2004 年 4 月 19 日 星期一 【晴】

唔，琴日老細同我講左我resign後既AL如何處理，不過佢竟然叫我同佢夾口供．．．十分奇怪！不過算啦，都走囉，咪幫下人囉．．．我最緊要錢拎番就得啦．．．

今日約左個朋友食飯，佢係工作上遇到好多不愉快既事，唉，聽完之後自己都不其然有好多野都想分享，因為自己都實在有好多不愉快既事情發生左係自己身上，但係我卻唔可以講出黎，確實有難言之忍．．．唉，算啦．．．有好多野總係唔到我去講，亦唔到我去控制，或許到左一定既時候，神自然會有佢既安排啦．．．係咪？

>>April 20, 2004 at 2:08:23 PM GMT+8

2004 年 4 月 18 日 星期日 【晴】

唔，我琴晚成晚冇訓到，由同老公傾完電話點幾鐘之後，直至五點幾先至訓得著，我足足喊左幾個鐘頭，我迫自己有一個決定．．．但係最終都係比唔到自己．．．好辛苦！

老公琴日好突然同我講話佢去左買樓，仲要好大聲既語氣同我講，層樓係屬於佢同佢阿媽既，我係冇份！我唯一可以參與既，就係揀家私，同埋清潔間屋．．．當時我好ought，亦都好唔開心係度問，點解老公要咁樣對我？我唔係介意話唔預我份供樓，而係我好擔心日後如何．．．

我要既係一個好錫自己既老公，而唔係錫阿媽，關心身邊朋友多過老婆既老公．．．我期望既係一個幸福既家庭，當中我有被愛，被尊重，被接妠，有權力，有地位，能參與其中的，令我有歸屬感的，有一份兒的．．．我唔係只係想要一個有瓦遮頭既地方罷了，而當中我知道自己將會冇地位，冇權力，冇份兒既地方，自己只係一個過客／同屋主既身份罷了！講真，日後個老公要我同佢捱，但係佢好錫我既，雖然只係住細細間屋，但係我都已經好滿足喇．．．我唔係只係要一個比我住既地方咁簡單．．．並且我唔會有咁大既壓力，因為我唔洗一次過去面對同適應三個新既面孔，而對方只係需要面對同適應我一個罷了！我由始至終都係最冇得揀既一個，點解工作係咁，愛情生活既係，樣樣我印冇得選擇，樣樣都係要我硬食去面對？其實人家聽落好似幾好丫，唔洗有份供樓可以有得住，唔係好事咩，個老公好鍚你丫，唔洗你咁辛苦．．．？但係，又何曾想過，日後既生活又會如何呢？

我可能實在太杞人憂天吧！或許好似早左少少去擔心．．．但係，我覺得如果一日自己仍然諗住同老公一齊，我就要面對呢d野，因為我唔想有任何不幸既事再發生喇．．．但係，我想左一整晚，完住冇訓過覺咁一路想一路不禁地哭，我真係好辛苦，我面對唔到咁多突如其來既打擊，我覺得好辛苦．．．我而家總係變得好唔敢嘗試走前一步，經常卻步，因為我真係對自己冇晒信心，我覺得自己好無用，點解神要我面對咁多野，我往往係冇信心能夠克服到，過度到，我唔單只對自己冇信心，就連對身邊人，對神都沒有信心了，我好失落，好沮喪！亦都好混亂．．．我只知自己仍然好愛老公，我唔想放棄，我仍對我地之間有一定既期望，我期待能夠同老公一生一世永不分離．．．但係我卻沒有信心．．．神呀！你已為我安排了很多，但你可否比多些啟示我，讓我有信心地繼續行我要行既路．．．

>>April 19, 2004 at 2:56:39 PM GMT+8

2004 年 4 月 16 日 星期五 【雨】

唉，老公今日真係好嬲，佢終於睇左我寫比佢既電郵．．．我知道我真係好對佢唔住，咁樣話佢，不過，真心講句，我都係想佢好先咁講，如果我自己冇心佢好，我冇心同佢一齊既，我唔需要咁緊張佢丫，我大可以有佢死，係咪？但係，我知佢永遠都唔會明白我既心意，佢只會覺得我係度話佢，唔尊重佢，令佢唔滿意，或者甚至係想我同佢分開．．．！！不過，我知道自己真係仲好愛佢，如果唔係我唔需要同佢講咁多野，我唔洗做咁多野去安慰番佢，去tum番佢，去等佢原諒番我．．．我都係好愛佢架，但係．．．唔知呀，而家個心好矛盾，好驚，好唔知點．．．我唔可以再受挫折架喇，因為我而家真係好傷，我頂唔住架喇．．．．我好怕我會死，真係好驚．．．希望唔好既事唔好再發生．．．！！

