生仔師奶款乜都有，我都心知不妙喇！一張 Reception Desk 有兩個公司名！
左一個右一個兩個 Reception，咁我當佢兩間公係同一個集團就冇理啦！
但個 Reception 無論樣同打扮都只係一個中年師奶，絕對唔係恤衫 Suit 裙。
我一行埋去話黎 Interview，就叫我「入去轉左圓凳坐低等下」簡潔～

入到去一轉彎就係凳，間野細到乜咁，淨係中間有六/ 八張似 Office 既灰色板間位。
而所謂「等」個度有成十張圓凳，坐左六個女仔 @@" 個個都後生，似十八九歲。
跟住就有個樣樣衰衰的西裝男人問我係咪黎 In，然後就拎張 Form 俾我填咁，
又問我搵內線幾多號姓乜野 *我覺得怪怪* Mark 低左就叫我自己填 Form。
咁我都好俾面填晒，但佢最底有幾條問題，問申請人對佢地公司有冇了解，
對美容瘦身有冇認識/ 興趣，我都估到冇好野喇！我自己點會搵 D 咁既工黎見？
除左中間個幾個位，間野其餘三面都係房（我背脊係淨番個面），怪怪地。

一路等我就一路周圍望，淨係見到 D 人行黎行去不停傾偈，唔似做野既。
又留意到 D 員工好多都拎住同一款膠杯，飲緊同一隻類似麥皮既東西。
跟住又聽到遠遠有個女人講電話〝猛話咩係豆奶唔係維他奶 @@"
又話「唔信你去惠康百佳睇下都．．．」不過我唔知佢講貨款定價錢。

坐對面有個打扮「入時」既女仔撩佢隔離個女仔講野，問佢地 In 咩 Post。
我就聽到一個答 Customer Service，跟住就聽到個入時女仔話：
「．．．好似係傳銷公司」而我又留意到有 D 人入左去勁耐都未出黎。

跟住就到我勒！一個中年男人出黎嗌我入房，木口木面得黎都幾串樣，唧都唔笑咁。
入房就話「坐啦！」而唔係「請坐」囉！間房又細到喊，真係一張書檯兩邊各一張凳。

佢：暑期工？ *我心諗：點你都唔應該係咁既態度開場下嘛？！
我：唔係
佢：唔係？（望一望我張 Form．但佢手頭冇拎我 Resume 之類）
我：唔係呀！我讀完個副學士架喇～
佢：咁你有咩打算？
我：出黎做野囉！
佢：做 D 咩？
我：如果做得番翻譯就梗係好啦！不過有其他機會都會試下。
佢：翻譯？好難架喎！ （唔係關心口肳的！串樣的）
我：係呀！所以咪出黎做下唔同既工，認識多 D 唔同方面既野。
佢：哦！咁我地公司做美容架喎～ 你對呢方面有冇認識？
我：唔係太多。
佢：咁你對呢行有冇興趣丫？
我：少少啦
佢：點為之少少？ *我已經開始唔高興
我：我對呢個行業冇抗拒囉！咁我個人又幾鍾意接觸新野，
　　而且做女仔對呢方面點都會有 D 興趣，會關心。
佢：咁即係冇咩興趣啦
我：*心裡面媽叉中* 都唔係既！做落就會有興趣架嘛！
佢：咁我地公司係做呢樣野，你又冇認識，又冇興趣，咁點呀？
我：*咁你叫我黎 In 之前問清楚先啦妖* 興趣可以培養，唔識咪邊做邊學囉！
佢：咁你有冇諗住報 D Course 讀下呢？
我：都有架！如果有需要增值我都會。
佢：咁我建議你想學野就去讀下 Course 啦！即係咁，
　　我地出糧俾你，你就黎學野，咁唔得架嘛！
　　我地呢度係做野，唔係學野架！你明唔明白？　我頂你個肺丫！
我：明。
佢：咁好啦！我會同你個 Supervisor 講架喇（即之前打黎個條友）
　　睇下會唔會安排你做個 second In 啦
我：哦。唔該。
佢：你走得架喇。（指一指個門口）
我：（企身）（望住佢）　你唔係咁都唔開門俾我牙？係咪男人黎架？
佢：（企左起身再指一指個門口）（見我再企定先開門）

即撇囉！咩呀 >< 嬲到我丫！一落樓就打俾人勁呻勁鬧呀！不知所謂呀間野！！！
我真係好想拍檯鬧臭個死寸咀囉！佢一入公司就坐而家個位既？低 Q 能！不過．．．
我唔排除佢家陣坐緊個個都係廢位既。有地位既間 Office 就唔會豆潤咁細啦！挑！

>>June 13, 2004 at 3:19:54 AM GMT+8

2004 年 6 月 9 日 星期三 【晴】

今朝陪爸爸去醫完做內窺鏡，等入去等左成個鐘，做又做左大半個鐘，訓又訓左大半個鐘。
一個人響度勁睇書，你都咪話唔悶！不過做乖乖女，陪下爹爹都好應該。我好錫佢架～

走個陣先醒起打俾姑媽，不過已經遲左，弟弟已經入左閘（OK！）同唔到佢講 Byebye lu...
坐叔叔車返馬鞍山，響樓下食大家樂。好耐冇同過爸爸食大家樂喇 ^^" 個咖哩好辣 @@"
跟住去左長沙灣見工。Well，見 Recreation Assistant，我冇諗過要 Formal Dressing 囉．．．
事但 一-一 原來呢間係大野黎架喎！我仲唔知頭唔知路。第一次覺得自己 In 得唔好添 ><

見完工就去左深水步買 Game！其實我恨左好耐架喇 XD 因為真係好悶，好想玩下電腦 Game。
買左隻 The Sims 連 Vacation Expansion Pack ^^ 返屋企 Install 埋先肯去補習。咁就玩左成晚。

