2004 年 7 月 27 日 星期二 【晴】

唔，今日又係懷住期望既心情繼續等待有冇電話打黎叫我去面試，同埋繼續去睇報紙搵工．．．今日有個好姊妹佢去左見工，佢並唔係因為冇左份工所以先要搵工，所以其實佢有機會見工時，我都有少少羨慕佢，因為佢根本唔需要擔心見工是否成功，因為佢根本而家有份工拎住係手，如果見工不成都仲有渣ｏ拿丫．．．而我？而家根本係度白等，都冇消息出現，好心灰呀！好唔想再係咁，但係自己又可以做d乜野呢？唉！如果叫我繼續做住兼職先，我又唔甘心，因為真係好辛苦，而且真係有少少唔知自己係度為乜，好矛盾，好似好冇目標咁，麻木咁繼續行自己要行既路．．．我開始覺得自己既前景係我唔可以掌握，係模糊不清架．．．我好驚，我唔知點解神要比呢個咁大既考驗我？唔通我之前真係做錯左好多事，而家神要讓我知道我以前既犯錯？佢要懲罰我？神呀！我唔想再係咁落去，我真係好希望可以再有一個新既境地出現，好想再有一個空間比我去發展自己．．．

仲有，今日有朋友叫我聽日出去同個朋友一齊慶祝生日，出去食飯．．．其實本身自己有約，但係其實內裡知道出去將會又要洗＄時，唉，真係有少少唔多想去．．．而家真係變得好沽寒，因為真係冇乜$可言，好慘，而家咁既境地都唔知仲要捱到幾時，屋企又要等住我黎幫手支持經濟問題．．．我真係好擔心．．．神呀！請你給予我機會搵到份工啦．．．

>>July 29, 2004 at 6:14:11 AM GMT+8

2004 年 7 月 25 日 星期日 【晴】

唔，今日幾開心，因為約左朋友出去食飯，大家不斷係度傾計，好開心．．．不過最唔開心既係，圍內加埋我幾個朋友都辭左職，而家大家都好努力咁搵緊工，見緊工．．．唉！真係唔知係咪天意，點解同一時間會有咁多人出左黎搵工？其實每個人辭左當然都會有佢地既原因啦，但係我地都傾過呢個問題，就係大家都覺得實在太辛苦喇．．．唔係因為自己唔捱得，而係實在機構或者工作環境既因素，令我地原本很願意為工作付出既人，都唔可以再付出熱誠再繼續工作落去，呢一點係令我地覺得好失望．．．同時間，我地又感到，而家d老師都可以開始為自己既權益同情況而團結起來去爭取，點解我地社工唔會番一d野呢？而家有好多機構都好屈水，夠膽死一萬蚊請一個全方位既小學學校社工？而家我地真係呾賤價，咁不值？真係好唔抵囉！

>>July 29, 2004 at 6:04:58 AM GMT+8

2004 年 7 月 24 日 星期六 【晴】

嘩哈哈~ 終於返完份part time喇．．．真係超級辛苦！成個人都好似冇晒力咁，好累好累，周身骨痛咁，仲慘過d阿婆阿伯咁，哈！不過過程都開心既，而且都比人讚，話我做野夠快手，又可以搵到錢，都叫倏可以幫補一下啦．．．不過如果再叫我去做，我估我會諗諗先喇，因為真係太辛苦，我唔係唔捱得，而係我唔多鍾意d咁routine既工作，成日好似機械人咁不斷係度做．．．所以真係要諗諗先．．．哈！

男友佢星期五返左黎喇，佢一返到香港就打電話比我，我好開心．．．不過知道佢過程中發生左事，我都唔太開心．．．不過事件都已經完左，而且又冇咩影響，所以都希望佢唔好再唔開心啦．．．琴晚終於可以見到佢喇，真係好開心，因為我實在好掛住佢，佢都一樣好掛住我，所以當大家見到時真係只係識得開心係咁笑，其他既野都唔識講喇．．．