我想同老公講，對不起．．．我真係好愛佢，我唔想佢離開我呀！

>>April 17, 2004 at 3:08:21 PM GMT+8

2004 年 4 月 15 日 星期四 【陰】

唉，今日終於交左封辭職信比老細．．．唔知點解，個人真係好down，尤其因為聽日中心有大型活動，個個同事都好忙咁為聽日既活動而工作，但係因為自己聽日冇份，所以好似好冇野做咁，同事問我：你攪掂晒聽日既野拿？我當時真係唔識答佢，只係笑左一笑，跟住就話：我聽日留守中心嘛！但係其實個心真係梗住梗住架．．．唉，好唔好感受．．．

唔，頭先同老公嘈交黎，唉，又係為左d小事囉，我都知自己衰先架喇，硬係要咁，真係衰．．．頭先自己一怒之下send左個e-mail比老公話佢．．．不過我send左之後先至識黎後悔呀！都唔知點算．．．我知老公一定會好嬲架喇．．．好驚呀！！

>>April 17, 2004 at 2:55:28 PM GMT+8

2004 年 4 月 13 日 星期二 【晴】

今日終於發生左不幸既事係我身上．．．果一件已經同我追逐多時既事件，終於有左一個結果同了斷！！

唉！老細今日叫左我入房，佢扮晒好似好不幸既樣同我講，中心決定唔再續我約．．．其實我自己都已經心中有數，所以當時並冇特別既反應或者唔太開心既情緒，不過，我最嬲既係，果條咁既粉腸，佢用refernce letter去大我，強迫．．．或者可以話係說我，自己寫辭職信，當係我自己辭職，而唔係中心終止我既合約或者不續我約．．．佢話只有呢兩條路我去揀．．．我頂佢丫，大晒呀，根本我冇路可揀，無論係點都對我冇咩影響！佢仲不斷係度話：如果你自己resign，對於中心層面，你就係辭職，而唔係終止合約；而對於你黎講，又唔洗背住不被續約既名義離開，而且份reference letter都可以寫得好d，又唔洗佢寫report點解要唔續我．．．．其實，我真係好憎老細，佢竟然講到出口，唔續我唔係總會既意思，係佢既意思，所以叫我唔好怪總會，要怪怪佢．．．仲有，我最忟既係，佢最後竟然警告我，話之前佢同我所講既一切，絕對唔可以同任何人講，包括中心同事同埋外間既人，因為佢怕流傳出去係佢迫同事辭職，而唔係我自願辭職．．．我呸！真係乞人憎．．．佢而家擺明係貓哭老鼠．．．係度扮晒佢都好為我設想，其實佢係度諗緊有咩縮數，可能唔洗中心負責或賠償，跟住仲可以趕我走添．．．

冇架，東家唔打打西家囉．．．唔洗死既．．．講真，我當時真係幾嬲，而家佢擺明係寸，又係度警告我唔准唱佢出去．．．唉，我而家都諗緊究竟點好．．．但係佢已經迫左我要我resign，要我今星期六比信佢喇．．．真係冇野好講．．．我真係要好好咁睇清楚我份contract，睇下有冇野要fight，我唔想比人玩謝，又唔想蝕本！！

>>April 17, 2004 at 3:22:45 PM GMT+8

2004 年 4 月 11 日 星期日 【晴】

唔，今日同左爹地媽咪上左琛圳行街，都幾好丫，本來平時冇咩時間陪佢地，難得呢一個復活節假期足足四日我都陪足佢地，都算係孝順喇．．．

反而老公就見都冇見過一面，連電話都冇點聽過．．．唉！算啦，無謂阻住人嘛，係咪？老公佢又要忙於工作，又要忙於應酬佢既好兄弟喎，點會有時間陪下我呢？我同家人一齊唔係仲好咩．．．唉，心淡架喇，乜都淡晒啦，仲可以點呢？！不過順其自然囉，想見咪見，橫掂冇左我仲有大把朋友陪佢既，咁我咪陪下家人囉，係咪？

