2004 年 6 月 1 日 星期二 【乍寒還暖】

唔，琴日同男友嘈交．．．今次好轟烈．．．唔，其實真係唔多開心．．．雖然而家已經冇野，但係都好擔心日後再會發生咁既情況．．．因為之前都曾經係咁．．．

講真，我自問自己而家已經好努力去做好自己，去改變自己．．．但係偏偏冇人見到呢？我好傷心呀！雖然話自己知道咪得囉，但係，有時候我都想佢都可以見到．．．

其實我近日好大壓力，我根本唔想比人知，因為我知身邊既每一個人，包括男友，家人，朋友．．．都同我一樣，每個人都有不同需要忙碌既事，不同既壓力．．．所以我心目中只有默默祈禱，希望神會聆聽我，可以給予我力量，給予我能力去面對所有困難，所有壓力，所有問題．．．因為我已經唔知道自己可以再做咩野喇？事業冇左，理想仍繼續搵緊，感情亮起紅燈，家庭出現經濟困難，好多好多野圍繞住我．．．好辛苦，我真係好想大叫一餐．．．！好想大聲問一句：點解？！我知，神已經有佢既安排，佢係要我經歷下一些困難，挑戰緊我，我同男友，我同家人既耐力，是否能夠一起共渡困難，會否自我放棄．．．．不過真係好辛苦喇，我仲可能頂多幾耐呢？真係唔知．．．好frustrate，好大壓力，好有anxiey！

誰人能明白，體諒我呢？神呀！

>>June 3, 2004 at 3:24:51 AM GMT+8

2004 年 5 月 31 日 星期一 【乍寒還暖】

唉，今日係第一日唔洗再返工住既一日．．．感覺．．．唔識形容！琴日同事們同我歡送，我都好感動，因為我真係感受到有一班好支持我既朋友係度同我一齊渡過囉！唉，今日開始我都唔知可以點渡過喇．．．好無奈！個個都話：咪當放假囉！講真，我寧願唔放有工開好過喇．．．

今日同舊同學吃飯，我都唔多想提自己而家既近況，因為真係唔想再提．．．唔知咁既境況要捱到幾時喇．．．

>>June 1, 2004 at 4:29:11 PM GMT+8

2004 年 5 月 28 日 星期五 【晴】

唉，今日確實好感慨，因為今日攪伴你高飛既畢業禮，見到d仔仔女女個個都咁比面黎參加活動，其實而家好感恩，加上見到佢地個個都話唔捨得我走，又寫左幾句話比我話好多謝我既教導，又話識到我好開心咁．．．唉，好心up呀！講真，我真係好唔捨得佢地同d同事架！

不過事實總要面對，下星期一已經係last day喇，真係好有感受．．．將要離開一個我存在左兩年光境既地方喇，當然係好唔捨得啦，不過我覺得我走都唔會抱住任何怨恨走，因為已經係冇用喇．．．而家要做既，就係希望可以早日搵到份工啦．．．唉，而家世界難撈，都唔知幾時先可以搵到份工喇．．．神呀，希望你給予我機會重新振作啦．．．

>>May 29, 2004 at 11:28:56 AM GMT+8

2004 年 5 月 22 日 星期六 【晴】

唔，今日都全日好free，冇乜野做，只係得閒同爹地媽咪去飲茶買餸咁，又執下間房同屋企咁，真係好舒服．．．不過當我諗到我將會有一段日子係咁過既時候，我真係好死氣沉沉一番喇．．．唉，都唔知點好，而家又少工o岩，又冇任何消息喎，真係好擔心，但係又唔想比屋企人知，要佢地擔心埋一份．．．唉，希望去完個旅行番黎之後，打個白鴿轉番黎之後，可以行番個好運啦．．．

>>May 24, 2004 at 11:16:15 AM GMT+8

2004 年 5 月 21 日 星期五 【雨】

唉～今日部電腦short左，係咁壞，都唔知咩事．．．加上先幾日成日爆case，攪到個人好忟呀，成日發脾氣．．．唔，雖然我就走喇，我係唔應該再跟任何個案，但係有時見到又唔夠同事，而且有時d case又只係想同我傾時，我唔介入都唔得囉．．．唉，其實我都唔知做乜，明知自己就走啦，唔知點解都可以咁用心落去做．．．老公話我都走喇，就算我再做任何野，做得幾咁好都唔會有人欣賞，因為已經冇用喇．．．唉，我都好心up架，因為好矛盾．．．唔，仲有一個星期就離開喇，而家仲未搵到工，我真係好擔心好驚．．．希望神可以幫助我啦．．．

>>May 23, 2004 at 5:51:38 AM GMT+8

2004 年 5 月 19 日 星期三 【晴】

唉，今日真係極度忙碌．．．一朝早就要去市中心搵旅行社攪去台灣自由行既野，唉，攪到幾死耐先攪掂，後來仲又話刎乜物物咁，又話同我整唔到台證咁，好煩．．．唉，算啦，都無計，鬼叫自由行就係咁架喇，旅行社乜都唔會肯幫你做．．．不過而家報左就冇野再可以嘈架喇．．．

