2008 年 8 月 22 日 星期五 【寒冷】

Nuri 鸚鵡

好o野！又返風更！錢錢錢錢！除佐風更錢，最重要係可以賺到時間。今日掛到九號風球，其他部門、公司全部收晒皮，我就可以o係公司慢慢做我o的文件o野。

不過今日其實都幾忙，唔可以立亂鬆懈，因為天文台掛得九號波，自己又讀過地理，感覺到成個柴灣突然之間冇晒風，o的樹唔甩又冇雨，個心硬係覺得好危險。

今次打風我o地冇乜損失，係中旅社個招牌吹爛佐。講真，打咁多次風個招牌都未試過有事，今次掛佐一次唔係好大風o既九號波，可能只係匿o係office o既我感受唔到佢o既實際風力嗟…


資料來源︰香港天文台

>>September 1, 2008 at 1:48:50 AM GMT+8

2008 年 8 月 21 日 星期四 【清涼】

Award Ceremony Channel 頒獎典禮頻道

強烈抗議兩間免費電視台不停中斷奧運運動項目直播時段，改為直播無聊白痴o既頒獎典禮，我建議佢o地一於開個「頒獎台」，全日廿四小時狂播中國挪牌o既儀式，去滿足佢o地o既愛國慾。

雖然係中國人，但係呢o的咁o既挪獎情節，十次有九點九次都係一樣，上台、頒獎牌、播國歌、升旗…真係睇兩日都夠啦，駛唔駛下下一有獎挪，就即刻cut過去播，嚴重剝削觀眾欣賞其他正在進行中o既比賽過程！比賽o既o野雖然個個選手做o既都大同小異，但總比o的無聊頒獎禮變化多罷！

比賽應重視同享受過程，同埋o係箇中學習到o的乜o野，而唔係為佐拎金、銀、銅牌而去做運動或者比賽！

睇頒獎仲悶過睇廣告，電視對我o黎講，重要性真係再進一步降低。

>>September 1, 2008 at 12:44:06 AM GMT+8

2008 年 8 月 20 日 星期三 【清涼】

Mountain Haruna 秋名山（榛名山）

每個人o既心裡面，都有一座「榛名山」！

自從呢個《頭文字D》以後，好多人都知道有「秋名山」呢樣o野，電影取影o既山真名叫做「榛名山」，以山路多彎見稱。而o係我o地一班玩車o既朋友仔當中，o係港、九、新界咁多山路之中，亦有我o地心目中o既秋名山。


對我o黎講，香港o既路都行得太多，港九新界o既大路都行得幾熟，唔熟o既路約略都可以憑方向感搵到。故此有時佢o地叫我出車，我都冇乜癮頭去陪佢o地玩，因為o的路太悶喇，冇新意。

今晚我o地幾個約埋去佐新界o既「秋明」一轉，新界地方要以大帽山o既荃錦公路為最多上、落山同埋急彎，不過因為條路闊，所以其實都幾容易駕同埋都幾安全。之後我o地再上九龍秋明飛鵝山一轉，匪夷所思o既事就發生佐…

一行七人五架車，佢o地話行行o下居然唔見佐狗仔軒架「標緻」（標緻有「山路之王」o既美譽）！唔通跌佐落山？！

先介紹o下狗仔軒呢條友仔。呢條友係公司以前o既同事，同佢出過一兩次車，發現佢手車真係衰到冇朋友，最鐘意o係彎心狂踩break，跟佢尾都要預留一、兩個車位，而佢最叻o既o野就係用架馬力大o既車o係直路狂放人。仲有件搞笑o的o既事，就係條友仔早排話自己架車o係停車場裡面畀人o地撞到連條車陣都攣埋，我o地討論完之後都冇人信佢，覺得係佢手車技術差自己撞山，之後講大話呃我o地。

點解會唔見佐佢呢？我o地o係山腰個亭等佐佢幾分鐘佢終於上到o黎。原來條友行行o下剷佐埋路膊刮花佐架車左邊裙腳，真係mission impossible。佢話後面架車盞大燈照住佢後鏡，搞到佢炒車喎…不過我o地都唔係好信，因為o係條咁窄o既山路基本上都只係會望住前面條路o黎駕，冇可能仲有時間望倒後鏡睇後面o既o野，所以佢o既辯稱係唔成立o既。

