2008 年 9 月 1 日 星期一 【清涼】

Noodle House Ippei-An 麵屋一平安

今晚又有ACDD o既飯聚，C真係好，幫我o地諗晒食乜同訂埋位，唔駛我o地傷腦筋。

我o地去佐銅鑼灣廣場隔o黎o個幢樓一間叫做「一平安」o既麵屋，C話間o野o係Openrice個網頁有好評，所以就去試o下，同一幢樓o既地牢就有間「八八八」，又係食麵o既，勁多人。其實我已經有一段好長o既日子冇o係銅鑼灣食日本o野，估唔到而家呢o的所謂o既日本料理開到成個銅鑼灣都係，仲要間間都咁多人，香港真係歌舞昇平。

雖然拉麵唔係我o既最愛（可能係因為難食o既湯粉「味千拉麵」令到我唔再想試食拉麵），不過我發現呢間o野都幾有心思，杯墊中間有個窿，o係食o野之前對木筷子就穿過個杯墊，有筷子托o既作用。係就係多餘o的，不過都算一物二用，ok環保啦。


今日A o既故仔緊張刺激好多喎，因為佢經歷佐人生之中o既第一次被劫，好在個賊係劫佢隔o黎個同事，而唔係向佢埋手，否則佢可能以為個賊玩o野，挪唔到錢之餘仲要畀佢玩返轉頭都未定。佢個同事嚇到辭職，真係跨張。其實做邊份工都有危險o架啦，邊度驚得咁多o架，只要平時訓練有素，跟返公司程序做，就淡定有錢淨啦！

唔知乜鬼香口膠喎，唔敢食…


>>September 15, 2008 at 11:03:58 PM GMT+8

2008 年 8 月 31 日 星期日 【清涼】

Tropical Cyclones 熱帶氣旋

未到九月，天文台已經吹晒雞話今年九月會比較多颱風，叫巿民留意，睇返天文台網頁，其實九月份不嬲都係香港o既颱風高峰期，如果真係咁多風打，今次就真係發達喇！

有次同呀偉傾開打風，突然諗返起中學年代曾經讀地理學過，打風呢個「風」，其實都分佐好多個levels，呀偉話唔講真係唔知，不過有時天氣報告都會有提起。而家就等我上一上天文台個網頁，copy落o黎等大家認識o下。

-----------------------------------------------------------------------------------------------------------------------------------

依照世界氣象組織之建議，熱帶氣旋是根據接近風暴中心之最高持續風力加以分類的。香港採用的分類定義以10分鐘平均風速為根據，分為以下四種：

熱帶低氣壓︰每小時62公里或以下
熱帶風暴︰每小時63至87公里
強烈熱帶風暴︰每小時88至117公里
颱風︰每小時118公里或以上

資料來源︰香港天文台

>>September 18, 2008 at 1:47:25 AM GMT+8

2008 年 8 月 30 日 星期六 【清涼】

Selfishness 自私

好鬼嬲！最近發現我住o個度o既十八樓有個超級自私o既肥婆！！

由於公司有五分鐘o既打卡buffer時間，令到我o地呢o的死懶人可以好好利用呢五分鐘o既空檔，唔到最後一分鐘都唔出門口。

屋企個大鐘快佐幾分鐘，而我就習慣o係呢個鐘指住八點十一先出門口，點知就畀我遇到呢個極度自私hold住部lift o既肥婆。

呢個肥婆o既特徵除佐似山東人之外，仲有一塊月球表「面」，經過我不下十次以上o既觀察，發現每次部lift升到十八樓之後，都總會停幾分鐘。由於控制我幢樓o既lift system太過「智能」，幾分鐘o既時間並唔足夠「引」到另一部lift升上o黎十五樓接我，我就唯有白白浪費幾分鐘「寶貴」時間，等架lift由十八樓落o黎，而每次部lift o係十八樓停完幾分鐘落o黎，都一定會見到呢個「月球肥婆」，換句話說，我可以肯定佢係hold lift o既兇手。

我o係度諗，有乜方法可以令到呢個肥婆唔再朝朝早自自私私咁hold住部lift唔畀人用直至佢入佐lift先放lift落樓呢？！

而家朝朝早遇到咁o既情況，我一入lift都會怒睥住呢個肥婆，睇o下佢醒唔醒水。但係如果咁都唔收效，我仲可以點做呢？

1) 寫大字報貼o係十八樓lift口，警告某人唔好再hold lift咁自私；
2) 朝朝早幾分鐘行樓梯上十八樓，走入部lift唔畀佢hold；
3) 十五樓入lift時用冷言冷語諷刺佢o既自私；
4) 話畀座頭呀叔聽；
5) 寫信畀管理公司叫佢改佐個lift system。

