2004 年 9 月 21 日 星期二 【晴】

嘩~ 今日返完三節，簡直係訓直左．．．好辛苦呢．．．講真，我唔係咁鍾意而家間機構既運作，好怪咁，有乜理由要同事硬要一個星期總有一日踩三節架，真係好辛苦架．．．不過可能對於我呢d新黎既人辛苦卦，因為冇乜特別野做，冇咁忙卦．．．哈!

近排班妹成日發生好多事，真係令我煩悶，有時真係唔想理，但係唔理佢地又有邊個理丫．．．唉！唔得，我要努力，如果唔係今個月冇stat就死得喇！

>>September 23, 2004 at 5:03:47 AM GMT+8

2004 年 9 月 18 日 星期六 【乍寒還暖】

唔，琴晚返完深宵黎，不過都比起上次冇咁累同辛苦．．．可能精神較上次好ｄ啦，所以都起勁少少．．．

今日好早十一點幾就起左身，跟住就出左去旺角行街．．．今日洗左好多＄呀，真係好耐以來都冇洗過咁多喇，不過買左好多唔係咁實際既野囉，大部分都係我至愛既高飛野．．．哈！雖然真係好傷呀，不過．．．我今次買左個高飛既figure公仔，係有史以來都未出現過架，好靚好正，真係完全好心動，我覺得唔買真係對唔住自己囉，所以都係忍心比錢出來買左．．．不過，因為自己而家間房太細喇，睇黎都要等第二日嫁得出果時放係自己既房度喇．．．哈!

仲有，最開心都莫過於妹妹送左份遲來既生日禮物比我．．．其實我知佢係冇乜錢架，我知佢好有心，雖然唔係咩野好貴重既野，但係我知佢有份心意係度我都好安慰架．．所以真係好感激佢！

>>September 19, 2004 at 3:38:51 PM GMT+8

2004 年 9 月 15 日 星期三 【晴】

唔．．．近日有少少身心疲累！因為近日病左，醫生係喇，係感冒喇．．．唉！一感冒親呢我既氣喘病就會隨時番發架喇，加上近日既空氣指數極差呀，我近日真係好慘，成日番發，但係由於又感冒中，所以個人好疲累呀！

不過慘就慘在事實係好辛苦好病，但係又放唔到病假，因為仲未返夠一個月工嘛．．．唉！冇計，唯有頂住上啦．．．

呢兩日真係好煩，中心落下d仔女成日發生事，下下要我去理，之但係佢地只係p.case，真係覺有少少白做囉，又唔計入stat喎，唉！又麻煩在中心唔夠電腦用，我都知，冇理由咁蠢自己帶埋電腦番公司用架，唉！不過算啦，都冇＄，唔買啦，費事無啦啦多條疤啦，係咪？

>>September 16, 2004 at 3:44:39 PM GMT+8

2004 年 9 月 10 日 星期五 【晴】

唉~ 終於捱過呢幾日喇．．．因為星期四同星期五都要返三節，朝十晚十呀！真係死人呀！今日又要一早返工，所以呢幾日個人真係好疲累呀．．．死左！

不過今日返工因為知道聽日同後日都有假放，所以特別輕鬆d，今日放工果時六點幾，突然間有一種感覺．．．就係：嘩，我好似好耐冇試過放工係可以見到白天喇，今個星期都係放十點幾，日日都係黑黑天咁回家，個人更加冇晒心情啦！不過今日放工果時特別起勁，因為好開心可以見到白天嘛！

>>September 11, 2004 at 2:12:54 PM GMT+8

2004 年 9 月 7 日 星期二 【雷雨】

唉！近日經常感到好疲累，但其實又並非唔夠訓，日日都訓夠九個鐘，又點會累呢？但係總係覺得工作好疲累，對於工作並沒有起勁咁．．．真係唔知點解，可能剛剛黎中心做既原因啦，總係好似好多野都唔多掌握咁，加上琴日又比一個文職同事話完一大輪黎之後，個心真係有少少不安．．．因為我又感到我將會好難受喇．．．果個同事已經係呢度做左起碼有十年既時間，我相信某程度上大老細都對佢有少少怕左佢咁，何況我地呢？琴日都好在有個同事好好人，佢都好有心咁提醒左我要小心處理行政上既細節同工作，因為處理行政既同事實在唔好得罪．．．我聽完之後真係好擔心自己會出錯．．．不過好在同事都好好，提醒我可以先問清楚佢地先再做，咁樣就可以減低被話既機會．．．

唔，其實我都擔心架，因為自己都係一d較大頭蝦既人，真係擔心容易出錯．．．不過都要適應架喇，因為無理由因為咁樣又離開架喇．．．係咪？我要努力！其實近日我都多數落區行，一係就做paper work咁，其實真係有少少悶，唔同以前咩都會做，咩都要跟，咁樣個人好似積極d同活躍d咁，唔洗好似咩都為OR而工作咁，有少少似番係做社工咁囉．．．不過分得清楚都有好有唔好既．．．而家問題就係我要好好適應囉！希望快些掌握好啦！

