2008 年 12 月 10 日 星期三 【颳風】

Ailuropoda Melanoleuca (Panda) 熊貓/貓熊

嘩！熊貓咬人都夠膽死呀！條熊貓幾鬼惡爺呀，咬完人仲即時以九秒九閃返入個竇度，仲唔係身有屎！

今朝起身睇一睇yahoo新聞，就睇到呢單咁o既料，雖然唔係熊貓食人，但係我估呢單o野會破壞佐熊貓o係好多小朋友心目中o既形象…

記得o係好耐之前，睇過套唔知乜o野動物記錄片，話熊貓其實原本係一種生性兇殘o既肉食性動物，只係o係咁多年o既演化過程中，變成佐以食竹為主o既動物。至於佢其實係肉食、雜食定係草食性動物，我就冇乜興趣去深究喇。但係單憑表面o黎睇，佢o既腸好短，而且冇消化竹o既細菌，就好有理由推斷，佢係屬於食肉獸居多。

食得肉o既就多多少少一定要有o的兇殘o既特性先得，因為要「獵」先有得「食」，其他細小o既動物係唔會企o係度畀你食咁戇居o架嘛…

諗返起之前有個以熊貓為題材o既漫畫，有時佢都畫到o的熊貓好惡爺，莫非佢都認同熊貓係兇殘o既動物？！

>>December 11, 2008 at 8:31:42 PM GMT+8

2008 年 12 月 9 日 星期二 【颳風】

Serendipity 緣份

緣份o既英文其實都已經搵佐一段時間，咁深o既字居然又會o係電視度出現！好神奇呀！

今日原本就係我o地一齊食飯o既晚上，但係老細話要襯住今晚operation班友仔齊晒人，要brief一brief佢o地，咁就焗住留到七點幾先有得走…

您話累要返去大埔先，咁我遲走都冇得揀，不過個心都好想見到您喎…係就係要走走踢踢、飛來飛去，只係見得一集《珠光寶氣》o既時間，但係我覺得值得喎！

時間雖短，但係都要好好珍惜。我買佐老麥畀自己食之外，仲有碗仔翅同埋舊彩虹o架，您想食邊樣就食邊樣啦！呵呵呵！

>>December 11, 2008 at 8:30:53 PM GMT+8

2008 年 12 月 8 日 星期一 【颳風】

Chaos 混亂

小憂憂離開佐之後，第一件事要搞o既，就係同佢計糧同埋send o野上人事部。其實呢o的都係小事，因為o係我任內都走佐好多件，而o係呀Mi走佐之後搞到要我獨力承擔晒o的HR o野o既亦都搞過兩、三件，所以幫人清數埋單我最在行，萬事俱備只欠老細簽名。

不過呢個只係前奏，因為佢走佐之後o既side effects唔單只係冇人出街送文件咁簡單…pppppppkkkkkkk！真係大x鑊。原先唔夠人手o既早班再減一個人，加上十二月係清大假月，o的友仔係咁放假，少一個人就真係唔想像中咁容易過，左調右調前調後調，十個煲得三個蓋，真係死得人。

重新編過個更表之後，都仲係多多擔憂，個心都係無辦法安寧。好在有條友仔話自己好想做保安，一於聽日再問o下人o地點請新人之後，即時叫佢去驗身返工！

救命…

>>December 9, 2008 at 2:15:02 AM GMT+8

2008 年 12 月 7 日 星期日 【颳風】

Resignation 辭職

估你唔到原來個個都話走唔走，最灑脫o既居然係o係眾人之中o既笑柄小憂憂會係第一個走。

呢隻憂o野冇o野好，為人又懶又爛賭，做o野又唔多識轉彎，但勝在份人肯捱義氣，而且仲係有借有還o既上等人。雖然條友係有o的煩，又成日煩鬼住晒自己做唔到決定，不過點都估唔到佢為佐佢o既新事業而放棄捱佐成年o既雙糧…

有次同憂憂出去夜談講到佢o既前途，都係一片迷惘。事關佢讀書又唔係多，個樣又唔係好，真係諗唔到有乜可以長遠發展至養老。搞生意又冇錢，同馬會搏鎚又輸多過贏。諗到爆頭去到尾都只係得一條路，就係「賭」。

