2009 年 4 月 1 日 星期三 【微冷】

April Fool 愚人節

以為放完假之後返工，會精神爽利o的，咁就大錯特錯…

唔知係咪愚人節畀人玩，返佐去冇耐，就有舖走o黎話捉到三隻老鼠，鼠身仲要清楚睇到有本場o既紋身o係度，咁就畀佐兩個鐘時間o個班友，跟呢樣跟o個樣，多多要求。雖然o個度o既地理環境好特別，有我o地o既喉同電線等經過，但係其實我想講，閣下租呢個舖前，應該清楚明白o個個位有o的乜問題，而圍封舖頂o既責任，係租戶並唔係業主或管理公司。

不過而家時勢唔好，而且我o地又係一間好o既管理公司，唯有幫得幾多得幾多…

跟住返到埋位，又畀幾份唔知佢想點o既IR激刺，心情唔好仲要加多腳，真係即時想hea到收工唔做o野，不過都係得個講字啦，o的o野你唔做邊個同你做o丫？

下晝，仲要同老細開佐個歷時兩個半鐘頭o既會，老細係咁追我同Tim Tim交功課…唉…死得…

好想死呀… >_<

>>April 3, 2009 at 2:17:25 AM GMT+8

2009 年 3 月 31 日 星期二 【陰】

Louis Pasteur 路易．巴斯德

喂喂喂！煲奶冇營養o架！>3<

最近唔知o係電視定係新聞睇到「巴斯德雞蛋」，話o的蛋經過「巴斯德消毒法」（Pasteurization）處理後，再o係雞殼面加佐層唔知乜o野礦物油，話超安全喎，但係蛋白就會好似熟佐咁偏白色，唔係透明。呢單o野令我諗起「巴斯德消毒法」。

最常採用「巴斯德消毒法」處理o既食品，其實非牛奶莫屬，不過其實最先採用o既，係酒。巴斯德係個法國科學家，對科學有極大貢獻。好似「巴斯德消毒法」咁，一般係用攝氏63度加熱30分鐘，或者係用72度加熱15秒，咁大部分o既細菌就會被殺死，但係因為唔係100度高溫消毒，所以經巴斯德消毒o既食物，例如牛奶，其實都係要放o係雪櫃度保存，如果唔係一樣好快會變壞，得兩日貨仔。

唔係高溫消毒o既好處，其實係想保持返奶本身o既味道同營養。因為奶o既成分主要係蛋白質，蛋白質有個特性，係遇到高熱會變質，減低營養成份、口感同食味。之所以煲奶、燉奶等面層會有塊「衣」，其實就係已經變佐質o既蛋白質，唔可以話有害，但係冇話有益。

所以，自從我知道呢樣o野之後，一向鐘意食所有奶類製品o既我，已經唔會再飲熱o既鮮奶，因為鮮奶（例如樽裝o個o的，總之要冷藏o個o的）o既營養價值之所以高過紙包奶（例如子母奶，總之唔駛雪住o個o的，通常經過UHT消毒），係因為前者用o既係低溫消毒，奶味係會濃o的好味o的，飲開奶o既人，一定一飲就飲得出唔同味，而熱奶o既奶味就更弱。不過有o的人唔鐘意o的奶羶味o既，煲奶亦係唔錯o既選擇o既。

參考資料︰
1) 巴斯德雞蛋
2) International Dairy Foods Association

>>April 3, 2009 at 2:51:45 AM GMT+8

2009 年 3 月 30 日 星期一 【微冷】

Persecution 迫害

嘩…今日勁慘呀…就快畀人迫死…

話說呢，一月中有個租戶打o黎講，話佢o地個單位畀BD睇完，有好多structural defects，有機會影響佢o地續牌咁話；之後佢o地再forward埋BD封信過o黎，咁我o地就梗係要同業主講，叫佢o地決定幫唔幫個客整啦，因為佢o地同人簽約o個度話包埋structural defects o架嘛。

咁同當時我o地個場o既渣fit人傾佐好多次，都係冇結果，主要原因係佢o地賴皮，話o的defects一定係要係o係beam、column、load-bearing wall、ceiling o個o的components上面出現先至界定為structural defects，咁就出事喇。究竟咩叫做structural defects呢？

以BD o既參考資料為據，與業主心目中（定係某人心目中？）o既定義並唔一樣，compromise唔到，但係又冇人夠膽拍晒心口出o黎講︰「呢o的o野我o地係唔會負責o既！」，咁當然我o地係唔會幫佢做代罪羔羊，揹起呢個重飛。因為如果我o地依業主o既口味而定出維修責任，萬一真係有事，我o地就會入晒，好唔著數。

