2004 年 1 月 27 日 星期二 【乍雨乍晴】

今朝本來要補習，不過中五個姐姐仔 SMS 我話要同屋企人去飲茶喎！好彩我仲響張床度。
嘿！一訓就訓到三點半。習慣晒咁懶，後日都唔知點返學 ^^" 食左碗麵線做「早餐」。
成個晏晝上網。五點半先執野（晏啦又！）六點三先出門口囉～ 練六點半，我六點十先到。

又話 Poly 唔駛練，但阿武有黎喎！好明顯係菜菜懶啦 XD 壁球姐姐又黎左，原來佢叫 Connie。
都有一刻唔開心既，覺得 Connie 姐姐黎，我練乜丫！不過諗諗下，係我自己發揮唔到嘖！
Connie 黎唔黎都冇影響。槍，我又傷；餅，係我自己掟唔到成績嘖！自己冇用，怪咩人嘖？
掟餅．．．唉！我真係唔知問題出響邊，只係覺得自己同一個唔識掟餅既人冇乜分別。
戴太話：「妳 Style 就有，係冇乜力。」咁我一係就食多 D 野，谷大隻 D，一係就做占架嘖！
咦 >< 但我唔想再係咁大份喎！我快 D 乖乖地去做占啦～ 唔為比賽，為自己 Fit D 都好丫 ^^"

雖然阿武成日笑我，又話我蠢，不過佢都好俾心機教我既。咪當係學野囉！我會努力。
因為膊頭真係傷～ 抖完成個假期，以為冇乜事啦！點知 Jog 完圈已經覺得痛。唔掟咁多囉！
今日學交叉步。戴太又話我做乜咁快學。算啦～ 佢都唔明白，亦唔會關心。學得幾好 ^^"
後尾戴太都話我個 Style 幾「靚」=D 不過都係要做 Weight。希望膊頭快 D 好返啦．．．

沖埋個涼就撇，同阿曉 + 撐杆人 + 阿 Wave 一齊搭車。屋企冇飯食喎，搵魚魚陪我食飯 ^^
響「食神」食左個粟米斑腩飯，又暖又飽。等小巴返屋企～ 暖 o^^o 等左好耐車，暖左好耐。
等到成條隊 D 人都放棄晒囉！我以為尾班車都 Full 埋，過去等巴士啦！丫佢又有車到喎～

「丫我覺得好得意架喎！．．．我覺得好得意，點解你會鍾意我囉 "3」因為．所以。

>>January 29, 2004 at 1:30:29 AM GMT+8

2004 年 1 月 26 日 星期一 【乍雨乍晴】

我既補習事業重開喇！今朝補兩個～ 兩個都補到我好眼訓 ^^" 同中五個學生關係幾好。
小五個個呢．．．唉也，考試成績冇進步，佢媽媽同我「傾偈」呀～ 真係衰 ><"
不過我真係覺得唔係好關我事，因為我教就教晒，佢硬係記唔到；唯有諗下計幫佢記啦！

結果決定要佢每次用個堂學既生字作句，希望佢透過運用 D 生字，慢慢記、記熟 D 啦～

原來魚魚又去左踢波 ^^" 都係 D 人叫佢去踢波先叫得醒佢架喎！打俾佢，冇人聽添！
臨返到屋企又接到佢電話，原來仲有一場，咁就返屋企換左衫先啦！今日著裙又戴帽 ^^"
走左架小巴，又 Full 左一架，已經遲出門口架啦！好遲先去到曾大屋，坐響出面睇。

踢完就搭的士落大圍，響大家樂 Share 左個飯。夠鐘就拿拿聲搭火車出去。又走車 ><
去到九龍塘會我女朋友。啊！女朋友真係買左盒蛋卷俾我食呀 o^^o 開心死我喇～ 抵錫！
跟住響太古城同埋八婆仔一齊上去。呵呵～ 有好多野食。Coffee 好叻呀！識頂波架～
晚餐好多野食，契爹又唔知做乜咁搞笑，笑死我地 XD 九點幾 Alva 到，食飽就圍埋傾偈。
講番好多以前既野。以前 D 野（尤其係中六！）我真係唔記得幾多，反而大家都好記得喎！
其實響恆商個陣真係幾開心。而家？都係做左年半同學，但我連 D 同學叫咩名都未知。