不過咁，我估都係要搵日放假，八點九起身一路睇住幢樓個CCTV台，證實真有其事先可以action…火呀！

>>September 9, 2008 at 1:51:48 AM GMT+8

2008 年 8 月 29 日 星期五 【清涼】

Moving 搬竇

今日收到Yahoo!個e-mail，話Geocities個server o既monthly charges由10月1號起，會由4.95美金加到6.95美心，即係由40蚊港紙加到55蚊港紙左右，足足加佐成40%。

雖然係少少錢，而且Geocities又用佐差唔多三年，的確又係幾穩定而且又快，但係佢又冇加我容量同下載量，服務又唔係話特別好，upload又麻煩，我真係諗唔到佢o係呢個電子化普及年代，居然仲可以有加價o既空間。

所以我決定轉去第二個server，而家搵佐Photobucket，雖然試過係load得慢o的，但係佢唔駛錢都畀到而家我o係Geocities同樣o野我，而Geocities我就會轉返做free account，一於話知佢，佢趕客我就唯有走人。

轉server都有好處，就係可以乘機執一執o的相同埋用返我standard o既filing system，不過真係有排搞，要用好多時間。因為除佐要將o的相全部upload一次之外，所有日記裡面o的相o既link全部都要update返，好大工程，但係我係唔會輸畀呢個奸商Yahoo o既！

>>August 30, 2008 at 2:39:24 AM GMT+8

2008 年 8 月 28 日 星期四 【清涼】

Deception 騙案

有一個好好o既客，畀一個好奸o既裝修佬呃佐，而家個裝修佬玩失蹤，連電話都熄埋…

我o係o的newsgroups度留佐言，希望有人有好o既方法可以幫到手啦…

----------------------------------------------------------------------------------------------------------------------------

清理磚面幼紋中o既英泥

我朋友搵佐個裝修師傅幫佢新舖鋪種磚面有圓型幼紋（好似o的平底鑊底咁樣o既凹凹凸凸紋），但係琴日交貨時發現有好多英泥黐住o係磚面o的幼紋裡面，無論清水、綠水、洗地水、天拿水、乾刷等等方法都整唔甩o的英泥，本來o的磚面係黑色反光o既，而家「啞」晒色咁，勁核突。亦試過用洗石水，點知一「那」塊磚就變佐「啞」色冇晒光澤…

救命呀，佢趕住開張，而家個地好核突！有冇好心人教o下我有乜辦法可以整甩o的英泥？



>>August 30, 2008 at 1:17:01 AM GMT+8

2008 年 8 月 27 日 星期三 【清涼】

Takeaway 外賣自取

由於您o既「出街食飯恐懼症」仲未好返，呢排我o地都係買外賣返屋企食多… @_@

身體檢查o既報告出佐，證實您o既身體冇乜大礙，只係話消化系統蠕動有o的慢。講真o丫，呢個結果其實都一早知啦，駛鬼佢講咩！畀佐o的「益生菌」您開水飲，咁不如飲益力多好過啦！學我話齋，日日飲一支益力多再加兩條蕉，包保日日有屎屙。

不過我仍然覺得您係心理反應多於生理上o既問題，或者而家份工實在壓力太過大，搞到您身體機能失調晒，呢個問題唔係放一個長假或者去一次旅行就可以解決到。轉另一份工當然係有當務之急，不過而家個市咁樣，要搵返份真係有吸引力o既工作已經開始困難，唯有頂硬上，撐得幾耐得幾耐啦…諗起都覺得慘…唉…

您講笑咁話，如果第日結佐婚，都係日日出去食或者買外賣返屋企食o架啦，唔會煮飯。其實呢o的都係正常不過o既事啦，今時今日o既小家庭，兩公婆為佐供樓兩個人都要出去做o野，做足全日成個人散晒，仲邊有心機玩煮飯仔，玩完之後仲要善後洗碗o架？

>>September 1, 2008 at 2:40:56 AM GMT+8

2008 年 8 月 26 日 星期二 【清涼】

Bonus 花紅

出佐喇！出佐喇！今年居然有40%！如果以舊年人工計算，咁舊年咪出佐14.2個月糧？！

公司今年好叻，玩手段，搞到八月尾先至出bouns，距離double pay o既時間只有四個月，而距離下一次bonus就只有五個幾月時間，咁樣望住份人工o黎做o野又可以留返o的員工多半年時間。

不過講真，而家個市已經跌緊，要玩跳槽其實又唔係一件容易o既事，或者我都係時候睇睇出年係咪真係要報HKU個Housing Master，拎返個CIH，再申請埋公司o既讀書津貼，一於o係公司長做落去，目的都係一份穩定收入同埋儲錢結婚。

