2008 年 8 月 12 日 星期二 【清涼】

Infernal Training 地獄式訓練

夏天o黎佐已經一段日子，碰o岩Kenji又再返早，又係我o地搏擊會keep fit o既時候！

呢個site係一個養肥人o既site，逐漸變肥亦得，立即變肥晒亦得，肥佐…我o地周不時都會比較o下大家個肥肚腩，發覺咁樣肥落去都唔係辦法，遲早就真係變到好似小憂憂咁大個肚腩，又或可能會變成企o係度望向下面望唔到自己o者o者，我o地唔想呢個情況出現，所以要及早行動，踢走脂肪！

要修腰，就梗係要玩sit-up啦！張sit-up床已經搵返出o黎，我o地就由琴日開始做返sit-up，琴日我分兩段夾埋做佐四十下，Kenji就好似做佐六十下，今朝起身我都覺得冇乜o野，亦唔覺得太痛，Kenji就話有o的痛，不過原來事實唔係咁簡單。

一坐o係落張sit-up床度，想去訓落o既時候，兩條腹外斜肌即時嗌救命，酸痛到不得了，經過一輪掙扎，大家都訓佐落去，但係訓低佐就起唔到身，因為條腰酸到冇晒力，好難好難先可以發力，結果我o地今日都只係每人做到廿下，夠晒皮，聽日再算… @_@

Kenji預計如果日日咁樣做，可能兩個禮拜就可以練返晒o的腹肌出o黎，咁容易咩…

Josephine生日快樂！

>>August 13, 2008 at 1:07:17 AM GMT+8

2008 年 8 月 11 日 星期一 【清涼】

Pressure 壓力

十三妹話工作壓力好大，公司有個上司玩針對，搞到佢個人short short o地，今日仲入埋醫院添… @_@

咁過火？未算。呢個低能上司居然玩到o係佢返工o既時間全程用CCTV睇實佢o既一舉一動，實在有侵犯個人私隱之嫌啦，仲要明知十三妹條腰有事都要佢係咁罰企，一坐低又問佢做乜坐低，好惡搞喎…

十三妹份人其實冇乜o野，係把口衰o的心直口快o個隻，都未至於要下下畀人啄住嗟…唔覺唔覺佢都出佐o黎做佐五年o野，實在進步佐唔少，之但係o的脾氣都仲係咁臭，想發就發。唔得咁o架，小不忍則亂大謀嘛！

>>August 26, 2008 at 2:20:33 AM GMT+8

2008 年 8 月 10 日 星期日 【清涼】

Delinquency 失責

今日全日都係玩LMS，冇人阻住真係好。

講返星期五下晝三點幾四點，個PA返佐o黎執o野走，o個個面口都好似我o地殺佐佢全家人咁樣，真係唔知得罪佐佢o的乜。Kenji話見到佢返o黎，同佢點頭笑一笑，換o黎o既係玄壇咁o既口面，真係唔得佢死。

不過，更加抵死o既事真係陸續有o黎！

呢條友仔真係夠晒抵死，又o係度轉晒口風話好想返o黎公司「試」o下繼續做，老細就梗係唔理佢啦，唔通仲想畀佢玩多鑊咩？！下次又唔知佢同邊個嘈交，跟住又搞煲大粥出o黎畀老細嘆o下，咁就真係唔得佢死喇。

言談之中我聽到老細又o係度同佢講道理，肯花呢o的時間去幫人o地教埋女o既老細，呢個世界真係少之又少。不過又畀我聽到o的o野喎…

佢話佢返到o黎見到佢自己個櫃筒畀我爆佐喎，又話我偷佐公司兩個個四郵票o黎用。我心諗︰如果你一路係咁射波同玩失蹤，咁我係咪等到你返o黎先可以寄信畀o的客同埋退返o的按金畀人？！