既然大家都唔肯揹，最好就係搵個有牌o既人做中間人，佢出report佢上身，大家都容易過骨，不過個結果往往都係出人意表。

其實做consultation同rectification都可以同時進行o既，不過都係我唔好，冇跟貼呢單o野，冇盡快催迫同事搵報價，但係請問我有幾多對手做o野、有幾多對耳仔聽電話、有幾多個口覆客呢？痴q線o既，做死人咩？乜都係我跟…如果我有咁o既專業知識，仲識出報價，我駛鬼靠人一早自己包辦晒啦！又或者咁講，我有咁o既專業知識，我去BD度做呀sir，專捉你o地班茂里o的蟲好過啦！

真係大至做budget，細至o係走廊執件垃圾都係我做，我咪真係一日返廿四小時都唔夠？

呢幾個月o既工作，無論係租務定係維修，樣樣o野都做唔停，老實講，我估席間冇一位同事畀我蛇得多囉，但係如果我做到隻狗咁款都叫做蛇的話，我估蛇呢個字o既定義要改寫囉…

當然，我今日只係狂接某人o既電話，條友其實已經係前朝o既人士，又何必苦苦相迫呢？莫非佢認為hold住我o係個電話側邊，o的工作就會自己完成、o的報價就會自己由個fax機嘔出o黎、佢就可以避過佢o個一劫咩？

最後，老細都未有o的乜責難，亦幫我頂住佐o個位已失勢o既業主代表…

做o野唔係冇壓力，逗份人工亦都冇話值定唔值，但係如果大家都係實事求事，唔係齋talk要人白做，做決策o既當機立斷o的，我估我o地會做得條氣順o的囉…

好一句︰「大家都係SHK，你應該同我o地同一個諗法，咁就梗係唔想做o的preventive o既o野啦！」咁都講得出口，人o黎o架？你o既「良知」去佐邊？又話自己讀過laws，又話要將可能要負責任合理咁推走，咁巴閉，你又敢出一句聲，話o的o野全部唔駛驗，總之唔係o係beam、column、ceiling、load-bearing wall上面o既o野就唔駛整，直情叫個客食自己嗎？

正如o係公路上飛車，見人架車慢就o係後面又閃高燈又響按又推人o個o的戇x仔咁，我都係一句，如果你真係咁夠薑o係明知前面係快相位，你仲可以唔收車照用極速衝過去，再畀人影埋沙龍的話，我一定會心服口服，叫我自己打爆個玻璃樽再跪落去同你認錯都豪無怨言呀！

>>March 31, 2009 at 12:41:46 AM GMT+8

2009 年 3 月 29 日 星期日 【微冷】

Analysis 分析

有一位好朋友，通過佢o係日常生活中對我o既認識，為我做佐一個深入o既愛情分析，冇話o岩晒亦唔係錯，不過都算係一個寶貴o既機會，令自己可以通過討論，認識自己o既愛情觀更加多。

一開始佢就話其實我只係追求一段好簡單o既愛情，但現實上，我卻handle過唔少複雜o既關係。拍過八次拖，有六個女朋友，都係出自唔係因為父母其中一方早逝就係有婚姻問題o既家庭，只有7A同十三妹叫做正常o的。伴隨住父母輩問題之餘，亦都有不少自身問題。另外，愛情中出現第三者更係咁多次分手o既最主要原因，三角戀可以話習以為常。可以講，其實我已經習慣佐o係複雜o既愛情生活中生存。至於係咪因為呢o的經歷，令我更加想過得簡單o的呢？到目前o黎講，我都仲未有個答案。

跟住繼續講到我其實想伴侶主動o的去了解同關心我，要清楚我o既每一句說話同舉動，因為我需要對方確定自己o既位置，所以女友唔駛聰明o既一類，但都一定要夠醒目，話頭醒尾o個隻，呢樣又好o岩喎，因為我份人都唔係咁鐘意表達自己意見同感受，但卻比較鐘意聽對方直接講佢o既要求或感受。自己唔鐘意估對方想我點，但係又偏偏要人o地估我想點，幾矛盾呀！

而且，佢話我係一個需要安全感o既人，我需要先感受到對方o既愛，肯定佐對方o既愛，先會給予安全感畀對方…o下？我真係咁o既咩？唔通真係嚇怕佐？其實我本身都幾被動o既，我最鐘意用Jewel o既Foolish Games裡面o既其中一句歌詞形容自己︰「fashionably sensitive but too cool to care」咁我係咪應該再為自己愛o既人再付出多o的呢？嗯…可能真係太愛自己。

雖然我會覺得，o係任何男女關係中，個個男人同女人都係一樣，甚至可接受同性戀，因為愛情o既本質理應一樣。但係佢就仍然相信，情人係一個唯一、特別o既存在，係我對愛情冇晒憧憬嗎？一切o既事情都真係咁「死」o既嗟？

