2009 年 3 月 12 日 星期四 【微冷】

Civil Service 公務員

小貓得到公務員o既offer，究竟係咩回事呢？

冷手執個熱煎堆，呢o的都唔知係咪叫做好彩。不過o個o的上晒電視o既睇相佬話今年屬猴人士大旺，事業、婚姻等等各樣如魚得水，突然間又好似好中咁樣…

不如要做公務員，又要再畀政府查家宅。其實我好懷疑呢個政府係玩o野的。因為政府各個機關，表面上好似互不相通，官僚到爆，實情每一個市民一定有一個file，而且各個政府部門互通，以身分證為編號，每個部門將一個市民o既零碎資料輸入一部超級電腦終端機，呢個大database有晒所有市民o既資料，所以政府要起一個人底，其實話都冇咁易，只係政府部門o的人懶，懶得查，只係自己睇返自己部門o既o野就算…

而政府各個部門不斷要你提供個人資料，其實就好似同一個問題同唔同o既方式問你幾次，以確定你冇講大話。嗯…一定係咁！

Anyway，我對公務員係有偏見的。

>>March 22, 2009 at 2:01:23 AM GMT+8

2009 年 3 月 11 日 星期三 【暴雨】

Phuket 布吉

Carol結婚喇…雖然佢都一早話安排緊幾時幾時一定要結到婚，但係估唔到佢又會咁突然！

Joseph對於Carol個男朋友最多意見，無他o既，佢成日都覺得人o地seven o丫嘛，不過Carol除佐以佢o既「督檸檬」理論去揀男朋友之外，今次終於都講得出佢鐘意男朋友o既原因，就係誠實。好簡單，卻好重要。

成熟又穩重，又好似唔係好o岩Carol咁喎，不過如果呀John佢學識不斷進步，我估都唔難過到Carol o個關o既。

出年，佢會o係布吉搞佢o既婚禮，仲邀請我o地一班友仔過去見證呢件盛事。到時會唔會有著住婚紗禮服，玩住wakeboard o既Carol同John出現呢？場面會唔會好搞笑呢？

期待…

>>March 17, 2009 at 12:58:21 AM GMT+8

2009 年 3 月 10 日 星期二 【微冷】

Roundabout 迴旋處

呢期discuss.com汽車討論區最hit o既topic莫過於呢個迴旋處。

香港有好多兩線，甚至三線o既迴旋處，不過考車時好少有試場係需要考人點樣用迴旋處。由於唔駛考，師傅亦唔駛教，以致好多人駕住架車殺入迴旋處，真係唔知點用。

其實一個普通雙線o既迴旋處，係「內圈」有個優先使用權。換句話說，即係外圈要讓內圈cut向左，concept上同一般路面上駕車有少少相反，又係因為咁結果令迴旋處o既交通意外咁多。

一個迴旋處成三、四個叉，唔識路o既時候又真係會幾閉翳。其實簡單o黎講，迴旋處o既外圈，其實只係畀諗住o係下一個左轉出口離開迴旋處o既車用，而去其他出口o既車，其實o係未入迴旋處之前，就應該揀用快線進入迴旋處內圈，直至駛過想離開o既出口之前，先打燈飛返出外圈，咁樣就會比較安全（係理想定夢想？！）。

有圖可參考。不過駕車幾時都要分外留神，因為其他人未必有你咁小心…


>>March 16, 2009 at 10:36:10 PM GMT+8

2009 年 3 月 9 日 星期一 【微冷】

Letter 信

您會話我好地地發乜神經，貼o的咁o既o野o係個blog度o既呢？其實係玩「經典重溫」呀！

呢封信係我最近我o係書架上面某一本書o既背頁中發現o既。一睇，原來整o既時候已經係2001年，有八年咁耐呀！！

呢封信o既背後，亦有一段始亂終棄o既故事，當年為佐追一個女人，而丟低佐一個對我好好好好o既女人。


最後呢封信當然都係冇寄到畀收信人，我亦冇繼續追呢個女人。雙失喎，咪好戇居？係呀，真係好戇居，到今時今日我都仲覺得係。但係無法，事情發生佐，失去o既感情就好似潑o係地上面o既水，等蒸乾。


奉勸大家做人真係咪咁鬼花心。

>>March 16, 2009 at 11:09:35 PM GMT+8

2009 年 3 月 8 日 星期日 【微冷】

Baptist University 浸會大學

好開心，今日可以去浸會大學旅行！

其實今日係公司一年一度o既annual conference，雖然無聊，但係例必要出席。以往幾年都係去理工，今年唔知係咪book遲佐，居然要去地方細細而又交通不便o既浸會，好在錯有錯著，可以重返母校，感覺特別好！

晨咁早就要起身，仲慘過返工，今日我冇好似以前咁，坐118去隧道口轉182咁敗家，而係轉火車，不過都係要坐頭等。而家地鐵合併佐，車費平佐，坐兩個站頭等，都只係6蚊，唔駛同人迫之餘仲抵過坐巴士，點都要影返張相留念o下！


巴士轉火車加行路超級快，唔駛一個鐘就返到浸大，晨早溜溜點都要幫襯o下個廁所！浸大o的廁所upgrade過，不過o的格局其實又同我公司o的廁所差唔多，老土佐o的囉，不過學校一間，唔駛咁fancy啦。