>>July 25, 2004 at 2:06:04 PM GMT+8

2004 年 7 月 20 日 星期二 【晴】

嘩，琴日聽到妹妹返完兼職返黎之後，知道公司唔夠人手，我自己於是就心郁郁想去試下，但心知又係一d好routine既工作，雖然自己唔多鍾意，但係都想呢段日子好過d，又想賺下錢，於是今日就晨咁早跟左妹妹返公司試．．．

嘩，超級辛苦呀，好辛苦．．．好累．．．真係極之rountine既工作，不斷係度入信封，入足十個鐘．．．真係人都癲呀！！仲有六日捱呀！嗚！

>>July 21, 2004 at 2:30:10 PM GMT+8

2004 年 7 月 18 日 星期日 【乍寒還暖】

今日好開心呀！只係一個日頭已經發生左好多開心既事喇．．．

首先，男友佢今日一朝早出發上大陸工幹，佢好好心呀，今日朝早十一點幾時就打左個電話比我同報平安．．．其實真係甜在心頭架，因為證明佢都有擺我係心度．．．

跟住，今日妹妹佢有成績出喇，會知道自己將會入讀咩野既科目，同埋知道入讀dip定high dip，當然啦我希望佢可以入到佢既第一志願，high dip既graphic design啦，最後真係開心，佢真係眾望所歸，可以入讀到自己既第一志願，而且總成績都幾好，有d都幾高分，其實佢班主任琴日都有同佢傾過電話，都輕輕透露過佢既成績，不過佢對自己缺乏信心唔多信阿sir，而家終於成績表得到手，佢先至信到十足十．．．不過點都好，我都為佢高興．．．加上，妹妹今日同我講，佢搵到一份part time做，我都為佢高興呀，起碼唔洗好似我咁丫，成日留係屋企唔知做乜咁，我都唔想佢好似我咁日日係度hair架！所以我都好開心呀！

唔，今晚要出去面試喇，我都希望可以順利啦，又可以有多一個好消息出現啦．．．

>>July 19, 2004 at 6:31:54 AM GMT+8

2004 年 7 月 17 日 星期六 【晴】

嘩，先幾日呢個網要大裝修，攪到冇得上網打日記，真係衰．．．不過而家終於可以上得番黎喇，真好．．．

呢幾日真係發生左好多野．．．講下男友丫，佢新屋終於攪掂左，係星期五終於正式搬晒野入新屋喇，已經可以開始住，真係為佢高興．．．講真，有時d朋友同時都會恭喜埋我，因為佢地都會以為我好順勢會成為新屋既女主人，不斷係度恭喜我，有時仲會問我會唔會都一樣咁高興，可以有新屋住？．．．其實我都會覺好尷尬，因為間屋始終一句，個女主人唔係我！唔，我通常都會好直接答人，我相信男友同個女主人會更加高興，而且我根本就唔係個女主人，我有咩感受可言呢？而且我去幫手搬屋，個女主人根本都冇當我係自己人，最後仲好死客氣咁同我講唔該晒我幫手搬屋．．．講真，我當時真係覺得幾見外，自己好似純粹一個朋友幫手搬屋咁囉！所以我都覺幾尷尬同難受！

不過算啦，我著緊既係我男友，我幫手搬屋都係因為佢，因為我知我唔幫佢唔會有親人幫佢架喇，所以我點都要撐佢！

另外，星期二都去左面試，哈，個感覺好怪，當日係小組面試，d人個個都好騎呢架，講真，唔係我自己讚自己，講到面試技巧，佢地真係好差，好多態度上，manner上，行為表現上都好差，不過講真，唔知人地中心係想請咩人，講到工作經驗，我真係比佢地高幾層，因為佢地大部分人都係fresh grad既，我必比人優勝．．．不過如果人地要請學歷高既，咁就真係唔夠人地兩個讀中大既黎喇．．．算啦，呢d野選擇權係人地度，人地唔選擇我係佢既損失，要對自己有信心．．．