唔，聽日又要開始工作喇，真係好唔捨得個短短既四日假．．．跟住落黎仲有一條長長既路我要走，希望神會比啟示我，讓我知道點樣走我餘下既路啦．．．

>>April 12, 2004 at 2:50:19 PM GMT+8

2004 年 4 月 10 日 星期六 【晴】

哈，今日好衰，因為琴日太累，所以今日起唔到身返教會．．．爹地佢叫左我好多次起身都起唔到呀，後來佢都放棄左再叫我起身，自己同左媽咪返左教會，屋企得番我同妹妹．．．我訓醒果時已經係十二點喇，真係訓左好多好多．．．不過精神晒啦．．．跟住下午就同妹妹去左食飯行街，仲shop好多野．．．嘩，又大出血，一轉親季往往都係咁．．．其實我係眼見而家既天氣好似暖左好多，我先至敢買短就衫咋，之前一直忍住呢．．．

媽咪爹地話聽日去琛圳行下，所以我又要幫手做導遊喇．．．唔去唔得呢！希望將一切交比神，希望聽日過程順利啦．．．

近日可能放假，所以個人輕鬆左好多，亦放低左少少野，不過自己真係唔知係咩野．．．同好姊妹傾完計後，都好似冇咩特別，覺得始終係要面對，只係自己硬住頭皮去面對吧．．．我其實先兩日發過一個夢，夢中講到老細無啦啦同我講話其實冇諗住唔續我約．．．！唉，唔知係咪日有所思，夜有所夢呢？其實問心，自己係咪真係唔想走？真係唔知，其實一直都係身邊既人動搖我有如此既想法，而唔係自己既想法吧！如果真係打算續我約既，我相信自己可能會應承．．．我估我有咁既夢，可能係因為果日個同事同我講，我老細將會食第二批人調到觀塘既中心既同事卦，所以我估自己先有咁既暇想．．．算吧啦，我知幸運唔會發生係我身上既，我將一切交比神喇，我唔想再自己執著d咩野，我只係想自己開心去過埋下半生！

>>April 11, 2004 at 4:07:37 PM GMT+8

2004 年 4 月 9 日 星期五 【晴】

哈，今日一朝早六點幾起身，而且琴晚成晚訓唔到覺，好慘，成日呆下呆下咁．．．不過都覺幾開心，因為可以同家人一起玩了一日嘛．．．感覺唔錯，仲映左好多相添．．．不過一返到黎已經好眼訓，跟住就走左去訓囉．．．哈．．．

老公聽日同後日會去camp，因為活動成功及順利啦，因為佢地會行山同露營，希望天公造美啦，唔好凍同落雨啦．．．為佢地祈禱呀！

>>April 11, 2004 at 3:56:38 PM GMT+8

2004 年 4 月 8 日 星期四 【陰】

唔，琴晚行夜山黎，過程都算幾順利呀，d仔真係後生可為，行得鬼死咁快．．．睇黎下星期行鳳凰山一定考唔到佢地．．．不過會考到我呢．．．唉，真係老喇，同唔到d後生比，行兩行就要抖喇，加上少運動呢，真係慘．．．比人話係阿嬸添！

今朝返到元朗已經成七點幾喇，本來想去老公度訓，訓醒先至算啦，點知上到去，見到佢有朋友黎左佢度訓．．．當時真係好嬲呀，因為我一早已經同佢講左我會上去，點知佢竟然唔記得左，真係激氣．．．咁點？我最後咪好嬲咁走左囉，返屋企囉，唔通人地唔歡迎我都賴死咩．．．真係好激氣．．．後來我訓醒之後send左個e-mail比佢，話左好多野，發洩發洩下！

唔，聽日係教會既旅行活動，希望聽日會順利同開心啦，因為好耐冇試過一家人一齊去輕鬆同玩下喇．．．不過聽朝要一早六點幾起身，真係好慘呢！

>>April 11, 2004 at 3:50:10 PM GMT+8

2004 年 4 月 5 日 星期一 【晴】

今日冇咩特別，同樣帶仔出去觀塘上堂，又係好無聊既一日．．．帶完班仔之後，同左老公食飯，本來應該同個同事fairwell既，不過我唔記得左，約左人，所以真係唔太好意思．．．

唔，今日同樣地唔係好想見到老闆，成日對佢好似避之則吉咁，心中想，最好唔好叫我啦，因為真係唔多想同佢講野囉．．．不過琴日我都親佢走我都走人囉，因為唔想煩喇．．．

今晚同個好姊妹傾電話，大家傾左好多野，亦分享左好多野．．．我講左好多我對工作既看棧法，亦同佢分享左好多對於愛情既野．．．唉！點都好啦，希望我同我個好姊妹既心結都可以早日完結，快d有個好好既結果啦．．．

>>April 7, 2004 at 10:56:29 AM GMT+8