2009 年 2 月 28 日 星期六 【微冷】

Pseudo-Birthday 假生日

祝我最愛o既小貓生日快樂，另外祝同小貓同年同月同日出世o既Tim Tim都生日快樂！


>>March 6, 2009 at 1:06:13 AM GMT+8

2009 年 2 月 27 日 星期五 【微冷】

Budget (3) 預算案（三）

孔子適齊，過泰山，有婦人哭於墓，使子路問之。答曰：昔吾舅死于虎，吾夫又死也，今吾子又死也。子路曰：何不去乎？婦曰：無苛政。子路以告。孔子曰：小子識之，苛政猛於虎也。 《禮記．檀弓》

>>March 1, 2009 at 11:13:46 PM GMT+8

2009 年 2 月 26 日 星期四 【炎熱】

Budget (2): Bullshiting 預算案（二）︰廢話

預算案演辭︰推動美酒美食旅遊

56. 去年，我宣布免收葡萄酒稅後，市場反應良好，而葡萄酒貿易、集散及其他有關業務都有明顯增長。截至去年十二月的十個月內，輸入本港的葡萄酒總值達到26億元，與二○○七年同期比較，增加了百分之八十二。順着這良好的發展，加上米芝蓮港澳指南的出版，我們會透過旅發局於今年十月與著名釀酒區合作，推出香港國際佳餚美食節，加強宣傳香港為亞洲美酒美食中心，吸引更多旅客訪港，刺激消費。我們與多個產酒貿易伙伴已簽訂合作協議，內容涵蓋投資推廣、展銷及人才培訓等，以強化香港作為區內葡萄酒集散和貿易中心的地位。我們積極鼓勵有意進軍亞洲市場的酒商參加在本地舉行的酒展，並在香港建立業務。

http://www.budget.gov.hk/2009/chi/budget22.html
----------------------------------------------------------------------------------------------------------------------------

係囉，減多o的酒稅啦，等o的人飲多o的，飲完再駕車出街啦，撞死更加多人啦！

----------------------------------------------------------------------------------------------------------------------------
老爸生日快樂！

>>March 1, 2009 at 11:14:00 PM GMT+8

2009 年 2 月 25 日 星期三 【炎熱】

Budget (1): Tyrannicide 預算案（一）︰苛政

預算案演辭︰醫療衛生

108. 另外，為了公眾健康，我建議即時把煙草稅稅率調高百分之五十。香煙的稅款會由每支約八角調整至約1元2角。我們亦會繼續加強推動戒煙及控煙的宣傳及執法工作。

http://www.budget.gov.hk/2009/chi/budget48.html

----------------------------------------------------------------------------------------------------------------------------

小那星！係咪玩o野呀？一包煙加八蚊？！

----------------------------------------------------------------------------------------------------------------------------

老妹生日快樂！

>>March 1, 2009 at 11:14:34 PM GMT+8

2009 年 2 月 24 日 星期二 【炎熱】

Simple 簡約

今日收工又收晏佐，開車時已經係八點正，天氣潮濕加上空氣質素差，架車超污糟，但係短期內都唔適合洗車，以免浪費體力。

落到灣仔電腦城接佐幫client買o野o既您，本想直返大埔，依舊食平時o係大埔食開o既o野。不過您見o的腸胃好返o的，就想食其他o野，結果就揀佐銅鑼灣o既「意大利的蕃茄」。

我o地未開始拍拖之前，曾經o係九龍灣店聚過一次，談天說地。今日好明顯大家心情都唔錯，雖然只有簡單同偏味濃o既食物，而且間o野亦冇乜特別有情調o既裝修，但係氣氛同感覺極之良好。

o係冇電視機o既情況下講講今日o既瑣事，爭論o既話題中卻隔濾了平日常有o既火葯味，您個傻瓜面帶寛容傻傻地笑，此情此刻令人忘懷。難得您又會認同我o既「o的o野放o係度唔用就自然會壞」o既歪理，更即時報以「o的鞋如果唔著就會發霉」o既例子。我就真係唔知好嬲定好笑，諗o下您放o係我度o的手袋就係最好o既反面教材啦。

