2009 年 3 月 22 日 星期日 【炎熱】

Submission 交功課

好o野！大功告成！終於都做完十三妹份功課喇！唔駛再畀佢催到褲都甩！

趁住有兩日假期，加上十三妹突然劈炮唔撈，佢份履歷同埋求職信，即時拖無可拖，唔做唔得…因為我都想佢可以好好咁生活，唔駛再受埋公司o的怨氣…

您問我點解要咁積極去同佢搞份resume同埋cover letter，違反我一貫「自己的事自己」做o既作風，亦都冇o係您request o個時去幫您，其實您又唔駛咁呷醋o既…

幫佢就一定要o架喇，話晒佢都係我其中一個最好o既朋友（十三妹呢個稱號，唔係普通料o黎o架！），而且我亦欠佢一定o既人情債，加上佢o的英文又唔係寫得特別好，見佢有嘗試自己完成份o野但未成功，就點都要幫o下手啦…

仲有，以我o的「三腳貓」英文水平同埋我寫resume o既方式，都未必能夠好容易咁達到您o既英文水平同埋格式，故此我都係幫個肯聽聽話話，全盤接納o既十三妹好過喇…嘻嘻嘻…

十三妹，您要加油搵工（同搵男友）呀，手停口停呀！

>>March 24, 2009 at 1:21:47 AM GMT+8

2009 年 3 月 21 日 星期六 【炎熱】

"Brother Laughing" 「Laughing哥」

嘩…謝天華真係又試咸魚翻生，繼之前幾年做佐舞王之後，今次又靠個「無間道」式大佬o係套電視劇度搶盡風頭，即使之前醉駕犯刑幾乎要坐監，亦都畀佢o既角色鋒芒所過…

搞乜春呀o的人，真係唔得佢死…Laughing哥呢個角色一死，居然會搞到成十幾萬電視迷鼓譟，低能到同無線要求佢復活，荒謬到不得之了…真係同「港男」裡面o既「復活戰」環節有得揮…

最近呢期，o的人除佐o係forum留言之外，facebook裡面亦日日畀佢炸板，九億幾人個個日日唔係送呢樣就係送o個樣畀Laughing哥，嚴重佔據facebook版面… @_@ o的人真係無聊得好緊要，簡直係走火入魔…

故此，一向唔睇電視o既我，為免同社會脫節，都要攝獵o下謝天華搞緊乜東東，以免畀人淘汰…

電視劇嗟…唔駛咁誇呀嘛…返回現實世界罷…香港人…

>>March 25, 2009 at 1:55:13 AM GMT+8

2009 年 3 月 20 日 星期五 【陰】

Free 自由

好耐都冇睇話劇喇，今晚睇佐最鐘意o既中英劇團上演o既《搶奪芳心喜自由》（A Funny Thing Happened on the Way to the Forum ），係成個月之前買定飛o既，坐o係我認為o既The middle of the middle o既位置，但係點解前面條友咁高o既？！

好好睇？唔算好特別；好劇本？亦唔算好爛；好好笑？絕對係笑死！

長年慮月咁返工放工，日日做到無停手，個「in tray」清極都清唔完，難得今日必定要六點走，趕去葵青劇院睇話劇（歌劇），都只係想尋個開心，令苦悶o既生活得到舒暢o既機會。不過原來個半鐘要由柴灣出發經中環再去葵芳，係好趕的，趕到要o係西隧裡面食麥當當…

主角為得到自由，真係無所不用其技，笑料百出。郵差累累o地o的人勁笑都訓得著，但係只要有o的o野畀我去集中精神，我就絕對唔會恰著的。當然，一套喜劇最終一定要有一個完滿o既大團圓結局，勢估唔到又有o個o的夫婦變成兄妹o既晴天霹靂低能橋段，真係橋唔怕舊就最緊要受，笑到我死死o下…

最後，我想講，我仍然都會極力爭取我o既言談自由，不過我會盡量識得避重就輕咁去寫，以免又無端端嘈一鑊。

>>March 24, 2009 at 1:52:07 AM GMT+8

2009 年 3 月 19 日 星期四 【炎熱】

Sociability 人緣

入佐公司4年，真係要感謝好多人o既提攜、教導同愛護，自從呀Mi走佐之後，我多佐好多機會親身或打電話去接觸其他site或者總公司其他部門o既人，從而建立到一o的好o既人緣，感謝Selina常年o既提攜，佢話好多o野都要我自己去問，唔應該太依賴呀Mi，原來真係好有用。