不知不覺就傾到十二點幾，搭鐵去旺角轉亡命返屋企。原來今晚有人去打邊爐唔叫我 ><

>>January 28, 2004 at 6:00:35 PM GMT+8

2004 年 1 月 25 日 星期日 【颳風】

Yeah！有馬跑～ 呀唔係，係有波睇 ^^" 今朝響跑馬地有波睇。八點半就要起身喇 ><
由八點半叫到九點，係有人自己話起身喇～ 唔駛再叫；結果我 9:55 打俾佢，佢先彈起身。
可惡起黎喎！要我響火車站坐。跟住就火車地鐵往銅鑼灣 ^^ 呵呵！有阿誠幫我買早餐～

轉左新 Look，魚魚個大隻朋友唔認得我呀 ^^" 阿誠又口痕喇～ 不過講 D 野又幾岩聽 XD

睇完波話去春茗，不過太多人，結果去左紅螞蟻。格調係高 D 既，不過唔係特別好食囉！
頂唔住大隻同阿 Ken 既臭煙攻勢，個鼻鼻辛苦過乜。食飽就同魚魚撘車返屋企 o^^o

返到黎又唔訓得覺喎，要等寶肥 send 相過黎俾我睇，然後陪佢出去買燈。丫點知睇唔到～
到我換埋衫諗住入房訓下覺，佢又打黎叫我出去，真激死 ^^" 拿拿聲換番衫出沙田。
大眾唔見有就食野野先。果然係「新春期間，坐地起價」呀下！不過算啦，一餐半餐。
食飯都要勁講電話，約聽日去阿媽度拜年。本來有六七個，搞搞下得番三個半．．．

去完西田再去埋宜家（哎！行親宜家都好想快 D 有個自己既屋企 >< ）總算買到勒！
返到屋企 Hea 下 Hea 下又同阿男人玩 SMS．．．啊～ 原來男人拍拖了！真係恭喜晒 ^^"

「就黎出三國誌十喇~」「嘩！出左你唔駛訓架喇 一~一"」「點會呢~? 你會要我訓架嘛~ "3」

>>January 28, 2004 at 1:18:32 PM GMT+8

2004 年 1 月 24 日 星期六 【乍雨乍晴】

今日大年初三，赤口，唔駛拜年，不過都係一早俾人嘈醒左：姑姐入黎陪我去拜太歲喎！
唉！話晒都赤口，真係逃不過嗌交既劫數 >< 尋晚又話唔駛我去，今朝又嘈醒我？！
仲話係我自己話要去？係有人尋晚同我講話可以代我去，今日又自把自為叫姑姐入黎之嘛！

終於都係起身洗左個頭、食左 D 野就換衫出去。去左荃灣間太歲殿。好多人呀！好煙。
原來有成六十位太歲咁多架！中間就有一位元君。原來我個年份既豬太歲係第六十位喎 ^^"
爺爺個位響我個個隔離，阿哥就再隔離。哈哈！原來我地兩兄妹係「傍」住爺爺架～
逐位太歲拜晒之後，化埋個寶就走得。排隊撘小巴落南豐，跟住行左一陣街，買左頂冷帽。
跟住去麥巍同姑姐分左九件魚柳 ^^ 再陪姑姐去買送，又陪姑姐撘地鐵，響鑽石山轉車。

