2004 年 5 月 26 日 星期三 【酷熱】

終於有時間清理一下雜誌。兩個月來，一本本未看完的雜誌，在袋裡、櫃裡，堆質如山。
最先翻開的是早兩期的 COSMOgirl!，因為它跟《便利》始終不同 -- Fashion 和「八卦」之別。
首先就讀到以下的一篇文章，內容句句到肉，不過，一直存在心中的矛盾，卻還未有解開。

．愛上別人的男友．（Copy from COSMOgirl! Issue 31：Love Feature）

對於很多同性來說，你是個敢作敢為的女生。因為當你知道深愛的他已經有女朋友的時候，
你並沒朕退出，而是義無反顧地選擇了加入這場愛情爭奪戰。這個遊戲，緊張刺激，愈得不
到愈想要。況且，一旦成功了，還會為你帶來前所未有的滿足感。

可是，CG! 要告訴你，在你一鼓作氣要加入戰圈以前，請先衡量自己是否受得了，也要看清
楚他是否值得！

在沒有遇見他之前，你覺得自己就像一個折了翼的單臂天使，無論怎樣努力都無法高飛。可
是他的出現使這一切都改變了，你無可救藥地愛上了他，看上來是一場 Perfect 的戀愛 -- 假
如他的身邊沒有外一個她的話！

然而，你覺得，他給你的愛和給她的不一樣，她就像一碗白飯，雖然每天必不可少，但食之
無味；而你則是精緻的甜點蛋糕，可愛又甜美。即使如此，你還是一個第三者。

認清自己
你為甚麼偏要做第三者？

如果你是因為怕 Commitment，認為揀一個有女友的男生，就可以不必為感情負責，同時也可
以 Date 其他人，那你亦必須要為這種錯綜複雜的關係作好心理準備。

倘若你 Simply 被愛情沖昏了腦袋，試想想剛過去的情人節，你要一個人過，或你只可以擁有
他一個上午那種胸口刺痛的感覺吧。

當第三者的唯一好處是，這段關係大概比一般的感情刺激和多姿多采（偷偷摸摸、害怕被發
現、愛恨交纏），當他能陪你的時候，你可以好 High，也可以好 Down。可是，剩下一個人
的時候，你卻有大量的空閒時間去想：對於你的煩惱你知道多少？他有多關心你的感受？假
期節日他有幾次能和你一起度過？和你拍拖去街的時候，他總有兩三次要走在一邊講電話。
放學、放工後，他會慣性地 Call「她」。不少時候，他會心不在焉。這樣的想法時常纏著你，
讓你寢食不安，晚上也不知哭濕了多少個枕頭。

認清他的愛情態度
另一方面，他又是否值得你去加入這場爭奪戰？

心理學專家把一腳踏兩船的男生分成下面幾類：

第一類是「一拖二專家」，他既不會為了你損毀自己的名譽和形像（因為他不想做衰人），
也不會為了你離開女友（因為他還愛著她）。他固然會給你一段輕鬆快樂的時光，因為他精
通分配時間，甜言蜜語的工夫也了得。但是，這樣的關係最終都不會長久，不久你會因為傷
心過度而「死」！

第二類是「證明自我」型，他們之所以要找一個女朋友之外的女生，不過是想證實自己的魅
力，跟他是不是真的愛你沒關係。

第三類是「狩獵」型，他未必知道自己想要一個怎樣的女友，而又在他確定自己找到最好的
女生之前，他是不會放棄繼續尋覓的。

第四類是「傷心男生」，這種人完全是因為不滿意目前和女朋友的關係才會想到重新尋找另
一份感情。如果這類男生不是那麼怯懦的話，他們是最可能拋卻舊愛和你重新開始的人。

第五類是「猶豫不決」型，他們好像既愛你，也愛她，他甚至可以把他的心和時間一分為
二，但是他永遠害怕作出決定。沒錯，他是一個好人，不想傷害任何一方，但其實，他正
在傷害著兩個人。