十賭九輸、十賭九騙等等等等。講真，同佢去過澳門搏殺，o係賭台上o既佢，絕對唔係我o地平時見到o個個戇戇居居、無所是事o既憂人。佢係學過、研究過，心裡面有佢o既一套方法，或者，呢條就係佢要走落去o既路。

佢o係香港冇人冇物，同佢一齊住o既呀婆又老人痴呆入佐老人院，住緊o個間公屋又就o黎要畀政府收返。出世時已經冇老豆，老母改嫁長駐大陸。單身寡佬o既佢，真係了無牽掛，孑然一身，屬雞o既佢，係時候出去闖一闖。

祝佢好運，all the best！

>>December 9, 2008 at 1:53:16 AM GMT+8

2008 年 12 月 6 日 星期六 【颳風】

八卦車訊抗海嘯！每週一慳︰慳油十戒

(手查)車想慳錢又唔想花時間左刮右刮邊間油站做特價？邊個停車場最抵泊？買市面聲稱有慳油功能o既產品又唔知可唔可靠，最直接又一毫子都唔駛用o既方法梗係從駕駛習慣入手。

1. 加速時切忌大油，因為大腳油起步扯高轉數最易令耗油量增加，所以應平穩加速。
2. 避免放太多無謂o野o係車增加負重。
3. 定期檢查胎氣，因為胎氣唔夠會增加車胎同路面之間o既磨擦，消耗更多能源。
4. 雖然車速只係800rpm左右，但引擎運作始終要靠燃料，所以停車熄匙一定慳到油。
5. 將車窗全開會增加行車時o既風阻，想慳油開少少就夠。
6. 同前車保持一段距離以均速行駛，避免經常踏迫力後再畀油。
7. 出發前最好睇定地圖，行錯路唔只浪費時間，仲o徙好多油。
8. 盡量以低轉高波行駛，減低引擎負荷。
9. 天氣轉涼，唔開冷氣起碼慳1成油。
10. 終極慳油方法，將士啤(車太)、音響、尾箱門板冷氣等不必要物件拆除，再自己每日跑步1小時減番十零廿磅，好似賽車咁偷輕架車，保證慳到油。

資料來源︰壹蘋果車網

-----------------------------------------------------------------------------------------------------------------------------

第10點簡直係超廢，爛gag一個。

>>December 25, 2008 at 4:44:27 PM GMT+8

2008 年 12 月 5 日 星期五 【颳風】

天上的笑臉
林超英
2008年 12月 04日

2008年12月1日出現了一個頗有趣的天象，那天日落時分望向西南方，居然見到一張可愛笑臉懸在半空！原來，當時金星和木星在天球上走到一個頗為接近的位置，碰巧下方也跑來一道娥眉彎月，結果就形成了一個天上的笑臉符號，彷彿老天爺也來為我們打氣，提醒我們做人不用太過悲觀，世上快樂的事還有許多許多。

我的同事在天文台總部的天台拍下了幾十張照片，並選取了一張效果最好的與大家分享（見圖）。說起觀星，天文台的地理環境起了很大變化，本來天文台建在尖沙咀的一個小山丘上，視野廣闊，可以看到維多利亞港，但是幾十年下來四周多了不少高樓大廈，這次星月下沉的路徑就被擋去一大片。另外，市區的強光也令拍攝倍添困難，哈哈笑臉出現沒多久就受霓虹招牌泛出來的光暈影響，視覺效果沒有那麼黑白分明，這就是天文愛好者所說的「光害」。

世事常有正反兩面。在真正漆黑的夜空，繁星萬千，初學觀星者會感到完全的迷失。在城市裏，光害淹沒了較暗的星辰，天上祇餘下疏落幾顆最亮的恆星和行星（例如今次的金星和木星），對於初學觀星的朋友，反而是學習辨認星座的好機會。

樂觀看世界，迷濛使人抓緊前進的方向，困難給人發揮表現的機會，星月無情也讓人見到上天的笑臉。我鼓勵大家凡事多看正面，讓開心的感覺進入我們的生活之中。


在天文台百週年紀念大樓天台拍得的照片，左上方是金星，右上方是木星，下面則是月亮。（天文台同事林堅銳先生攝）

資料來源︰ 台長網誌

----------------------------------------------------------------------------------------------------------------------------

