2009 年 1 月 29 日 星期四 【微冷】

米芝蓮 Michelin

佢o地班友仔真係衰到震，幫Elaine改佐個咁o既花名…

>>February 23, 2009 at 2:19:24 AM GMT+8

2009 年 1 月 28 日 星期三 【颳風】

"Chi Kou" 赤口

「赤口」先o黎拜年？係呀，因為返佐初一、二，今日先至放假呀… >_<

>>January 31, 2009 at 2:35:11 AM GMT+8

2009 年 1 月 27 日 星期二 【乍雨乍晴】

"Hoi Nin" 開年

過新年最開心o既事莫過於同一班同事仔打牌過日神！

所謂「創業容易守業難」，可以話係今日打牌時領悟o既重點。點解咁講呢？因為今日打牌真係幾好彩，唔駛搞到北圈先至開到糊，頭兩圈都已經贏佐幾百蚊，但係打牌呢o的o野真係一日唔到最後都唔知鹿死誰手，而且我又有個「贏佐錢就放軟手腳打」o既傾向，結果打完八圈都只係執到一百蚊左右…陰公…

又所謂「薑係越老o既越辣」，德哥又再次成為最終o既大贏家，點解好似年年都係佢贏最多o既呢？！！主場之利？！

又正所謂「新o黎新豬肉」，新同事呀輝畀呀李拉佐上o黎打牌，由始至終都係「陪打」同幫手「砌牌」，睇住佢係咁拎o的一百蚊紙出o黎輸，我估頭頭尾尾夾埋分分鐘輸佐八舊水都有，再加埋佢未過試用期今個月四日勞工假都係冇薪o既，可以話係大慘事，真係賭搏害人，影響一生呀…

>>January 31, 2009 at 12:43:26 AM GMT+8

2009 年 1 月 26 日 星期一 【乍雨乍晴】

Mystery 謎

近日，同「新鴻基地產」冇關o既「新鴻基金融」同意全數買返三百幾個投資者o既迷債，總值八千五百萬。雖然間公司冇兜口兜面咁出o黎認錯，但係證監會都話要公開譴責，多多少少係有o的誤導成份，先會咁順攤「退錢」。

早排，任志剛又出o黎同大眾市民講，2009年o既金融海嘯第二波比舊年九月o個o野仲勁，但係因乜事咁勁佢又講o的唔講o的，一味靠估，免得估唔中畀人「柴台」。

今晚我就o係度諗，究竟係咩原因搞個第二波出o黎呢？係同匯豐或者其他銀行公佈業績後，銀行股頂唔住拖低個市？定係政府受唔住市民o既口誅筆伐，迫銀行食返晒o的迷債而搞串個party？匯豐會跌低過五十蚊？歐羅九個半、甚至九蚊有望？！

嗯…謎…

>>January 28, 2009 at 1:22:50 AM GMT+8

2009 年 1 月 25 日 星期日 【乍雨乍晴】

Noise 噪音

唔知點解身邊四圍都係噪音，嘈到我心都煩。

每曰二十四小時電話隨時響起，有時仲要係一連串o既奪命追魂call，超級煩。不如轉做震機罷啦，唔駛嘈住晒。但係我o既工作有機會要on-call，所以又唔可以唔知電話響有人搵我…但係我都有選擇聽電話o既時候罷…

放假o既日子，日頭真係好嘈，媽媽用類似唱山歌o既聲浪去講o野，有時又鬧o下人咁。我唔係怪佢嘈醒我，反正我都好容易訓返。但係成日都咁大聲嗌，多多少少對聲帶都唔好。

平日o既夜晚，佢o地睇電視又會好嘈，電視劇我只係間中先會撈一撈，或者食飯先會睇。多年前住宿舍已經習慣佐冇電視o既生活，卻不能冇電腦！匿埋o係房裡面上網，上到悶都係訓。唯有訓著佐先聽唔到電視嘈。

有時深夜醒佐，本應係清靜無比o既時間，隔o黎屋冇公德心o既住戶兩隻狗又吠過不停，有幾次真係想報警，但係明知冇用結果都係算數。

駕住架車四圍去，少不免都會去到o的繁忙路段，好多無品o既司機好鐘意o係你後面係咁「推」你行，又響按又閃燈咁，嘈到死煩到死，一於少理。一般路面行五十，你想我行幾快？有本事就過我頭，又或者咁叻駕到一百衝過o的白鴿籠啦，我一定會讚你叻。

所以我鐘意行小路，一個人駕車，唔駛開收音機、音樂，享受得自己一個o既時間。唔駛特別思考o的乜人生哲理（或者可以話o係路面不宜思考除佐路面以外o既o野），聽風擦過車身o既聲，聽車o既引擎聲，睇住其他趕時間o既人駕車超越你…