第六類是「冷血」型，一方面他會和你發生性關係，另一方面他卻可以對你視若無睹，不動
任何感情，因為他們不想受到任何一個女生的牽絆。

最後一類是討厭的「Playboy」，他們把一拖二（甚至三、四、五、六、七）當作一種刺激的
遊戲，他一旦對你失去興趣，就會馬上抽身而出，不會有任何不捨告眷戀。

要知道他是甚麼類型，你可以從「甚麼促使他背叛女友」開始入手。不要假設自己比他的
女友強，要客觀分析他的為人，畢竟，他是做了背叛女友的壞事！也不要忘記「Once a
cheater，always a cheater」這合話。

保持清醒
真的想要得到他嗎？

如果你決定要和他一起，那麼你一定要小心謹慎地處理，千萬別意氣用事給他下最後通牒
（當一個人必須在很短的時間內作出決定時，他們往往會選擇留在自己熟悉的人身邊），
但也絕不能讓他拖泥帶水。

有些女生會故意幾天不露面，以為他會為他惴惴不安，其實他可能沒有察覺到你的短暫消
失。也不要用懷孕甚至自殺來威脅他，你這樣一鬧，只會讓他更難做。

你要給他一個期限。「我需要你」這句話只能允許他說一次。當然，這還要看他的具體情
況：一個拍拖五年和一個談了三個月戀愛的男生是不能同日而語的。同時，提議分開一段
時間，給大家一個獨立思考的空間。也許在這段時間內，他會發覺不能沒有你，或者你其
實並不是那麼愛他。

準備工夫
你真的準備好接受他的答案嗎？

終於到了他要作出決定的一天，你可能會面對兩個極端的答案。對此，你要有充分的思想準
備。他也許會說：「我決定和她分手了。」這自然是皆大歡喜的結果局。但他也可能會說：
「我還需要一些時間。」這樣的回答最普遍，那麼你也得為自己打算，要不要再跟他糾纏下
去。當然他的回答也可以是最好的選擇，不要讓他完全支配你。

即使他願意和女朋友分手，也不等於問題結束。要知道分手不是一件容易的事，中途亦會
出現變數（女友的難纏程度、他猶豫不決的性格）。這段時間，不會比和她分享他的時候
易捱。

雖然，努力爭取和自己喜歡的一人起並沒有錯，但這個遊戲不是人人玩得起，更不應該為了
一個根本不尊重愛情的男生而痛不欲生。一旦發現他並不值得你一直等下去，就果斷地和他
分手吧。他應該相信，除了他，畢竟這世界上還會有一個全心全意愛你的人，把你視為他生
命中的唯一。

他一直在拖延嗎？

如果他還在用以下的種種方式拖延，那麼，在你被他拖垮以前，趕快離開他：

．對於他之所以無法作決定，總是有一大堆理由 -- 女友還需要我照顧、你比她堅強就忍一
　忍吧、我不想傷害她。
．如果他是個佔有欲極強，或不可靠的人。
．你發現他除了你，還有第三個、第四個女性密友。
．他答應和你在一起，但是幾個月後又回到了她身邊。
．他總是說：「等到．．．（她情緒平伏一點、我安排好自己的事等等）我就會離開她。」

CG! Tips：
不要相信小說的話，以為自己可以 Handle，可以很理智。
事實是，當你讓他進入你的生命，你只會想把他抱得更緊！

>>May 30, 2004 at 3:28:31 PM GMT+8

2004 年 5 月 26 日 星期三 【酷熱】

今日紅假，對我黎講都唔係放假既 >< 仲反而要早 D 起身，十點半就響九龍塘補習！
補完仲要冇街去，即刻返屋企。本來諗住返黎訓下啦！點知又冇訓，臨出門口先黎訓 XD
約左阿武食飯，結果遲大到，仲要趕住走添！真係唔好意思 @@ " 唯有請食飯啦～

「咩呀．．．妳食完咪即刻落黎囉！」「妳去排隊啦！．．．一路會有人加入去架！」

係我自己遲到，都算了；點解跟住又係咁樣？點解次次都係咁樣？下次唔會？！呃人既 ><
我真係想即刻喊出黎。唔係第一次了。但點解我總係要扮若無其事，唔可以發下脾氣？
不斷咁聽佢講野，其實一直響度諗番頭先句說話。但唔駛三個字，我又忘記得一乾二淨。
「丫！講 D 野俾你聽，不過你唔好呷醋架喎！今日響火車站見到個女仔，應該有成六呎高！
（我沒有六呎高～）我諗我未必高得過佢。個女仔哩，長頭髮，眼大大咁，激靚！！！」
呷咩醋丫！我又唔係高，頭髮又唔靚，眼又唔大。我既 Selling Point 從來都唔係「靚」。