魚魚今朝（其實已經係晏晝 XD 係我岩岩出門口既時間。）打黎話可以同我睇戲喎～
又話六點幾走打俾我，結果我係等到心灰意冷咁決定返屋企。丫，點知佢又打得切黎喎！
當時我已經排緊隊等巴士。上到 GH 已經冇乜飛，呵！買左個心心位。跟住行住街等。
到魚魚黎到，就陪佢響麥當奴食左個包。噢！食左好大啖士多啤梨新地 D 糖漿 ^^"
跟住就去睇戲啦！睇最後冇事．．．《最後武士》呀！哈哈～ 我都估唔到自己會睇呢套。
又估唔到套戲幾好睇。可能係我冇乜期望啦 ^^" 同埋心心位係真係好坐 D！Heehee o^^o

本來話去影相喎（好耐冇做過呢樣野喇！）不過閂左門，下次啦唯有～ 撘巴士返屋企 lu...

>>January 27, 2004 at 4:54:46 PM GMT+8

2004 年 1 月 23 日 星期五 【乍雨乍晴】

每年年初二，照例去林村拜神。其實年年我都係出去食早餐 ^^" 今年先至真係去拜。
今年好乖，入晒咁多個殿，好誠心咁鞠足咁多個躬。跟住先去食左個肉丁通粉。
食完同表姐行左陣，睇中左個成五十蚊既掛飾，不過睇勻晒都係呢個靚，最後 $45 成交。

好乖架我呢 D 女 ^^ 買左個掛飾就帶佢入廟拜勻咁多個神明，希望佢地保祐爹爹出入平安。

去埋寶福山拜舅父就返屋企。食左個開年飯，都係睇下電視又上下網咁。出去打牌？
係阿爹阿娘出去打牌，阿哥出去打機。我出去都冇野做架啦！所以索性留響屋企。
無無聊聊撈電影台，一邊又上網打下牌咁，都幾悶。打到中晒眼訓囉．．．又唔想訓喎～
結果成六點先起行去葵芳 ^^" 又唔識路上姨媽度。上到去都係坐住睇電視、等食野。

食完野睇埋煙花，又入左表哥房上網，跟住就睇阿公同阿姨打牌。噢～ 咁就一晚咯！

>>January 27, 2004 at 4:39:28 PM GMT+8

2004 年 1 月 22 日 星期四 【乍雨乍晴】

今日係大年初一！恭喜發財 ^^ 祝大家新一年順順利利、開開心心，最緊要係身體健康。
每年年初一既節目就係上爺爺屋企團拜。好似上年年初一咁，又有得同阿爺打牌 ^^"

仲記得上年食左舖十三么（阿爺打一筒出充！）今年都做過一舖，不過俾人碰斷左隻南。
今年係不停出充俾阿媽，但後來居上：食左一舖清一色，又有自摸小三元！哈哈．．．
到爺爺煮飯，姑媽就教我打台灣牌，仲要係姑媽一家教我 @@" 夾攻呀 >< 輸死我啦！
不過呢個遊戲真係好刺激，但就略嫌激得滯，我唔係好頂得順囉！都係廣東牌好玩 D ^^"

食完飯繼續，結果輸四十幾，不過姑媽就唔駛我俾 ^^" 如果唔係就真係交學費架喇～

>>January 26, 2004 at 2:21:36 AM GMT+8

2004 年 1 月 21 日 星期三 【乍雨乍晴】

今朝補習，又唔知醒，遲左半個鐘，補少半個鐘。不過今日有錢收 ^^ 唔好責過年喎！
補完習就同寶肥出旺角。發生左件不思議事件！話說我響大學站趕住上火車．．．
可能係行得快，個褸袋又淺，我個手提電話響不知不覺間跣左出黎，而我係完全唔知囉 ＠O＠

幸好有個有心人追住我嗌：「小姐、小姐！你跌左。」嘩！真係感動到難以形容 ><
上左車我就越諗越肉緊～ 好彩有人執番俾我咋！如果唔係，又唔見電話真係唔知點算喇 ^^"

