2004 年 11 月 10 日 星期三 【晴】

雖然醫生叫我抖埋今日，但係見今朝冇咩野囉，都返工啦，唔通真係唔洗do咩！我仲要養家架嘛！今日返工真係好忙，冇返幾日工就攪到好忙咁，尤其要跟番先兩日missing果個女既事，今日仲要陪佢媽咪接佢放學，跟住同佢去警署見madam，個madam都大讚我係個好社工，因為好少社工肯跟埋d case一齊去見差人！講真，我都唔多想去，因為我知d差人好麻煩，我自問唔多識點同差人打關係，而且我都要維護我自己client既野，所以好麻煩．．．但係為左我想了解多d警方會點樣攪我個女既case，我先至點都要去一去咋．．．聽日仲要見一見個女呀，睇下佢今晚同屋企人果邊傾成點．．．呢個個案真係有排攪喇，希望有好成績我睇到啦，咁我就好安慰架喇．．．今日真係好慘囉，為左個case，連食飯時間都冇，食藥都冇時間食，仲連厠所都冇時間去呀．．．好耐冇試過咁折墮喇．．．唉！攪到放工果時又肚餓，又胃痛，又口渴，又累．．．好慘呀！

個女就承諾左好多野．．．希望佢真係可以做到啦．．．唉！神呀，請你協助佢可以多d自制能力啦，因為我真係好擔心佢呀！希望神你眷戀下佢啦．．．

>>November 10, 2004 at 4:15:23 PM GMT+8

2004 年 11 月 9 日 星期二 【晴】

唔，今日病左，好慘！今朝一早又氣喘，攪到又返唔到工．．．唉！醫生仲叫我放兩日假喎，想死咩，唔係做呀？我仲有大把野跟呀，先兩日個missing女仔我都未知佢而家點呀，聽日有排攪喇．．．唉！今日成個人都冇乜心情呀，睇完醫生就係咁訓，但係都好似差唔多咁．．．唉！真係好怕，成日好似好依賴醫生咁，如果呢個世界冇左醫生，我肯定係第一個人死左呀！

>>November 10, 2004 at 4:09:15 PM GMT+8

2004 年 11 月 7 日 星期日 【晴】

今日好正，因為有個auntie請左我食buffet囉，哈，雖然唔係一d咩野好貴既buffet，不過都幾正架，係正小熊國隔離，食完野又可以去果邊行行，餐廳裡邊仲有好多bear bear既擺設，真係食都食得開心架．．．哈～

我食左好多甜品呀，因為我永遠去食buffet一係就食魚生先，跟住就全攻甜品喇．．．食左好多呀，今次一定肥死．．．我仲好驚會又咳死添呀！

>>November 9, 2004 at 6:31:16 AM GMT+8

2004 年 11 月 5 日 星期五 【晴】

唉~ 真係煩．．．之前imissing果個女仔又再次係今日唔見左．．．真係對佢好失望．．．尤其係佢既家人同學校老師．．．我都好心痛．．．本來見佢呢幾都好好地既，好乖咁日日好準時返到屋企，我仲諗住送份小禮物比佢讚下佢，鼓勵下佢，仲寫左封信比佢添．．．點知．．．就咁就出事喇．．．其實我都估到佢會去左邊度玩，但係無奈我又唔可以將個女仔既事話比佢媽咪知，始終呢d係我地做社工既守則，我真係好兩難呀！有時要守秘密都幾辛苦架，尤其係咁樣既時候．．．唉！好麻煩呀！希望佢聽日乖乖地出現番啦，我之後又有排跟喇．．．

>>November 7, 2004 at 11:03:17 AM GMT+8

2004 年 11 月 2 日 星期二 【晴】

今日去左missing果個女度做家訪．．．都幾好，因為眼見個女都對今次件事有少少悔改咁，我都好安樂，佢都願意承諾我好多野，我都對佢有信心可以做得到，而且眼見佢屋企人好似都對佢好左，大家關係開始好轉咁，我都好開心呀！希望佢可以堅持自己落去啦，我會為佢祈禱架．．．而我自己？近日真係覺好疲於奔命咁，真係好辛苦，總係有d一波未平，一波又起既感覺咁．．．不過做得外展社工就真係預左有呢一刻隨時出現囉．．．不過，見到d仔女有改變，自己其實都好開心同安慰既．．．

