2008 年 12 月 30 日 星期二 【颳風】

Engagement 婚約

恭喜恭喜！Tim Tim今次芬蘭之旅完滿結束，亦都修成正果。

記得之前同Tim Tim傾偈，佢話o個日下晝同女朋友會去薄夫林參觀一間教堂，o個度可以租o黎舉辦婚禮，我問佢係咪想o係o個度搞，佢話唔係教眾應該唔會。最正就係我話可能佢女朋友想呢，佢好有信心咁答我︰「如果連咁小o既事都得唔到共識，根本就冇可能結婚。」呵呵，睇o黎佢兩個o既感情都好深厚，加油啊！

好浪漫呀！我要偷相！


>>February 22, 2009 at 2:32:13 AM GMT+8

2008 年 12 月 29 日 星期一 【颳風】

Review 2008 回顧（個人）

講完o的永遠做唔完o既工作大事回顧，就梗係要講返自己o既o野啦！

1月19日︰第一次，或者可能係最後一次，o係黃金海岸商場個天台BBQ，夜晚風景冇話特別靚，但環境氣氛都幾浪漫。估唔到過佐一段好短o既時間想再去，打去問先知間o野已經執佐，太可惜喇…o個度o既燈飾普通，但亦頗襯o個度o既環境。

2月29日︰同婆婆過四年一度o既生日，晏晝趁住食飯時間，送佐札奶白色o既玫瑰花畀佢，勁靚。

3月13日︰買斷部Move仔，擁有自己o既第一部車，但係就冇轉名，因為保費唔係平。

3月29日︰家姐結婚，終於都嫁得出！佢嫁得落手o既都應該係個好好o既男人，再一次祝福佢。

6月15日︰人生第一次撞車，仲要奉獻佐畀停車場條柱角，真係無奈…咁就冇佐幾千蚊，肉赤死。

9月1日︰認識到另一個1980年2月29日o既人，仲要幾乎可以話係日日都見到佢o既新同事，Tim Tim。我估一個人一生之中如果唔係特登去搵呢類閏年閏日出世o既人o黎認識，真係好難識多個兩個。勁！

9月6日︰經歷您屋企o既反(木台)事件，多多少少都更加明白點解您會想搬出呢個屋企。相見好，同住難。受傷害o既，除佐係鬧交搞事o既人之外，夾o係中間o既屋企人亦都同樣受苦。

11月19日︰擁抱多年冇見o既好朋友Joseph，估唔到有生之年仲可以見返佢…

（生活咁dry，諗唔到十件大事呀，八件算啦！）

>>February 8, 2009 at 2:54:54 AM GMT+8

2008 年 12 月 28 日 星期日 【颳風】

2008 Review 回顧（工作）

又到年尾，等我又學o下人o地整個大事回顧先…首先要講o下工作上o既o野。日常工作無鬼聊，做管理層最深刻o既事多數都係人事上o既事，人就係最難管理。今年我回憶工作上o既十件大事，主要都係人事變動。

2月4日︰Cyman報到。呢件o野都可以算係XO級，o係公司搞佐幾壇大o野出o黎，最後都係要同Vicky一齊黯然離去，佢o既performance真係仲衰過呀Mi幾倍呀陰公…細路女始終都係要磨練o下先得o既。祝佢好運。

4月11日︰老細買佐蛋糕同我慶祝生日，夠晒人情味，摷返o的相先知，原來當時我曾經同今年離開個場o既三個女同事居然有張合照，真係邪！

5月8日18點38分38秒︰超級麻煩o既前regional i/c因為搞「禍」佐個超級賺錢盤而被貶為sub-regional i/c，雖然佢曾經收歛過佢o既氣焰，但係冇耐又再返發…而且做人都仲係咁縮骨。

6月8日︰柴灣大水災，年年都係咁浸，做餐死。晨早接到電話o既第一句，就係「pk」…唉…

6月24日︰今年第一次返風更，但係全年就返佐四次，叫做賺多少少OT錢，如果年年都係咁多風打就好喇！

6月30日︰呀Man last day，公司又除去一個毒瘤。若果佢唔係一個女人同埋o係公司做佐咁耐有頭有面，我估之前個site o的工程o野做得仲慢。個場有救喇！

11月3日︰多年o黎商場不斷畀住宅班茂里玩完又玩，係咁蝦得就蝦，今年終於都做返單o野搞到佢o地一幢都冇！老細好o野！Detex locks好o野！

12月7日︰小憂憂放棄仲差兩個禮拜就可以lum到落口o既年終酬金，全身投入佢o既賭博事業，搞到個場short佐三個禮拜o既人手，但間接令我學識佐請一個新人o既程序。