一個只屬於我和自己的空間。

>>January 25, 2009 at 4:11:11 PM GMT+8

2009 年 1 月 24 日 星期六 【乍雨乍晴】

Cleansing 洗邋遢

停車場o個幢樓o既大維修好似沒完沒了咁，舊年年尾睇佢過年前都一定起唔到貨，o個條村o既居民真係辛苦，過年o的親戚o黎拜年出出入入都唔會好舒服，不過受害o既唔止係居民，仲有o的車泊o係o個度o既車主…

早排佢o地大拆牆身紙皮石，搞到四周圍都污煙瘴氣，o的工人日日都運一桶桶o既泥頭落個垃圾斗度，而泊o係停車場o既車，包括我o既Move仔，亦都唔需要泊低半晝，就成架車都舖滿晒塵，搞到我都冇乜心機洗車，一於等佢做污糟貓，因為洗完都係o徙心機、o徙力、o徙時間、o徙錢。


年尾溜溜，兼連放三日假，咁o岩琴日又係年廿八，都係時候同架車洗o下邋遢，就趁住凌晨冇乜人去佐油站洗白白，不過冇時間同佢打蠟。

今日下晝入到大埔，您又話做緊清潔，唔可以上去您屋企住，見仲有o的太陽，就索性o係您樓下幫架車打返個蠟先，不過仲要駕車返屋企，所以冇搞擋風玻璃同side鏡，食完飯返到停車場再善後，成架車靚仔晒，滑雪雪…呵呵！

等呀仔o係度同大家拜個早年先啦！祝大家心想事成！


>>January 31, 2009 at 12:39:44 AM GMT+8

2009 年 1 月 23 日 星期五 【微冷】

Go to Work 上班

「…由於五名工人上班途中遇車禍死亡，不能算作工傷。職工盟立法會議員李卓仁認為，政府應把員工上、下班時間列為勞工保險受保障範圍，同時規定僱主為到僻遠地區工作的員工提供接駁交通工具…」

o下？係o既咩？唔算o架咩？！原來真係唔包。

關於呢單o野，睇佐好多新聞報導，原來平時搭車、行路返工時出事，係唔會受到勞保保障，其他情況例如八號風球、黑雨，又或者坐公司提供o既交通工具，就會包括o係勞保o既範圍。

呢單o野又睇到呀曾特首去現場視察，中途有家屬情緒激動，仲要跪埋特首，跟住就係咁畀人鬧。我腦海中即時浮現出四川地震溫家寶落區視察o既感人片段。雖則唔知呢段o野係咪特登做出o黎收賣人心，但係個效果就比特首好九百幾倍。

特首呀特首，你真係要好好檢討o下先得喇。

>>January 25, 2009 at 2:41:45 AM GMT+8

2009 年 1 月 22 日 星期四 【微冷】

Incurable in Property Management (2): Dogs 物業管理三大死症之二︰狗

>>February 23, 2009 at 2:19:42 AM GMT+8

2009 年 1 月 21 日 星期三 【炎熱】

黑人新文化運動說標準英語
《蘋果日報》2009年1月21日

美國黑人和白人英語大不同，黑人多說埃伯尼語（Ebonics），但被視為黑人總統的奧巴馬卻極少說埃伯尼語。他在激動人心的演說中，字正腔圓說美式英語，最終成功選上總統。憑著超人氣的氣勢，奧巴馬可在黑人中掀起「新文化運動」，將有更多黑人下一代改說標準美式英語，更有人擔心這代表「埃伯尼語之死」。

下一代改說美式英語
埃伯尼語源於西非，現在成為美國黑人的方言。埃伯尼語主要特徵包括動詞to be不變位，例如說「I be joking」，詞尾輔音脫落，例如將「hand」讀作「han」，又經常「you knows」，雖然不合文法，但不少人視埃伯尼語為美國黑人獨特身份象徵。

奧巴馬除了在華府著名快餐店「老班辣味碗」一句埃伯尼語「Naw, we straight」，意指自己同他陪食的華府市長是「好兄弟」，他幾乎沒有在公開場合說埃伯尼語。財經網站King George指出，奧巴馬強而有力、感染力強的演說，令不少黑人下一代大為嚮往，他們可能會摒棄黑人方語，這代表「埃伯尼語之死」。因為美國黑人意識到想獲取成功，必須要說標準美國英語，因為標準美國英語是一種權力語言，一種金融語言，是通向成功的敲門磚。

----------------------------------------------------------------------------------------------------------------------------

您都有份讚Obama o的英文講得好正喎！不過我到呢一刻都未聽過佢o既任何演說。

>>January 22, 2009 at 1:34:37 AM GMT+8

2009 年 1 月 20 日 星期二 【炎熱】

Red Cliff 2 《赤壁︰決戰天下》

果然係冇乜特別。



>>February 16, 2009 at 2:47:17 AM GMT+8