「哼！你太可惡喇～ 又又唔信我，又激靚，仲駁咀添．．．我嬲緊你架！你唔好撩我講野。」

今晚場波都幾悶，個場又大啦！又冇人陪我喎 @@ 好彩有部相機，又夠光，影得幾好。
完場又要等佢地圍啦～ 走個陣多左個袋，原來係阿邦既。佢都得架喇！掛住行，袋都唔要。
跟住搭車去到隧道口就自己轉車返屋企 lu... 其實好累，返到黎攤響張床度恰左成個鐘。

27-05-04 00:37「B呀~．其實呢~．我呢~．都係．好鍾意你架喎~"3」就一句，嬲咩都唔記得了。

>>May 30, 2004 at 3:27:14 PM GMT+8

2004 年 5 月 25 日 星期二 【暴雨】

今朝去跑步，陰陰涼涼咁跑，其實都幾舒服，不過大雨 D 仲好，濕得徹底 D ^^"
跑 2x3x20、1x2x40，跟住仲有 3K，不過跑得 1.8K 咋，因為小掩痛到行都行唔到。
全日最開心都係拉筋個陣 ^^" 我都未試過拉筋拉得咁舒服、咁開心架！傻婆～

跑完就同魚魚、阿 Ben 去左滿滿屋，基本上係佢兩個人食，我只係食左兩啖咋！
費事咁辛苦跑完，食得多又肥番晒啦！我越黎越覺得有人嫌我肥．．．囉 ><

去左 New Youth 諗住買襪，點知一對都冇，唔通唔出？唔得架喎！個隻咁好著 @@"

陪埋魚魚去銀行，返到屋企已經好晏。計埋 D 錢又要出去補習，都已經遲到了。
補完返馬鞍山又繼續補。今晚冇食到麥當奴喇 ^^" 怕肥。哈！請個學生食魚食餅 =)

>>May 30, 2004 at 5:00:59 PM GMT+8

2004 年 5 月 24 日 星期一 【酷熱】

今日又 In 左兩份工，一份係 donki 響觀塘既報社工，第二份係上環 In 做 Translator。
donki 都幾搞笑，我都幾想做呢份工，不過唔知人地請唔請我 @@ 等消息吧？
間 Translation 公司岩岩搬黎，亂七八糟既，連開個 Word File 俾我做 Test 都唔得。

不過我又係衰，唔記得帶埋 C-E 既 Translation 俾人做 Reference，以後要記住先得喇！

跟住返學校執 Locker，叫左 Cori 返去俾番本字典我，之前一齊響 Delifrance 食野。
本來諗住去補習，丫點知又唔駛喎！死仔包，早 D 野黎我就返屋企先食野啦！
D 字典又重到乜咁喎 >< 拎到我成隻野咁。返到大學都頂唔順，要搭的士返屋企。

唉．．．都唔知而家做乜，抖極都唔夠咁，又成日都好累，做少少野都冇力冇精神。

>>May 30, 2004 at 4:43:42 PM GMT+8

2004 年 5 月 23 日 星期日 【炎熱】

今日冇咩做，響屋企就係響度數錢，計埋計埋條數，唉！呢個月真係好唔掂。
其實我而家一個月補足習既話，應該可以搵到三千五，但邊補得咁足丫？
睇番 D 單，自從我識得簽卡以黎，數額真係越黎越大喎 @@" 要收儉下至得喇 ><

仲有差三個禮拜多 D 我就生日喇！唔知今年既生日會點過呢？不過係星期五．．．
唔知魚魚會唔會陪我呢？不過陪都係陪日頭，打後實要補習啦！Desmond 又要空手道。
阿 Neth 唔知溜左去美國未呢？艾花又未返到黎喎！小傑會唔會陪我架？唔知呀唉。
不過年年都係咁架啦！唔係考試就公假，都慣左冇人陪。係上年有小傑同 Des。