>>February 25, 2009 at 2:57:02 AM GMT+8

2009 年 2 月 23 日 星期一 【炎熱】

Uniformity 單調

美心果然係一間大公司，咁快就有template reply仲要有reference number，真係唔佩服都唔得。老細經常都掛o係口邊，話佢當年o係美心做同KS合作，覺得KS係一間好有制度o既公司，點知入去做之後…

今朝一返到公司坐低左額就爆頭痛，閃o下閃o下咁陣痛，可能係琴晚訓訓o下畀人嘈醒o既關係。

我每日返工都做住差唔多o既事，勁有規律︰同一眾同事講早晨，返埋自己位（因為我通常都唔係第一個返，所以開燈開冷氣冇我份），開寫字樓server再開自己部腦，同時睇行動組拎上o黎o既文件加簽名同日期印（等部電腦load），開公司email同delete junk mails，再處理一o的急o既文件（如有），換衫，打電話畀小貓。做晒呢堆o野通常係十點左右，當然間唔中有出入。

跟住就去開個大，再落返counter睇大簿（或加巡視業務），開始入戲肉做文件o野…

結論︰日日都係咁，悶到抽。

----------------------------------------------------------------------------------------------------------------------------

from: Public Relations
to: Dominic Lei
subject :RE: 讚揚員工服務質素

檔號：SPR/CBD-02-000106
電話：(852) 2101 1300
傳真：(852) 2216 7883

敬啟者︰

感謝　閣下之電郵來函，稱許美心西餅（新翠商場分店）員工及製餅師傅之服務用心及優質出品，敝司謹此致謝，並已轉達致相關部門。

敝司一向以客為尊，得到人客嘉許，感到非常高興，日後定當盡力為人客提供更優質之服務及食品。

謹此多謝　閣下對美心西餅的支持。敬祝

台安

美心食品有限公司
公關部

>>March 18, 2009 at 7:11:15 AM GMT+8

2009 年 2 月 22 日 星期日 【微冷】

Compromise 協調

嘩…呢個十三妹十二點幾連續打佐兩次電話o黎，我已經訓佐覺唔想聽電話o架啦，不過最終都係難逃一劫…

一點幾接完小貓o既電話之後，呢個十三妹又再次打o黎，唔多對路喎，佢知我唔鐘意好少連打幾次畀我喎，一定係有事發生，結果我都係唔忍心聽佐。

原來佢又同男友鬧佐交，原因係佢份工壓力大，搞到佢個人心理不平衡，佢男友強迫佢辭工。不過佢間衰公司又預計會o係下個月出花紅，面對手停口停同病情惡化o既兩難局面，令到佢好苦惱。

其實兩個人有乜係「com」唔掂o架，不過為佐十三妹好，同埋避免夜長夢多，我都係快手o的幫佢搞埋份resume先喇，話晒都拖佐佢成半年啦… @_@

我發覺有個現象，就係即使有鼻敏感打住乞嚏咁訓，只要訓著佐，通常都好少機會會訓訓o下流鼻涕打乞嚏而中途醒；但係被嘈醒之後，就已經多次因為鼻敏感停唔到而狂打乞嚏以致訓唔返…唉…無奈。

----------------------------------------------------------------------------------------------------------------------------

Zoe生日快樂~

>>February 23, 2009 at 3:02:04 AM GMT+8

2009 年 2 月 21 日 星期六 【微冷】

Sales Addiction 特價狂

婆婆並唔係一般o既「購物狂」，而係專門掃走特價貨品o既「特價狂」，情況嚴重…

作死您咩，搞乜日日都好似有新o野買返屋企o架…第日間屋真係冇幾千尺都放唔晒您o的o野喇！ @_@

購物都係女人天性之一，加上買o既都係特價貨，原則上我係支持o既，不過屋企地方細細冇位擺就係個大問題啦…我寧願買o的細細件又值錢o既o野喇，例如買金飾等等…

話時話，當年我o係中大讀書做o野o個時，都真係個個月一出糧就買件大禮物畀自己o架喎，o個時心理質素低同埋有感壓力超大，購物以平衡苦困o既心情都有o的治療作用o既…不過長遠o黎講先知道自己「奶」晒o野…如果當年唔係咁揮霍，可能而家已經買佐樓都未定…

