2004 年 5 月 8 日 星期六 【晴】

唔，今日星期日要返全日，真係朝早唔多想做野．．．咁O岩坐我對面既同事問開我點解要辭職，所以就咁同佢傾開計．．．哈，咁就過左半日喇，真係好開心．．．其實我都好唔捨得D同事架，唉，尤其有幾個特別FRIEND果D啦．．．果個今朝同我傾計既同事其實都好好朋友架，佢講到明好唔捨得我呀！我聽到都好感動．．．唉！加上佢同我講開佢先排同女皮分左手，我又安慰唔到佢，反之要佢安慰番我轉頭，叫我比心機搵工．．．唔，呢個朋友真係唔話得架！

下午見到同事個個都好緊張聽日既SQS呀！唉！其實雖然SQS係任何一間中心都有機會面對，而我亦好有需要了解，不過始終可能因為自己就走，所以唔單中心唔會需要我放精神同時間落去，就連我自己都唔會投入入去．．．所以見到同事好忙時，都有少少怪咁．．．

唔，今日我打比老公，我感到佢仲好似對我好冷漠咁．．．唉！真係唔開心，其實係咩野問題呢？唔．．．我只希望可以快D解決我地之間既問題！但係我真係好矛盾呀！神呀，求你比D啟示我啦．．．．

>>May 10, 2004 at 2:32:42 PM GMT+8

2004 年 5 月 7 日 星期五 【晴】

唔，聽日係媽媽節，不過我因為聽日要返工，所以日頭冇時間陪媽媽．．．所以今日我同爹地夾埋一齊，今晚為媽咪慶祝母親節．．．

我地同媽咪去左市中心果邊食飯，跟住靜雞雞帶媽咪去D波鞋店，因為我地諗住送佢一對泳鞋呀！其實我之都諗左好耐，究竟送咩野比媽咪做禮物好．．．後來，好在爹地一言驚醒夢中人，提起我媽咪近排話過想買對波鞋，所以就有咁既決定．．．好在媽咪都好開心同好驚喜我地既安排，所以今晚大家一家人都好開心呀！

不過中間卻發生左少少插曲．．．唉，我同男友又嘈交喇．．．都唔知點解呢兩日大家總係有少少阻滯咁，好容易會因為小事而嘈交．．．唉，我都唔想咁樣，因為真係好傷感情．．．唔，希望快D冇事啦．．．因為今晚大家食飯時都有少少面阻阻咁，好唔舒服，係人見到都知我地係有事．．．唉，好唔開心呀！希望可以化解啦．．．

>>May 10, 2004 at 1:35:41 PM GMT+8

2004 年 5 月 6 日 星期四 【晴】

唔，今日又去左見工．．．都覺得幾ok啦，個wriitten test好似比我想像中較為易啦，不過最死既都係一個問題．．．點解我要走？呢個問題真係好難答，我自己都思量左好耐．．．

其實，而家個心已經冇之前咁緊張喇，因為我都認為都要順應天命啦，係咪？努力左已經可以了，而人地請與否唔係我控制吧！

>>May 10, 2004 at 1:14:56 PM GMT+8

2004 年 5 月 5 日 星期三 【晴】

哈，今日終於去左仁愛堂度面試左．．．唔，感覺好尷尬，如我所料，而且個老細仲好似有心留難我咁，不斷係度寸我乜，寸我物．．．尤其講我曾經係仁愛堂度做過，跟住走左．．．不過算啦，人地請唔請唔係我決定，加上個人工比而家少成千幾蚊．．．可能我都真係要想清楚囉．．．

唔，聽日又要面試，個人真係好疲憊．．．好似好頻泊咁．．．好累呀！聽日仲要去慈雲山咁遠添，真死，之後仲要返工呢！

另外，今晚終於收到我個好姊妹既電話．．．知道醫院同佢檢查左，話佢個肺同腦都冇事．．．咁我都安樂d．．．不過聽佢講佢個病好似都唔能夠藥到病除咁．．．真係好擔心佢．．．希望佢可以快d好番啦！

>>May 7, 2004 at 3:07:59 AM GMT+8

2004 年 5 月 4 日 星期二 【晴】

唔，今日收到電話，係仁愛堂打黎叫我去面試．．．係聽日呢．．．唉，我真係衰，臨急先黎搵老公幫我手溫書，仲要得登去佢度拎d資料去溫．．．唔，真係好緊張同擔心，再加多少少尷尬．．．因為聽日會見番以前工作既朋友同同事，尤其會見到個大老細．．．唔知佢會否認得我？唔知佢會否覺我呢個人走左又番黎，好唔信得過？唔．．．真係好多疑慮呀！！