響女人街食左個焗飯，跟住行旺中。搵唔番上次買褲個間舖頭添！又會咁快執左既？！
響旺中地下間舖見到我錶，一問之下，平左成百銀！即刻心動，但又唔知咁衝動好唔好喎～
過左對面買蛋芯；買完返轉頭望多兩眼，最後都係忍唔住．買啦！好靚呀真係 ^^ Yeah！
跟住響太子個邊買左條褲。冇乜幾可一試就岩 Size，可能係有緣啦～ 又係即刻買。
條褲要改，咁就去左 IKEA 陪寶肥睇燈，但佢屋企乜都裝唔到 O_o" 拎埋條褲就極速返屋企。

因為要趕食團年飯，唯有響大學打的返屋企啦 一.一 哎也也．．．洗左好多錢丫今日。
寶肥上黎拎左件粉藍色褸走。唔，總好過擺響屋企吽臭既～ 跟住食飯、上網咁。

呵！今晚去行花市。撘 286M 去油塘會阿 neth。估唔到響巴士撞到斌仔喎！幾年冇見喇～
難得佢又認得我，我都係諗左一輪先醒起佢係邊個。傾足一程車啦！講下呢幾年點。
原來今晚得我同阿 neth 兩個「拍拖」XD 響天后出左閘，跟傻仔 neth 響維園外圍打左個轉。
搵野食囉！行到老遠先食上海野。個雲吞都幾好味。跟住返維園先發現之前兜左個大圈。

開頭都唔係好多人既，十點幾開始就逼人喇！逼都唔係問題，最慘係我著白鞋俾人踩。
嗚．．．我早幾日先洗完咋 >< 今年都係冇乜撞到熟人，就係咁岩見到 E.T. 同 Billy。
幾經辛苦，終於行晒咁多條 Line；尾個兩行兩邊都賣得意野，兩行都有一邊完全睇唔到。
不知不覺原來已經十二點。大家「係咁以」倒數完，我就岩岩成功闖到雪豆人既陣地。
之前已經睇中左 ^^" 諗住行晒先買，結果逼餐死。不過買到都好滿足～ 多謝阿 neth。

走個陣又唔知行邊邊好啦！信阿 neth 點路都幾得人驚。不過最後總算去到叮叮站啦 ^^"
話咁快就講左我猴年第一個大話。阿 neth 響度扮小販叫賣，好搞笑 XD 撘叮叮去銅鑼灣。
打俾女朋友啦！唉～ 又話怕逼，唔行花市，原來自己同唔知邊個響花墟個邊排隊囉！
不過算啦！佢都冇好結果：全香港加埋 D 自由行都快七十萬人，咁都俾佢撞到 XDDDDD

接到魚魚電話，原來佢過緊海，就係去行年宵。哎也！又係咁樣，緣慳一面起黎。
同阿 neth 去食糖水。跟住周圍搵洗手間 ^^" 臨走打俾魚魚，唔，我戾戚自己走架喇！
搵巴士撘啦！丫，見到有架 681，截都截唔切，原來係反方向往中環架 ^^" 豬左。
跟住望下對面，有車呀！拿拿聲追 >< 新正頭就要追巴士 XD 半個鐘就返到屋企喇 ^^

響呢度祝大家：

>>January 26, 2004 at 1:44:53 AM GMT+8

2004 年 1 月 20 日 星期二 【乍雨乍晴】

今日返九點半又遲到喇！但原來我都唔係好差，因為起碼 16 個人既班，返得 8 個人囉！
Interp 終於有機會譯。落左堂就即刻飛左出旺角買鞋過年。響火車站撞到肥 Des 伉儷。
又睇中另一對牛仔布，不過寶肥話佢都鍾意，咁我都費事試了。買左之前睇中個對啡色 =)