>>June 27, 2004 at 3:06:05 AM GMT+8

2004 年 6 月 8 日 星期二 【微雨】

今朝跑步都係木口木面，結果魚魚都問口話我呢排成日都係咁既樣．．．
但我好威的，冇咩點理佢，點一點頭就繼續擰咩面發吽豆 @@ 我可以點嘖？
不過跑完個長就好開心，因為我一口氣跑左 7K 呀！破晒自己紀錄 ^^"

係見份工見得幾過癮幾開心，等我尋日仲猛諗見唔見好，原來份工係 Secretary。
哈！我自己 Fax 完都唔記得。佢話佢地公司好少請我呢 D 咁 Fresh 既人喎～
佢話通常收到好似我呢 D 咁既 Application，佢地睇都唔會睇，唔會理喎！
但又唔知點解會 In 我 ^^" In 我個個男人肥嘟嘟，講野好慢，但 D 語氣好搞笑 XD
佢問 D 問題又俾幾多位我講野：點解讀完理科轉商科、唔鍾意理科/ 商科 D 乜野、
我有咩志願．．．嘿！跟住又話我咁活潑澱好動冇理由鍾意坐 Office XDDDDD

我話我搵工多數搵文職，都係 Sec 或者 Clerk 之類，但志願就係做番翻譯個邊。
我話傳媒個 D 都岩我，即係做下幕後、譯下外國劇集或者字幕就最好啦 XD
跟住佢就問我有冇諗過做配音，我話都有，佢就問我點解，跟住講完一輪佢就話：

「我地公司同北京個邊有個 Project 傾緊，係電視台黎既，如果傾得成做得黎呢，
　將來真係會有配音呢 D 位，我當然希望傾得成，到時你仲想做就可以上去。
　我係怕到時愀唔肯去北京咁遠咋！希望傾得成啦！不過最快都要半年時間左右。」

最搞笑係佢聽完我篇「我的志願」之後，笑住咁講左句：唉～ 善變既女仔 XD

臨尾佢問我住響邊，跟住諗左成分鐘，就話佢仲有間公司響上環，仲上左市添！
不過裝修緊，要整多兩三個禮拜先 Ready：「我諗你都係跳跳扎冇時停架喇！
你都應該仲搵工架啦？拿，咁啦！我俾你繼續跳跳扎啦～ 個邊大約要七月先搞掂，
咁兩個禮拜後，如果你跳到累，搵唔到工也好，又或者真係想黎我公司做都好，
打俾我！個邊呢．．． Secretary 也好，丫，就算翻譯既野都有得你做架喎！
因為我地都出好多 Notice。你做兩個月都可以話俾人聽響上市公司做過翻譯啦！」

雖然我唔知佢係咪呃我，又或者搏我唔打去，不過 In 既過程係幾過癮既 ^^"

我覺得佢講野都幾有技巧，佢講左三次正常唔會 In 我呢 D，但都有話我答得好。
不過如果佢係呃就冇理由同我講話未傾得成啦？仲要大約半年左右先會落實 @@"

見完份工都幾開心，笑住走架 XD 同埋太古坊真係幾得，連 Lift 都高級過人。
可能係心情好轉，走左架巴士都冇憫，入到第一城仲食左個吉野家 $12 細牛肉飯！
跟住一口氣補左三個鐘頭習，雖然弟弟唔係太聽話，不過我都冇話發爛渣呀 ^^"

返黎食左半碗飯一碗白粥，冇咩特別感覺，不過話好興奮又唔係，好過尋日少少啦！
大抵係多得今日份工吧！真係天意。如果今日唔去 In 又去邊呢？訓覺 XDDDDD

>>June 27, 2004 at 3:31:36 AM GMT+8

2004 年 6 月 7 日 星期一 【晴】

今日搭巴士個陣有個男人望左我全程車，我一啤佢佢就擰轉面，轉個頭又擰番過黎喎 O_o
我落車個陣行過（佢企正響門口）佢開聲講野！我聽到個「你」字，頭都冇擰就一支箭逃了。
勁驚喎 @@" 完全唔知佢做乜。我肯定我唔識佢的。我有諗過係咪自己有 D 瘀野唔知道 XD

>>June 27, 2004 at 2:54:17 AM GMT+8

2004 年 6 月 6 日 星期日 【晴】

今朝又晏起身，一仆一碌咁出去廣源補習。出門口之前大發脾氣，不滿有人爭用所所。
用都唔緊要，人地用緊時你要用，唔該細細力敲門，唔係求求其其大大力力啪啪啪就算！
最慘唔係趕住去廁所，係剪完頭髮要洗頭，出門口要 Gel 頭，跟住仲要照鏡剃鬚 ><

即係我呢 D，明明係梳緊頭，但唔知點解俾人半逼左出黎，洗 Con 戴 Con 都響電腦檯做。

補完習就出彩虹，點知等左個半鐘，仲要個半鍾都係企響地鐵站，刨晒本《３周刊》。
等到魚魚勒，佢又唔係好好態度咁樣 一-一 好趕咁出到筲箕灣，完全人生路不熟。
睇左半場多少少就要走了．．．要去德福食飯。早知唔咁早走啦！去到勁耐都齊人。

餐飯都算食得開心既 ^^" 最開心係同弟弟玩。佢傻既，乜都笑得一餐。佢真係好得意！
今晚之後又唔知幾時先有得再見喇～ 真係希望個傻豬仔大個左都仲記得家姐啦 ^^"

今晚食魚頭個陣，響魚咀入面發現左一隻迷你賴尿蝦 一-一" 即刻咩胃口都冇晒啦．．．

>>June 27, 2004 at 2:55:47 AM GMT+8