>>April 6, 2009 at 1:23:37 AM GMT+8

2009 年 3 月 28 日 星期六 【暴雨】

Sigh 嘆息

漫長o既六日工作終於結束，感覺今個月過得特別慢，日日都有新o既adhoc o野等住你去完成，超級辛苦…

放佐工如常入去大埔同小貓食飯，亦係慣常咁買外賣去工業村裡面食。我對車裡面設施同裝飾o既要求好低，但求架車行得走得，安全達陣就ok，不過最近架車停低未熱o既時候，好明顯係多佐一種之前冇o既雜聲。聽到佢叫到格格聲咁，心都痛埋。

o係工業村裡面咁o岩又見到一個駕Move o既師兄，佢話應該係死turbo，提我凍車時最好踩得柔o的。其實我已經踩得極柔，如果唔係個turbo已經一早死佐。車房太子傑少老早都講過架車o既turbo有問題，但係建議行得走得就算，無謂再o徙錢去換。正正常常一個新turbo，講緊都要成六千蚊未計裝工，二手o既傑少亦冇積極咁幫我搵，唉…

係咪應該繼續投放資源落去呢？定係等佢死再當廢鐵賣就算？Move仔呀Move仔，講我聽你想點？



----------------------------------------------------------------------------------------------------------------------------

十三妹欣欣生日快樂~

>>March 30, 2009 at 12:32:38 AM GMT+8

2009 年 3 月 27 日 星期五 【雨】

Talkativeness 口多

早兩日畀個同事詐型，內容係有關某公司高層落佐去某條村度開會，之後有關一o的傳聞o既事。

聽聞有關人士即時畀佢老細鬧，o係呢間流言滿天飛o既公司裡面，有時講o野真係要小心，因為KS冇秘密呢個係千古不變o既事實。

據有關o既老細同我講，其實亦同同事所同我講o既差不多，只不過一個傳一個，有時亦都難免會有o的差異，或會加入佐一o的個人情緒、感受或者幻想o係裡面。

而且好多誤會，都係由「講者冇心、聽者有意」而起。即使發放消息者內容有幾咁中肯，經過一對眼或耳，再由一個口、另一對耳、另一個腦分析思考，再由另一個口傳到另一對耳、另一個腦，過程之複雓，難免有漏或有加，所以呢，o係公司裡面，真係成日都會有同一件事幾個版本o既情況出現。

可能今次個同事畀老細話，係我o既責任都未定，因為我都係普通人一個，難免會有bias，或者我表達得唔好，令人誤會都未定。

不過有邊個老細係鐘意o係第三、甚或第四者口中去知道自己個site裡面o既事o架…都係怪我衰多口罷…

----------------------------------------------------------------------------------------------------------------------------

終於都有人upload返15號o個o的結婚相上網喇，立即偷佐佢放上自己個blog先…估唔到once upon a time得十幾廿人o既教會團契，真係十年人事幾番新…


>>March 30, 2009 at 12:52:33 AM GMT+8

2009 年 3 月 26 日 星期四 【微冷】

Roof Rats (R2/2R) 家鼠

每年到佐呢個季節，一早已經有晒心理準備班鼠輩一定橫行無忌，但係今年o既情況特別誇張咁，好似係一發不可收拾咁樣…我o地個場o既地理環境好特殊，包圍成個場o既三百六十度位置都唔係我o地o既管理範圍，你話o的花槽冇老鼠，就真係冇人信。仲有，有咁多間食肆o既後欄，晚晚有得食又有得匿，想佢o地唔定居都難啦。所以好多o野單靠我o地一己之力，根本冇辦法搞得掂…

除佐外圍唔受我o地控制，我o地個場中間又要夾佐個唔係我o地管理o既停車場。據同事匯報，夜晚停車場又係佢o地o既世界，大把僭建o既儲物室、雜物堆…呢度又係佢o地o既屋企…

我可以講，成個場應該有接近40至50巴仙o既舖位面積係食肆o黎o既，咁多o野食真係養到班鼠輩肥肥白白o丫…不過最重要o既據點，其實係住宅o個邊o既垃圾房！嘩…o的老鼠真係多到呀，嚇q死你呀！晚晚o係度開P咁，見到人都唔會驚唔會走，你拎住部相機係咁同佢拍沙龍，佢o地都只係繼續自己做自己o野，吹脹…

究竟我o地可以點做先頂得住班鼠輩呢？畀舊錢出o黎係咪真係可以搞得掂呢？煩惱。

>>March 29, 2009 at 3:43:01 PM GMT+8

2009 年 3 月 25 日 星期三 【雨】

Fury 躁

今日真係好躁呀，一返到去就有人話上個禮拜見報有老鼠間吉舖，今日又有老鼠跌佐落o黎，仲要又係「生歐歐」o既…唔係嘛…咁猛？

樓上個無良業主搵o既老馮地產代理，呢期日日係咁打o黎。講真，呢條茂里我就真係對佢無乜好感，一來老細話條友勁冇禮貌，有次突然發老脾，「級」佐老細電話。我呢個老細份人又真係好鬼執著，畀人收佐線之後仲要特登打返畀人，再問人係講講o下斷線定係特登「級」線，真係畀佢吹脹…