究竟我可以o係呢一行裡面做到幾成功？我唔知道。係咪有機會轉site？我都唔知道。我只想盡快做好晒手頭上o既o野，或者交畀下一個接班人。

九月一號會有新工程師o黎返工，到時又可以卸返低o的維修工作畀佢；九月開始又會有新PA調過o黎間斷性咁幫手，直至佢handover晒舊site o的o野就全力o係我o地呢邊返工，到時又可望早o的收工；九月中又會有新CCA上場，到時又可以畀返o的promotion o既o野佢跟，又可以進一步加快完成我手頭上o既工作。

一切都好似慢慢會變返好，希望事實真係咁啦…

>>September 1, 2008 at 2:26:38 AM GMT+8

2008 年 8 月 25 日 星期一 【清涼】

Subsidy 津貼

早兩日打去數碼通，問佢點解過晒期都唔截數，原來係因為而家我收緊公司津貼，要拉返齊個截數日，等我仲以為數碼通又癲佐o係度想屈水添！

鬧錯人… @_@ 真係唔好意思，唯有寫返封讚賞畀佢以示歉意啦！

----------------------------------------------------------------------------------------------------------------------------

from Dominic Lei
to [email protected]
date 25 Aug 2008 23:38
subject Appreciation of Staff Performance

Dear Sirs,

I am the registered user of telephone number 9xxx-xxxx. I am writing to express my pleasure in your staff performance of telephone hotline staff Ms. Joyce Lau regarding the bill payment issue. She listened to my complaints and queries patiently at last Saturday night was highly appreciated. In addition, thank you for her timely reply and explanation at 11:00 p.m. of 25 August 2008.

Please also send my heartfelt apology to her for my rudeness and anger during the previous telephone conversation.

Regards,
Dominic Lei

>>August 30, 2008 at 2:42:51 AM GMT+8

2008 年 8 月 24 日 星期日 【酷熱】

Decay 腐化

住佐o係柴灣差唔多廿年，最近呢幾年留意到一個現象，就係身邊多佐好多講唔咸唔淡廣東話o既人o係柴灣出沒，尤其係女人。

除佐講o野講唔正之外，呢班人仲有好多共通點。第一，講o野大大聲；第二，生埋成竇細路；第三，隨意放低佢o地o既細路，任由佢o地四圍亂咁走大聲尖叫同搞破壞；第四，老公用純正廣東話粗口當街大罵老婆；第五，一上到巴士地鐵就即時飛身搶位。

我可以表明，我真係好唔鐘意呢班人，由大到細全家都唔鐘意，並唔係因為佢o地係大陸新移民家庭咁簡單，而係我完全接受唔到佢o地o個種文化，直接令柴灣降格。

o岩o岩搬入o黎柴灣o既時候，柴灣呢個鬼地方仲有好多「臨時房屋區」，住佐好多新來港人士，而且柴灣呢個地方原本都幾雜。不過隨住時間同埋拆晒o的「臨屋」，再加上大量居屋落成入伙，柴灣由「貧民區」慢慢升格，而且交通亦都越o黎越方便，N線通宵巴士都有四條咁多，生活質素同埋居民素質都曾經提升過唔少。

但係唔知由幾時開始，呢班人慢慢入滲柴灣呢個社區，仲要帶o黎大量大陸文化入o黎柴灣，加上柴灣冇乜私人樓，想upgrade生活o既後生一代都搬走佐，老年人口不斷增加，換入o黎o既，就係呢班柴灣「新一代」，搞到成個柴灣烏煙瘴氣…

或者再過多幾年，柴灣會變成好似天水圍一樣o既悲情城市…

>>August 31, 2008 at 5:01:55 AM GMT+8

2008 年 8 月 23 日 星期六 【陰】

Eye 風眼

蘋果日報登佐一張疑似風眼相片，即時o係多個討論區引起好多爭論，有o的人又話係風眼，有o的人又話只係「雲中洞」。不過點都好啦，天文現象變化莫測，即使係專家亦都只係憑經驗去推測一個「結論」出o黎，而大多人認同o既一件事又往往會被認定為「事實」。

所以好多人甘心做「騎牆派」，一於大家都冇錯，大家隨心所欲，只要o係中間搵到大家認為可以妥協o既位置，咁就ok啦。

我琴日返風更，確實感覺到有一段時間完全冇風冇雨，係唔係風眼掠過真係唔重要啦，o係我o既知識裡面，風眼位置氣壓最低（但係我冇氣壓計），而風眼應該係一個畀好似牆一樣o既雲層圍住（但係睇o的相又唔多似），唔同o既地理環境或者唔同o既風暴，可以有唔同o既風眼形態，教科書只會挪最突出最明顯o既例子o黎講，至於實際情況係點，好多時都要執生o架啦！

你話係咪係，唔係咪唔係囉。銀線灣同柴灣影到o既風眼相。


資料來源︰DCHome.net 數碼天地論壇

>>September 1, 2008 at 1:34:19 AM GMT+8