睇o黎又到我出口術o既時候喇。

>>August 26, 2008 at 1:00:41 AM GMT+8

2008 年 8 月 9 日 星期六 【清涼】

Grass Jelly 涼粉

您買佐涼粉畀我食，但係又得您睇住我食，唔夠開心！涼粉呢o的係普通有得賣o既o野，我個人唔係一定要食糖，幾淡o既o野一樣食得落。不過夏天溜溜有涼粉食又確係幾爽！

最近您o的腸胃經常都保持住嚴重失調o既狀態，連續好幾次出街食飯您都會食到半路突然唔舒服，即時要返屋企，搞到您而家有「出街食飯恐懼症」，今晚亦都唔例外。

不過又講真，我個人對於食真係冇乜所謂，正所謂好o既一餐唔好又係一餐。千幾蚊o既日本o野同埋十幾蚊碗o既車仔麵，又或者係幾十蚊一大罐o既涼粉，食佐落肚之後都係變返做屎走返出o黎再跌落屎坑再畀水沖走，冇乜分別。

今日我o地試佐o係您樓下商場shopping換免費泊車，好鬼抵，六點前買夠50蚊就可以免費泊一個鐘；六點後駛100蚊，仲可以泊足五個鐘，真係超級抵，係咁買道地烏龍茶，放到成個車尾都係… @_@



>>August 30, 2008 at 1:49:34 AM GMT+8

2008 年 8 月 8 日 星期五 【清涼】

Beijing 2008 Olympic Games 京奧2008

中國人o既盛事，o黎料！

其實o的奧運節目我都冇乜興趣睇，亦都好憎一開電視就只係得奧運睇，極悶。運動呢味o野，始終都係身在其中先至有樂趣，只不過而家個人懶佐，連波都冇踢，認真唔o岩。

中國為佐呢壇o野，起佐好多經典o既建築物，真係估唔到中國都會有o的咁新潮o既o野，好正！



京奧網頁︰The Official Website of the Beijing 2008 Olympic Games

>>August 30, 2008 at 1:52:24 AM GMT+8

2008 年 8 月 7 日 星期四 【清涼】

Atlas 地圖

我呢個超級懶精終於都突然心血來潮，挪佐本舊地圖去scan返兩頁post上自己個blog度。

呢本o野犀利喇，係我未搬過o黎之前住公屋o既年代，o係對面屋丟出o黎o既舊書雜誌之中摷到而執返o黎o既，到而家我都仲係一直當係「寶」o架！

其實柴灣同大埔都係同好多其他香港沿海o既地方一樣，大部分平地係填海填出o黎o既，只不過我o地年紀唔夠大，見證唔到呢o的歷史咁解嗟。而家政府想填海就真係難過登天，但係車就越o黎越多，空氣亦越來越差，港島o既商業中心區一日塞車塞足十幾個鐘，時間就係金錢，我就絕對支持填海加新路喇，城市就係咁o架啦，一個商業區，講咁多感情做乜o丫…


>>August 30, 2008 at 1:59:04 AM GMT+8

2008 年 8 月 6 日 星期三 【驟雨】

Suzhou Shit 蘇州屎

晨早掛佐八號波，又返佐公司返風更，以圖及企圖賺返o的外快。

P佢個K o丫！個PA琴日繼續射波，我就o係佢個位度執佢o的手尾，居然畀我發現四十幾五十張未上單找數o既invoices，真係佩服。老早已經同佢講過，所有o野都係盡快推個波去第二部門咁樣自己先會最安全，話極唔聽，教而不善，唔怪得之我收到咁多張畀人追債o既statements啦！真係豈有此理！

一次過清晒大部分可以清o既單，畀老細簽埋即上，有理冇理，總之唔好煩到自己。

失蹤兩日之後，今日老細終於都搵到佢，佢話自己個電話壞佐喎，搵鬼信埋，佢有幾部電話幾張電話卡o架喎…跟住老細同佢講佐個死pk sub-regional i/c突然扭(車太)反口唔保佢呢個事實佢聽，佢又話想返o黎公司「試」o下返工喎，是戇x的嗎？

老細就同佢講（事實上我覺得有串佢o既成份）︰「我聽日唔會返site，我唔可以保護到你o既安全，同埋我都要保障我個site正常運作唔會有事。」大快人心，抵q死！出o黎做o野又冇料，居然仲想扭屎忽花，真係好天真、好傻。