12月24日︰呀李冇年終酬金呢單o野，可以話係殺一儆百，表面公司立場係唔會畀o的閒人o係度白逗人工，good！

12月31日︰Submit佐今年第80個final account，達唔到100呢個目標，多多少少都係因為我五月先可以搞呀Mi留低o既LMS蘇州屎…辛苦足一年，出年仲要繼續做落去…

>>January 6, 2009 at 2:15:09 AM GMT+8

2008 年 12 月 27 日 星期六 【颳風】

Fury 忿怒

放假就最忌畀人嘈醒！不過唔係我忿怒喎，而係個同事。

七點幾，Kenji打o黎話呀李仲未收到今年份雙糧，冇可能o架喎，東亞出糧都收到啦，仲未收到一定事有「QK」。冇理佢o地，聽完照訓。

下晝點幾就到呀李打o黎，話同老細傾過，連老細都唔知點解，問佐人事部話冇，但係究竟畀邊個老細截住佐就唔知，仲要問云云。佢就一定覺得老細玩x佢，但係我又覺得事情未必咁簡單。聽完佢「申」，再訓。

晚上，同Kenji再研究，都覺得老細份人講o野同做事斬釘折鐵，面對呀李下晝o既質問亦都冇需要扮傻仔，箇中一定係有人做o野，雖然暫時未知原因，但係我o地o既結論係︰結果係唔會改變，呀李今年都應該唔會有雙糧。

種乜o野因就收乜o野果。我唔係講風涼話，即使唔計較佢o既表現，單以為o既工作態度，又點會唔得老細或者o的上大人憎o丫…都係o個句︰算罷啦！

----------------------------------------------------------------------------------------------------------------------------

Joseph生日快樂~

>>December 28, 2008 at 5:54:18 AM GMT+8

2008 年 12 月 26 日 星期五 【颳風】

Reflecting Road Studs (Light Dome) 反光路釘

o係網上面查車廂燈反射問題o既同時，又學到o的新o野喎！

根據運輸署o既綱頁，呢o的咁o既反光路釘，有幾隻顏色，最左紅、右線黃、路口綠，都幾得意。

呢o的o野，令到駕駛者即使睇唔到條線，架車踩上去時都有起伏感，令人有所警惕。不過佢o既設計，亦都有為車上o既人著想，就係當架車碌過o既時候，係可以壓低少少，令到架車冇咁拋。

更神奇o既係，o係某生產商o既網頁睇到，原來當o的頂畀車壓低o既時候，居然設計到裡面有塊o野可以刮一刮個反光面，實行自動清潔，個design真係有諗過o架喎！

法例︰第374G章 第13條 路釘

運輸署︰道路使用者守則

某生產商︰Industrial Rubber plc

>>February 16, 2009 at 2:37:30 AM GMT+8

2008 年 12 月 25 日 星期四 【颳風】

Ai Iijima 飯島愛

OMG！唔係呀嘛？飯島愛自殺死佐？佢好後生咋喎…實在太可惜喇…

以前好鐘意買書，其中一本就係佢寫o個本自傳《柏拉圖式性愛》，雖然有指佢o既內容吹水唔抹咀兼講大話，但亦都畀佢o既經歷吸引同感動。今日聽到佢突然間死佐o既消息，真係有o的唏噓…


當年o既AV同而家o的四仔所玩o既o野就梗係差得遠，但係以當年o既道德尺度，佢又係一個突破。報紙話可能係自殺，又可能係病死，而家仲查緊。

其實感情事不得已，都十常八九，痛過之後就要忘記。生老病死亦係每日發生無限次、平凡不過o既事罷了。

>>February 16, 2009 at 2:02:09 AM GMT+8

2008 年 12 月 24 日 星期三 【颳風】

Supernatural Phenomenon 超自然現象

超級嬲呀！要我特登騰返公司，搞埋o的無謂o野，仲要係因為o的人勁白痴、勁無用！吼！

難得連放一個禮拜假（大假、例假加補假），但係做得物管呢一行，你想完全抽離唔理公司o的o野，機會率係等如零o既，否則亦難免收到公司o的友仔o既通風報訊，講你知公司有乜事發生。

今日返去，就係因為o的友仔話counter部fax機fax唔到o野。完全唔知邊條友咁多手，走去搞部fax機o既settings，真係唔知邊條粉腸咁白痴，將條fax線個number，set佐落部機個prefix度…試問每次打出都係先打一串錯o既數字，又點會fax到o野？

更白痴o既事當然係一不離二，就係當我set返好部fax機，自己fax o野去寫字樓條線試機時，寫字樓部機居然冇紙出！！搞乜春呀？！來來回回上上落落幾時，條線係通但係就fax來fax去都冇紙出，搞o下搞o下先發現寫字樓部fax機個尾蓋居然打開佐，o的紙去晒部機個羅柚度出！！！！！！