今日要返恆商拎信。撘小巴過去個陣又遇到消防車，消防員又見到我，但我 V 唔切呀 ><

拎完信就返去上 Duncan。果然唔係想像中咁好玩呀下！不過我都有心理準備架喇～
感覺上真係比 Legal 更加岩我讀；但睇帶個陣都頂唔順恰眼訓 ^^" 點都好啦！要俾心機。
落左堂出去真係落雨，諗住唔駛練啦！但又要食飯喎～ 咁點好呢？同小瑩 + 壁球姐姐打的。
激死！我問去邊度食啦，又叫我過左去先，過到去大家響度圍威喂，結果？「去城軒！」
餐飯又勁冇癮啦！我不過係跟左 X-Country 個堆人行，結果要同佢地坐，但就完全冇話題。
本來以為小庭會陪我啦！但又有人留左位俾佢，變左我一個人響 X-Country 個邊戇居居。
唉！阿曉猛叫我坐過去喎，但都冇位，坐乜鬼嘖？好彩後尾小庭過黎陪我，咁先冇咁慘咋！
到 Vincent 黎左，我附近先多番少少聲氣。佢夾左舊西芹俾我囉．．．食到苦瓜咁既樣 ><
食飽大隊話去花墟，都唔係十分想去，不過跟大隊啦！原來阿曉都唔係咁想去，咁唔去 lu...

呵！大進步呀～ 首先有擰轉面同我野啦；其次係發現左條 Scarf！真係好開心架喎 o^^o
「丫！妹丫！唔能夠咁貪心架．．．下一年佢就係妳架啦．．．放心啦！」承你貴言呀哥～

>>January 23, 2004 at 2:06:52 PM GMT+8

2004 年 1 月 19 日 星期一 【晴】

又係返學既日子。上九點半堂真係好辛苦。今日上堂都冇咩好講，冇訓覺已經好叻。
為左煩修咩科，一個鐘頭既 Lunch Break 都要走黎走去，又要搵 Alan 同 Duncan 問意見。
呵！跟住竟然係同 Suki 同 Alan 食飯，仲係 Alan 請 ^^" 不過越黎越覺得 Alan 有 D 怪怪．．．

上阿 Jim 個陣，小濤坐左響我附近，成日響度搞搞震。上晒堂又去乙明村補習咁。
返屋企就煩 Reg 科喇！全日問左幾十個人都有，真係好難取捨。最後都係揀左 Duncan。



>>January 23, 2004 at 12:49:23 PM GMT+8

2004 年 1 月 18 日 星期日 【乍雨乍晴】

食左 D 野，意圖試下個 Printer，結果 Prnit 左 City University of Hong Kong 一行字就停左 一.一
今日去摩士睇波。我又發揮「貴人出門招風雨」既神奇力量喇！一出門口就開始有雨粉。
咁都未算緊要！出到摩士先至真真正正係我實力既表現～ 滂沱大雨起黎，仲要一落就唔停。

我去左一個亭避雨，魚魚都傻既！咁凍，又淋到濕晒都仲要踢 >< 我就罰企咁企足個幾鐘。
好不容易先等到佢地踢完，但雨就一路都冇細，我都係冒住雨行番去室內運動場個邊。
驚喜囉！Bernard 既長途電話：「．．．堆滿晒女 Fan 睇你啦～ 燕瘦環肥都有啦！」
「唉！個 D 假架嘖～ 妳呢 D 正室要收埋架嘛！」我記住你講過句咁既說話呀 ^^ 呵呵～

跟住去左麥記。樂富間麥記換左新 Look，黃襯黑。哈哈！魚魚買左我話想食既麥樂魚柳 =P
食飽就撘 7M 上竹園，今晚團年。冇野做，訓左個零鐘晏覺，跟住都係自顧自打 PDA。
食完飯就睇電視、返屋企。返到屋企都仲要睇波喎！利物浦又輸波，不過我真係冇乜感覺。

梗係凍，又淋左雨啦！又話有 D 病咯～ 唔可以病架喎 >< 要訓番多 D 覺，快 D 好返。

+ua)U!^：我係唔知道你抽筋既經過丫！係個晚有人講番我先知囉～ 我又矮呢！
　　　　 你有事，成村人響門口排晒隊等住慰問你，我根本連邊個有事都睇唔到。

>>January 23, 2004 at 12:42:16 PM GMT+8