吹完水之後就各自散水…好眼訓呢…zzz…

相片來源︰群馬県ホームページ

>>September 1, 2008 at 1:14:45 AM GMT+8

2008 年 8 月 19 日 星期二 【清涼】

Magic Lamp 神燈

話說老妹去佐成個禮拜旅行，居然唔係去原本打算去o既東歐，而係去佐北非o既突尼西亞！

睇返老妹個blog，見佢好似玩得都幾開心，雖然旅行中總有o的小意外，但總算全部平安渡過，仲o係過程中、經歷中學到唔少o野，增廣見聞，真係可喜可賀。

佢買佐個小小鎖匙扣畀我，係一盞神燈，係咪真係有求必應我就真係唔知，只知道妹話好多o野都係made in china… @_@


我都好想去旅行呢！

>>September 1, 2008 at 12:48:47 AM GMT+8

2008 年 8 月 18 日 星期一 【晴】

Angel 天使

琴日駕車遇到天使呀！

話說琴日同您帶佐呀B去剪毛之後，我o地就出佐去旺角買電話，之後就返入大埔。離開高速公路之後，正準備o係燈位前停車o既時候，由於條路西斜o既關係，向前正望極之辛苦。

就o黎到燈位時，前面已經有幾架車排緊隊，我架車亦都已經收晒車好慢，時速我估都唔夠十公里…

見您好曬咁，就手多多諗住幫您拉低您前面塊太陽擋，點知就係咁樣「奶」o野，架車好輕力咁撞埋前面架萬事得626度…心裡面又再出現兩個字︰「仆街！」

落車睇，前面車個男人話︰「而家點先？」我答︰「吞後架車睇o下先囉…」之後睇一睇佢個泵把，冇凹，只係有o的油漆痕印佐上去。個男人話︰「下次唔好跟得咁貼喇！冇o野啦。」跟住就上車走佐。

我估我遇到一個天使，因為正常人畀人撞到即使冇乜事，點都會屈返三、五百去飲o下茶啦！又會咁好o既！行運呀！

>>August 30, 2008 at 2:13:05 AM GMT+8

2008 年 8 月 17 日 星期日 【清涼】

Secret 秘密

部死人Dopod終於都壞到我忍佢唔到，今日一於就出佐去買新電話啦！

其實都冇乜心理準備換電話，一來又想等Smartone出iPhone，二來諗住拖得就拖、慳得幾耐就幾耐。點知Smartone廢到震，人o地和記出佐成個幾月都仲未挪到貨返o黎賣；而個Dopod舊電又虧到差唔到同埋個電池蓋又爛佐，要搵膠紙貼住先唔甩，情況真係幾折墮。

o係網上面睇佐幾日，發覺都冇乜邊部電話突別o岩心水。由於Nokia、Sony Ericsson係必然唔會睇o既牌子，再加上想繼續用揭蓋或者推蓋o既機，範圍就進一步收窄…

結果睇到LG有新機出，又未用過呢個牌子，今日去百老匯睇都覺得唔錯，就買佐呢部KF750喇，都幾形o丫，黑色做主打我鐘意。個電池蓋好得意，係格仔閃花o黎o架，好似以前o的閃卡咁。


都幾滿意。您話買畀我，當係補返份生日禮物畀我喎，過佐咁耐啦，仲記住要補做乜… @_@

>>August 30, 2008 at 1:22:13 AM GMT+8

2008 年 8 月 16 日 星期六 【清涼】

Usain Bolt 尤塞恩．·博爾特（保特）

新o既世界飛人誕生喇！今屆奧運美國嚴重失利，o的獎牌畀其他國家瓜分晒。


呢條友都真係好犀利，跑o既時候輕輕鬆鬆，仲有時間左望右望望鏡頭…


一百米真係好少見到會贏咁多，呢條友仲要威到降衝線前發現贏咁多就開始收步…結果，佢都係破佐一百米o既世界紀錄，我估過兩日佢都應該可以破埋二百米o既世界紀錄。


咁多樣奧運項目裡面，我最有興趣睇o既都係田徑項目，可能係自己玩過，特別有感覺。


最鐘意佢呢個得戚o既射箭姿勢，夠晒串咀。起步前大會介紹佢o既時候佢已經做過一次呢個動作，贏佐之後又整多次。


好想買佢對金boots呀！


令我諗返起中六o個時o岩o岩轉佐去新學校，第一次參加佢o地o既陸運會，當時我記得我對跑鞋借佐畀人人o地還唔切畀我，我又夠鐘開跑，結果就冇著鞋去跑我o既強項四百米。但係由於新舊學校division有別，運動員質素亦都有別。結果我呢個外來人跑佐三百米已經見到冇人追到我，我就向住看台o個邊同o的社員做晒手勢，輕輕鬆鬆咁贏佐個四百米金牌。