希望神你給予我信心，清晰既頭腦，去面對聽日既面試啦．．．

>>May 7, 2004 at 3:03:42 AM GMT+8

2004 年 5 月 3 日 星期一 【晴】

唔，今日收到個唔係咁好既消息．．．

我個好姊妹佢病左入左醫院．．．當我一聽到佢既電話時，真係嚇左一跳，好驚，好擔心佢．．．因為佢講到已經訓左一晚醫院，今晚仲要訓多晚，聽朝一早檢查個腦．．．唔，真係好擔心佢．．．

希望神會保守佢，看顧佢，為我既好姊妹帶來好運，並給予佢健康既身體．．．

>>May 7, 2004 at 3:03:57 AM GMT+8

2004 年 5 月 2 日 星期日 【晴】

唔，終於完左果個三日兩夜既肝事訓練營喇．．．真係好鬼死辛苦．．．雖然唔係我去訓練，但係成日睇住d仔訓練，而自己又見到佢地唔夠飽，所以自己又唔敢食，比晒佢地食，加上成日係咁晒住，嘩，講真，佢地行幾多，我都一樣架，所以都好辛苦．．．呢一個簡直你減肥團黎．．．不過點都好，都過去左囉！都好順利丫．．．

今日真係激氣，本來應該收到一間機構既電話叫我去面試，點知媽媽佢同朋友仔唱緊歌，所以攪到我聽唔到電話，後來打番去又話果個聯絡人放左工．．．唔，真係激氣，好驚咁樣冇左個面試機會．．．（雖然間中心真係幾遠，加上個背景都係麻麻．．．不過都希望藉此多一個面試經驗嘛，因為真係好生疏喇．．．）唔，希望聽日可以收番個電話啦．．．不過都煩呀，因為可能要請假呀．．．唔，不過唔理喇，攪掂面試緊要．．．．我要努力！

>>May 3, 2004 at 4:34:56 PM GMT+8

2004 年 4 月 28 日 星期三 【晴】

唔，今日放假，唔洗返工，但係就要去第一份工既面試．．．唔，真係令人擔心！不過最後都面試完喇，well．．．我覺都不算太差既，起碼唔會唔識答問題，其實係唔識答都勁吹水囉．．．哈～

今次係頭炮，最後都唔係太強差人意既，都起碼有一個心理準備，起碼都可以一個經驗去熟習番如何面試啦．．．

希望仲有其他既面試繼續黎啦，因為而家距離五月尾只戈唔多時間，我真係要好努力喇．．．

>>April 30, 2004 at 4:02:40 AM GMT+8

2004 年 4 月 24 日 星期六 【陰】

唔，終於去完個退修營喇．．．果真好悶．．．不過可能因為裡邊講既野都將會與我冇關啦，所以特別唔多上心啦．．．不過，今朝個工作坊其實都幾好既，可以學下有關創意工作既野，都唔錯，整個活動當中，我相信呢個環節係比較吸引我！

呢兩日真係食左好多野呀，食到真係想嘔．．．不過，可以同班同事一齊玩，一齊食，真係好開心架．．．不過呢d時候將會唔再會有好多機會再出現係我身上喇．．．唉！

琴晚同老公又嘈黎．．．其實都唔係嘈既，只不過係想大家一齊討論下，澄清下咁．．．都唔係件壞事既，起碼證明左件事仲有得解決嘛！老公佢終於感覺到我近日既心情係幾嬲佢．．．唔，都係好事黎既，希望佢日後可以了解我多d，真係可以用心去嘗試了解同感受下我既感受啦，因為有時候我真係好忟佢，我成日諗，佢冇可否認工作上真係好能幹，但係，佢係愛情上我覺佢真係唔多醒．．．好多時佢都唔夠醒目，好多野都唔懂去主動做去tum下人開心或者歡心，往往只會先興住自己．．．有時候真係好忟下架，因為眼見人地個個男友或者老公錫個女友同老婆出晒面咁，關懷備致，細心，又會以老婆為先咁．．．真係好羨慕架！唔，我都好期望自己都同時成為被人羨慕既一群．．．

>>April 25, 2004 at 1:09:17 PM GMT+8

2004 年 4 月 22 日 星期四 【晴】

唔，琴晚行完鳳凰山，真係好辛苦，而家成個人好似散左咁，周身骨痛呀！好慘！星期六日仲要去retreat camp添，真係唔死就奇喇．．．

哈，今日有個好消息呢．．．我收到聖公會九龍城IT既電話，叫我下星期四去面試．．．唔，真係好緊張，因為已經好耐冇面試過喇，而家要做written test呀！真係要溫溫書喇．．．其實真係有少少緊張呀！！

唔，聽日又要一早出去喇，跟住又悶足兩日一夜．．．唉！算啦，捱埋佢啦．．．

>>April 25, 2004 at 12:56:52 PM GMT+8