We will make you wish to die and it will not happen. 呢句野令我覺得自己幾有翻譯 Sense ^^

突然間好想食湯圓．．．好想食九龍城個間唔知乜既 凍白果腐竹 + 芝麻花生湯圓 ！
不過臨急臨忙搵唔到人陪我食，搵到人陪我食都唔夠時間。好想食呀 >< 真係好想食。

今晚去左土瓜灣睇波，自己摸去；好彩我都唔蠢。原來我中學響呢度打過學界架 =)
要做埋 Camera Girl，冇所謂啦！我都鍾意影相。走個陣仲見到好多人黎放狗呀！
見到隻好靚好靚好靚既西伯利亞雪橇犬，跟住仲有金毛尋回犬添！有機會多 D 黎先 XD

搭車返到大圍先轉車。不過下次都係自己搭車返去算了，又唔係冇車直接返到黎。


《愛情已死》　張智霖

能抱下去　還有沒有餘力　辯認誰
能吻下去　還有沒有好心情　能沉睡
就當做紀念　曾漂亮過的諾言
我就坐　你表演

不必告訴我愛情已死　知已當然知彼
無能為力冷戰　可以嬉戲
人在機場　早晚亦要飛
來為你離別致哀下半旗
即使你對我愛情已死　表演一場歡喜
為何情願報憂不報喜
臨別痴呆　可以扮逃避
在一起　來較量　誰入戲

難愛下去　仍要盡你綿力　玩心碎
難笑下去　仍舊要用你真情　流流淚
向上吻向下吻也沒有激情
向後看有沒有悲壯布佈景
無論多麼高興　沉睡到清早總要清醒
別太早清醒

>>May 30, 2004 at 2:12:46 PM GMT+8

2004 年 5 月 22 日 星期六 【炎熱】

一早過左頌安補習，好彩都未致於恰眼訓，跟住返黎屋企繼續。
第一次叫學生上黎我屋企補習。都幾好，起碼慳番 D 車錢同時間。
今晚得我一個，六點就食左飯了。本來約左阮熙飲杯野．．．

訓覺嘖！又唔係叫你昏迷，幾廿個電話都唔聽，訓醒仲要話我好唔叫醒佢！

終於，donki 話會盡快安排 In 我架喇！
今晚，我響 Newsgroup Post 左一張全身相 （冇樣的！）
今晚，我又響 Newsgroup 鬧得好唔愉快。

電話？出門口一個、放工一個、補完習一個（我唔得閒喎～）返到屋企一個。沒了。

>>May 29, 2004 at 2:52:44 AM GMT+8

2004 年 5 月 21 日 星期五 【炎熱】

今日訓左成個鐘晏覺 ^^ 感覺很好～ #18
冇咩做，淨係去左火炭補習，補完就返屋企。

>>May 29, 2004 at 2:46:42 AM GMT+8

2004 年 5 月 20 日 星期四 【酷熱】

補習@樂富；補習@乙明；睇波@太和。
今日有人屈我打佢，我仲要俾佢鬧「人渣」。
今日我又遲左走，要飛的去沙田火車站。

今晚，佢地踢波羅場羅到要報警 @@"
今晚，漫天飛蟻，真係見到都毛管戙，激核突！
今晚，我親自意圖整盲自已，將蚊怕水直噴入眼。
今晚，葵涌份 General Clerk 請我，但我推左。
今晚去左大家樂食飯，Peter 打黎讚我 ^^"

我 Agressive 嗎？我真係出於好意，冇諗過要晒命。

>>May 29, 2004 at 2:43:19 AM GMT+8

2004 年 5 月 19 日 星期三 【乍寒還暖】

嘩！ 尋日晨操完，今日就彷如俾人打左一身咁，周身痛到丫．．．仲要咁早起身 ><
同阿媽一齊「返工」，原來佢公司同我見工個度真係好近。不過早得滯，要搵地方 Hea。
都唔知算唔算 In 得好喇唉！拎封廢信出黎叫我譯，明意思咪得囉！點識個字點解嘖？