我知道，唔會個個人都鐘意同我合作，而且我係一個串咀o既人，多多少少得罪人多稱呼人少。不過為佐建立一個較好o既人際關係，呀趙o既哲學係對的，佢係我o地公司o既黃大仙，幾乎係有求必應，吹雞實幫手o個隻，因此o係公司裡面有好多朋友。我當然冇佢咁高層次，但我都會秉承佢o既一貫作風，令我個site成為「幫人之site」。

今日，居然有兩位識佐幾年好同事搵我，一個就打o黎訴苦，聽佢把聲有o的激動咁，話畀總公司某部門連續打o黎幾次狂鬧，其實我咁o既遭遇我都試得多，因為我o地做服務處o既，做得好又冇人讚，冇做錯又畀人賴，做錯佐仲畀人罵，係咁苦的。

之但係我都為呢件事好開心，原因唔係我心涼，而係我不知不覺間，發現原來我o地之間o既友情，居然可以令我成為佢訴苦發脾氣o既對象。你可能會覺得我有o的低能，但係我唔係被虐狂。我只係覺得，當一個人真係信任你o既時候，佢覺得你會明白佢o既感受，所以唔保留咁將佢o既不滿情緒發洩出o係我身上。假若鬧完一輪之後可以重新納入正軌工作，我仍覺得係值得。

另一位好朋友今晚亦都向我透露佐一o的佢o既感情世界，我先知道原來平日大笑姑婆o既佢，居然有o的咁深刻同特別o既愛情經歷，聽得入戲o的o既直頭就覺得好似拍戲咁。異地戀o既成功率幾乎接近零，但係我估唔到原來一向勇字行頭o既佢，原來有時都會選擇逃避。期間，我o地亦交換佐一o的心得同經歷，估唔到面對一段失敗o既愛情，佢其實係好豁達，利害！高手！（更有同事不斷盛傳我o地兩個拍緊拖，其實我o地兩個係好好感情o既姐妹就真）。

非常之感謝呢兩位朋友o既分享同信任，同埋佢o地o係工作上對我o既幫助同埋支持，令到我o係KS工作，雖然超OT勁辛苦，都覺得好溫暖，好有價值。

>>March 20, 2009 at 3:04:53 AM GMT+8

2009 年 3 月 18 日 星期三 【炎熱】

Trap 靠害

幾乎畀人「隊」羅柚，仲要係畀自己友！

想點呀？大佬？靠害咩？點駕車o架？！

見咁多人都拍佐o的駕車片段放上網，今日我又試o下放部手機o係車頭，拍低o的駕車經過，點知一拍就遇著經典o野，真係炒佐都可以做呈堂證供呀（我估）…我將當時間情況cap佐出o黎，等我講解o下當時o既情況先。

圖解（時間序為左至右，每張相距約半秒）︰同Kenji駕車我先佢後去石澳兜一轉，沿途跟住另一架四驅車，一路行發現都有好多地方封佐成條行車線o黎整路。當就o黎到達一個整緊路o既路段前o既一個彎位時（左），一出彎我就見到有兩架私家車為佐扒架泥頭車，飛佐過我o地條行車線（中），大家都開始收油，但未落brake。


圖解︰前面架車突然落重brake，仲要o係兩秒之內停定架車！呢o下真係靠害！但與此同時，兩架扒頭o既車已經返晒入自己條行車線內！我見佢咁dup法，當然亦要落重brake去整停架車…


圖解︰其實兩架扒頭o既車已經入返晒線，換句話說其實前面條友係冇需要「拿」死架車，嘩！大佬！你玩o野咩！咁搞法真係會害死人o架！對頭線兩架車極速飛馳，佢o地扒得頭總唔會慢吞吞等人撞呀嘛，我敢肯定佢o地一開始扒頭就已經見到有對頭車，所以肯定會踩衝油過，前面條友就嚇到dup停晒，幾乎就搞單串燒車禍出o黎喇！條路又落斜又冇防滑沙，即使安全車速都好難急停o架！好在最後o係ABS o既作用下，我架車終於都停佐（右），而跟尾o既Kenji o係響埋o太之後，亦都停佐。


