2004 年 4 月 4 日 星期日 【晴】

唔，今日放假，個人心情都好d既．．．尤其有老公陪住我，我都開心d啦．．．

唉，不過講開又講，其實近日我覺得自己好反常，成日個心情大起大落咁，一時好開心，可以放開晒咁，尤其我星期日果日返教會時，我心中不斷祈禱時，個心係覺得神係度聆聽緊我，我知道神將會幫助我．．．但係，其實我個心又好唔舒服，成日覺自己唔可以投入到個工作之中，成日覺得自己好似outsider咁，好似樣樣野都唔關我事咁．．．唉！冇既，老闆既權力封鎖根本係冇人能夠反抗得到，咁我可以點呢？其實，坦白講，我到呢一刻仍然未能完全放開手，我仲係好擔心自己，因為我限期將至喇，但係眼見好似仍未有任何既好轉既時候，我真係好擔心，好驚．．．但係，我又可以點呢？

>>April 6, 2004 at 12:57:15 PM GMT+8

2004 年 4 月 3 日 星期六 【晴】

唔，今日既情緒比起呢幾日黎講真係好左好多，起碼我會識得同妹妹講笑，傾計，亦冇再將唔開心既事擺係自己塊面度喇．．．只會帶住笑容見人，因為我真係想話比人知，我會好好咁去面對一切，要對我有信心，因為我對自己都有信心去面對一切一切．．．我好希望佢地都會支持我．．．

今日老公佢好好，特登早左返黎香港．．．我知道左真係好開心，因為佢對我黎講實在係一個好重要既人，如果冇左佢係我身邊，我真係覺得日子特別難過，尤其先排不斷發生好多事添．．．不過而家可以多個人支持我，同我一齊分享．．．我真係好開心．．．

>>April 4, 2004 at 5:15:19 PM GMT+8

2004 年 4 月 2 日 星期五 【陰】

唔，今日既心情比起前排的確好左少少．．．不過每當有人提起我既傷心事時，我都不禁會傷心起黎，仲會喊左出黎添．．．唉！不過點都好，而家終歸係要面對事實．．．唯有盡自己既力量去做埋最後一場囉，始終都係做人有始有終既好既．．．

琴晚成晚都唔係好訓得到，可能心情唔係咁好啦，不過好在今日只係返下午一節，所以都有少少放假感覺，都令心情有好少少既進展．．．

唔，老公佢仲有兩日返啦，好期待等佢返黎．．．我呢排唔開心都有寫電郵比老公，雖然我知道佢而家根本唔係香港，係唔會有時間睇我既電郵，但係我都覺得過程中係一個發洩囉，因為有好多野好想同人講，但係又唔想令人擔心我．．．真係好矛盾．．．點都好啦，我要開始面對自己既困境架喇．．．神呀，我亦會將一切交托去你手中，好讓你為我安排一切啦！

>>April 4, 2004 at 5:05:30 PM GMT+8

2004 年 4 月 1 日 星期四 【暴雨】

唔，今日雖然冇咩特別野發生，而且老細仲好似冇啦啦問我食唔食野，感覺真係有少少怪．．．不過，今朝老細就比左份apprisal我，要我呢幾日就填左佢．．．其實我之前既probabion係extend左，而老細一直都同我聲稱我6月果時先要做apprisal．．．點知，佢扼我，等我以為自己仲有大把時間去搵工，正衰人．．．原來總會一日都係計我5月31日完約，而家距離只係淨番兩個月唔夠．．．唉，真係好開始令人擔心．．．

雖然，我對於自己去搵工既信心都唔弱，但係，都要睇番而家個就業市場有冇我想搵既工先得架，而家好唔同以前，以前剛出茅廬果時，梗係咩工都殺啦，而家話晒都有番咁上下經驗時，自然都想選擇一下．．．唉，近日睇過D工，都好似唔多O岩心水咁，真係好擔心呀！唉！份APPRAISAL要下星期二交喇，雖然冇咩要寫，但係又要見老細同佢做APPRISAL，真係十萬個唔想呀！

>>April 2, 2004 at 5:10:19 PM GMT+8

2004 年 3 月 31 日 星期三 【雨】

今日係中心年度既新開始，我亦期望自己亦都將會有一個新既開始．．．今日如是者開伴你，但係，今日發生左好多令我唔開心既事，亦同樣呢d事令我決定得好清楚我跟住要行一條咩路．．．

今日老細明顯做左好多野出黎係令我覺得佢而家係擺明想趕盡殺絕我，唉！天呀！神呀！點解要我面對咁既情況，我真係唔好受．．．我知，好多我身邊既人都叫我放手，唔好再為啖氣而糾纏落去，根本唔值得，而且，既然知道最後都唔會被續約，人地都會趕我走囉，咁倒不如自己光明正大地走，走得光彩d，唔再要係度死纏爛打咁賴死，令自己毫無自尊可言．．．

唔，我而家突然間有好大既決心，我知自己跟住落黎應該點行自己既路，我已經再次睇清楚我個死人老細係一個咩野既人．．．我要光明正大咁走，我要話佢知佢唔要我係佢既損失，冇左呢度份工，我仲有大把人請我，我仲有大把既發展空間同機會，一定唔洗死，而且佢終有日會後悔．．．我要自強，我唔可以再衰比任何人睇．．．