>>September 8, 2004 at 3:04:56 PM GMT+8

2004 年 9 月 5 日 星期日 【陰】

唔，今日好開心，約左個好姊妹出黎食飯．．．呢個約會係我地一齊慶祝我地八月生日既聚會．．．真係約左好耐先至可以約到出黎，所以特別開心同珍惜．．．

我地一齊傾計分享，過程中真係好開心，因為只有呢個好姊妹我係值得去信任，可以同佢分享好多，同埋會好明白我．．．

我地到左今年十月，就會相識左五年喇，係呢五年裡邊，真係好珍惜同呢個好姊妹一齊既時間架，希望我地會有更多個五周年啦．．．

>>September 6, 2004 at 3:43:59 PM GMT+8

2004 年 9 月 3 日 星期五 【晴】

唉！今日好死累．．．因為琴晚返深宵，返到兩點，今日又要返下夜喎，所以好辛苦呀！真係好累．．．今日返工就好似個人遊遊下咁，好冇集中力呀！

不過最死係，今日下午媽咪突然打電話比我，話屋企發生事，仲係大件事，咁我都無計，迫住今日夜晚唔返，同阿頭講改更囉．．．點知返到黎最後件事又可以解決左，所以都覺得有少少唔多抵咁．．．唉！不過算啦，最緊要唔好發生咩野事，最好一家人齊齊整整，平平安安就得架喇．．．

>>September 4, 2004 at 2:37:54 PM GMT+8

2004 年 8 月 31 日 星期二 【晴】

哈，今日係開學日，見到好多學生哥都好似唔多願返學咁．．．其實佢地真係完全未感覺到返學係最開心架，當佢地出左黎攸野佢就知做野係辛苦過返學架．．．不過，我今日都好開心，因為可以放早，本來打算返屋企同媽咪食下飯，點知男友突然同我講佢可以放早，咁當然就即約一齊食飯啦．．．好耐冇咁去撐台腳喇，所以好開心呀！跟住盲　梗係親機會去拍下拖，行下街咁啦．．．

>>September 4, 2004 at 2:48:22 PM GMT+8

2004 年 8 月 30 日 星期一 【晴】

唔，今日係我頂替果個同事既last day！其實係呢兩個星期中，我發覺自己同佢係比較熟既一個同事，而且可能大家年紀差唔多，所以好似好傾d咁．．．而家佢走喇，我有少少感到有少少失落咁啦，因為我覺得如果佢繼續係度做既話，我相信佢會係一個好好既同事．．．因為佢係一個好認真工作既人外，亦係一個好好傾既人，而且對個人充滿理想，所以我都幾欣賞呢個女仔．．．唔，希望日後都有機會再見到佢！

不過自己都有少少衰架，因為佢走喇，自己就終於可以有番張台用，哈，佢一走我就開始將自己既野進注入去張台喇．．．d同事都講笑咁講：你終於有台用喇．．．

唔，其實我都好羨慕佢，因為可以咁放得開一切，去流浪三個月，滿足自己既理想．．．

>>September 4, 2004 at 2:45:11 PM GMT+8

2004 年 8 月 29 日 星期日 【雨】

yeah~ 琴日同今日都係琛圳玩，琴晚已經上左去搥骨，都係好，因為實在累左太耐喇，係時候要鬆下．．．加上同男友同埋班朋友一齊去，係好玩d既．．．（不過係去之前就發生左件事，都係我大意，唔小心long起左個屋企電話，自己個手提又飛左去，攪到男友搵左我成日都搵唔到我，初頭諗住唔理我自己去玩，點知好在我又打番比佢．．．咁梗係即刻孩到去啦．．．我知佢好嬲我，因為我都知自己係抵嬲．．．不過好在後來佢都冇嬲我！）

今日就一朝早起身去飲早茶，嘩，真係好鬼早，琴晚兩點幾先訓，差d見到奧運閉幕架，不過最後都搥完之後太累，所以冇再去睇喇，訓覺好過，第二朝就八點半起身喇，好累．．．跟住成日既行程都係行街，都有少少收獲既．．．不過最後四點幾已經好累，所以大家都決定番香港好過．．．哈！返到黎始終覺得係最舒服．．．

不過，番黎後仲約左妹妹係元朗行街，行左一陣之後走左去搵男友，因為佢話有份禮物要送比我．．．嘩，原來係一隻軍艦模型，佢話呢隻係一隻驅逐艦，佢砌左成晚，攪到半夜三點幾先整好，而且果隻軍艦係有我個名，所以佢特別送比我．．．其實我唔多識去欣賞軍艦，亦對佢缺乏認識，不過我知道係男友佢親身砌，係好比心機去整，而且背後亦有其意義係度，所以我都好開心架．．．都係一句，最緊要係有心．．．我好想講句，alan我愛你呀！

>>August 31, 2004 at 4:04:43 AM GMT+8