條友足足停定兩秒先再開車（左），我o地亦畀佢o既所作所為嚇到一額冷汗，最後冇事之餘亦都等佢行遠o的先至再開車，費事畀佢害多鑊…


----------------------------------------------------------------------------------------------------------------------------

原來我o係KS四週年喇！

>>March 20, 2009 at 2:11:53 AM GMT+8

2009 年 3 月 17 日 星期二 【晴】

Lost and Lost 失物「冇得」認領

今朝打電話搵您唔到，跟手收到您個短訊，話漏佐個環保袋o係架巴士上面，裡面有好多您見工o的notes，勁唔開心…

您打過去個站頭度，不過冇結果。

教訓o既說話唔需要講，因為您全日都已經o係度自責緊。您認為呢件事好唔「老黎」，因為好似預言佐唔得咁，不過我又唔係咁睇o既。

您話我唔識講o的安慰o既說話，我會講o既係︰「否極泰來」。

我又要講廢話喇。每個人o既運程起跌，就好似波浪一樣有起有伏，而且一定係一起一伏，唔會成日固定佐o係某一個位置。如果搵唔返個袋，好可能係幫您擋佐個低水位都未定，故此唔需要耿耿於懷，亦即係我成日強調o既「小病是福」。

平常心，用平常心去對待，每日都會過得暢快o的。

>>March 18, 2009 at 1:16:26 AM GMT+8

2009 年 3 月 16 日 星期一 【晴】

Improvement 進步

今晚唔知showhappy食佐o的咩屎，load得勁快，唔再好似蟻躝咁慢，搞到我即時有返o的意慾寫o下日記，因為我性急，最憎等。

呢期發覺自己冇乜士氣去做o野咁，成日半偷懶蛇蛇o地咁，雖然都有貨交，但係台面o的o野越堆越多，返到屋企都冇心機做自己o野之餘，欠十三o個份resume又遙遙無期咁，畀佢催到就o黎傻，但係依然冇貨交（做物管最叻耍太極同埋死拖爛拖，仲要厚顏無恥唔怕人投訴）。

仲有您o個篇問題同答案，仲有CCC Meeting份minutes…通通outstanding…幾時死呀又？！

琴日同今日都不斷同o的同事仔分享我個怪夢，班友係咁狂笑，個死人Tim Tim仲要話搵微波爐即係搵食，帶我四圍去搵食呢o的女人娶得過… @_@ 即時奉送中指一大隻畀佢以示我對佢o既嚴重不滿！

唉…辛苦…

----------------------------------------------------------------------------------------------------------------------------

郵差生日快樂~

>>March 17, 2009 at 1:50:43 AM GMT+8

2009 年 3 月 15 日 星期日 【晴】

Nightmare (2) 惡夢（二）

嘩！又有人結婚？！o的人有冇咁結得呀又？

呢對青梅竹馬都算拍拖拍得耐，我估都有十幾年喇陰公！有冇咁誇呀又…anyway，祝福佢o地。


Tim Tim o既初戀情人咁o岩琴日結婚，我o地無聊又傾開o的男女o野，原來個衰仔都幾多經歷o架喎，兩個男人傾o下笑o下，佢就半day收工走人，我就繼續LMS奮勇作戰…

今日最死恐怖o既係，十一點幾又畀個惡夢嚇醒！個夢唔知發緊乜，只係見到突然間公司個女同事無端端拉住我隻手係咁跑，四圍咁搵o野，搵o的乜呢？居然係微波爐！好努力咁掙扎醒佐，之後都唔敢再訓，因為怕一訓返又會追返之前個惡夢…

好嘔心呀，係人都知我最怕肥人o架啦…help…

>>March 17, 2009 at 12:30:38 AM GMT+8

2009 年 3 月 14 日 星期六 【微冷】

Tao Heung 稻香

您話稻香搞緊個「一蚊雞」推廣，想去試o下，既然您覺得o的腸胃ok返，咁就一於睇o下佢有幾好食。

其實小弟對稻香一向並無好感，雖則佢係發大晒o黎做o既酒樓，仲有好多特色中菜館，但係試過好幾次，不過菜式，無甚特別之餘，價錢亦相對高少少，話晒人o地都係走中檔路線喎。

