2008 年 11 月 30 日 星期日 【颳風】

Fault 過失

都係我錯o既，係我冷落佐我o既小貓。

其實我都唔想o架，不過真係好辛苦。呢排天氣大轉，我個死人鼻就持續失控，以往就只係朝頭早起身o個時打十幾個乞嚏，過佐上晝就冇事。呢個禮拜就真係慘無人道，可以講話係一日二十四小時都痛，只要係神智清醒o既時候，個鼻就會感覺到痛，鼻塞鼻水就不在話下冇時停搞住晒，咁o既生活真係好冇癮。

其中一個搞到我長眠o既原因，就係食佐抗敏感葯之後個人特別好訓囉。雖則呢個都唔可以做藉口o架喇，因為我平時放假都係狂訓o丫嘛，但係呢排真係食抗敏葯食多佐，最慘就係功效唔大，個人又累又冇心機，除佐訓著佐冇咁辛苦之外，其他時間都好似o係度等死咁…唉…

我想快o的搬返入新界住，再住香港島真係頂唔順喇！

>>December 1, 2008 at 2:42:38 AM GMT+8

2008 年 11 月 29 日 星期六 【颳風】

Twins 雙胞胎

今日o係街度見到一個女仔，非常之似我之前某一個女朋友，樣貌似佐95%，衣著似佐75%，化妝似足100%！雖然我唔知佢而家係梳乜髮型，但係印象中佢亦到曾經同呢個途人甲一樣整過負離子。我觀察佐一段時間，發覺佢連笑o個時面上面o個o的「紋」亦都有90%相似，但係我可以肯定唔係同一個人，因為身裁冇我前女友咁好。

想講o既係，原來好似佢呢一類o既女人，真係通街都係，可能o係旺角女人街挪住支AK47打橫掃射一轉，分分鐘可以射死幾十個同一類型打扮o既女人。

所以有時o的o野真係唔可以咁執著，諗返起o個時真係有o的低能兼白痴，為佐佢「隊」佐半支tequila，嘔到周圍都係，仲要搞到而家連烈酒都唔敢再飲…too bad！

>>December 1, 2008 at 2:57:38 AM GMT+8

2008 年 11 月 28 日 星期五 【颳風】

芬蘭 Finland

Tim Tim聖誕假期去芬蘭旅行，原來有另一個目的，唔怪得知要駛成六皮o野啦！

一提起芬蘭就梗係諗係聖誕老人啦，但係除佐呢條老o野之外，仲可以諗起o的乜呢？Nokia電話？

北歐三國瑞典、挪威同芬蘭一向都以富貴見稱，今次Tim Tim同女友去，擺明就係尋找聖誕老人的故事，同個聖誕假期貼晒題，個衰佬真係幾鬼浪漫呀！傾開又傾，原來今次去一去，要成兩皮幾o野一個人，再加埋佢諗住o係旅行期間同佢女友求婚呀！勁high呀！死佬，真係想一生一世都咁難忘o既旅程…

預祝Tim Tim成功先！cheers！

>>December 28, 2008 at 12:56:38 AM GMT+8

2008 年 11 月 27 日 星期四 【微冷】

八卦車訊抗海嘯！每週一慳
行隧道定小路？成本大結算！

相信好多住得遠o既車友，從買車o個日開始已經一直有個大疑問，就係出市區究竟行小路平o的定行隧道抵o的？家陣經濟唔好，呢個問題真係要認真o的搵答案，所以今期《每週一慳》就同大家計一計行4條最熱門隧道同替代路線o既成本。不過架架車耗油量唔同，我o地就以最常見、平均行$1.5/km o既私家車做例子，睇o下行隧道o既油費加隧道費平o的，定行替代路線o既油費平o的！


總結
算爆4條路線之後，原來有3條路都係唔行隧道平o的！不過抵還抵，行替代路線就要有2大事項要留意。首先所需時間可能多30%以上，塞車機會亦大o的，唔趕時間兼非繁忙時間先好行；第二替代路線多數又多彎、又要上落斜，手車狼o的油費可能會大增，冇柔住(手查)慳油技術o既朋友就唔行好過行喇！

資料來源︰壹蘋果車網

>>December 24, 2008 at 2:23:29 AM GMT+8

2008 年 11 月 26 日 星期三 【微冷】

Soy Sauce Chicken Wings 豉油王雞翼

都係媽媽煮o既o野最好味…呵呵呵！


有時放工放得晏，真係唔係好想返屋企食。一來又要屋企人留飯，二來返到屋企又要自己一個人食，三來食完飯累到死又冇得偷懶唔洗碗…

不過即使唔理以上三個points，返到屋企食飯，如果仲要食中一o的自己唔係咁鐘意食或者唔係咁想o係咁夜o既時間食（例如食蝦要剝殼等），又真係幾苦惱。雖然大原則係唔駛自己煮就唔好咁多聲氣，而且我亦都大多數會照食唔表態就算，但係食到一o的自己鐘意食o既o野就梗係會開心o的o架啦！

我係雞翼o既fans，任何形式o既雞翼都係好味道o既！yeah！

>>February 3, 2009 at 2:05:52 AM GMT+8

2008 年 11 月 25 日 星期二 【微冷】

Prize Money 獎金

幾個月前老細叫我幫自己拎封讚賞信，話要o係公司季度獎金幫我寫o野，幾經波折，張支票終於都o係今日到手。

之所以話係幾經波折，又係因為個sub-regional搞事。老細寫佐份o野上去，經佢手o既時候，條友居然唔批，仲寫佐句o野話如果有好表現就要升，唔駛畀獎金。我就梗係反對啦，錢幾時都係即時有得袋落袋o既先係著數。