不過唔係咁o既話，上次件事又冇咁好笑嗟。

我都唔係好鐘意同佢講o野，因為條友真係以為自己大晒咁，成日o係度狐假虎威。今朝條友又打o黎，我都唔想覆佢，點知佢又再打o黎，自己唔過o黎睇o下個實際情況，淨係識得問長問短之餘，講講o下仲要無端端話呀南態度唔好…

冇o野呀嘛？我敢講，呀南係我o地個site之中脾氣最好、語氣最溫和o既人，呀南根本就唔會有態度唔好o既時候…當然，我點都要同條代理佬灑o下lum咁啦。事後都係提返呀南小心o的，因為所有同四樓有關o既人都係奸的！

>>March 28, 2009 at 12:21:23 AM GMT+8

2009 年 3 月 24 日 星期二 【雨】

Drop-off 放低

唔通真係要愛懂放低，先至懂得點去愛？

早兩日講過，同某同事msn傾開大家o的感情歷史同埋問題，今日個腦突然之間好似諗通佐o的o野。有時人真係唔應該咁執著，成日生活o係舊日o既影子裡面，限制佐自己o既進步空間。

自問自己係一個好有天份進步o既人，學o野快、適應快，唔知點解有時o係愛情方面卻係原地踏步，唔進唔退…

六年前當我決定quit佐中大o既Master之後，我痛痛咁跌過一次，自信心大受打擊，意志消沉就如一個廢人，欠債之餘亦冇心機搵o野做。曾經試過跌倒，但我o係失敗之中了解到自己o既缺失，更加明白自己並唔係食o個行飯o既人，慢慢視野清晰返，企返起身，從頭再做過。

學習接受自己o既不足同失敗，係好重要的。

兩年前o係我認為人生最重要o既事愛情上跌倒，雖然已經爬返起身，但內心仍然未能完全放低當日被棄丟o既事實。原來真係人越自大就越係失敗。

我今日克服到對佢o既恐懼、憎恨同埋懷念，我估唔到原來自己可以做到。過去兩年半時間，我只係曾經o係佢舊年生日msn佐幾句，仲要唔係特別真心o個隻，再加點冷言冷語。一直以為原諒唔到佢o既出賣，其實係原諒唔到自己o既失敗。

我o地本來就係萍水相逢o既兩個獨立個體，最終回歸原狀亦係一件普通不過o既事。我o地本來就係要好o既好朋友，已經係好有「緣」；更加o係一個交錯o既機會，能夠走埋一齊拍拖，亦算有「份」。曾經愛過已足夠，我何必苦苦記住唔開心o既事呢？

>>March 29, 2009 at 11:56:31 PM GMT+8

2009 年 3 月 23 日 星期一 【炎熱】

Orthodontists 箍牙

有o的o野真係唔上網search過都唔會知，原來香港除佐衛生署有個叫「牙齒俱樂部」o既健康網頁同埋有個叫做「香港矯齒學會」，都幾多o野學o架喎。

今日有個好朋友去剝牙，下個禮拜再take two，總共要剝四隻，為上牙箍做好準備，不其然令我呢個超級怕整牙o既人，對箍牙呢件事想了解多少少。雖然我o的牙唔齊，但係都未至於要去箍牙，所以對呢一門科學冇乜深入認識。上到呢兩個網頁睇，原來牙箍都有幾種，仲有好多奇奇怪怪o既牙齒病變，網頁圖文並茂，睇落都幾核突…

講起箍牙，不得不提起，以前有一位女朋友，佢o的門牙都幾哨，呢個point亦都成為佐某o的朋友取笑我o既揀對象o既眼光，不過真係愛o既，o的牙排得齊唔齊、哨唔哨，又有乜關係呢？由於佢成日都會有咬唔開o的食物o既情況出現，所以每次同佢食飯，都習慣將o的食物切開細細件先畀佢食。

仲有一樣o野喎，佢有個遺傳病係唔聞得臭丸，所以我好多時出街都要留意o下附近會唔會有o的對佢造成生命危險o既物件出現（尤其係公廁）…唔知佢而家o既另一半，有冇幫佢打點呢o的細微o野呢？希望佢可以尋找到佢o既幸福。早幾日經過朋友仔o既輔導，彷彿突然又原諒佢多佐一點點，定係時間繼續沖淡一切呢？

參考資料︰香港矯齒學會及牙齒俱樂部

>>March 24, 2009 at 1:11:16 AM GMT+8