唉…係命運。

>>February 22, 2009 at 2:26:43 AM GMT+8

2009 年 2 月 20 日 星期五 【微冷】

Appreciation 讚

成日畀人話我識彈唔識讚，作為一個美心o既忠實fans，一於寫返個email去讚o下佢o地啦，今次佢o地都幾醒，最鐘意o的人有用過個腦o黎做o野。



----------------------------------------------------------------------------------------------------------------------------

from: Dominic Lei
to: [email protected]
subject: 讚揚員工服務質素

敬啟者︰

本人曾於2009年2月14日下午在　貴司新翠商場分店訂購了一個「栗香旋風」蛋糕及加購一個星座牌於蛋糕面上，但訂購時間傖倅，本人未有察覺原來星座牌上已印有「Happy Birthday」的字樣，在填寫訂購表格時仍然寫了「Happy Birthday To Zoe」，卻要在取蛋榚當日（2月18日星期三）才發現上述事宜，因而擔心萬分。

不過還是　貴公司的製餅師傅比較細心及體貼，只在星座牌上寫了「To Zoe」的字樣，避免了「Happy Birthday Happy Birthday To Zoe」的尷尬情況出現，真是萬分感謝，而本人與朋友亦享受了快樂的時光。

貴公司製作的蛋糕美味可口，加上熱情好客的售貨員，以及細心體貼的製餅師傅，實在值得讚揚嘉許！謹祝　貴公司生意蒸蒸日上，在金融海嘯下能夠重用這班優良的員工，創造出更好的業績！

此致
美心集團公關部

Dominic Lei謹啟

>>February 23, 2009 at 9:47:59 PM GMT+8

2009 年 2 月 19 日 星期四 【微冷】

病假 Sick Leave

小貓病倒了！擔心！擔心！

您個肚痛腸胃失調好佐一輪，今朝又再返發搞到返唔到工，好慘。

究竟您呢個係咩病o黎o既呢？係咪大部分都市人都有o既焦慮症？其實我個人認為都係心理因素居多，可惜心病還需心葯醫…

要您好似學到我咁成日遊戲人間咁o既生活態度，根本都冇可能。或者做物管真係揀o岩條路，一來唔駛為有冇工做而煩惱，二來雖然您見我一日返咁多個鐘頭工又無償OT，但係我收佐工就好少諗o的公事，好似洗佐腦咁。突然記起可以做o既就即做（如send email），唔可以做o既亦都唔會出力記住第二日要做，頂盡send隻email畀自己提自己返工時要做，件事亦隨住email o既send出而o係我腦海中消失。

您話我返工時變佐做第二個人，我都認o既，因為o係公司就只係想盡快完成o的tasks，希望搾得出時間蛇o下或準時收工。有時行行o下街您又見我突然拎部相機出o黎影呢影路，為開會o既料作出準備，其實都係想順過靚便。因為踏出佐公司門口後，就極之唔想特登為佐準備o的開會o既材料而四圍騰、四圍刮，呢種感覺好嘔心、好鬼煩。

您以為我係個工作狂，放假都冇抽離工作，仲要得閒就死返公司做o野，只係因為太得閒又唔眼訓嗟，如果您有事要我幫您做，我係會搞佐您o個part o野先都唔會返公司搞搞震。

我遊戲人間最重要o既point，就係點樣o係工作同私人時間呢個crossover佐o既關係當中，投入同抽離，記性好o既同時亦要識得點樣善忘。

樣樣o野都擔心，邊度諗得咁多呀？！

>>February 24, 2009 at 2:57:46 AM GMT+8