火都o黎！邊個做o既好事呀？仲要我唔講係冇人知o個隻，你一出聲o的人就話︰「唔怪得咁耐都收唔到fax啦…」

妖…嬲都震！果然係比復活島人頭像更誇張o既「超自然現象」，正常o既理論根本就冇辦法解釋到。

>>February 19, 2009 at 1:54:59 AM GMT+8

2008 年 12 月 23 日 星期二 【颳風】

Dome Light 車廂燈

或者您會覺得我好無聊，不過我真係已經花佐好幾晚時間o係網上面係咁search，搵來搵去，無論係香港、美國或者其他用英文為主o既國家網頁，都搵唔到有指名道姓o既rules、regulatons或者laws，係講行車時唔可以著「車廂燈」。

吹脹！我放棄喇。

網上可以搵到o既解釋︰
「由於外面暗，裡面的燈光一開，可將擋風玻璃視為平面鏡，一部分光發生反射，從而會將車內的景物成像在擋風玻璃外，即司機的眼前，會與車前景物重疊，影響司機視線，十分危險。所以，夜間不能在車內開打。」（中國雅虎知識堂︰為甚麼夜間開車車內不能開燈？）

比較近o既法例就只有呢條，不過如果要告o既，一條「不小心駕駛」o既罪名都已經入晒啦︰
「在展示任何獨特而又亮著的燈時，在道路上駕駛汽車，除非該燈符合《道路交通(車輛構造及保養)規例》(第374章，附屬法例)第VII部的規定。」（雙語法例資料系統︰香港法例第374G章︰道路交通（交通管制）規例，第47條︰汽車上的照明，第(2)款第(c)段）

究竟呢個係common sense、common practice定係乜呢？我真係好想知，而且仲要係有據可依，唔係口講口賠o個隻…究竟有冇人可以答到我？

>>December 27, 2008 at 4:18:03 AM GMT+8

2008 年 12 月 22 日 星期一 【颳風】

用免提都犯法?

讀者M：「本人有幾個 車時使用手提電話o既問題：1.如果(手查)車時用免提裝置打電話算唔算犯法？2.冇戴handsfree叫人o地幫手拎住電話放o係司機耳邊講又得唔得？3.用speaker講電話又算唔算犯法？

梁永鏗律師：「有關行車時使用通訊器材的法例列載於《道路交通（交通管制）規例》（第374章，附屬法例）第42（1）（g）條內，根據讀者第一個情況，行車時(手禁)handsfree o的掣打電話一定犯法，因為手已離開(車太)盤，有機會影響行車安全；第二個情況都有機會觸犯法例，因為雖然由乘客拎住電話講，但司機需要轉彎扭(車太)時，可能影響司機而構成危險；第三個情況用speaker就有可能犯法，亦有可能唔犯法，主要視乎當時你是否校了自動接聽，如果是自動接聽就不犯法，但要按掣接聽，嚴格 講都可以構成危險，所以算犯法，就算用緊speaker但仍然(手查)住個電話都屬於犯法。

最後梁永鏗律師指，所有法例嚴格執行的話，凡用手去按掣接聽的免提裝置都是犯法，只有校了自動接聽才不會犯法，違例者最高可被罰款二千元。

資料來源︰壹蘋果車網

>>February 8, 2009 at 4:06:43 AM GMT+8

2008 年 12 月 21 日 星期日 【晴】

Winter Solstice 冬至

12月22日是冬至的日子。中國人很重視冬至，有「冬大過年」的說法。但除了與家人吃飯外，冬至還有甚麼意義？

冬至是廿四節氣其中一個。地球環繞太陽公轉，太陽相對於地球的位置每日不同，這個假想的軌道稱為「黃道」。廿四節氣就是太陽在黃道上24個不同位置（每個位置相差15度）。

廿四節氣出現的日子相當穩定，常在某日期前後三天內。

天文學上，冬至是太陽直射地球南回歸線的日子，也是北半球日照時間最短的一天。冬至過後，太陽直射的位置開始向北移，北半球日照時間也開始增加。

冬至不是最冷的一天，因為地面熱量仍在釋放。俗語有云「冷在三九」，意思是冬至後第三個九天（即廿七天）才是最冷。

冬至過後就是小寒及大寒，然後就立春了。

資料來源︰氣象．人．語

----------------------------------------------------------------------------------------------------------------------------

今晚當然係要留o係屋企食飯做冬，好多(食送)呀，睇o黎之後又要食幾日隔夜飯… @_@

>>February 16, 2009 at 12:55:12 AM GMT+8