又一如以往，完佐都係要返公司duty…今年個conference超頹，好唔掂。走人時幾千人湧晒出浸會出面條窩打老道，個個心口掛住個勇字，慌死o的車唔會撞死佢咁…又係今年conference一個大敗北…

唉…又話用心服務o既？個心呢？

>>March 16, 2009 at 10:54:50 PM GMT+8

2009 年 3 月 7 日 星期六 【暴雨】

Seminar 講座

好邪門呀！今日放假去聽城大個Housing Master講座，居然撞到Trevor！

其實之前兩年都有報名城大Master，兩年都有叫我去interview，不過我只係第一年有去，第二年冇心情去，o係屋企訓覺。Seminar就真係冇聽過，所以唔駛錢就報名去聽o下。

Trevor話佢已經戎佐煙，真係恭喜佢。

佢仲話諗住買車喎，佢咁龐大o既身軀，一架三菱Lancer究竟放唔放得佢入呢？佢入佐去出唔出得返o黎呢？

>>March 16, 2009 at 10:40:23 PM GMT+8

2009 年 3 月 6 日 星期五 【雨】

因了解而結合
高慧然

戀愛不妨因誤會而邂逅，婚姻卻必須因了解而結合。

我一直認為，戀愛是一個人發現自我及完善自我的過程，所以，戀愛過程中錯愛不是問題。有時候，所謂「誤會」不是我們錯誤認識了對方，而是我們錯誤認識了自己。

戀愛了，我們才知道，我們喜歡戀愛的感覺遠甚於我們的戀愛對手；

戀愛了，我們才知道，我們是多麼沒有安全感的人；

戀愛了，我們才知道，跟進駐對方的心靈相比，彼此走進對方的身體實在太容易；

戀愛了，我們才知道，自己真正追求的是甚麼，自己真正缺乏的又是甚麼。

我們在錯愛中成長，無數次錯愛，讓我們真正了解我們自己，然後我們才明白我們真正需要跟甚麼樣的對手共度餘生。

有些人期望一次戀愛便成功進入婚姻，這是不現實的。戀愛，既是一個交心過程，也是一個磨合過程，連上網、駕駛、游泳這樣簡單的事情我們都要重複操作才能得心應手，更何況跟另一個人相知相守？

年少的時候，我渴望成為對方生命中的唯一，同時，也希望對方是我生命中的唯一。年歲漸長，卻開始知道，一個人一輩子只跟同一個人在一起，除非是真正的天作之合，緣定三生，否則，多半是因為雙方都別無選擇，這種相守，只是對已然成為習慣的生活方式的倚賴。

真正經得起考驗的婚姻，是因了解而結合。既了解對方，也了解自己，曾經滄海仍為水。

----------------------------------------------------------------------------------------------------------------------------

「這種相守，只是對已然成為習慣的生活方式的倚賴。」簡單o既一個事實，無容置疑。咁試問呢個世界又有幾多對「天作之合」呢？

世界就好似一個棋盤，而世人就好似棋盤上o既棋一樣，只係神手上o既一件玩物而矣。

>>March 16, 2009 at 10:16:32 PM GMT+8

2009 年 3 月 5 日 星期四 【乍寒還暖】

Inflammation 發炎

忍佐佢幾日，終於都係頂唔住，右邊下顎o的牙肉腫到咩咁，真係連合埋個口都覺得頂住…最後都係走佐上萬寧買消炎葯食…

今次已經係幾個月內o既第二次牙肉發炎，非常辛苦。口唇乾乾o地，搽o的潤唇膏之後想印一印條唇，都好痛，因為右顎已經再冇多餘o既空間去畀o的肉去伸展…so shit…

我知道，如果去睇牙醫，個牙醫一定話要剝佐隻死人牙，但係佢會剝打橫生o個隻衰o野，定係畀隻衰o野頂住o個隻牙呢？定還是兩隻都要剝晒？！

真係諗起就心寒…最怕就係整牙喇… @_@

>>March 16, 2009 at 10:13:04 PM GMT+8

2009 年 3 月 4 日 星期三 【雨】

Compensation 賠償



>>March 16, 2009 at 11:40:20 PM GMT+8

2009 年 3 月 3 日 星期二 【陰】

Waiting 等待

駕得車越耐，真係越頂唔順等巴士o個種感覺…

救命呀！今日下晝開完個CCC會，居然要企o係條街度等佐半個鐘頭巴士先上到車，期間有兩班車係完全爆滿兼飛站… @_@ 但係另一方面，同一個站o既過海巴士，居然密到五分鐘就有一班咁滯，雖然唔係每班車都爆滿，但係睇到o的人企o係巴士度塞車過海，就覺得辛苦…

原來買佐車駕佐車，真係好難返轉頭…shit…

如果返屋企o既巴士路程全程都要企，我真係寧願o係架私家車裡面坐o係度慢慢等，起碼停o下郁o下對手對腳都叫做有o的o野做，o係巴士車廂裡面做沙甸魚，真係超慘…

唉…

>>March 6, 2009 at 1:28:54 AM GMT+8