唔，聽日又有得面試喇，今次都要努力，而家努力溫書呀，因為要筆試呀，唔可以衰架喇，我要快d搵到工呀！我唔可以再係咁落去喇．．．

男友聽日開始會上大陸工幹五日．．．我會好掛住佢架．．．希望佢一切都順順利利啦！為佢祈禱！

>>July 18, 2004 at 10:06:24 AM GMT+8

2004 年 7 月 9 日 星期五 【雨】

嘩~ 而家超累呀！因為琴日一朝早走去幫男友手搬屋，都唔知點解佢一個人可以有成二三十箱野架．．．之前幫佢pack野果時都已經知道佢有好多野，到琴日真正去搬果時真係知死．．．得我地兩條友仔搬咋，真係人到死，我地差唔多搬左成七八轉呀，由佢舊屋搬到去新屋過程中，完全冇任何人幫過我地手，我地都算幾厲害呀！哈~

搬晒去新屋之後，仲要幫佢手入架入櫃，真係辛苦呀！琴日都整野整到成夜晚十一點都頂唔順喇，累到要死．．．所以都索性係新屋訓．．．不過慘在未入伙唔可以訓床，好慘，已經周身骨痛喇，仲要訓板．．．嗚~ 不過唔緊要啦，我永遠支持我男友架，我一定幫佢既，幾辛苦都要幫佢，因為佢係我最親既人，我一定緊佢架．．．係咪？到左今日都執野執左成大半日，其實都差唔多執左一半架喇，仲有野未執同埋有家私未到，所以而家都好亂．．．希望可以幫佢早日攪掂個新居，有個舒舒服服既新屋企啦．．．

>>July 10, 2004 at 2:31:39 PM GMT+8

2004 年 7 月 7 日 星期三 【晴】

唔，琴晚個人都仲係好困擾，今日醒左個腦就已經有一點既想法．．我估我真係唔可以再坐以待斃，我要主動出擊！我決定要係而家一段等待既時候中自我增值，邊等邊提升自己，我亦希望比自己一個月既時間堅持搵社工既工作，如果一個月後都仲未成功，我會再搵其他類既工．．．唉！其實自己並唔想走到咁既地步．．．神呀，求你讓我可以在七月尾前搵到一份社工既工作啦．．．

>>July 8, 2004 at 1:49:22 PM GMT+8

2004 年 7 月 6 日 星期二 【晴】

唉~ 頭先同男友傾電話，佢講到關於我既前景問題．．．其實我知道佢都係緊張我同關心我，所以先至有少少提醒我叫我真係要好好咁去諗諗自己既前景問題．．．一個月喇，已經失左業一個月喇．．．其實我自己都好矛盾．．．係咪仲繼續守落去，等最後搵到一份社工既工為止？定係決定轉行呢？定係有其他既路向呢？其實我自己都好頭痛．．．我同自己講過，我希望比自己一個期限，在期限內我希望達丁自己既目標．．．唉！我真係好困擾呀！不過，同男友傾完之後，其實我都想多謝佢，聽完佢咁多肺腑之言之後，我真係比佢好似打左一把咁，成個人醒晒，而且仲想通左少少野．．．不過始終仲係有少少唔甘心，唔想咁快放棄我而家既想法．．．我就一d咁執著既人，但係我都知佢都係想我好，所以先至提醒我要好好咁去諗自己既前景．．．講真，有邊個男友真係鍾意自己個女友成日都好得閒咁，成日得閒到成日去搵個男友架？男友都想個女友會有自己既事業啦．．．我清楚知道，但係真係好困擾．．．

>>July 8, 2004 at 1:38:08 PM GMT+8

2004 年 7 月 4 日 星期日 【晴】

唔，今日出左去荃灣，幫男友去銀行攪d野，自己就順便行下街．．．呀，聽日要面試喇，但係總係好似冇點溫過書咁，個腦好似空空咁．．．真係擔心，因為已經成三個幾星期冇面過試喇，真係確實有少少生疏．．．希望聽日可以順順利利啦．．．

>>July 6, 2004 at 10:46:21 AM GMT+8