或者你會話我戇居，但係宏觀咁睇，其實我個site已經冇得再升，要升職的話就應該調site，呢個site afford唔到我再升高一級（包括編制同埋人工），除非係做site i/c，但係我自問又未夠料做。

根本老細同regional都唔係諗呢個升我o既方向，只係想畀o的獎勵我之嘛，條sub-regional又扮晒好人，表面上好似想提攜我，實際上我知其實佢想建立一o的屬於佢o既勢力，但係佢永世都估唔到我其實係最反骨o個一個，以佢o既性格同處事方式，唔係話我睇死佢，佢根本冇可能o係呢間公司度「東山再起」。算罷啦！

>>December 28, 2008 at 5:24:56 AM GMT+8

2008 年 11 月 24 日 星期一 【微冷】

Big Ben 大笨鐘

最近爸爸唔知o係邊度買佐個鐘返o黎，只係一個座台鐘，奇怪在好鬼大座，原來仲會每小時好似o的鐘樓咁報時，一點鐘一o下，十點鐘十o下咁，搞到我今日放假，成朝都畀o的電子音樂「當當」聲嘈住晒，訓o下又醒o下…

爸爸好似好鐘意個鐘咁喎，又讚個鐘準。我估有可能係因為呢o的報時o既「當當」，十足十以前放o係澳門屋企個廳o個座大笨鐘咁，不過o個個古董大鐘o的聲真實好多，唔係電子聲。

我估爸爸可能年紀大，諗起o的舊o野特別有感情，特別懷念都未定…不過o的電子報時聲真係好鬼煩呀！

>>December 9, 2008 at 2:28:47 AM GMT+8

2008 年 11 月 23 日 星期日 【晴】

卡坦尼亞出奇制勝
《on.cc波經》2008年11月23日

卡坦尼亞可以話係近年意甲最具爭議性球隊，淨係零七年對巴勒莫一戰引發嚴重球迷暴亂，造成一名警察殉職，夠晒震撼。呢隊西西里球隊上季大難不死，護級成功，今季依然邪氣不改，蠱惑招數多多，最出位一次，莫過於上仗有球員於排人牆時除褲，分散對方龍門注意力，造就隊友入波。卡坦尼亞今晚作客森多利亞，隨時又出奇制勝，Mic少捧卡軍「讓球客勝」。

森多利亞淨識恰弱旅
卡坦尼亞上仗對拖連奴，當前鋒馬斯卡拉準備射罰球時，隊友震撼地使出「除褲」及「雙人牆」戰術，既有球員排反人牆，又再有人組成另一道人牆，阻礙對方龍門視線，最出人意表o既係第二道人牆中o既柏拉斯馬迪突然除褲，搞到全世界呆晒，馬斯卡拉立即起腳將罰球射入網，整個安排實在係「技驚四座」，亦引起一片爭議，不過事實係佢o地最後贏波。

講真一句，卡坦尼亞除佐識用蠱惑招數外，本身實力都唔差，特別係前鋒馬斯卡拉近兩仗入佐四球，甚至有傳納比都有意召佢入意大利國家隊。睇戰績，卡坦尼亞今季曾經作客逼和祖雲達斯，對國米時亦僅敗，絕對唔o野小。而森多利亞表面上近績唔差，但所贏對手都係下游球隊，欠缺說服力，今場如果一個唔留神，隨時又畀卡坦尼亞奇招玩死。

----------------------------------------------------------------------------------------------------------------------------

o的報紙吹到咁大，即時上網摷o下呢場波搞乜鬼，原來都只係條友拉一拉條褲之嘛，講到全世界呆晒咁誇張，死東方o既可信性真係低到無淪。



>>November 25, 2008 at 12:35:27 AM GMT+8

2008 年 11 月 22 日 星期六 【微冷】

Copy & Paste 剪貼

最近畀人話我個日記成日剪剪貼貼其他網頁o既o野，其實唔係我懶唔寫呀，而係我o既日記，就好似我本百科全書咁，專門收藏一o的我認為有用o既資料，方便第日搵返o黎睇。

呢部寫佐將近六年o既網上日記，係我o既歷史書，亦係我o既字典、剪報、文物廊、相簿、歌詞庫，甚至百科全書。我暫時仲未搵到一個更加好o既方法，可以完完整整咁將所有我覺得有用，或認為重要o既事物，好好收藏而又可以隨心所慾咁去翻閱。

好彩o既係，showhappy係一片經營困難o既情況下，居然仲未執笠。雖然佢真係慢到出汁，登入人數最多頂盡只可以有5個人，如果有10個人或以上同時o係server中活動，係慢到可以load一頁成二百幾秒（即係超過4分鐘），真係我呢o的咁冇要求o既人，先可以忍佢咁耐。

不過我仍然鐘意用我呢本copy & paste o既日記簿。

>>February 3, 2009 at 2:24:35 AM GMT+8

2008 年 11 月 21 日 星期五 【微冷】

Guestbook 留言簿

Sub-regional又發功…救命…

條友又o係度同我激烈風爭論一o的新地十幾廿個商場都跟同一做法去做o既o野，我都只係一句︰「我唔想自己一個場同其他場有乜唔同！」

佢話counter放佐本顧客留言簿，裡面有好多負面o既留言，佢話唔可能放呢o的留言出o黎畀人睇晒，話會損害公司形象，又話會有敵方o既公司特登派人過o黎寫衰我o地新地…救命呀！佢o既「被害妄想症」又再次發作！

畀晒之前開會o既minutes佢睇，係HQ o既人話要咁做，個個場都照做，佢都唔服。請埋佢去開會，叫佢親自反映佢o既意見畀o的老細聽，佢又冇膽匿x埋，你想點呀大佬？難怪你真係一事無成，日見日笑。

唉…

>>February 3, 2009 at 2:31:40 AM GMT+8