跟住之後趕番中心，點知又發生左事，有個女失蹤左，咁我又要搵佢，同佢阿媽電聯，又落左去元朗搵佢搵左幾個鐘，後來終於人搭人先搵到佢身處何方，咁我咪即刻過去，同佢傾左兩個幾鐘，之後傾唔埋欄，咁之後再要同佢阿媽傾．．．足足最後我成八九點先有一粒飯同一滴水落肚咋．．．唉．．．都走啦，最尾都要攪埋d咁既野，真煩．．．

>>May 20, 2004 at 3:57:58 PM GMT+8

2004 年 5 月 17 日 星期一 【晴】

唔，近排真係開心番好多，因為老公佢而家對我好好，佢真係好錫我架，所以我都好開心可以同佢一齊．．．希望我同佢都可以好努力咁為我地既將來而奮鬥啦．．．

今日約左個好姊妹出黎食飯．．．真係好，大家可以暢所欲言咁傾計，可以不斷係度講大家近日既唔開心事．．．唉！有時候我係度諗，點解我同佢係愛情路上都會遇到咁多事呢．．．不過點都好啦，我相信神會有安排既．．．

唔，而家其實同老公一齊，我都會好珍惜，而且我都明白到給予大家空間既重要，所以而家我都盡量讓雙方有更多空間，好似老公佢同朋友去玩，去食飯咁，我都盡量唔會多管閒事問咁多喇，講真，佢想講既自然會講丫嘛．．．而我？我又會經常約朋友仔出街食飯咁，因為我都需要有番自己既生活．．．唔，我相信小別勝新婚既，希望大家少左見面，真係可以增進彼此間既感情啦．．．

>>May 20, 2004 at 3:45:07 PM GMT+8

2004 年 5 月 11 日 星期二 【晴】

唔，近日真係唔知發生左咩事．．．老公好似成日無聲無色咁，我好似越來越對佢陌生．．．我完全唔可以理解佢係度諗緊乜野，做緊乜野．．．我好驚好擔心．．．

我今晚搵左佢成晚，用盡任何方法都搵唔到佢．．．我好驚，一來唔知佢係咪發生左咩事，二來我好擔心舊日既情況再次發生．．．（五年前佢如何避開我既情境我仍然記憶尤新．．．）

唉！我真係好驚．．．我真係好想可以聯絡到佢，讓我知道究竟係咩事．．．

>>May 13, 2004 at 3:24:40 AM GMT+8

2004 年 5 月 10 日 星期一 【晴】

唔，今日返工真係唔多好彩．．．今朝本來應該帶班仔去學耕田，點知我醒唔起今日係天后誕，成條路封左，就連個小巴站都封埋，攪到我地都去唔到，好無奈咁取消左，後來連想走都好困難先走到呀，好慘！

跟住下午放工，同個好姊妹傾左好耐電話，內容講及大家近日既愛情生活．．．唔，大家都真係好有共鳴，同時又再令我自己反思又反思．．．唉，加上頭先睇左一套劇集，內容有講到兩個人係一齊時既道理．．．聖經中亦有講過：愛一個人，不只在言語及舌頭，而更在於行為及誠實．．．唔，我好有感受．．．而且當中劇集內容亦曾講過，兩個人一齊，如果只有一個人只有不斷付出，而對方又唔明白到你既感受，又體諒唔到你既愛時．．．根本唔再值得繼續下去，因為這樣只有令自己永遠得唔到快樂．．．！因為我都想自己既愛情係完美無瑕架！我都想自己開心．．．但係我又想，自己又能否可以好決絕呢？我做唔到，因為我知道自己仍然好愛佢，但係我又唔敢去preview大家既將來係點樣時，我又好有anxiety！真係好矛盾．．．

>>May 11, 2004 at 2:23:34 PM GMT+8

2004 年 5 月 9 日 星期日 【晴】

今日中心SQS呀，成個中心都進入最高既介備狀態，好厲害．．．好多同事係下午既時間都盡量唔會係中心度出現，以免會發生不必要既問題呀！不過最後我地都好成功咁過左關，聽講老細下星期會請食飯添．．．

唔，今日收到九龍城聖公會既電話．．．唉，唔係好消息呀！不過，佢話我唔適合佢中心，不過近日東涌果邊佢地請人，問我有痛興趣試．．．我諗都冇壞既，所以而家唯有等人叫我去面試囉．．．

而家近日開始好擔心自己既事業．．．唉，講真我都預左呢個六月有機會會坐係度架喇，因為而家咁既情況下，你話幾時先搵到份工呢？加上呢幾日同老公感情好似差左咁，我開始心情又唔多好喇，真係好煩惱呀！唔，幾時可以雨過天青啦．．．

>>May 10, 2004 at 2:54:18 PM GMT+8