>>November 4, 2004 at 3:33:59 PM GMT+8

2004 年 11 月 1 日 星期一 【晴】

唉~ 都唔知咩事，今日又爆case喇，係個missing case囉，個女仔既阿媽喊住咁黎搵我話個女唔見左兩日，已經報左警，但係又好擔心，好想出去搵下佢，又想去警署到比多少少資料警方，所以我都冇計，要陪個媽媽去．．．後來攪左一大輪，好在都搵得番個女仔．．．唉！有時都幾心up架，見到個父母好擔心子女，但係d仔女又唔理阿爸阿媽感受，又唔明白我地做社工都好慘架，兩邊夾住做人，又要保住同佢既關係，但係又唔可以得失父母果邊．．．真係好煩！

>>November 4, 2004 at 3:29:35 PM GMT+8

2004 年 10 月 31 日 星期日 【晴】

今日本來朝早都好好地，因為送完男友返工之後就返左屋企，見三點幾眼訓就訓左覺喇．．．一訓訓到六點幾，點知就係比個電話嘈醒左．．．原來係中心打黎，我有個p.case搵我，話琴晚已經冇屋企返，今晚都唔知點算．．．冇計啦，我唯有都要出去一次攪攪件事啦．．．其實做外展都預左周不時都要爆case架喇，點知就係正我放假既時候發生事．．．所以呢，外展同工冇個可以比細路既手提或者call機都幾煩，而今次係個細路好彩上左中心而中心仲有人係度咋（琴日中心本來係唔開門架，而咁o岩仲有同事係度而又開門比佢入去搵我咋！）

最後琴日攪左成晚，而家件事都未完結，因為個細路仲要面對跟著既日子同生活．．．不過好在佢係社署既個案，咁我都唔跟得喇，要果邊跟番啦．．．我唔係推卸責任，我都想跟佢架，我同佢都幾好關係，只不過社署跟緊我唔可以介入咁o者．．．真煩，聽日要call番社署果邊．．．

>>November 2, 2004 at 4:08:04 AM GMT+8

2004 年 10 月 30 日 星期六 【晴】

今日好好玩呀！今日係萬聖節，所以同朋友仔一齊出左去蘭桂芳玩．．．唔，今年比起往年氣氛好左好多，可能今年d經濟好左，d人莆洗錢多d啦，所以d人都好用心去打扮同化妝咁，真係好正架，我地係間bar度飲野傾計，又四圍搵d得意打扮既人映相，當然我地自己都有扮野，有街既人都有搵我地比佢地映相．．．成個過程都好正啦，又係bar度識到人，仲一齊玩添，有年青人，有鬼佬咁，真係好好feel囉．．．仲係間bar度跳舞呀，真係好耐冇跳舞喇，唔認老都唔得，跳三首歌都已經累喇．．．哈~ 我決定聖誕再去玩過，因為我都好enjoy咁既生活架！

>>November 2, 2004 at 4:31:41 PM GMT+8

2004 年 10 月 29 日 星期五 【晴】

哈！今日好開心呀！因為今日去左一個autine屋企玩萬聖節party呀！我地每個人都為今日呢個活動而打扮，我扮左一個鬼格格既樣，好抵死架，我周圍同人講：”我叫寧妃，我係屈係後官死，我係比一條紅菱吊頸死架．．．我死得好慘！”真係好好玩．．．因為我地今日叫左pizza同家鄉雞，所以每當一送野黎，我地就出去玩人，嚇人．．．點知後來比一個送pizza既哥哥玩番轉頭，真係好好玩呀！唔，我估仲有機會既話，我會再參加咁既活動，我好鍾意呀，因為可以癲番一晚，將自己一路累積既壓力舒緩下，真係開心好多．．．

聽日我又再出動，去蘭桂芳玩呀，約左朋友仔一齊扮野．．．哈，好期待聽日呀！

>>October 31, 2004 at 6:28:06 AM GMT+8

2004 年 10 月 27 日 星期三 【晴】

今日好慘．．．其實琴日感覺到自己病喇，所以已經請左病假，不過就冇睇醫生，點知今日就黎發病，仲要返三節工呀，所以好慘！後來都要返工中途去左睇個醫生，如果唔係我諗死左喇．．．好辛苦呀，成日wing到死，又係度咳，好驚會突然氣喘發作呢．．．不過好在都捱過左一日！聽日仲要返早呢，真係要好好休息呀．．．

真衰，近幾日好冇心機返工，因為成日諗住星期六同日可以玩萬聖節呀，真係想快d到呢！

>>October 31, 2004 at 6:23:14 AM GMT+8