「味，道出真愛」，真係超級廢話，廣告永遠都係廣告，唔好奢望。

呢間稻香有一班敗家o既廚房，完全唔明點解叫o個三碟o野都係「油浸」，有「油浸海味白菜」，「油浸一蚊雞」，同埋「油浸扇貝」。

繁忙o既飯市都唔會諗佢會有幾好服務，等佐好耐都冇人加水，直至有人拎壼茶去加水後，居然放返o係台面一個人坐o係度伸手唔到o既另一邊，吹脹。既然斟得o既，亦唔爭在放近少少個客啦，步程手力相信唔會爭好遠呀嘛…

真係去食海港冇咁嬲。稻香，令人失望。

>>March 16, 2009 at 10:25:00 PM GMT+8

2009 年 3 月 13 日 星期五 【微冷】

Investigation Report on the Refilling Power of Water Closets in the Female Toilet 女廁水箱回水速度調查報告

呢單係勁o野o黎o架，唔係講玩喎！勁認真！

搞乜鬼吹水習作！

話說今日落到去同行動仔班友吹水，佢o地講起要徹查個女廁水箱o既回水能力喎，咁無聊o既事，咁八卦o既我，就梗係要知道佢o地班友做乜東東啦！

原來事緣係個駐廁工有日同老細告御狀，話o的水箱有問題，做到佢死o下死o下咁。我老細喎，份人咁事事關心，就梗係話要了解o下件事係點啦，於是行動仔班友就o係度搵o的方法去試試o的水箱，一方面係要證明行動仔同維修有做o野，唔關佢o地事；其次，亦係我認為佢o地諗歪佐o既一面，就係想證明個駐廁工玩o野，成日離開崗位去執紙皮賺外快。

講真，若果o係凌晨時份做測試，同日頭繁忙時段o既實際情況，一定有出入，但係都可以當係一個參考。凡係一個科學化o既測試，都要make好多assumptions，但係亦都要盡量接近現實情況。務求所有水箱都要o係一個「公平、公正、公開」o既情況之下接受測試，咁先可以好客觀咁睇o下o的水箱係咪真係有問題。

我提出，因為水箱儲水量有分別，印象中女廁有三款唔同o既水箱，所以水箱注滿所需o既時間，會因為水箱大小而有差別。佢o地個report，就連呢樣最基本o既o野都冇留意到，單憑佢o地得出o既數據，即使係做佐幾次o既平均數，亦好難查得出回水時間長短差異o既原因。

由於結果得出時間由15秒至45秒不等，唔同型號o既水箱、水箱配件新舊都會影響到結果。仲有水壓，由總掣去到水箱o既喉管粗幼、長度，通通都會有影響。仲有一樣o野，就係個波曲set o既水箱水位高低，同埋水箱閘掣o既鬆緊… @_@ 咁多factors，可以全部都做到一樣嗎？冇可能。咁o的水箱點可以公平競技呀？！

最後，我覺得最少同類型o既水箱可以比較到o既，而唔同類o既水箱，要比較的話，就最好將個水箱容量同回水所需時間拉上關係，得出一堆數據，先可以比較。

或者睇完上面堆垃圾之後，你都會好似我o的同事所講咁︰「都唔知你講乜！」

不過唔緊要，我o既重點只係想帶出︰

1) 唔好將件事當作駐廁工玩我o地咁，要客觀咁去諗o下驗o下係咪真係o的水箱有問題，要去解決o既就去解決，如果得出結果係正常o既就同老細講根本冇問題。

2) 千祈唔好因為個駐廁工o的工作態度同質素令到自己先入為主有bias，至於個駐廁工有乜問題，最好都係呢件事完佐三個禮拜之後先再提出，以免老細或者當事人以為我o地玩報復或者針對。

份報告佢o地會點present畀老細聽呢？講明先，我冇要求要做份8頁紙o既report o架。

>>March 17, 2009 at 1:48:44 AM GMT+8