不過聽完個 Job Description 已經唔想做囉！我寧願打下字計下數，都唔想同客議價呀 ><

跟住過左美孚新村。個「老細」竟然叫我響麥當奴等，佢做完野落黎接我！你都咪話唔驚。
同寶肥講左一陣電話，就接到阿 Peter 電話教我點樣行去中心，原來都唔係好難去架嘖！
入去要除鞋的 @@" 有晒梳化咁樣。全程講英文都冇問題既，Peter 仲讚我 D 英文得～
不過我發現自己用左好幾次 Actually．．．即刻 Cheap 左，要改喇！但肯定係 In 得好呀 ^^"
係臨尾佢講左幾句叫我咩譯野咁，我唔係好聽得明。問我收開咩 Rate 喎 @@" 我真係唔知添！
仲有就係返工時間好唔正常：有日頭俾我游水跑步囉！但我會完全補唔到習．．．好難搞。

In 完就搭地鐵去鑽石山轉巴士，買左杯珍珠奶茶 ^^ 返屋企換過條裙，坐左陣又出去補習。
期間食左個孖芝，正（不過好肥！）一路行，一路同魚魚傾電話，唔記得左去社區中心 XDDD

>>May 23, 2004 at 6:10:45 PM GMT+8

2004 年 5 月 18 日 星期二 【炎熱】

終於都做運動喇！不過都係早唔到起身，恃住陰陰天，晏 D 都唔會曬，成 10 點先過到去。
又話好多人，結果都係得熊仔同阿 Ben 陪魚魚。我黎到佢地都做晒 Warm up，我要自己 Jog。
佢地跟既 Programme，我唔跟喇～ 跟完會冇命囉！今日跑圈算了。自己跑左 8 個圈 =)

跟住抖左陣，到佢地跑 3K 就跟住跑多 5 個～ 計埋 Warm up 總共跑左 15 個，算係咁啦 ^^"
沖埋涼洗埋頭（個浴室唔係幾得）就去惠康買寶礦力水特！又接到電話，約左聽朝去見工。
本來過去維園食，結果去左魚魚由細食到大個間茶樓飲茶喎 @@" 其實係叫小菜食飯嘖！
食完就各散東西返屋企。響車度都覺得幾累架！但返到屋企又唔眼訓喎～ Hea 左成個下晝。

　自戀狂！再 Post 相就冇人黎睇我日記架喇 XD

不過有一樣野幾乎係可以肯定既：人 Cheap 真係冇藥醫。自己理虧在先都仲夠膽駁人架！
夠膽同我逐樣數、逐樣計丫笨！ 你錯就冇問題，我錯就係錯晒既，做大既大晒既而家？
做大既唔係咁做架！做人唔係咁做架囉～ 同你有咁上下 Cheap 既男人，世間難求呀！
你話冇大袋用，我成個 Nike 袋俾晒你用啦！你冇黑色背囊咩？好地地做乜要用我個個先？！
唔好話你貪新忘舊好牌子？要用既你自己買囉～ 電腦我都自己買啦！你學咩人做大呀？
最威係個袋仲有你 D 野、撻左響你 D 地方，你都仲夠膽回番一句「大家咁話」，面皮真厚。

我買 D 野就俾人用俾人食，你地 D 野我就唔用得唔食得，每次都係多多理由、多多藉口。
一毫子都唔駛俾個個可以大大聲話部電腦係自己既，結果咪我要自己俾錢買一部？嘿～
點知 D 袋又俾人強姦，而家擺支寶礦力響雪櫃都有得鬧架！D 野擺邊度都有人話亂架喎 ><
廿歲女都仲同個男人住埋一間房，我話第時我有能力就搬出去住，又話我唔黐家唔鍾意屋企！
我更憎更憎最憎就係個臭男人成日訓我張床囉！又唔知自己臭，眼訓就躝番上床訓啦！！！
唉．．．City 都係快 D 收我啦～ 快 D 九月，等我可以住 Hall，費事煩。屋企好似擺我唔落咁。

我對自己有信心架！我覺得自己仲未搵到工，同我仲會讀書，又唔識講大話呃人有關。
單以 Interview 既表現，再加埋我咁既材料，我信我要搵全職既話，一定會搵到架 ><

>>May 23, 2004 at 5:41:35 PM GMT+8