神呀！請祢給予我力量去面對跟住落黎既所有困難同障礙啦！並且給予我力量同精神去應付跟住落黎既搵工情況！希望各方好友都可以支持我啦．．．我要努力呀！！！

>>April 2, 2004 at 5:03:44 PM GMT+8

2004 年 3 月 30 日 星期二 【陰】

唔，今日好忙，因為下午要開伴你，跟住夜晚要開會．．．不過我今日返到中心先記得原來我約左個人十二點半見，點知我唔記得左，成點半先返到中心，但係同事又冇講過有人黎搵過我喎，哈，都唔知點喇，因為冇晒下文．．．唔理喇．．．佢自然會搵我架喇．．．我都冇時間理咁多野．．．

今日開會，傾到我個小隊可能會cut人呀，唔知點解一聽到好自然諗到可能係自己．．．鬼咩，近日同老細關係咁差，一定有自己份．．．加上今日收到個訊息，知道啟業果邊有同事走得好突然，好似話發生左d事喎．．．而家既情況既兩間中心會互調人手，而第一個同事將會於4月19日就調過去喇．．．唉，唔知下一個會唔會自己呢？我而家好衰架喇，都打定輸數，都知老細一係就唔續我約，一係就調我走架喇，睇下佢想點啦，我都預晒架喇．．．不過，我都仲表現得自己好積極同好做野架，我好主動去應頭好多野做，希望可以改變老細對我既睇法啦．．．唉，真係好唔開心架，諗起上次比人屈，真係好唔順氣．．．唉！仲要冇晒自尊咁比人屈，得唔到人既信任，真係好唔服．．．不過，始終都要面對現實既！希望神會比啟示我啦，我都唔係好知應該點做好喇．．．

>>March 31, 2004 at 5:12:21 PM GMT+8

2004 年 3 月 29 日 星期一 【雨】

唉，今日又要一早帶班仔出去覲塘學野，其實我真係覺得好浪費時間，我根本冇時間去做我應該做既事，真係好麻煩．．．不過冇計，呢一班根本係冇可能放得手既人黎既，一定係貼到實一實既，冇計啦．．．咁就過左一日喇．．．帶完班人返去中心時已經成六點喇，果時見到老細唔多妥，好火爆咁，咁梗係即刻攪掂埋d野就走人啦，有咁快得咁快．．．哈！免得過又發生磨擦啦，而家我已經唔多妥老細架喇，都係唔多想見到佢同聽到佢把聲．．．希望佢快d放大假啦，咁大家同事都可以輕鬆下幾日丫嘛．．．

>>March 31, 2004 at 5:00:39 PM GMT+8

2004 年 3 月 28 日 星期日 【陰】

今日朝早一早就起身喇．．．其實琴晚都夜訓呀，因為要攪埋工作上既野，所以都好慘，好夜先訓！今朝一早起身其實都係為左陪媽咪去買佢份生日禮物囉，不過好在都買到一份合媽咪心水既禮物．．．跟住下午就同媽咪去飲茶，咁夜晃就返工喇．．．今日返工學左玩氣槍，個感覺幾正，我都射中左架，好叻．．．

>>March 31, 2004 at 5:06:21 PM GMT+8

2004 年 3 月 26 日 星期五 【晴】

今日係媽咪生日，係度同媽咪講多生日快樂．．．今日下午同老公一齊去左義務工作發展局度講talk，個效果都唔錯，而且都發現同老公都可以合作得唔錯，都幾開心．．．不過果度d職員好似差左少少，真係唔多喜歡！

跟住完左之後就趕番去屯門，因為訂左台同媽咪食飯，去新開既一間京滬菜餐廳度食，d食物質素都幾好，不過員工既服務就好似差左少少啦．．．不過唔緊要啦，最重要係一家人可以一齊食飯嘛．．．今餐係老公請架，佢真係識做．．．

今晚要返深宵，真係辛苦，個人好累好眼訓呀，都唔知點捱喇．．．

>>March 28, 2004 at 8:23:03 AM GMT+8

2004 年 3 月 25 日 星期四 【暴雨】

唉！不幸既事終於發生左．．．今日老細唔知發乜神經，周圍去搵人罵，仲攪到有同事因為被罵而喊．．．唉，我地做同事既見到都有少少眼濕濕呀．．．

當然，我梗係無得幸免，我件事終於有一個解決．．．我真係好激氣，而家擺明係比老細老屈我，寃狂我，我真係好唔服，我真係絕到同佢講：我要交待既已經交待晒，講既亦都係事實，如果你都係唔信既我都冇辦法．．．唉！我真係好唔份氣呀，個死人老細根本講好多野都係”空”我既，好多我一聽就知唔係事實，擺明放我上台架喇而家．．．好激氣，我真係好辛苦，忍左好耐，成日因為工作時間而冇得發洩．．．終於當我見到老公時係咁講出自己唔開心既野，仲喊埋出黎添．．．唉，好辛苦．．．．而家我終於睇清楚呢個係一個咩人黎，而且我都好知道我真係要好好咁去計劃我跟住落黎既路向．．．因為我已經知道呢一個再唔係我久留之地架喇．．．我真係要好好決定．．．不過，我自己真係好矛盾，一方面我係度識左好多好朋友，二來同client又建立左關係，三來我對自己既工作一向都落左好多心機落去做，我真係唔捨得放手．．．唉，好矛盾，好頭痛，唔知點好．．．

神呀，你比個啟示我啦．．．我真係唔知點好，因為好矛盾．．．仲有，我真係唔明白點解神要比呢一個考驗我去承受．．．我好唔開心呀！！！

>>March 26, 2004 at 2:05:30 PM GMT+8