諗起都覺得自己當時真係太過串咀喇…呵呵…

>>September 1, 2008 at 12:03:34 AM GMT+8

2008 年 8 月 15 日 星期五 【清涼】

Finale 結局

搞佐半個月，今日終於都有晒定案。兩個搞事之人，各散西東…佢o地係咪好慘呢？定係我又要一個人做多兩個人o野慘o的呢？

個PA成日都同老細講話想返o黎做，我都同老細出佐口算話有佢冇我，結果最終佢都要留o係sub-reg o個邊，就由得佢慢慢服侍個sub-reg囉。而個女就將會轉去將軍澳做club assistant，其實好過做CCA啦，起碼做會所有個發展空間，將來如果有興趣，仲可以繼續進修o下，話唔定條路仲有得行落去。

所以幾時都係學呀Ken話齋，小不忍則亂大謀，希望佢兩個o係呢件事之中汲取到教訓，以後做人就生生性性，同埋要用虛心o既態度去學o野，以及去適應新環境。

祝佢兩個好運。

>>September 1, 2008 at 12:43:28 AM GMT+8

2008 年 8 月 14 日 星期四 【清涼】

Romance 浪漫

唔經唔覺老妹都去佐成個禮拜旅行，呢個禮拜都係得我同媽媽兩個人食飯。今日係媽媽生日，於是出佐去食飯，咁就畀我遇到浪漫o既一幕…

琴晚媽媽話︰「唔係想我生日都得一個人食飯呀嘛？」咁我今朝就約佐佢出街食晚飯啦，但係柴灣又真係冇乜o野好食，尤其係o係新翠，結果入佐其中一間好難食o既餐廳「椰林閣」度食，結果o的o野食真係好難食，不過算啦，我o地都只係為佐飯聚而一齊食，o的食物質素係點已經係其次。

媽媽話個電話壞佐，今日成日都打唔到電話，幫佢整極都唔得，打開個電池蓋諗住換卡試o下，點知原來個電話裡面有粒釘書釘插佐o係度，可能就係因為呢條釘影響佐o的電波發射所以打唔到電話都未定！

整返好個電話之後，個電話留言信箱即響，慣性動作去聽，原來o係爸爸留言畀媽媽，o丫，唔係，係爸爸唱生日歌畀媽媽聽先o岩，好sweet sweet呀！聽完留言個電話即刻又響，咪就係爸爸囉，我估佢一直係咁畀電話媽媽啦，因為我今日都狂打畀媽媽都打唔通…

媽媽當然係開心到咪咪咀笑啦…講真，一對結佐婚三十年o既夫妻，仲咁鬼神心咁鬼浪漫，我又點會唔佩服呢個爸爸o丫！老豆，您係得o既！

>>August 29, 2008 at 1:20:39 AM GMT+8

2008 年 8 月 13 日 星期三 【清涼】

Custard Longevity Peaches (Shou Bao) 奶黃壽桃

其實唔係新o野，亦冇乜特別，只不過撞o岩我鐘意食奶黃，同埋係我第一次食，所以先成為話題。

自細對蛋類、奶類、牛油類食物都冇乜抗拒o既我，一直都以為自己係唔會肥o既，仲以為可以成世keep住百一、二磅，最近唔知邊個o係更衣室放佐個浴室磅，雖然成身都係又老西又皮鞋咁成身都係「架生」，但係一企到上去，居然有百四磅！！出事了！中年肥胖危機！

您每次飲茶都會叫排骨，而奶黃包幾乎可以話係我每次去飲茶都會叫o既點心。我最鐘意就係將個奶黃包剝皮，食晒佢外層光滑o既部分，跟住成個包o既表面會變得好粗糙，o係呢個時候，最好就係用力啜個包裡面o既奶黃餡出o黎！好味道呀！啜晒o的餡，再食埋個包…

諗起都想食…ccc…不過您實會話我食得好核突… @_@

>>August 29, 2008 at 1:21:03 AM GMT+8