老細話佢又o係個sub-regional i/c告我狀，我覺得我行得正企得正，又唔怕你去叫乜狀囉，更何況你而家搵o個個所謂o既「靠山」，只係一隻o係公司上上下下畀人恥笑畀人睇小o既冇牙老虎。如果係要玩o既，到時我又扭屎忽花睇o下公司會撐邊個多o的囉，我遞信即刻走，睇o下到時個site點運作囉，我敢打賭起碼全癱兩個月，再加多一年時間去執我o的手尾囉。唔係我串咀呀，一個呀Mi走佐都做佐我七個月都未完全做得完佢o的屎，又睇o下到時有邊個肯o黎執我o的屎囉…真係聽到都把幾火。

「有人說，當年有個外江佬主管廣州，政績不太好，走後，人們以他原籍蘇州，故說留下『蘇州屎』。」

資料來源︰劉天賜談通俗文化

>>August 25, 2008 at 1:55:56 AM GMT+8

2008 年 8 月 5 日 星期二 【清涼】

Responsibility 責任感

曠工都夠膽死，而家o的人真係冇得頂！我真係完全唔明之前個PA扮到好有責任感咁o既樣，原來全部都係假o既。佢留低好多filing、找數、procurement等未做，咁佢即係想點呀？！

今日個sub-regional i/c落佐o黎同老細開會，商討個PA同個女o既去留問題，老細好似講到有o的火咁，不過我就冇理佢o地喇，一於離開office等佢o地慢慢傾。

後尾個sub-regional都冇搵我就走佐，仲諗住勸佢懸崖勒馬，之祈唔好畀女色所迷，睇o黎而家真係要睇佢自己o既造化，因為佢稍為有些少偏私，就有可能會牽一髮動全身，隨時畀人送上路…

今日老細仍然都係諗唔到個PA，玩失蹤，真係擺明係壞孩子。老細話要解決呢個問題，兩個都唔可以留低，但係另一方面，佢又好努力咁打佐好多個電話，問其他site邊度要人，為個女搭好晒後路…唉…真係可憐天下父母心喇…

>>August 7, 2008 at 11:17:30 PM GMT+8

2008 年 8 月 4 日 星期一 【清涼】

Time 時間

可唔可以畀多o的時間我做o野？

幾經辛苦終於都畀租務部批返2007年至2008年o既license agreements o既錢，而家要做o既，就係狂出agreements同埋追收返o的賴皮唔肯畀錢o既數…不過…好煩呢！

講真，真係幾經艱苦終於都收拾佐呀Mi留低落o黎o既LMS殘局，我預計2008年度經我手埋o既final accounts可能會超越100個呢個關口，雖然過晒期o既舖位accounts已經畀我埋得八八九九，而家做o個o的都只係routine要做o既正常o野，但係一諗起o的過期licenses，就真係唔知仲要畀幾多時間，send幾多個fax，同埋打幾多個電話，先可以完全settle晒…

每一日，我都要同時間去比賽，以為新PA可以幫得o下手，諗住傳授佢全副功力等佢接班，點知都只係廢人一個，有o野唔做有o野唔學，淨係識得搞風搞雨四圍撩o野，究竟我幾時先可以全身而退？

神呀！請給我多一點時間！

>>August 25, 2008 at 3:08:14 AM GMT+8

2008 年 8 月 3 日 星期日 【清涼】

Tea Time 茶聚

老趙又試放假走返公司做o野，有時真係唔係好明佢老婆點樣頂佢，唔通好似我o既小貓咁？下晝一於走去探o下佢先！

聽聞佢老婆好似有事要入院做手術，最近身邊都唔止一個識o既人要入廠修理喇，人就真係化學o既嗟。

第一次去置富南區廣場，原來地方都唔算細，但係都有幾多吉舖。個寫字樓真係大到嚇死人，同我o地個場比真係足足大佐三、四倍，而且仲有大量物資存貨，可能用十年都用唔晒，所以我順手借佐本假紙走。

講真，見佢桌面一堆堆o野，呀嫦調過去又唔知係幾時，真係唔忍心見佢一個孤軍作戰，但係我呢邊o的o野一直都未搞完，想話過去幫佢手都仲係得個講字…

唉…嘆息…

>>August 25, 2008 at 2:50:58 AM GMT+8