唔係您話我知，我都唔知有單咁o既o野喎！好彩台長有講嗟！

>>December 22, 2008 at 9:33:55 PM GMT+8

2008 年 12 月 4 日 星期四 【颳風】

Report Duty 交差

有食肆o既地方，就一定有老鼠，呢個係鐵一般o既事實。咁如果一個地方，有幾間食肆集中埋一齊，結果會係咩呢？

答案就係︰好x多老鼠。

今晚為佐某食肆而特登OT，其實都只係做場show。講真，其實我都唔係好感覺到佢o地真係有幾大誠意去搞o的老鼠囉，約佐十點鐘可以搞到十點半都未到整，所謂o既整人其實又只係得三個人，硬係要話捉到o個o的老鼠，左手上面有我o地商場logo朵花o既紋身，右手上面又紋佐斧頭，擺到明就係商場走入佢個舖度，又未免有o的那個…

可惜個場o既地理環境限制，今晚有o的無功而還，只有下回分解。

但係，我想講，呢班茂里連自己個舖背脊o個道係實心磚牆都唔知，仲要拍住佢公司o既另一個品牌，再間硬話兩間舖之間有個void位，種種跡象顯示，其實佢o地都只係為佐交差而交差，大機構，果然官僚。

>>December 9, 2008 at 2:28:02 AM GMT+8

2008 年 12 月 3 日 星期三 【颳風】

MegaBox

唔係要site visit交功課，開今日個死人會，我琴晚都唔會駕住架車四圍去，去完灣仔再去九龍灣，更加唔會走去MegaBox。

一入到去，見到佢搵佐Winnie the Pooh做聖誕deco，即時影一影先，去到中庭，仲有棵小熊維尼聖誕樹添呀！我估您姨甥仔一見到就一定會發佐癲咁攬住隻Pooh唔肯走。

不過好在有MegaBox，我今日份功課先有得交…不過下次又可以去邊呢？！！shit…




>>December 13, 2008 at 5:23:04 AM GMT+8

2008 年 12 月 2 日 星期二 【微冷】

Illness 病

好地地又病佐，轉天氣是也…上晝睇完醫生食佐葯，累到爆炸，但係仲要四圍走出去site visit，真係慘…o的idea都已經搾乾搾淨，幾時先有人承繼我呢個task…

架車拎佐去畀人整，順手驗車，所以借佐Kenji架Smart仔出去，其實佢架車都幾好力水o架喎，如果用手動拖住個一波就爆得更加勁，都幾過癮，但係懶人都係用自動波好。

車仔細細都幾好玩，善用空間呀！


>>December 28, 2008 at 12:35:06 AM GMT+8

2008 年 12 月 1 日 星期一 【颳風】

Mess 一團糟

今日交收舖搞足成日，上晝下晝完全冇晒，但係結果都只係一團糟，心裡狂叫︰「What a mess!!! fuck it!」

舊客o係兩年前已經玩過我一次，但係當時擺明係佢高招，而且玩到租務o個邊吹佢唔脹，今次為免佢又重拖故技，萬事都係小心為上。不過放假就即係放假，星期六、日一於唔踏足個場半步，一切o既屎都係留返今日先解決。

講真，其實如果佢琴日交佐吉就一定冇事，最多我都係用"as is" condition咁交隻舖畀個新客，到時新客又係求奇還原畀我就得。可惜，今次佢除佐太多o野未做完之外，租務亦未同新客簽約，一切都可以postpone同delay，更大鑊o既係，接佢手o既新租客亦都o係埋度，有時o的o野精人出口就笨人出手，新租客咋晒型，舊客點都玩唔到o野，呢度o個度個個位都要執返好先可以離場。

拿拿拿，人o地講o架咋，唔係我出口o架，呢o的o野，你冇得咋我型啦！

有時又真係惡人自有惡人亡o既，鬼叫佢真係交o的垃圾出o黎咩！結果今日交唔到吉，白做一日…唉…

>>December 9, 2008 at 2:04:43 AM GMT+8